Published:Updated:

உங்கள் பிரச்னை, எங்கள் தீர்வு - 11 - சைக்கிளைப் போல இருங்கள்!

உங்கள் பிரச்னை, எங்கள் தீர்வு - 11 - சைக்கிளைப் போல இருங்கள்!
பிரீமியம் ஸ்டோரி
News
உங்கள் பிரச்னை, எங்கள் தீர்வு - 11 - சைக்கிளைப் போல இருங்கள்!

பிசினஸ்ராமாஸ் கிருஷ்ணன், நிறுவனர் மற்றும் நிர்வாக இயக்குநர், ஆஷ்பயர் இன்ஃபினிட் அண்டு டேப் இண்டியா (Aspire Infinite and TAB India)

தீபாவளி முடிந்த அடுத்த நாள் ‘சவுண்டிங் போர்டு’ உறுப்பினர்கள் அனைவரும் அந்தக் குழுவின் மூத்த உறுப்பினர்களான திரிலோக்கின் வீட்டில் கூடினார்கள். தீபாவளிப் புத்தாடைகள் அணிந்து அனைவரும் வந்திருந்தார்கள். தீபாவளி இனிப்புகளை அனைவரும் சாப்பிட்டு முடித்தபிறகு, அன்றைய கூட்டத்துக்குப் புதிதாக ஒரு இளம் தொழில்முனைவர் வந்திருப்பதை எல்லோரும் கவனித்தார்கள். ‘சவுண்டிங் போர்டு’-ல் உறுப்பினராக இருக்கும் ரமேஷின் நண்பர் சிவாதான் அந்தப் புதிய நபர். இந்தக் குழுவின் நடைமுறைகள் பற்றி ரமேஷ்மூலம் நிறைய கேள்விப்பட்டிருக்கிறார் சிவா. என்றாலும், முதல்முறையாக இந்த மீட்டிங்கில் அவர் கலந்துகொள்கிறார் என்பதால், அவருக்குக் கொஞ்சம் தயக்கமாகவும் இருந்தது. அவரைக் கூட்டத்தின் மற்ற உறுப்பினர்களுக்கு முறைப்படி அறிமுகம் செய்துவைத்தார் ரமேஷ்.

‘‘என் நண்பர் சிவக்குமார், பாரத் ஹெவிமெட்டல்ஸ் லிமிடெட் நிறுவனத்தின் சி.இ.ஓ. அவரது அப்பாதான் அந்த நிறுவனத்தைத் தொடங்கி நடத்தினார். இன்ஜினீயரான சிவா, தொழில் உலகுக்குப் புதுசு’’ என்று சொல்லிவிட்டு, அவரைப் பேசும்படி அழைத்தார். சிவா தயங்கித் தயங்கி தனது பிரச்னையைச் சொல்ல ஆரம்பித்தார்.

உங்கள் பிரச்னை, எங்கள் தீர்வு - 11 - சைக்கிளைப் போல இருங்கள்!

‘‘நான் தொழில் செய்யப் புகுந்தது ஒரு விபத்து என்றுதான் சொல்ல வேண்டும். என் அப்பாதான் இந்த நிறுவனத்தைத் தொடங்கினார். நான் படித்துவிட்டு, வெளிநாட்டு கம்பெனி யில் வேலை செய்வதாகத் திட்டம். ஆனால், படித்து முடித்தவுடன் நான் இந்த நிறுவனத்தைத் தலைமை தாங்கி நடத்த வேண்டிய கட்டாயத்துக்கு உள்ளானேன். எனக்கும் தொழில் செய்ய வேண்டும் என்றுதான் ஆசை. ஆனால், நான் அடைய வேண்டிய இலக்கு எது என்று தெரியாமல் தவிக்கிறேன். தொழிலை நல்லபடியாக நடத்துவது புலி வாலைப் பிடித்த மாதிரி இருக்கிறது. வாலைப் பிடித்து, அதன் பின்னால் ஓடவும் முடியவில்லை; எப்படியோ போய்த் தொலைகிறது என்று வாலை விடவும் முடியவில்லை’’ என்றார்.

சிவா எதிர்கொண்டிருக்கும் பிரச்னை மிக முக்கியமானது என்பதால், ‘சவுண்டிங் போர்டு’ டீமின் மிக மூத்த உறுப்பினரான திரிலோக்கே பதில் சொல்ல ஆரம்பித்தார்.

‘‘குழம்பிப் போயிருக்கும் நீங்கள், எந்த நிலையிலும் தொழிலை விட்டுவிட்டு வெளியே போய்விடக் கூடாது என்பதில் உறுதியாக இருங்கள். ஒரு நிறுவனத்தின் ஓனர் என்பவர், தனது பிசினஸை தொலைநோக்குடன் பார்ப்பார். தனது வாடிக்கையாளர்களுக்குப் பணிவிடை செய்வதற்காகத் தன்னை அர்ப்பணித்துக் கொள்வார். அதற்காக கஷ்டப்பட்டு உழைத்தாலும், அதன்மூலம் கிடைக்கும் பலனை அனுபவிப்பதில் கடைசியில் இருப்பார். அதே நேரத்தில், அவர் தனது பிசினஸை எப்படி வளர்த்தெடுப்பது என்பது குறித்து யோசித்துக் கொண்டே இருப்பார். இதுதான் ஒரு தொழில்முனைவருடைய டி.என்.ஏ என்கிறோம். ஒரு தொழிலில் ஏற்படும் சவால்களை எதிர்கொள்ள முடியாதபோது, அவரது தொழில் தடைகளைச் சந்திக்க ஆரம்பித்துவிடுகிறது. போராடும் குணம் கொண்ட ஒரு பிசினஸ்மேன் இந்தத் தடைகளை உடைத்துக் கொண்டு, முன்னேற வேண்டும்.

‘‘உங்கள் தொழிலில் நீங்கள் மிகப் பெரிதாக மதிக்கும் விஷயம் என்ன?’’ என்று பல தொழில்முனைவர் களிடம் நான் கேட்டிருக் கிறேன். பலரும் பலவிதமான பதில்களைச் சொல்வார்கள். ஆனால், நான் எதிர்பார்க்கும் முக்கியமான பதிலை இதுவரை யாரும் சொல்ல வில்லை. அது, அவருடைய நிறுவனத்தைப் பெரிதாக வளர்த்தெடுக்க வேண்டும் என்று நினைக்கிற அவருடைய கனவு. தான் செய்யும் தொழில்மீது தான் கொண்டிருக்கும் காதலை, தான் தயாரிக்கும் பொருளுடன் பலரும் இணைத்துப் பார்ப்பதில்லை. அப்படி இணைத்துப் பார்க்காதபோது, அவர் தயாரிக்கும் பொருளுக்கான விலை எப்படிச் சரியாக இருக்கும்?

உங்கள் கனவைப் பற்றி உங்களுக்கே சரியான அபிப்ராயம் இல்லாதபோது, உங்கள் தயாரிப்பு களுக்கு உங்கள் வாடிக்கையாளர் எப்படி மதிப்பு தருவார், உங்கள் விற்பனைப் பிரதிநிதிகள் அந்தப் பொருளை சந்தையில் எப்படிப் பெருமையாக விற்பார்கள், வாடிக்கையாளர்களின் தேவைக் கேற்ப உங்கள் உற்பத்திக்குழு எப்படிப் பொருள் களைத் தயாரிக்கும், உங்கள் பிசினஸில் திறமையான ஊழியர்களை வேலைக்கு அமர்த்தத் தேவையான பணத்தை விற்பனையிலிருந்து எப்படிப் பெறுவீர்கள், புதிய பொருள்களைத் தயாரிப்பதற்குத் தேவையான மூலதனத்தை எங்கிருந்து பெறுவீர்கள்? இதெல்லாம் நடக்காத போது உங்கள் பிசினஸுக்கும், மற்ற பிசினஸ் களுக்கும் எந்தத் தொடர்பும் இல்லாமல் போய், கடைசியில் அது காணாமலே போய்விடுகிற அபாயம் இருப்பதை மறுக்கமுடியுமா?

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
உங்கள் பிரச்னை, எங்கள் தீர்வு - 11 - சைக்கிளைப் போல இருங்கள்!

ஒரு பிசினஸின் சொந்தக்காரர் என்பவர், அந்த பிசினஸை சொந்தம் கொண்டாடுவதை விட்டுவிட்டு, அந்த பிசினஸை வளர்த்தெடுக்கும் கனவினை சொந்தம் கொண்டாட வேண்டும். அப்போதுதான் அவர் அடைய நினைக்கும் இலக்கினை அவரால்  அடைய முடியும்.

ஒரு தொழில் நடத்துவது என்பது மியூச்சுவல் ஃபண்டில் முதலீடு செய்கிற மாதிரி. ஃபண்டில் முதலீடு செய்தபின், அதன்மூலம் கிடைக்கும் வருமானம் எவ்வளவு என்று பார்க் கிறோம். நாம் எதிர்பார்த்த அளவுக்கு வருமானம் கிடைக்கவில்லை என்றால், நமது போர்ட்ஃபோலி யோவில் சில மாற்றங்களைச் செய்கிறோம். நமது போர்ட்ஃபோலியோவில் இருக்கும் பங்குகளை நாம் காதலிக்கக் கூடாது. நாம் எதிர்பார்க்கிற வருமானம் தரும்வரைதான் அவற்றைக் காதலிக்க வேண்டும். அதுமாதிரி, நமது தயாரிப்புகளையோ, வாடிக்கையாளர்களையோ அல்லது நாம் வைத்திருக்கும் சொத்துகளையோ நாம் காதலிக்கக் கூடாது; நமது கனவுகளைத்தான் காதலிக்க வேண்டும்.

ஆக, பிசினஸ் என்பது வேறு, அதனை சொந்தம் கொண்டாடுவது என்பது வேறு என்பதைத் தெளிவாகப் பிரித்துப் பார்க்கத் தெரிய வேண்டும். எப்படி இது சாத்தியம் என்று கேட்கிறீர்களா?

உங்கள் பிசினஸை இரு சக்கரங்கள் கொண்ட தொரு சைக்கிளாக நினைத்துப் பாருங்கள். ஒரு சைக்கிளின் பின்சக்கரம் அந்த சைக்கிளை மிக வேகமாக முன்னுக்குத் தள்ளிக் கொண்டு செல்லக்கூடியதாகும். அந்த சைக்கிளின் முன்சக்கரம், அந்த சைக்கிள் எந்த இடத்துக்குச் செல்ல வேண்டும் என்பதைத் தீர்மானிக்கக்கூடியதாகும். என்ன தான் சைக்கிளின் பின்சக்கரத்தை வேகமாக இயக்கினாலும், முன்சக்கரம் தவறான பாதையில் சென்றுகொண்டிருக்கும்பட்சத்தில் அதனால் எந்தப் பிரயோஜனமும் இல்லை.

இதேபோல, ஒரு தொழிலின் ஓனர் தனது பிசினஸை முன்னேற்ற மிகவும் கஷ்டப்பட்டு உழைத்தாலும், அவரது கனவும், எதிர்காலம் குறித்த சரியான கணிப்பும்தான் அவரது பிசினஸை சரியான இலக்கினை நோக்கிக் கொண்டுசெல்லும். இதன்மூலமாக மட்டுமே ஒருவர் தொழில்முனைவர் தனது வாழ்க்கையை சந்தோஷமாக அமைத்துக்கொள்ள முடியும்.

இதற்கு நீங்கள் செய்ய வேண்டிய முக்கியமான விஷயம், உங்களுடைய பிசினஸ் இலக்குகளையும், உங்களது தனிப்பட்ட மதிப்பீடுகளையும் தனித்தனியாகப் பிரித்தறிந்து பார்க்கத் தெரியவேண்டும். பிசினஸ் இலக்குகள் உங்கள் லட்சியத்தை வருமானமாகவும், லாபமாகவும் மாற்றும். உங்கள் லட்சியத்தை எந்த வேகத்தில் சென்றால் அடைய முடியும், அதற்கு எவ்வளவு உழைப்பும், மூலதனமும் வேண்டும் என்பதைக் கண்டறிய உதவும்.

அடுத்து நீங்கள் செய்ய வேண்டிய முக்கியமான விஷயம், உங்கள் மனப்பான்மை மற்றும் உங்களுக்குக் கிடைக்கும் வாய்ப்பின் அடிப்படையில் உங்கள் பிசினஸுக் கான கொள்கைகளை உருவாக்கிக் கொள்ளுங்கள். இதன்மூலம் உங்கள் பிசினஸில் என்ன செய்ய முடியும் அல்லது முடியாது என்பதைத் தெளிவாக வரையறுத்துக்கொள்ள முடியும். இதன்மூலம் உங்கள் பிசினஸை மற்ற பிசினஸ்களிலிருந்து வித்தியாசப்படுத்திப் பார்க்க முடியும்.

ஆக மொத்தத்தில், ஒரு பேப்பரை எடுத்துக்கொண்டு உங்கள் கனவினை அதில் தெளிவாக எழுதுங்கள். உங்கள் கனவு நீங்கள் சென்றடைய நினைக்கும் இலக்கினையும், அந்த இலக்கினை அடைய நீங்கள் தேர்வு செய்ய வேண்டிய பாதையையும் உங்களுக்குக் காட்டும்’’ என்று திரிலோக் பேசி முடித்தார். திரிலோக் சொன்ன விளக்கம் சிவக்குமார் மனதில் அவரது பிசினஸ் குறித்த தனது கனவு என்ன என்பது குறித்து யோசிக்க வைத்தது. அந்தக் கனவினை இன்னும் அழகாக வளர்த்தெடுப்பது எப்படி என்பது குறித்து அவர் யோசிக்கத் தொடங்கினார். ‘கனவு காண்’ என நமது முன்னாள் ஜனாதிபதி அப்துல் கலாம் சொன்னதன் அருமை, சிவக்குமாருக்கு இப்போது தெளிவாகப் புரிய ஆரம்பித்தது.

(தீர்வுகள் தொடரும்)

கேளுங்கள் சொல்கிறோம்!

கடந்த பத்து ஆண்டுகளாக தனியாகத் தொழில் செய்துவந்தேன். இப்போது என் நண்பரை என்னுடன் கூட்டாளியாகச் சேர்த்துக்கொள்ள விரும்புகிறேன். சோல் புரப்பரைட்டர்ஷிப் என்பதிலிருந்து பார்ட்னர்ஷிப் ஆக எனது தொழிலை மாற்ற நான் என்னென்ன விஷயங்களைக் கவனத்தில் கொள்ள வேண்டும்?

எஸ்.கதிர், திருச்சி.

‘‘தனிப்பட்ட முறையில் நீங்கள் நடத்திவரும் இந்தத் தொழில் நல்ல லாபம் சம்பாதித்து வருகிறது எனில், அதை பார்ட்னர்ஷிப்பாக மாற்ற வேண்டுமா என்பதை நன்கு யோசியுங்கள். தொழிலுக்காக ஒரு நல்ல நண்பனை இழந்துவிடாதீர்கள். இரண்டாவதாக, உங்கள் பார்ட்னர், உங்கள் தொழிலின் மதிப்பீட்டை உயர்த்தவும், தொழிலை வளர்ச்சி காண வைக்கவும் எந்த வகையில் உதவுவார் என்று பாருங்கள். அதுதான், அவருக்கு நீங்கள் தரவேண்டிய பங்கினைத் தீர்மானிக்க உதவும். 50:50 என்கிற விகிதத்தில் நீங்கள் பங்கினைத் தரவேண்டும் என்று எந்த அவசியமும் இல்லை. எந்த முக்கியமான முடிவாக இருந்தாலும், அதை ஒருவர் மட்டுமே எடுக்கிறமாதிரி இருப்பது நல்லது. இறுதியாக, லாபத்தைப் பகிர்ந்துகொள்கிற மாதிரியான ஒரு பார்ட்னர்ஷிப்பை நீண்ட காலத்துக்கு ஏற்படுத்திக் கொள்ளுங்கள். பார்ட்னர்களாக உங்கள் உறவு வலுப்படும்பட்சத்தில், உங்கள் பார்ட்னர்ஷிப்பினை முறைப்படி அமைத்துக்கொள்ளலாம். இந்த விஷயத்தில் நீங்கள் நிதானமாகச் செயல்படுவது நல்லது.’’

பிசினஸில் நீங்கள் சந்திக்கும் பிரச்னைகளை navdesk@vikatan.com என்கிற மின்னஞ்சலுக்கு சுருக்கமாக எழுதி அனுப்புங்கள்! உங்கள் பிரச்னைக்கு நாங்கள் பதில் தருகிறோம்!