Published:Updated:

ஜி.டி.பி குழப்பங்கள் ஏன்?

ஜி.டி.பி குழப்பங்கள் ஏன்?

பிரீமியம் ஸ்டோரி

மீண்டும் சர்ச்சையைக் கிளப்பி அடங்கியிருக்கிறது ஜி.டி.பி குறித்த கணக்கீடு. 2004-05 முதல் 2011-12 வரையிலான மொத்த உள்நாட்டு உற்பத்தி (ஜி.டி.பி) குறித்த புள்ளிவிவரங்கள் (2011-12 வரிசை), சமீபத்தில் மத்திய புள்ளியியல் நிறுவனத்தால் திருத்தி அமைக்கப்பட்டுள்ளது. இது, இந்தியாவிலுள்ள புள்ளியல் அமைப்புக்களின் ஆஸ்தான அமைப்பாகக் கருதப்படும் தேசிய புள்ளியியல் ஆணையம் கடந்த ஆகஸ்ட் மாதத்தில் வெளியிட்ட ஜி.டி.பி எண்களிலிருந்து மாறுபட்டு இருந்ததால், முதலீட்டாளர்கள் மத்தியில் குழப்பம் எழுந்தது. மேலும், தன்னாட்சி அமைப்புகள் வெளியிட வேண்டிய பொருளாதார புள்ளிவிவரங்களை, அரசியல் சார்புள்ள நிதி ஆயோக் அமைப்பு வெளியிட்டது புதிய சர்ச்சையையும்  எழுப்பியுள்ளது.

   அடிப்படை ஆண்டு மாற்றல் அவசியமே

ஜி.டி.பி மதிப்பீடுகள், புள்ளிவிவரங்கள் சேகரிக்கப்படும் காலகட்டத்தின் பொருளாதாரச் சூழ்நிலைகளைச் சரியாகப்  பிரதிபலிக்க வேண்டும் என்பதால், அடிப்படை ஆண்டு குறிப்பிட்ட கால இடைவெளிகளில் மாற்றி அமைக்கப்படுகிறது. சுதந்திர இந்தியாவில் இதுவரை ஏழு முறை அடிப்படை ஆண்டுகள் மாற்றியமைக்கப் பட்டுள்ளன. கடைசியாக, 2004-05-ம் ஆண்டின் மொத்த பொருளாதார உற்பத்தியை 100 என்ற அடிப்படையாகக் கொண்ட அளவுகோலின் உதவியுடன் ஜி.டி.பி வளர்ச்சி 2014 நிதியாண்டு வரை கணக்கிடப்பட்டு வந்தது.

ஜி.டி.பி குழப்பங்கள் ஏன்?

மத்தியில் ஆட்சி மாற்றத்திற்குப்பின் (2015), அடிப்படை ஆண்டு 2011-12 என மாற்றியமைக்கப்பட்டது. கூடவே, ஜி.டி.பி வளர்ச்சியைக் கணக்கிடும் முறையும் மாற்றப்பட்டது. சர்வதேச நடைமுறை களின் அடிப்படையில் இந்த மாற்றம் கொண்டு வரப்பட்டதாக மத்திய அரசு விளக்கம் கூறியதை, அப்போதைய ரிசர்வ் வங்கி கவர்னரான ரகுராம் ராஜன் ஏற்றுக்கொள்ளவில்லை. மேலும், புதிய வரிசை தொடங்கும்போது,  முதலீட்டாளர்கள் மற்றும் பொருளாதார நிபுணர்களின் வசதிக்காகத் திருத்தியமைக்கப்பட்ட பழைய பொருளாதாரத் தகவல்களும் வெளியிடும் நடைமுறையும் அப்போது பின்பற்றப்படவில்லை என்பது வருத்தத்துக்குரியது.

சுமார் மூன்று வருடங்கள் கழிந்தபிறகு, ஜூலை 2018-ல், தேசிய புள்ளியல் ஆணையம் திருத்தி அமைக்கப்பட்ட ஜி.டி.பி தகவல்களை வெளி யிட்டது. 2004-2014 காலகட்டத்தின் (மன்மோகன் சிங் ஆட்சி) பொருளாதார வளர்ச்சி 2014-18 (நரேந்திர மோடி ஆட்சி) காலகட்டத்தைவிட அதிகமாக இருப்பதாக வெளிவந்த தகவல்கள், ஆட்சியாளர்கள் மத்தியில் அரசியல்ரீதியான சங்கடத்தை ஏற்படுத்தியது. அந்தப் புள்ளி விவரங்கள் இணையதளத்தில் உடனே நீக்கப் பட்டன. பின்னர், பெருவாரியாக விமர்சனங்கள் எழுந்தவுடன் மீண்டும் வெளியிடப்பட்டன. மேலும், அவை அதிகாரப்பூர்வமானவை அல்ல என்ற விளக்கமும் அளிக்கப்பட்டன.

இந்தச் சூழ்நிலையில், மீண்டும் திருத்தி யமைக்கப்பட்ட ஜி.டி.பி வளர்ச்சி விகிதங்கள் தற்போது வெளியிடப் பட்டுள்ளன.  இந்தத் தகவல்களின் படி, 2004-2014 காலகட்டத்தில் பொருளாதார வளர்ச்சி குறைவு என்றும், 2014-2018 காலகட்டத்தில் அதிகம் எனவும் தெரிவிக்கப் பட்டுள்ளது.

ஜி.டி.பி குழப்பங்கள் ஏன்?

    அரசின் பார்வையில்...

அமைப்புசாராத் சேவைத் துறைகளில், பழைய முறைப்படி, மொத்த விற்பனையின் வளர்ச்சி விகிதம் கருத்தில் கொள்ளப்பட்ட தற்கு மாறாக, புதிய முறையில் விற்பனை வரி வளர்ச்சி மற்றும் மொத்த பணவீக்கம் கணக்கில் கொள்ளப்பட்டுள்ளன. விற்பனை வரி வளர்ச்சி விகிதம், மொத்த விற்பனை வளர்ச்சியைவிட குறைவாக இருக்கவே, ஜி.டி.பி வளர்ச்சி விகிதமும் குறைக்கப்பட்டது. தொலை தொடர்புத் துறையில், பழைய முறையில் பயனாளிகளின் வளர்ச்சியைக் கருத்தில் கொள்ளப்பட, புதிய முறையில் உபயோக அதிகரிப்புக் கணக்கில் கொள்ளப்பட்டது. இதிலும் பயனாளிகளின் எண்ணிக்கை அதிகரிப்பைவிட உபயோகத்தின் வளர்ச்சி குறைவாக இருக்கவே ஜி.டி.பி வளர்ச்சி விகிதம் குறைக்கப்பட்டது.

இந்திய ரிசர்வ் வங்கியின் வங்கிப் பிரிவு, முந்தைய முறையில் சந்தைக்கு சம்பந்தப்பட்ட அமைப்பாகக் கருதப்பட்டு அதன் பங்களிப்பு பழைய ஜி.டி.பி-யில் சேர்த்துக்கொள்ளப்பட்டது. ஆனால், தற்போது, ரிசர்வ் வங்கிப் பிரிவு, சந்தை சாராத அமைப்பாகக் கருதப்பட்டு, ரிசர்வ் வங்கி யின் ஜி.டி.பி பங்களிப்புக் குறைக்கப்பட்டுள்ளது.

   நிபுணர்களின் பார்வையில்...

முந்தைய காலகட்டத்திற்கான ஜி.டி.பி-யைக் கணக்கிடுவதற்கு, தற்போதைய பொருளாதார விகிதாச்சார (weights) அளவுகோலைப் பயன்படுத்தியது விநோதமானது. எடுத்துகாட்டாக, இன்றைய சந்தைப் பொருளாதாரத்தில் பெரும்பங்கு வகிக்கும் இணையதள வணிகம், சுமார் பத்து வருடங்களுக்குமுன் இந்தியப் பொருளாதாரத்தில் மிகக் குறைந்த பங்கையே வகித்தது. இணையதள வணிகத்தின் இன்றைய நிலையை அடிப்படை அளவுகோலாகக் கொண்டு, பத்து வருடங்களுக்கு முன்பான புள்ளியியல் தகவல்களை ஆராய முயற்சி செய்வது தவறான விடையையே கொடுக்கும்.

மேலும், நாமினல் ஜி.டி.பி எனப்படும் உத்தேச மொத்த உள்நாட்டு உற்பத்தியானது (GDP at Current Prices), இரண்டு வகையான மதிப்பீட்டு முறை யிலும் பெருமளவு மாறுபடாத நிலையில், ரியல் ஜி.டி.பி-யில் மட்டும் அதிகளவு வேறுபடுவது ஆச்சர்யத்தை அளிக்கிறது. இதற்கு முக்கியக் காரணம், நாமினல் ஜி.டி.பி-யில் இருந்து ரியல் ஜி.டி.பி-யை அறிய உதவும் பணவாட்ட அளவுகோலை (Deflator) சரிவர பயன்படுத்தாதது தான்.

ஜி.டி.பி குழப்பங்கள் ஏன்?

   காகிதக் கப்பல் கரை சேராது

ஜி.டி.பி என்பது அதிமுக்கியமான பொருளா தார புள்ளிவிவரம் என்றாலும், நிறுவனங்களின் விற்பனை, வங்கிக் கடன், கரன்சி புழக்கம், வரிவசூல், பங்குச் சந்தைகள், அந்நிய முதலீடு, ரூபாய் மதிப்பு போன்ற முக்கிய பொருளாதாரக் காரணிகளில் ஏற்படும் மாற்றங்கள் பொருளாதாரத்தின்  உண்மையான நிலையைப் புடம்போட்டுக் காட்டுகின்றன.

ஜி.டி.பி புள்ளிவிவரங்கள் சர்வதேச தரம் மற்றும் ஐக்கிய நாடுகள் சபையின் அளவுகோலின் அடிப்படையிலேயே திருத்தியமைக்கப்பட்டன என்று நிதி ஆயோக் துணைத் தலைவர் மல்லு கட்டினாலும், இந்தியாவின் முன்னாள் தலைமைப் புள்ளியல் அதிகாரியான, பிரணாப் சென் போன்றவர்கள், பொருளாதாரத் தகவல்கள் தொழில்முறை வல்லுனர்களால் மட்டுமே மதிப்பிடப்பட வேண்டும் என்றும், இந்த விவகாரத்தில் நிதி ஆயோக்கின் தலையீடு சந்தேகங்களைக் கிளப்புகிறது என்றும் சொல்லி யிருக்கிறார். மேலும், குறைவான ஜி.டி.பி வளர்ச்சி உள்ளதாகக் கூறப்படும் காலகட்டத்தில் தொழில் நிறுவனங்களின் வருவாய் வளர்ச்சி அதிகமாக இருப்பதும், ஜி.டி.பி வளர்ச்சி அதிகமாக  உள்ளதாகக் கூறப்படும் காலகட்டத்தில் வளர்ச்சி குறைவாக இருப்பதும் முரணாக உள்ளது. 

   புள்ளிவிவரப் புரட்டுக்கள் ஆபத்தானவை

இந்தியா போன்ற வளரும் நாடுகள் தமது வளர்ச்சிக்குத் அத்தியாவசமான மூலதனத்திற்கு பெரும்பாலும் அந்நிய முதலீட்டையே எதிர் நோக்கியுள்ளன. அந்நிய முதலீடு பெறுவதற்கோ, ஒரு நாட்டின் நம்பகத்தன்மை மிகமிக அவசியம். பொருளாதாரப் புள்ளி விவரங்களில் அரசியல் தலையீடு என்பது நம்பகத் தன்மையை முற்றிலும் சிதறடிக்கக்கூடியது. புதிய அணுகுமுறைக்கு சில நியாயமான காரணங்கள் இருந்தாலும்கூட, சுயேச்சை அமைப்பான புள்ளியியல் நிறுவனத்தின் செயல்பாடுகளில் நேரடியான அரசியல் தலையீட்டை ஒருபோதும் நியாயப்படுத்த முடியாது. சீனாவிடம் நாம் பின்பற்ற  எவ்வளவோ நல்ல விஷயங்கள் இருக்கும்போது, புள்ளிவிவரப் புரட்டு மட்டும் வேண்டவே வேண்டாம்.

பொதுமக்களின் பார்வையில், நல்ல பொருளாதார வளர்ச்சி என்பது வருவாய் மற்றும் வாழ்க்கைத் தர உயர்வு மட்டுமே. முதலீட்டாளர்கள் பார்வையிலோ சிறப்பான பொருளாதார வளர்ச்சி என்பது நிறுவனங்களின் அதிக வருவாய் மற்றும் பங்கு விலைகளில் வருவாய் வளர்ச்சியின் பிரதிபலிப்பு மட்டுமே. எளியவரும்கூட எளிதில் உணரக் கூடிய வகையிலான உயரிய பொருளாதார வளர்ச்சியைத்தான் மக்கள் எதிர்பார்க்கிறார்களே தவிர, பழைய புள்ளிவிவரங்களின் பின்தேதியிட்ட மாற்றங்களை அல்ல!

- சுமதி மோகனப் பிரபு

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு