Published:Updated:

கனடா வெப்ப அலை: உருகும் சாலைகள், உயிரிழந்த 200 பேர்; காலநிலை மாற்றம்தான் காரணமா?

A man stands under a water feature trying to beat the heat
A man stands under a water feature trying to beat the heat ( Jeff McIntosh/The Canadian Press via AP )

வெப்பத்திலிருந்து தங்கள் நாட்டு மக்களைக் காக்க, பொது இடங்களில் செயற்கை நீரூற்று அமைத்தும், குளிர்சாதன வசதி செய்யப்பட்ட தற்காலிக குளிர்ச்சியான மையங்கள் அமைத்தும் கனடா மற்றும் அமெரிக்க நாடுகள் உதவி வருகின்றன.

கனடா மற்றும் அமெரிக்காவில் வரலாறு காணாத வெப்பநிலையால் மக்களின் இயல்பு வாழ்க்கை மிகவும் பாதிப்படைந்துள்ளது. சுட்டெரிக்கும் வெயிலால் தார் சாலைகள் உருகும் நிலை ஏற்பட்டுள்ள நிகழ்வு அந்நாட்டு மக்களை அதிர்ச்சியில் ஆழ்த்தியுள்ளது.

கனடா நாட்டின் வான்கூவர் மாகாணத்தில் கடந்த 60 ஆண்டுகளில் இல்லாத அளவாக 49 டிகிரி செல்சியஸ்க்கும் மேலாக வெப்பநிலை பதிவாகியுள்ளது. இந்த வெப்ப அலையானது ஒட்டுமொத்த வடமேற்கு பசிபிக் பகுதியையும் வாட்டிவருகிறது. இதன் காரணமாக இதுவரை 200-க்கும் மேற்பட்டோர் உயிரிழந்துள்ளனர். இதில் பெரும்பாலானோர் முதியவர்கள் என்பது குறிப்பிடத்தக்கது.

People try to beat the heat at a beach
People try to beat the heat at a beach
Jeff McIntosh/The Canadian Press via AP
`முதன்முறையாக ஆர்டிக்கில் பதிவான 100.4 டிகிரி ஃபாரன்ஹீட் வெப்பநிலை!’- என்ன நடக்கும்?

கனடாவின் மேற்கு பகுதியில் உள்ள பிரிட்டிஷ் கொலம்பியா, வான்கூவர் மற்றும் அமெரிக்காவின் சியாட்டல் எனப் பல பகுதிகள் வெயில் அலையினால் பாதிக்கப்பட்டு வருகின்றன.. `இது வெறும் ஆரம்பம்தான். வெயிலின் உச்சம் ஜூலை மாதத்தில்தான் அதிகமாக இருக்கும்' என அந்நாடுகளின் வானிலை ஆய்வு மையம் தெரிவித்துள்ளது.

இந்த வெப்பநிலை அதிகரிப்புக்கு, பசிபிக் பெருங்கடலில் ஏற்படும் `வெப்ப குவிமாடம்' (Heat Dome) எனும் நிகழ்வே காரணம் என்று வானிலை ஆய்வாளர்கள் தெரிவித்துள்ளனர். பசிபிக் பகுதியின் வளிமண்டலத்தில் உயர் அழுத்தநிலை ஏற்படும்போது பசிபிக் பெருங்கடலிலிருந்து வரும் காற்றை, இந்த உயர் அழுத்தநிலை உறிஞ்சிக்கொள்ளும். இதனால்தான் வெப்பநிலை உயர்கிறது என்று கூறுகின்றனர்.

வெப்பத்திலிருந்து தங்கள் நாட்டு மக்களைக் காக்க, பொது இடங்களில் செயற்கை நீரூற்று அமைத்தும், குளிர்சாதன வசதி செய்யப்பட்ட தற்காலிக குளிர்ச்சியான மையங்கள் அமைத்தும் கனடா மற்றும் அமெரிக்க நாடுகள் உதவி வருகின்றன. மேலும், பள்ளி கல்லூரிகளுக்கு விடுமுறை அறிவிக்கப்பட்டுள்ளது. இதனால் சிறு குறு வணிகமும் பாதிக்கப்பட்டுள்ளது. அதனுடன் கொரோனா தடுப்பூசி மையங்களும் தற்காலிகமாக மூடப்படுவதாக அறிவித்துள்ளனர்.

A young boy runs through a fountain
A young boy runs through a fountain
Jeff McIntosh/The Canadian Press via AP
காலநிலை மாற்றம்: பூமியைக் காப்பாற்ற இனி இதுதான் ஒரே வழி!

காலநிலை மாற்றம்தான் இந்த உயர் வெப்பநிலைக்கு காரணம் என்று விஞ்ஞானிகள் கூறுகின்றனர். கடந்த அரை நூற்றாண்டில் முன்பு எப்போதும் இல்லாத அளவாக, இப்பகுதியில் 1.7 டிகிரி செல்சியஸ் அளவு வரை வெப்பம் அதிகரித்துள்ளது என்று `பெர்க்லி எர்த்' (Berkeley Earth) என்ற அமைப்பின் ஆய்வு கூறுகிறது. இதன் காரணமாகத்தான் சாலைகளும் உருகியுள்ளது என்று கூறப்பட்டுள்ளது.

இந்தியாவைப் பொறுத்த வரையில், தலைநகர் டெல்லியில் கடந்த மாதம் 29-ம் தேதி இந்த ஆண்டின் அதிகபட்ச வெப்பநிலை (43 டிகிரி செல்சியஸ்) பதிவாகியுள்ளது. இந்த ஆண்டின் வெயில் காலத்தில் இந்தியாவில் வெப்ப அலையின் தாக்கம் உணரப்பட்ட முதல் நாள் என்று இந்தியா வானிலை மையம் குறிப்பிட்டுள்ளது.

அடுத்த கட்டுரைக்கு