Published:Updated:

வெளியேறிய அமெரிக்கப் படைகள்... தலைகாட்டுவாரா தாலிபன்களின் ஹை கமாண்ட்?

ஹிபத்துல்லா
பிரீமியம் ஸ்டோரி
ஹிபத்துல்லா

1960-களின் தொடக்கத்தில் கந்தஹாரில் பிறந்த ஹிபத்துல்லா, தாலிபன் அமைப்பு தோன்றுவதற்கு முன்பாகவே பல்வேறு கிளர்ச்சிகளில் பங்காற்றியவர்.

வெளியேறிய அமெரிக்கப் படைகள்... தலைகாட்டுவாரா தாலிபன்களின் ஹை கமாண்ட்?

1960-களின் தொடக்கத்தில் கந்தஹாரில் பிறந்த ஹிபத்துல்லா, தாலிபன் அமைப்பு தோன்றுவதற்கு முன்பாகவே பல்வேறு கிளர்ச்சிகளில் பங்காற்றியவர்.

Published:Updated:
ஹிபத்துல்லா
பிரீமியம் ஸ்டோரி
ஹிபத்துல்லா

`தாலிபன் அமைப்பின் நிறுவனர் முல்லா முகமது ஒமர் 2013-ம் ஆண்டே இறந்துவிட்டார்’ என்ற தகவலை அதிகாரபூர்வமாக 2015, ஜூலை 29 அன்று வெளியிட்டது ஆப்கானிஸ்தான் அரசு. அந்தச் சமயத்தில், ``ஆம்... 2013, ஏப்ரல் 23 அன்று காசநோய் காரணமாக ஒமர் உயிரிழந்தார். அந்தத் தகவலை இரண்டு ஆண்டுகள் நாங்கள் ரகசியமாக வைத்திருந்தோம்’’ என்றார்கள் மூத்த தாலிபன் தலைவர்கள். தற்போதும் அதே போன்றதொரு செய்தி ஆப்கனில் உலவிவருகிறது. `தாலிபன்களின் உச்சபட்ச தலைவராக இருக்கும் ஹிபத்துல்லா உயிரிழந்துவிட்டார். அதை தாலிபன்கள் ரகசியமாக வைத்திருக்கின்றனர்’ என்பதே அந்தச் செய்தி!

`தாலிபன் தலைவர் மௌலவி ஹிபத்துல்லா அகுந்த்ஸடா கோவிட் தொற்று அல்லது குண்டுவெடிப்புத் தாக்குதலில் சிக்கி உயிரிழந்திருக்கலாம்’ என்றொரு தகவல் சமீபகாலமாகப் பரவிவருகிறது. இதை வதந்தி என்று தாலிபன்கள் மறுத்தார்கள். கடந்த ஆகஸ்ட் 15-ம் தேதி ஆப்கன் தலைநகர் காபூலை தாலிபன்கள் கைப்பற்றியதிலிருந்து, பல்வேறு தாலிபன் தலைவர்களும் காபூல் வந்தடைந்து விட்டனர். ஆனால், ஹிபத்துல்லா மட்டும் தலைகாட்டவேயில்லை. தவிர, இதுவரை ஹிபத்துல்லாவின் ஒரேயொரு புகைப்படத்தை மட்டுமே வெளியுலகுக்குக் காட்டியிருக்கிறார்கள் தாலிபன்கள். இதனால், `ஹிபத்துல்லா எங்கே... ஏன் அவர் பொதுவெளியில் தோன்றவில்லை?’ என்ற கேள்விகள் தாலிபன்களைப் பின்தொடர்ந்துகொண்டே இருக்கின்றன. இதையடுத்து, ``ஹிபத்துல்லா கந்தஹாரில்தான் இருக்கிறார். விரைவில் வெளியுலகுக்கு வருவார்’’ என்று சமீபத்தில் தாலிபன் செய்தித் தொடர்பாளர் ஜபியுல்லா முஜாஹித் தெரிவித்திருக்கிறார்.

யார் இந்த ஹிபத்துல்லா?

1960-களின் தொடக்கத்தில் கந்தஹாரில் பிறந்த ஹிபத்துல்லா, தாலிபன் அமைப்பு தோன்றுவதற்கு முன்பாகவே பல்வேறு கிளர்ச்சிகளில் பங்காற்றியவர். 1980-களில் சோவியத் ஒன்றியத்துக்கு எதிரான ஆப்கன் கிளர்ச்சியில் படைத்தளபதியாகச் செயல்பட்டிருக்கிறார். இஸ்லாமிய அறிஞரான ஹிபத்துல்லா, மதம் சார்ந்த நூல்களை எழுதியிருப்பதாகவும் கூறப்படுகிறது. 2016-ல் அப்போதைய தாலிபன் தலைவர் அக்தர் மன்சூர், அமெரிக்க ட்ரோன் தாக்குதலில் உயிரிழந்தார். அவர் எழுதிவைத்த உயிலில் ஹிபத்துல்லாவைத் தன் வாரிசாக அறிவித்திருந்ததை அடுத்து, 2016, மே மாதத்திலிருந்து தாலிபன்களின் தலைவராகச் செயல்பட்டுவருகிறார் ஹிபத்துல்லா. 1996-2001 காலகட்ட தாலிபன் ஆட்சியில் ஹிபத்துல்லா, தாலிபன் உச்ச நீதிமன்றத்தின் துணைத் தலைவராகவும் பதவி வகித்தார். 2001-க்குப் பிறகு, ஆப்கனில் தாலிபன்களின் வீழ்ச்சியை அடுத்து, இவர் மத அறிஞர்களின் தலைவராகச் செயல்பட்டிருக்கிறார்.

இவர் தலைவரானதற்கு வேறொரு காரணமும் சொல்லப்படுகிறது. தாலிபன் அமைப்பைத் தோற்றுவித்த முல்லா ஒமரின் மகன் முல்லா முகமது யாகூப்தான் அடுத்த தலைவர் ஆக்கப்படவிருந்தார். ஆனால், அவர் வயதில் மிகவும் சிறியவராக இருப்பதால், முல்லா யாகூப்பே ஹிபத்துல்லாவின் பெயரை முன்மொழிந்தார் என்றும் ஒரு செய்தி உலாவருகிறது. ஆண்டுக்கு ஓரிரு முறை மட்டுமே வெளியில் தலைகாட்டும் ஹிபத்துல்லா, கடந்த சில ஆண்டுகளாக வெளியே வருவதேயில்லை. மர்ம மனிதராகவே வாழ்ந்துவரும் ஹிபத்துல்லாவுக்கு, சுமார் 60 வயது இருக்கும் என்கிறார்கள். தற்போது தாலிபன் அமைப்பில் இவர் எடுப்பதே இறுதி முடிவு.

வெளியேறிய அமெரிக்கப் படைகள்... தலைகாட்டுவாரா தாலிபன்களின் ஹை கமாண்ட்?

உயிருடன் இருக்கிறாரா?

முல்லா ஒமர், அக்தர் மன்சூர் உள்ளிட்ட கடந்தகால தாலிபன் தலைவர்கள் மறைந்து வாழ்ந்தபோது, ஆப்கானிஸ்தானின் ஆட்சி அதிகாரம் தாலிபன்களின் கையில் இல்லை. ஆனால், இப்போது ஆப்கனை தாலிபன்கள் முழுவதுமாகக் கைப்பற்றியிருக்கும் நிலையில் ஹிபத்துல்லா ஏன் மறைந்து வாழ்கிறார் என்பதே பலரும் எழுப்பும் கேள்வி. இதுவே அவர் உயிருடன் இருக்கிறாரா என்கிற சந்தேகத்தை மேலும் வலுவடையச் செய்கிறது. கடந்த ஆகஸ்ட் 29-ம் தேதி கந்தஹாரிலுள்ள பழங்குடியினத் தலைவர்களை ஹிபத்துல்லா சந்தித்ததாக ஆப்கானிஸ்தான் ஊடகம் ஒன்று செய்தி வெளியிட்டிருக்கிறது. ஆனால், அதற்கான ஆதாரம் எதுவும் வெளியிடப்படவில்லை.

``ஆப்கன் மண்ணில் வெளிநாட்டுப் படைகள் இருக்கும்வரை, தாங்கள் புனிதப் போராளியாக இருப்பதாகச் சொல்கிறார்கள் தாலிபன்கள். அதனால் வெளிநாட்டுப் படைகள் முழுமையாக வெளியேறும்வரை தங்கள் தலைவரை தாலிபன்கள் மறைத்துவைத்திருப்பார்கள். தாலிபனின் உச்ச தலைவர் மறைந்து வாழ்வதற்கு இதுதான் காரணம்’’ என்று சில நாள்களுக்கு முன்பு இந்தச் சந்தேகங்களுக்கு விடை அளித்திருக்கிறார் பாகிஸ்தானை சேர்ந்த பாதுகாப்பு ஆய்வாளர் இம்தியாஸ் குல்.

ஆகஸ்ட் 31-ம் தேதியுடன் அமெரிக்கா, நேட்டோ நாடுகளின் படைகள் ஆப்கனைவிட்டு வெளியேறிவிட்டன. இம்தியாஸின் கூற்றுப்படி பார்த்தால், ஹிபத்துல்லா இன்னும் சில நாள்களில் வெளி உலகுக்குத் தலைகாட்டுவார் என்று நம்பலாம். அப்படி அவர் தலைகாட்டினால் மட்டுமே அவரைச் சுற்றியிருக்கும் மர்மங்களுக்கு விடை கிடைக்கும்!

****

தலைவர்கள் மறைந்து வாழ்வது ஏன்?

அல்-கொய்தா, ஐ.எஸ்.ஐ.எஸ்., தாலிபன் தொடங்கி பல்வேறு பயங்கரவாத அமைப்புகளின் உச்ச தலைவர்களும் தலைமறைவு வாழ்க்கையையே வாழ்ந்திருக்கிறார்கள். ``இது போன்ற உச்ச தலைவர்களின் தலைக்காக அமெரிக்கா உள்ளிட்ட நாடுகள் கழுகுப் பார்வையுடன் காத்திருக்கின்றன. வளர்ந்துவிட்ட தொழில்நுட்பம் காரணமாக, தலைவர்களின் சிறு அசைவுகூட அவர்களைக் காட்டிக்கொடுத்துவிடும். அதனால் பாதுகாப்பு காரணம் கருதியே அவர்கள் மறைந்து வாழ்கிறார்கள். ஓர் இயக்கத்தின் தலைவர் இறந்துவிட்டார் என்றால் அந்த இயக்கத்தின் கடைசி வீரன் வரை அது அவநம்பிக்கையை ஏற்படுத்தும். பலரும் உத்வேகத்தை இழந்து, இயக்கத்திலிருந்து விலகிவிடுவார்கள். அதனால்தான் முல்லா ஒமரின் மரணம்கூட இரண்டு ஆண்டுகளாக ரகசியம் காக்கப்பட்டது’’ என்கிறார்கள் சர்வதேச அரசியல் பார்வையாளர்கள்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism