Published:Updated:

`வீட்டுக்கு அனுப்பப்படும் நோயாளிகள்; நாடு முழுவதும் பரவிய வைரஸ்?’ - ஏமன் நிலையால் வருந்தும் ஐ.நா

ஐ.நா
ஐ.நா

ஏமன் நாடு முழுவதும் கொரோனா வைரஸ் பரவியிருக்கும் என நம்பப்படுவதாகவும் அந்நாட்டுக்கு உடனடியாக நிதி தேவை எனவும் ஐ.நா சபை எச்சரித்து வருத்தம் தெரிவித்துள்ளது.

தென்மேற்கு ஆசியாவில் உள்ள மிகவும் ஏழ்மையான நாடு ஏமன். அங்கு எப்போதும் உள்நாட்டுப் போர் நடந்த வண்ணமே இருக்கும் இதன் காரணமாகவும் அங்கு பிரதான தொழிலாக இருந்த எண்ணெய் உற்பத்தி குறைந்துவிட்டதாலும் அரேபிய நாடுகளிலேயே ஏமன் மிகுந்த வறுமையில் உள்ள நாடாக இருக்கிறது. அப்படிப்பட்ட ஏமனில் நாடு முழுவதும் கொரோனா வைரஸ் பரவியிருக்கும் என நம்பப்படுவதாக ஐ.நா எச்சரித்துள்ளது.

ஏமன்
ஏமன்
AP

ஐ.நாவின் மனிதாபிமான விவகார ஒருங்கிணைப்பு செய்தித் தொடர்பாளர் ஜென்ஸ் லார்கே நேற்று ஜெனீவா மாநாட்டில் ஏமனின் நிலை பற்றிப் பேசியுள்ளார். ``கொரோனா வைரஸ் ஏமன் முழுவதும் பரவியிருப்பதாக நம்பப்படுகிறது. அந்நாடு உண்மையில் ஆபத்தின் விளிம்பில் உள்ளதாக அங்கிருந்து கிடைக்கும் தகவல்கள் தெரிவக்க்கின்றன. மேலும், அந்நாட்டின் சுகாதார முகமை சரிந்து, சமூக பரவல் அதிகரித்துவிட்டதால் வருங்காலத்தில் அந்நாட்டின் சுகாதார நிலைமை இன்னும் மோசமாக இருக்கும் என்று அஞ்சப்படுகிறது.

ஏமனில் போதுமான மருத்துவ பணியாளர்களோ, வென்டிலேட்டர்களோ, பாதுகாப்பு உபகரணங்களோ, தனிமைப்படுத்தப்படும் வார்டுகளோ இல்லை என்பதால் கொரோனா பாசிட்டிவுடன் வரும் மக்களுக்கு சிகிச்சையளிக்காமல் மீண்டும் வீடுகளுக்கே அனுப்பப்படுகின்றனர். தற்போது அந்நாடு சர்வதேச வான்வழியைத் திறந்துள்ளதால் அவர்களுக்குத் தேவையான நிதி மற்றும் மருத்துவ உதவிகளை விரைந்து அளிக்க வேண்டும். தெற்கு ஏமனில் இருக்கும் முக்கிய கொரோனா வைரஸ் சிகிச்சை மையத்தில் கடந்த 2 வாரத்தில் மட்டும் 68 பேர் உயிரிழந்துள்ளதாக அந்நாட்டு மருத்துவ தொண்டு நிறுவனம் கூறியுள்ளது. இந்த எண்ணிக்கை இதுவரை ஏமன் அரசு அறிவித்ததைவிட இரண்டு மடங்கு அதிகமாக உள்ளது. எனவே, அந்நாட்டுக்கு விரைவில் உதவிகளை வழங்க வேண்டும்” என லார்கே கேட்டுக்கொண்டுள்ளார்.

லார்கே
லார்கே

தொடர்ந்து போரினால் பாதிக்கப்பட்ட ஏமன், ஊட்டச்சத்து குறைபாடு உள்ள மக்கள் தொகையைக் கொண்டுள்ளது. இதனால் அங்கு கொரோனா பரவல் அதிகரித்து தொடர் உயிரிழப்புகளும் ஏற்படுவதாகத் தெரிவிக்கப்பட்டுள்ளது. ஏமனில் இதுவரை 209 பேர் வைரஸால் பாதிக்கப்பட்டு 33 பேர் உயிரிழந்துள்ளதாக அரசு தரப்பில் இருந்து அறிவிக்கப்பட்டுள்ளது. ஆனால், உண்மையில் இந்த எண்ணிக்கை மேலும் அதிகமாக இருக்கும் என ஐ.நா அதிகாரிகள் தெரிவித்துள்ளனர்.

அடுத்த கட்டுரைக்கு