Published:Updated:

ஆபத்து இல்லை அன்டார்ட்டிகா!

கார்த்தி

ரோன் பனி அடுக்கிலிருந்து இப்படிப் பனிப்பாறைகள் உடைவதை ‘கால்விங்’ என்கிறார்கள் ஆய்வாளர்கள்.

பிரீமியம் ஸ்டோரி

அன்டார்ட்டிகாவின் ரோன் பனி அடுக்கிலிருந்து சுமார் 4,320 சதுர கிலோமீட்டர் (சென்னைப் பெருநகரைவிடப் பத்து மடங்கு பெரியது) பரப்பளவு கொண்ட A76 என்னும் பனிப்பாறை உடைந்து நகரத் தொடங்கியிருக்கிறது. ஆய்வாளர்கள், ‘இது இயற்கையாகவே நிகழ்ந்துள்ளது. இதற்கும் காலநிலை மாற்றத்துக்கும் சம்பந்தமில்லை. இது மிதக்கும் பனிப்பாறை என்பதால் கடல் நீர் மட்டம் உயராது’ என்று அறிவித்திருக்கிறார்கள். ‘‘அதிகம் வளர்ந்த நகம் வெட்டப்படுவது போன்ற இயல்பான நிகழ்வு இது’’ என்கிறார் ஆய்வாளர் கிறிஸ்டோபர் ஷூமன்.

அன்டார்ட்டிகாவில் இருப்பதெல்லாம் சொற்ப மனிதர்களும் (கோடையில் அதிகபட்சமாக 10,000 பேர்), கோடிக்கணக்கான பென்குயின்களும்தான். இந்தக் கண்டத்தை முழுவதுமாக (98%) பனிப்பாறைகள்தான் மூடியிருக்கின்றன. உலகின் 61% சுத்த நீர், இந்தப் பாறைகளுக்குள்தான் உறங்கிக்கொண்டி ருக்கின்றன. ஒருவேளை இவை முழுமையாக உருகினால், உலகின் கடல் நீர் மட்டம் 60 மீட்டர் வரை உயரும் அபாயம் உண்டு. இந்த அபாயச் செய்திகளையெல்லாம் புறந்தள்ளிவிட்டுப் பார்த்தால், அன்டார்ட்டிகா என்பது ஒரு பாலைவனம். பல்லாயிரம் ஆண்டுகளாக அங்கு விழும் பனி, அந்தக் கண்டத்தை அப்படி உருமாற்றி வைத்திருக்கிறது.

ஆபத்து இல்லை அன்டார்ட்டிகா!

ரோன் பனி அடுக்கிலிருந்து இப்படிப் பனிப்பாறைகள் உடைவதை ‘கால்விங்’ என்கிறார்கள் ஆய்வாளர்கள். நிலத்தோடு ஒட்டியிருக்கும் இந்தப் பனிப்பாறைகள் நீர் நிலைகளைத் தொடும்போது, அதன் சமநிலை கேள்விக்குள்ளாகிறது. அப்போது நிலத்தைச் சாராமல் விலகி இருக்கும் பகுதிகள் உடைந்து பனிப்பாறைகளாக மிதக்க ஆரம்பிக்கின்றன. ஃபில்ச்னர் - ரோன் பனி அடுக்கு, வெட்டல் கடலுக்கு அருகிலேயே இருப்பதால் அதில் ஒவ்வொரு ஆண்டும் நூறு மீட்டர் அளவிலான கட்டிகள் உடையக்கூடும். தற்போது நடந்திருப்பது ஒரு பெரும்பிளவு, அவ்வளவே.

ரோன் பனி அடுக்கில் இந்த A76 நிகழ்வு நடந்ததற்குக் காரணம் அதனை ஒட்டியிருக்கும் வெட்டல் கடல். மே மாதத்தின் ஆரம்பத்தில் மெலிதாய் விரிசல்கள் உண்டாக, அது கொஞ்சம் கொஞ்சமாகப் பெரிதாகி, தற்போது உலகின் மிகப்பெரிய பனிப்பாறையாக உருமாறி உலக வெளிச்சம் பெற்றிருக்கிறது.

இதற்கு முன்பு 2017-ல் லார்சன் பனி அடுக்கில் இருந்து A68A பனிப்பாறை உடைந்து மிதந்தது. இந்த ஆண்டு ஜனவரி ஆரம்பத்தில் A68Aவின் ரெக்கார்டை முந்தியது A23A. இப்போது இவை இரண்டையும் பின்னுக்குத்தள்ளி A76 முதலிடம் பிடித்திருக்கிறது.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு