Published:Updated:

ஐ.எல்&எஃப்.எஸ் சிக்கல்... மியூச்சுவல் ஃபண்ட் நிறுவனங்களுக்கு பாதிப்பா?

ஐ.எல்&எஃப்.எஸ் சிக்கல்... மியூச்சுவல் ஃபண்ட் நிறுவனங்களுக்கு பாதிப்பா?
பிரீமியம் ஸ்டோரி
News
ஐ.எல்&எஃப்.எஸ் சிக்கல்... மியூச்சுவல் ஃபண்ட் நிறுவனங்களுக்கு பாதிப்பா?

நெருக்கடி

ங்குச் சந்தை மற்றும் மியூச்சுவல் ஃபண்ட் முதலீட்டாளர்களைக் கதிகலங்க வைத்திருக்கிறது ஐ.எல்&எஃப்.எஸ் நிறுவனம். இந்த நிறுவனம் வெளியிட்ட வணிகப் பத்திரங்கள் (Commercial paper) முதிர்வு நாளுக்குப்பிறகும் திரும்ப வழங்காததால் சிக்கல் ஏற்பட்டது. இந்த நிறுவனம் அடுத்த ஆறு மாதங்களுக்குச் சந்தையில், வணிகப் பத்திரம்மூலம் நிதி திரட்டக்கூடாது என்ற கட்டுப்பாடு விதிக்கப் பட்டிருக்கிறது.

இந்தச் செய்தி வெளியாகத் தொடங்கியவுடன் இந்த நிறுவனத்தின் பங்கு விலை கடுமையாகக் குறையத் தொடங்கியது. கடந்த ஓராண்டு காலத்தில் இந்தப் பங்கின் விலை 62% குறைந்துள்ளது. அதிலும் கடந்த ஒரு மாதத்தில் இந்தப் பங்கின் விலை 37% குறைந்துள்ளது. ஐந்து மாதங்களுக்குமுன் இந்தப் பங்கின் விலை ரூ.57-ஆக இருந்தது, தற்போது வெறும் ரூ.14 என்கிற அளவில் வர்த்தகமாகி வருகிறது.

என்னவானது ஐ.எல்&எஃப்.எஸ் நிறுவனத்துக்கு, ஏன் இந்த நிறுவனம் சிக்கலில் மாட்டித் தவிக்கிறது?

சுமார் 90 நிறுவனங்களை உள்ளடக்கியுள்ள ஐ.எல்&எஃப்.எஸ் குழுமம் பெற்றிருக்கும் மொத்தக் கடன் தொகை சுமார் ரூ.80,000 கோடிக்கு மேல்.  பல்வேறு உள்கட்டமைப்புத் திட்டங்களுக்கு இந்த நிறுவனம் கடன் வழங்கி யிருக்கிறது. மியூச்சுவல் ஃபண்ட், இன்ஷூரன்ஸ் மற்றும் அரசுத் துறை நிறுவனங்களிடம் கடன் வாங்கித்தான் இந்தக் கடனைக் கொடுத்தது ஐ.எல்&எஃப்.எஸ் நிறுவனம். இப்படித் தந்த கடனானது திரும்ப வராமல் போக, வாங்கிய பணத்தைத் திருப்பித் தரமுடியாத சிக்கலில் மாட்டியிருக்கிறது ஐ.எல்&எஃப்.எஸ் நிறுவனம்.

ஐ.எல்&எஃப்.எஸ் சிக்கல்... மியூச்சுவல் ஃபண்ட் நிறுவனங்களுக்கு பாதிப்பா?

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

இந்த நிறுவனத்தில் இப்படியொரு சிக்கல் இருப்பது தெரியவந்தவுடனேயே இந்த  நிறுவனத்தின் ரேட்டிங்கானது   ‘AAA’-விலிருந்து ‘AA+’ என்கிற அளவுக்குத் தரமிறக்கம் செய்தது ‘இக்ரா’ ரேட்டிங் ஏஜென்சி. இந்த ரேட்டிங்கானது சில நாள்களுக்கு முன் மேலும் பல படிநிலைகள் குறைக்கப்பட்டு ‘BB’ என நிர்ணயக்கப்பட்டது. தர நிர்ணய நிறுவனங்களால் வழங்கப்படும் ரேட்டிங் வரிசையில் ‘BB’ என்பது முதலீடு செய்யும் தகுதிநிலைக்கும் கீழானதாகும்.

ஐ.எல்&எஃப்.எஸ் நிறுவனம் நிதிச் சிக்கலில் மாட்டியதுடன் நிற்காமல், மியூச்சுவல் ஃபண்ட், இன்ஷூரன்ஸ் நிறுவனமான எல்.ஐ.சி மற்றும் சிட்பி (SIDBI) நிறுவனத்தையும் மாட்ட வைத்துள்ளது.

கார்ப்பரேட் நிறுவனங்கள் வெளியிடும் கடன் பத்திரங்களில் மியூச்சுவல் ஃபண்டுகள் முதலீடு செய்வது வழக்கமான விஷயம்தான். கடன் சார்ந்த ஃபண்டுகளில் முதலீட்டாளர்கள் முதலீடு செய்யும் பணமானது பெரும் தொழில் நிறுவனங் களுக்குக் கடனாக வழங்கப்படு கிறது. இப்படி வழங்கப்படும் கடன் சில சமயங்களில் திரும்ப வராத நிலை ஏற்பட்டுவிடுகிறது. கடந்த 2016-ம் ஆண்டு ஆம்டேக் ஆட்டோ நிறுவனம் தனது வணிகப் பத்திரத்தின்   (Commercial Paper) முதலீட்டுத் தொகையை முதிர்வுத் தேதி முடிந்தபின்பும்  திரும்ப வழங்கத் தவறியது. குறுகிய காலக் கடன் ரீதியான மியூச்சுவல் ஃபண்டுகள் அப்போது பெரும் இழப்பைச் சந்தித்தன. மியூச்சுவல் ஃபண்டுகள், கார்ப்பரேட் நிறுவனங்களின் கடன் பத்திரங் களில் முதலீடு செய்வதில் உள்ள அபாயங்களைப் பற்றிய ஒரு எச்சரிக்கை மணியாக ஆம்டேக் விவகாரம் அமைந்தது. இப்போது ஐ.எல்&எஃப்.எஸ் நிறுவனத்தில் முதலீடு செய்ததன்மூலம் பல மியூச்சுவல் ஃபண்ட் நிறுவனங் கள் மாட்டிக்கொண்டுள்ளன. (பார்க்க, எதிர்பக்கத்திலுள்ள   பட்டியல்!)

ஐ.எல்&எஃப்.எஸ் சிக்கல்... மியூச்சுவல் ஃபண்ட் நிறுவனங்களுக்கு பாதிப்பா?

மியூச்சுவல் ஃபண்ட் நிறுவனங்களுக்குப் பங்குகளைத் தேர்வு செய்வதில் நீண்ட நெடிய அனுபவம் மற்றும் தொழிற்முறை திறன் இருந்தாலும், கடனை ஆய்வு செய்வதில் அதே திறமை இருக்கிறதா என்பது முக்கியமான கேள்வி.  மத்திய ரிசர்வ் வங்கியின் கடுமையான கண்காணிப்பின்கீழ் பணியாற்றும் வங்கிகள் தனியார் நிறுவனங்களுக்குத் தரும் கடனையே திரும்ப வசூல் செய்ய முடியாத நிலையில் இருக்கின்றன. மேலும், கார்ப்பரேட் நிறுவனங்களின் சொத்துகள் மற்றும் தினசரிப் பணப் பரிவர்த்தனைகள்மீது வங்கிகளுக்கு இருக்கும் கண்காணிப்பும், கட்டுப்பாடும் மியூச்சுவல் ஃபண்ட் நிறுவனங்களுக்கு இல்லை. 

மியூச்சுவல் ஃபண்டுகளின் முதலீடுகள் பெரும்பாலும் இக்ரா, க்ரைசில், கேர் போன்ற தர நிர்ணய நிறுவனங்கள் வழங்கும் ரேட்டிங்கின் அடிப்படையிலேயே, அதுவும் குறிப்பாக, AA-க்குமேல் ரேட்டிங் உள்ள நிறுவனங்களிலேயே செய்யப்படுகின்றன. என்றாலும்கூட, இந்தக் கடன் நிச்சயம் திரும்ப வரும் என்பதற்கு எந்த உத்தரவாதமும் இல்லை. 

சமீபத்தில் நடந்த மியூச்சுவல் ஃபண்டுகளின் கூட்டமைப்பான ஆம்ஃபி மாநாட்டில் உரையாற்றிய செபி தலைவர் அஜய் தியாகி, கடன் பத்திர மியூச்சுவல் ஃபண்டுகள் பெருமளவில் பொதுமக்களின் பணத்தைக் கையாள்வதால், கடன் சார்ந்த ஃபண்டுகளின் நிதி மேலாளர்கள் கடன் பத்திரங்களில் முதலீடு செய்வதில் உள்ள ‘தனித்துவ மான ரிஸ்க்’ பற்றித் தெளிவாகப் புரிந்துவைத்திருக்க வேண்டும் என்று அறிவுறுத்தினார்.  
ஐ.எல்&எஃப்.எஸ் குழுமம் வெளியிட்ட கடன் பத்திரங்களில் எத்தனை மியூச்சுவல் ஃபண்ட் திட்டங்கள் முதலீடு செய்துள்ளன என்பது பற்றிய அதிகாரபூர்வமான தகவல் இல்லை என்றாலும், 12 மியூச்சுவல் ஃபண்டுகள் ரூ.3.500 கோடி அளவிற்கு முதலீடு செய்துள்ள தாக ப்ளூம்பெர்க் நிறுவனம் சொல்கிறது. 

ஐ.எல்&எஃப்.எஸ் சிக்கல்... மியூச்சுவல் ஃபண்ட் நிறுவனங்களுக்கு பாதிப்பா?

மியூச்சுவல் ஃபண்ட் நிறுவனங்கள் வழங்கும் கடன் சார்ந்த முதலீடுகளில் பெரிய ‘ரிஸ்க்’ இல்லை என்பது பொதுவான உண்மை என்றாலும், ஆம்டெக் ஆட்டோ, ஐ.எல்&எஃப்.எஸ் போன்ற நிறுவனங்களுக்குத் தந்த கடன் திரும்ப வராமல் போய், முதலீட்டாளர்களுக்கு நஷ்டம் ஏற்படும் என்பதை நாம் கவனிக்கத் தவறக்கூடாது. இன்றைக்கு மியூச்சுவல் ஃபண்டில் முதலீடு செய்யப்பட்டிருக்கும் தொகை ரூ.23 லட்சம் கோடி. இதில்  சுமார் ரூ.12 லட்சம் கோடி கடன் சார்ந்த ஃபண்டுகளில் முதலீடு செய்யப்பட்டுள்ளது. இந்த நிலையில், முதலீட்டாளர் களின் பணத்தை மியூச்சுவல் ஃபண்ட் நிறுவனங்கள் இன்னும் கவனமாகக் கையாள வேண்டிய கட்டாயம் ஏற்பட்டுள்ளது.

மியூச்சுவல் ஃபண்ட் நிறுவனங்கள் மட்டுமல்ல, எல்.ஐ.சி நிறுவனமும் இந்த சிக்கலில் சிக்கியிருக்கிறது. இந்த நிறுவனத்தில் 25.34% பங்குகளை வைத்திருக்கிறது எல்.ஐ.சி நிறுவனம். இந்த நிறுவனத்தின் பங்கு விலை தொடர்ந்து இறங்குவதினால், எல்.ஐ.சி செய்த முதலீட்டின் மதிப்பும் குறைந்துள்ளது. ‘‘இந்த நிறுவனத்தில் இருக்கும் முதலீட்டினைக் கொஞ்சம் கொஞ்ச மாகக் குறைத்துக்கொள்ள எல்.ஐ.சி நடவடிக்கை எடுக்கும்’’ என்று சொல்லியிருக்கிறார் ஐ.ஆர்.டி.ஏ.ஐ நிறுவனத்தின் தலைவர் சுபாஷ் சி.குந்தியா.

ஐ.எல்&எஃப்.எஸ் சிக்கல்... மியூச்சுவல் ஃபண்ட் நிறுவனங்களுக்கு பாதிப்பா?

ஐ.எல்&எஃப்.எஸ் நிறுவனத்துக்கு சிட்பி (SIDBI) நிறுவனம் ஏறக்குறைய ஆயிரம் கோடி ரூபாய் கடனாகத் தந்திருந்தது. இந்தக் கடன் பணமும் திரும்ப வராமலே போகக்கூடிய சூழல் உருவாகியுள்ளதாகச் செய்தி வெளியாகியிருக்கிறது. இந்தக் கடனைத் தந்ததற்காக ஐ.எல்&எஃப்.எஸ் நிறுவனத்திடமிருந்து சிட்பி நிறுவனம் எந்த வகையான சொத்தினையும் அடமானமாகப் பெறவில்லை என்று சொல்லப்படுகிறது.

ஐ.எல்&எஃப்.எஸ் ஒரு தனியார் நிதி நிறுவனம் என்றாலும், இதன் குழும நிறுவனங்களின் பங்கு மற்றும் கடனில் பொதுத் துறை நிறுவனங்களின் முதலீடு பெருமளவு இருக்கிறது என்பது மத்திய அரசுக்கும், பொதுத் துறை வங்கிகளுக்கும் கவலை தரக்கூடிய விஷயமாகும். இந்த நிறுவனத்தில் ஏற்பட்டுள்ள நிதிச் சிக்கலை தீர்க்க என்ன நடவடிக்கை எடுக்கலாம் என மத்திய அரசாங்கம் யோசித்து வருகிறது. பங்கு, ஃபண்ட் முதலீட்டாளர்களும் தங்கள் பங்குக்கு கவனமாக இருப்பது அவசியம்!

- சுமதி மோகனப் பிரபு