Published:Updated:

அதிகரிக்கும் நஷ்டம்... இ-காமர்ஸ் நிறுவனங்களின் எதிர்காலம் என்னவாகும்?

அதிகரிக்கும் நஷ்டம்... இ-காமர்ஸ் நிறுவனங்களின் எதிர்காலம் என்னவாகும்?
பிரீமியம் ஸ்டோரி
News
அதிகரிக்கும் நஷ்டம்... இ-காமர்ஸ் நிறுவனங்களின் எதிர்காலம் என்னவாகும்?

ஆன்லைன் ஷாப்பிங்

தீபாவளி பண்டிகையையொட்டி, ஃப்ளிப்கார்ட், அமேசான் உள்ளிட்ட இ-காமர்ஸ் நிறுவனங்களின் விற்பனை உச்சத்துக்குச் சென்று, வருவாய் அதிகரித்தபோதிலும், லாபத்தைச்  சம்பாதிக்க முடியாமல், தொடர்ந்து அதிகமான நஷ்டத்தையே சந்தித்து வருகின்றன. வாடிக்கையாளர் களை ஈர்ப்பதற்கும், அவர்களைத் தக்கவைத்துக் கொள்வதற்கும் பணத்தை அள்ளி இறைப்பதால், அந்த நிறுவனங்களின் நஷ்டம் அதிகரித்து வருகிறது. இதனால், இ-காமர்ஸ் நிறுவனங்களின் எதிர்காலம் என்னவாகும் என்ற கேள்வி எழுந்துள்ளது.

அதிகரிக்கும் நஷ்டம்... இ-காமர்ஸ் நிறுவனங்களின் எதிர்காலம் என்னவாகும்?

750% நஷ்டம் கண்ட ஃப்ளிப்கார்ட்

இந்திய இ-காமர்ஸ் சந்தையில் வேகமாக வளர்ந்துவரும் நிறுவனமான ஃப்ளிப்கார்ட்,  இந்தியாவில் ஃப்ளிப்கார்ட் இந்தியா மற்றும் ஃப்ளிப்கார்ட் இன்டர்நெட் ஆகிய நிறுவனங் களைத் தனது கட்டுப்பாட்டின்கீழ் வைத்து நிர்வகித்து வருகிறது. கடந்த மே மாதம், ஃப்ளிப்கார்ட்டின் 70 சதவிகிதப் பங்குகளை, 16 பில்லியன் டாலர் (இந்திய ரூபாய் மதிப்பில் 1,07,200 கோடி) கொடுத்து வாங்கியது அமெரிக்க நிறுவனமான வால்மார்ட்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

இதனைத் தொடர்ந்து சர்வதேச அளவில் பிரபலமான அமேசான் நிறுவனத்தின் இந்தியப் பிரிவுடன் கடுமையாகப் போட்டிபோட்டு வருகிறது ஃப்ளிப்கார்ட். இந்தப் போட்டியின் காரணமாக 2017-18-ம் நிதியாண்டில், ஃப்ளிப்கார்ட் நிறுவனத்துக்கு 2,064 கோடி ரூபாய் அளவுக்கு இழப்பு ஏற்பட்டுள்ளது. முந்தைய நிதியாண்டில் ஏற்பட்ட 244 கோடி ரூபாயுடன் ஒப்பிடுகையில்,  இது 750% அதிகமாகும்.

அதிகரிக்கும் நஷ்டம்... இ-காமர்ஸ் நிறுவனங்களின் எதிர்காலம் என்னவாகும்?

அதேசமயம், இந்த நிறுவனத்தின் வருவாய் கடந்த 2017-18-ம் நிதியாண்டில் 21,650 கோடி ரூபாயாக உயர்ந்துள்ளது. இது, முந்தைய நிதியாண்டில் ஈட்டிய 15,560 கோடி ரூபாயுடன் ஒப்பிடும்போது சுமார் 40% அதிகமாகும்.

ஆனால், 2017-18-ம் நிதியாண்டில் இந்த நிறுவனம், வாடிக்கையாளர்களை ஈர்ப்பதற்காக அறிவித்த பல்வேறு சலுகைகள், விலைக் குறைப்புகள், அதிகமான குடோன்கள் அமைத்தல் மற்றும் இபே (இந்தியப் பிரிவு) உள்ளிட்ட சில சிறிய இ-காமர்ஸ் நிறுவனங்களைக் கையகப்படுத்தியது  உள்ளிட்டவற்றுக்காக 23,700 கோடி ரூபாய் அளவுக்குச் செலவிட்டுள் ளது. இதன் காரண மாகவே, இந்த நிறுவனத் தின் இழப்பு அதிகரித் துள்ளதாகச் சொல்லப்படுகிறது.

அதிகரிக்கும் அமேசான் நஷ்டம்

ஃப்ளிப்கார்ட்டின் கதை இதுவென்றால், அமேசான் இந்தியா நிறுவனம், அமேசான் நிறுவனம்  2017-18-ம் நிதியாண்டுக்கான வரவு செலவு அறிக்கையை இன்னும் தாக்கல் செய்து வெளியிடவில்லை. ஆனாலும், அதன் துணை நிறுவன மான க்ளவுடெயில் (Cloudtail) நிறுவனம், மேற்கூறிய காலகட்டத்தில் 7,149 கோடி ரூபாய் அளவுக்கு, அதாவது முந்தைய நிதியாண்டைவிட 27% அளவுக்கு அதிகமாக வருவாய் ஈட்டியுள்ள போதிலும், இழப்பு நான்கு மடங்கு அதிகரித்துள்ள தாகவும், செலவினங்கள் 26% அதிகரித்திருப்பதாகவும் தகவல் வெளியாகியிருக்கிறது. இந்த நிலையில், அமேசான் இந்தியா நிறுவனத்தின் வரவு செலவுக் கணக்கும் இதே ரீதியில் அமைந்தால் ஆச்சர்யப் படுவதற்கில்லை என்கிறார்கள் இந்தத் துறை வல்லுநர்கள்.

ஸ்விக்கியும் விலக்கல்ல

வாடிக்கையாளர்களிடமிருந்து ஆன்லைனில் ஆர்டர் எடுத்து, அவர்கள் விரும்பும் உணவகங் களிலிருந்து உணவுகளைப் பெற்று டெலிவரி செய்யும் சேவை நிறுவனமான ஸ்விக்கி, கடந்த மார்ச் மாதத்துடன் முடிவடைந்த 2017-18-ம் நிதியாண்டில், அதற்கு முந்தைய நிதியாண்டில் ஈட்டிய 146 கோடி ரூபாயைக் காட்டிலும் அதிகமாக,  468 கோடி ரூபாய் என்ற அளவுக்கு வருவாய் ஈட்டியுள்ளபோதிலும், அதன் இழப்பு என்னவோ கிட்டத்தட்ட இரண்டு மடங்காக அதிகரித்துள்ளது. அதாவது,      2016-17-ம் நிதியாண்டில் 200 கோடி ரூபாய் அளவுக்குக் காணப்பட்ட நஷ்டம், 2017-18-ம் நிதியாண்டில் 390 கோடி ரூபாயாக அதிகரித்துள்ளது.

ஆன்லைன்மூலம் உணவுப் பொருள்களை டெலிவரி செய்யும் ஜுமோட்டோ நிறுவனத்தின் நஷ்டம் 93% அதிகரித்து, ரூ.397 கோடியாக இருக்கிறது. இந்த நிறுவனத்தின் வருமானம் 230% அதிகரித்தும், நஷ்டம் அதிகரிப்பதை நிறுத்த முடியவில்லை.

அதிகரிக்கும் நஷ்டம்... இ-காமர்ஸ் நிறுவனங்களின் எதிர்காலம் என்னவாகும்?

பே டிஎம்-க்கும் அடிதான்

ஆன்லைன் பணப் பரிமாற்றத்துக்கான சேவையை அளிக்கும் நிறுவனமான பே டிஎம் நிறுவனத்தின் நஷ்டமும் அதிகரித்திருக்கிறது. இந்த நிறுவனத்தின் தாய் நிறுவனமான ஒன்97 கம்யூனிகேஷன்ஸ், கடந்த மார்ச் முடிந்த நிதியாண்டில் ரூ.1,490 கோடி நஷ்டம் கண்டிருந்தது. அதற்கு முந்தைய நிதியாண்டில் இந்த நிறுவனம் ரூ.879 கோடி அளவுக்கு மட்டும் நஷ்டம் கண்டிருந்தது குறிப்பிடத்தக்கது.

இத்தனைக்கும் இந்த நிறுவனத்தின் வருமானம், பல மடங்காக அதிகரித்திருக்கிறது. கடந்த 2016-17-ம் ஆண்டில் இந்த நிறுவனம் ரூ.624 கோடி அளவுக்கு வருவாய் ஈட்டியது. ஆனால், 2017-18-ம் ஆண்டில் இதன் வருமானம் ரூ.2,987 கோடி என்கிற அளவுக்கு  அதிகரித்திருக்கிறது.

அதிகரிக்கும் போட்டி

ஆன்லைன் நிறுவனங்களின் வருவாய் அதிகரித்தும், இழப்பு அதைவிட அதிகமாக ஏற்படுவதற்கு முக்கியக் காரணம், சந்தையில் தனது இருப்பைத் தக்கவைத்துக் கொள்வதற்கான செலவுகளை ஆன்லைன் நிறுவனங்கள் அள்ளி இறைப்பதுதான். உதாரணமாக, ஆன்லைன் மூலம் உணவகங் களிலிருந்து உணவுகளைக் கொண்டுவந்து தரும் ஸ்விக்கி நிறுவனத்துக்குப் போட்டியாக ஊபர்ஈட்ஸ் மற்றும் ஃபுட்பாண்டா போன்ற புதிய நிறுவனங்களும் களத்தில் இருக்கின்றன. ஆன்லைன்மூலம் சேவையை அளிக்க ஒரு நிறுவனம் தொடங்கப்பட்டால், அதேமாதிரியான சேவையை அளிக்கப் பல நிறுவனங்கள் போட்டிபோடத் தொடங்கிவிடுகின்றன. இதனால் விலையைக் குறைத்துத் தர வேண்டிய கட்டாயம் ஆன்லைன் நிறுவனங்களுக்கு ஏற்படுகின்றன.

கடந்த ஆகஸ்ட் மாதத்தில், டெசர்ட்ஸ் (desserts) 9 ரூபாய், ஸ்நாக்ஸ் 19 ரூபாய் என்று குறைந்த விலையில் வழங்குவதாக விளம்பரப்படுத்தி இருந்தன பல ஆன்லைன் நிறுவனங்கள். அதேபோல, ஊபர்ஈட்ஸ் நிறுவனமும் காலை சிற்றுண்டிகளுக்கு விலைக்குறைப்பு சலுகைகளை அறிவித்திருந்தது.

ஆன்லைன் நிறுவனங்களின் நஷ்டம் அதிகரிப்பதற்கு இதுமட்டுமே காரணமல்ல. ஆன்லைன் நிறுவனங்கள்  புதிய சந்தைகளை நோக்கிச் செல்வதற்கும், அதன் டெலிவரி நெட்வொர்க்கை விரிவுபடுத்துவதற்கும் அதிகமாகச் செலவிட்டு வருகிறது. இதனாலும் இந்த நிறுவனங்கள் ஈட்டும் வருவாயைவிட செலவு அதிகமாகி நஷ்டம் அதிகரித்து வருகிறது.

இழப்புகள் தொடரும்

விலைக் குறைப்பு மற்றும் வாடிக்கையாளர் களுக்கான சலுகைகளில் நிறுவனங்களிடையே காணப்படும் போட்டிதான், அவற்றை நஷ்டத்தில் தள்ளுகின்றன. தற்போது மட்டுமல்ல, வரவிருக்கும் நாள்களிலும், சந்தையைத் தக்கவைத்துக் கொள்வதற்காக ஃப்ளிப்கார்ட் இதுபோன்ற செலவுகளைத் தொடரத்தான் செய்யும். ஏனெனில், இந்தியச் சந்தையைக் கைப்பற்றுவதற்காக அமேசான் நிறுவனம் தொடர்ந்து பல நூறு கோடி ரூபாய்களை இறைக்கத்தான் போகிறது. இதனால் ஃப்ளிப்கார்ட்டும் அதே அளவுக்குச் செலவிட வேண்டியதுள்ளது.

ஆனால், இந்தச் செலவுகள் எல்லாம்  எதிர்கால வளர்ச்சிக்காக செலவிடுவதாகத் தான் கருத வேண்டும். இந்த நிறுவனங்கள் பெரும்பாலும் நுகர்வோர் சாதனங்கள் மற்றும் எலெக்ட்ரானிக்ஸ் பொருள்களை நம்பியே செயல்படுகின்றன. ஏனெனில், இவைதான் வாடிக்கையாளர் களிடம் வேகமாக விற்பனையாகும் பொருள்களாக உள்ளன. வெவ்வேறு வகையான உள்கட்டமைப்புத் தேவைகளையும் கொண்டிருக் கின்றன. ஒவ்வொரு விநியோக மையங்களை அமைக்கவும் சில நூறு கோடி ரூபாய் தேவையாக உள்ளது. கூடவே டெலிவரி ஆள்களுக்கான சம்பளம் மற்றும் நிர்வாகச் செலவுகள் தேவையாக உள்ளன. எனவே, அடுத்த மூன்று அல்லது நான்கு ஆண்டுகளுக்கு இந்த இழப்புகளின் விகிதம், குறிப்பாக, உணவு மற்றும் மளிகை சாமான்கள் பிரிவுகளில்  அதிகரிக்கலாம்.

அதிகரிக்கும் நஷ்டம்... இ-காமர்ஸ் நிறுவனங்களின் எதிர்காலம் என்னவாகும்?

இருப்பினும், இதன்மூலம் சம்பந்தப்பட்ட நிறுவனங்களின் வாடிக்கையாளர்களின் எண்ணிக்கை, விநியோக மையங்கள், உட்கட்டமைப்புகள் அதிகரித்து, அவற்றுக்கான சந்தை விரிவாகி வருகின்றன. இதன்மூலம், அவை சிறிய நகரங்கள் மற்றும் கிராமங் களின் சந்தைகளையும் கைப்பற்ற முடியும். இதன் காரணமாகத்தான், அந்த நிறுவனங்கள் அவற்றின் இன்றைய லாபங்களைத் தியாகம் செய்து வருகின்றன” என்கிறார்கள்.
வாடிக்கையாளர்களைப் பிடிப்பதன்மூலம் புதிய சந்தையை உருவாக்க நினைக்க எவ்வளவு வேண்டுமானாலும் செலவு செய்யலாம். அதற்காக எவ்வளவு வேண்டுமானாலும் நஷ்டப்படலாம் என்கிற சிந்தனை பிசினஸ் உலகில் வெகுவாக இருக்கும் காலம் இது. இன்னும் எத்தனை நாளைக்குத்தான் இந்த நிறுவனங்கள் சந்தோஷமாக நஷ்டத்தைத் தாங்கிக்கொள்ளும் என்று பார்ப்போம். 

- பா.முகிலன்

படம் : தே.அசோக்குமார்

“இன்றைய நஷ்டம்... நாளைய லாபம்!”

அம்பி பரமேஸ்வரன், நிறுவனர், பிராண்ட் பில்டிங் டாட் காம்


‘‘இதுபோன்ற இ-காமர்ஸ் நிறுவனங்களின் தற்போதைய இழப்புகளை, குறுகிய கால கண்ணோட்டத்தில் பார்க்காமல், நீண்ட கால அடிப்படையில் பார்க்க வேண்டும். ஒரு வருடம் அல்லது இரண்டு வருடங்கள் என்ற அடிப்படையில் ஒரு பிசினஸைப் பார்க்கக்கூடாது. அமெரிக்காவில் அமேசான் நிறுவனம் ஏறக்குறைய 10 ஆண்டுகள் வரை நஷ்டத்தைத்தான் சந்தித்து வந்தது. அதற்குப் பின்னர்தான் லாபம் ஈட்ட ஆரம்பித்தது. ஆனால், அந்த லாபம் மிக அபரிமிதமாக இருந்தது.

இதில், நீங்கள் பார்க்க வேண்டிய விஷயம் என்ன வென்றால், அமேசானின் விற்பனை 100 சதவிகிதத் திலிருந்து 200 சதவிகிதத்துக்குச் சென்றபோது, நஷ்டம்  150 சதவிகிதத்திலிருந்து 250 சதவிகிதமாக அதிகரித்தது. அடுத்த ஆண்டு விற்பனை, 200 சதவிகிதத்திலிருந்து 300 சதவிகிதமாக அதிகரித்த போது நஷ்டமும் அதே அளவுக்குக் கணிசமாக அதிகரித்தது. 

அதிகரிக்கும் நஷ்டம்... இ-காமர்ஸ் நிறுவனங்களின் எதிர்காலம் என்னவாகும்?

இந்த நோக்கில் பத்து ஆண்டுகள் கழித்துப் பார்க்கும்போது, இன்று 100 கோடி ரூபாயாக இருக்கும் விற்பனை, 5,000 கோடி ரூபாயாக ஆகிவிடும். ஆனால், இன்றைக்கு இருக்கிற நஷ்டம் படிப்படியாகக் குறைந்து அன்றைக்கு, அதாவது 10 ஆண்டுகளுக்குப்பின்னர் லாபமாக மாறிவிடும். 

மேலும், இந்த நிறுவனங்கள், தயாரிப்பு நிறுவனங்களிட மிருந்து பொருள்களைக் கடனுக்கு வாங்கி, வாடிக்கையாளர் களிடம்  ரொக்கத்துக்கு விற்பதால், இவர்களிடம் பணப்புழக்கம் அதிக ரிக்கும். அடுத்ததாக, வழக்க மான கடைகளைப் போன்றல்லாமல்,  இ-காமர்ஸ் நிறுவனங்கள் மூலம் பொருள்கள் வாங்கும் ஒவ்வொரு வாடிக்கையாளர் பற்றிய விவரங்களையும் அதாவது, அவர் எந்த வகையான பொருள் களை, எந்த பிராண்ட் களை அதிகமாக வாங்கு கிறார் என்பதுபோன்ற விவரங்களைத் தொடர்ந்து ‘ட்ராக்’ செய்ய முடியும்.

உதாரணமாக ஒரு வாடிக்கை யாளர், குழந்தைக்கான டயபர் வாங்குகிறார் என்று வைத்துக்கொள்வோம். இதன்மூலம் அவரது வீட்டில் குழந்தை இருப் பது தெரியும்.  இது போன்று குழந்தை களுக்கான பொருள் களை வாங்கும் வாடிக்கை யாளர்களைத் தொடர்ந்து ட்ராக் செய்வதன்மூலம், குழந்தைகளுக்கான உணவுப் பொருளைத் தயாரிக்கும் நெஸ்லே போன்ற நிறுவனத்திடமோ அல்லது  குழந்தை களுக்கான ஆடைகளைத் தயாரிக்கும் நிறுவனத்திடமோ நாம் தொடர்புகொண்டு, என்னிடம் உள்ள வாடிக்கையாளர்கள் சுமார் 25,000 பேர்களின் (உதாரணத்துக்கு) வீடுகளில் குழந்தைகள் இருக்கிறார்கள். அவர்களுக்கு, உங்கள் தயாரிப்பு பொருள்கள் குறித்து மெசேஜ் அனுப்ப வேண்டுமா அல்லது அவர்களை உங்கள் பக்கம் ஈர்க்கும் விளம்பரங்களை அனுப்ப வேண்டுமா என ‘டீல்’ பேச முடியும்.

அதாவது, வாடிக்கையாளர் எப்போது, என்ன வாங்குகிறார், எந்தப் பொருளை வாங்குவதற்கு அதிக முக்கியத்துவம் கொடுக்கிறார் அல்லது விரும்புகிறார் என்பதைத் தெரிந்து கொள்ள முடியும். உதாரணமாக, ஒரு வாடிக்கையாளர் இன்று ஒரு புத்தகம் வாங்கினால், நாளை அதேபோன்ற புத்தகம் சந்தைக்கு வந்தால், உடனே இந்த நிறுவனங்களால், சம்பந்தப்பட்ட வாடிக்கையாளருக்கு, ‘‘நீங்கள் ஏற்கெனவே வாங்கிய புத்தகம் போன்றே இன்னொன்று வந்துள்ளது. உங்களுக்கு வாங்க விருப்பமா?’’ எனக் கேட்டுத் தகவல் அனுப்ப முடியும். இதன்மூலம் விற்பனை அதிகரித்து, அதற்கேற்ப லாபமும் அதிகரிக்கும்.

எனவே, நீண்ட கால அடிப்படையில் பார்க்கும்போது, இந்த நிறுவனங்களுக்கு நல்ல எதிர்காலம் உள்ளது. மேலும், சந்தையில் இன்றுள்ள இ-காமர்ஸ் நிறுவனங்களில் 90% மூடப்படும் அல்லது பெரிய நிறுவனங்களால் கையகப்படுத்தப்படும். பெரிய நிறுவனங்களால் கையகப்படுத்தப்பட்டு, பெரிய நிறுவனங்கள் மட்டுமே சந்தையில் இருக்கும்.”