Published:Updated:

வரிச் சலுகை... என்னென்ன வாய்ப்புகள்?

வரிச் சலுகை... என்னென்ன வாய்ப்புகள்?
பிரீமியம் ஸ்டோரி
வரிச் சலுகை... என்னென்ன வாய்ப்புகள்?

கேள்வி - பதில்

வரிச் சலுகை... என்னென்ன வாய்ப்புகள்?

கேள்வி - பதில்

Published:Updated:
வரிச் சலுகை... என்னென்ன வாய்ப்புகள்?
பிரீமியம் ஸ்டோரி
வரிச் சலுகை... என்னென்ன வாய்ப்புகள்?

வருமான வரிச் சட்டம் 80சி, 80டி தவிர வேறெந்த வழிகளில் வரிக்கழிவுக்கு வாய்ப்புகள் உள்ளன?

சங்கரராமன், சென்னை

கே.ஆர்.சத்யநாராயணன், ஆடிட்டர்

“வருமான வரிச்சட்டம் 80CCD (1B)  பிரிவுபடி, என்.பி.எஸ் முதலீட்டில் கூடுதலாக 50,000 ரூபாய்வரை வரிக்கழிவு பெறலாம்.

மூத்தக் குடிமக்கள், வருமான வரிச் சட்டம் 80-TTB பிரிவின்படி, ரூ.50,000 வரை தங்களது வங்கி, அஞ்சலக சேமிப்பின் வட்டித் தொகைக்கு வரிக்கழிவு பெறலாம்.

80E பிரிவின்படி, எட்டு ஆண்டுகள் வரை கல்விக் கடனுக்காகச் செலுத்தப்படும் வட்டியை வரிக்கழிவில் சேர்க்கலாம்.  முதல்முறையாக வீடு கட்டியவர்கள் / வாங்கியவர்கள்,  80EE பிரிவின்படி, ரூ.50,000 வரை வட்டித் தொகையை வரிக்கழிவுக்குக் காட்டலாம். அடுத்தவரைச் சார்ந்துவாழும் உடல் ஊனமுற்றவர்களில் 40-80% வரை ஊனமுற்றவர்கள் ரூ.75,000 வரையிலும், 80 சதவிகிதத்துக்கு மேல் ஊனமுற்றவர்கள் ரூ.1,25,000 வரையிலும் பிரிவு 80DDB-யின்படி மருத்துவச்செலவுகளுக்கு வரிக்கழிவு பெறலாம். உடல் ஊனத்தால் துன்பப் படுபவர்களுக்கு வருமான வரிச் சட்டம் 80U-யின் படி ரூ.75,000 வரையிலும், மிகவும் அதிகமாகத் துன்பப்படுபவர்களுக்கு ரூ.1,25,000 வரையிலும் வருமான வரிக்கழிவு உண்டு.”

வரிச் சலுகை... என்னென்ன வாய்ப்புகள்?

நான் ஏற்றுமதியாளராக ஆர்வமாக உள்ளேன். அதற்கு என்ன செய்ய வேண்டும்?

முத்துகுமார், தூத்துக்குடி

கே.எஸ்.கமாலுதீன், இயக்குநர், புளூபாரத் எக்ஸிம் பிரைவேட் லிமிடெட்

“முதலில் ஏற்றுமதியாளராக இருக்க நீங்கள் தகுதியானவரா என்பதைத் தெரிந்துகொள்ளுங்கள். தகுதி என்பது, ஏற்றுமதி பற்றிய உங்களது அடிப்படை அறிவு, அதுகுறித்த தொழில்நுட்ப அறிவு மற்றும் வெளிநாடுகளில் உங்களுக்கு உள்ள தொடர்புகள் ஆகியவற்றைக்கொண்டே தீர்மானிக்கப்படும். இவற்றில் நீங்கள் தகுதியானவராக இருந்தால் கூடுதலாகப் பயிற்சி எடுத்துக்கொள்ள வேண்டும். அடுத்ததாக ஏற்றுமதியின் ஒவ்வொரு நிலையிலும் இருப்பவர் களின் பணி குறித்துத் தெரிந்திருக்க வேண்டும். இவை அனைத்திலும் தேர்ச்சி பெற்றிருந்தால் நீங்கள் தைரியமாக ஏற்றுமதித்துறையில் இறங்கி செயல்படலாம்.”

என் வயது 28. மாதாமாதம் ரூ.6,000 வீதம் 30 ஆண்டுகளுக்கு மியூச்சுவல் ஃபண்டில் முதலீடு செய்ய விரும்புகிறேன். மியூச்சுவல் ஃபண்ட் முதலீட்டுக்குப் புதியவனான எனக்கு ஆலோசனை கூறுங்கள்.

ராஜ்குமார், சிவகாசி

ஸ்ரீகாந்த் மீனாட்சி, துணை நிறுவனர், ஃபண்ட்ஸ் இந்தியா

“ஆரம்ப நிலை முதலீட்டாளர்களுக்கு உகந்த ஃபண்ட் வகை, ஹைபிரீட் ஃபண்டுகளாகும். இந்த வகை ஃபண்டுகளில் பங்குச் சந்தை முதலீடுகளும் உண்டு, கடன் சார்ந்த மியூச்சுவல் பண்ட் முதலீடுகளும் உண்டு. ஹெச்.டி.எஃப்.சி ஈக்விட்டி ஹைபிரீட் ஃபண்ட், ஆதித்ய பிர்லா சன் லைஃப் ஈக்விட்டி ஹைபிரீட் 95 ஃபண்ட் ஆகியவற்றில் தலா ரூ.3,000 வீதம் முதலீடு செய்து வரவும். உங்கள் வருமானம் அதிகரிக்கையில் வரும் வருடங்களில் இவற்றுடன் முற்றிலும் பங்கு சார்ந்த  ஃபண்டுகளில் நீங்கள் நுழையத் தொடங்கலாம்.”

வயது 34. தனியார் நிறுவனத்தில் மாத சம்பளம் ரூ.35,000 வருமானமுள்ள எனக்கு 4 வயதில் ஒரு குழந்தை உள்ளது. தற்போது எனது குடும்பத்திற்கு எந்தெந்த விஷயங்களைக் கவனத்தில் கொண்டு எவ்வளவு தொகைக்கு ஹெல்த் இன்ஷூரன்ஸ் பாலிசி எடுக்கலாம்?

செந்தில்குமார், பொள்ளாச்சி

பி.மனோகரன், இன்ஷூரன்ஸ் ஆலோசகர்

“தொடர்ச்சியாக எவ்வளவு பிரீமியம் தொகை கட்ட முடியும் என்பதைப் பார்க்க வேண்டும். அடுத்ததாக, உங்களுடைய வசதி மற்றும் விருப்பத்திற்கேற்ற மருத்துவமனையில் மருத்துவம் பார்க்க, அதற்கேற்ற காப்பீட்டுத்தொகையைத் தேர்வு செய்ய வேண்டும். குடும்பத்தில் எத்தனை உறுப்பினர்களை இந்த ஹெல்த் இன்ஷூரன்ஸ் பாலிசியில் கவர் செய்ய விரும்புகிறீர்கள் என்பதைப் பொறுத்து பாலிசி எடுக்க வேண்டும். இறுதியாக எந்த நிறுவனத்தின் ஹெல்த் இன்ஷூரன்ஸ் பாலிசியை எடுப்பது என்பதை முடிவுசெய்ய வேண்டும். அந்த நிறுவனத்தில் கேஷ்லெஸ் பாலிசி கொடுக்கிறார்களா, நமக்கு அருகிலுள்ள, நம் வசதிக்கேற்ற மருத்துவ மனைகளோடு இணைப்பில் இருக்கிறதா என்பதைப் பார்க்க வேண்டும். அதன்பிறகு பாலிசியை உறுதி செய்யலாம். உங்களுடைய வருமானம் மற்றும் சூழலை வைத்துப்பார்க்கையில் ரூ.1.50 லட்சம் முதல் 2.50 லட்சம் வரையிலான காப்பீட்டுத் தொகைக்கு பாலிசி எடுப்பது ஏற்றதாக இருக்கும்.” 

என்னுடைய வயது 25. நடுத்தர சம்பளம். எதிர்கால இலக்குகளை மனதில்கொண்டு,  மாதாமாதம் ரூ.3,000 முதலீடு செய்ய விரும்புகிறேன். தகுந்த ஆலோசனை கூறவும்.

ரஞ்சித் குமார், மதுரை

கோவர்தனன் பாபு, நிதி ஆலோசகர்

“தங்களுக்கு வயது 25 என்பதால், நீண்ட காலம் முதலீடு செய்ய முடியும். ஈக்விட்டி ஃபண்டுகளில் மாதம் ரூ.1,000 வீதம் 3 திட்டங்களில் முதலீடு செய்யலாம். ஃப்ராங்க்ளின் இந்தியா ஸ்மால்கேப் ஃபண்ட், ஹெச்.டி.எஃப்.சி மிட்கேப் ஆப்பர்ச் சூனிட்டீஸ் ஃபண்ட் மற்றும் ஆதித்ய பிர்லா சன் லைஃப் ஈக்விட்டி ஃபண்ட் ஆகியவற்றில் முதலீடு செய்யலாம்.”

ஒட்டுமொத்த விகடனுக்கும் ஒரே ஷார்ட்கட்!

வரிச் சலுகை... என்னென்ன வாய்ப்புகள்?

தனியார் நிறுவனத்தில் பணிபுரியும் எனது மாதச் சம்பளம் ரூ.2 லட்சம், வயது 40. தற்போது மாதம் 15,000 ரூபாயை எஸ்.பி.ஐ புளூசிப் ஃபண்ட், ஐ.சி.ஐ.சி.ஐ புளூசிப் ஃபண்ட், ஐ.டி.எஃப்.சி ஃபோகஸ்டு ஈக்விட்டி ஆகியவற்றில் முதலீடு செய்துள்ளேன். தொடர்ந்து 20 ஆண்டு காலத்திற்கு ஆண்டுக்கு 10% முதலீட்டை அதிகரிக்கவுள்ளேன். எனது மியூச்சுவல் ஃபண்ட் தேர்வு சரிதானா? 20 ஆண்டுகளின் முடிவில் எவ்வளவு வருமானம் எதிர்பார்க்கலாம்?

மகேஷ் குமார், ராஜபாளையம்

என்.விஜயகுமார், நிதி ஆலோசகர்

“நீங்கள் 20 ஆண்டு காலத்திற்கு முதலீட்டைத் தொடர்வதென்றால் ஹெச்.டி.எஃப்.சி ஸ்மால்கேப் ஃபண்ட், ஆதித்ய பிர்லா ஈக்விட்டி ஃபண்ட் ஆகியவற்றைக் கூடுதலாகச் சேர்க்கலாம். அதேபோல, ஐ.சி.ஐ.சி.ஐ புளூசிப் ஃபண்ட் மற்றும் எஸ்.பி.ஐ புளூசிப் ஃபண்ட் இரண்டும் கிட்டத்தட்ட ஒரே திட்டம் போலிருப்பதால் இரண்டில் ஒன்றை மட்டும் தொடர்வது நல்லது. இந்த முதலீடுகளை எஸ்.ஐ.பி முறையில் தொடரவும்.
உங்களுடைய முதலீட்டை ரூ.15,000 என்ற தொகையில் தொடங்கி, ஆண்டுக்கு 10% முதலீட்டை அதிகரிக்கும்போது, தோராயமாக 12% வருமானம் எதிர்பார்த்தால், 20 ஆண்டுகளின் முடிவில் கிடைக்கும் வருமானம் சுமார் 2.8 கோடி ரூபாயாகும். இதற்காக நீங்கள் முதலீடு செய்த மொத்தத் தொகை சுமார் 1.03 கோடி ரூபாயாக இருக்கும்.”

புதிதாக ஆயுள் காப்பீடு  எடுத்துள்ளேன். ஆலோசகர்  என்னிடம் சொன்னதற்கும் காப்பீடு பத்திரத்தில் கூறப் பட்டுள்ளதற்கும் வேறுபாடு உள்ளது. ஆலோசகரைக் கேட்டால் ஒப்புக்கொள்ளமாட்டேன் என்கிறார். இதற்குத் தீர்வு என்ன?

அகிலன், சேலம்

கே.பி. மாரியப்பன் இன்ஷூரன்ஸ் நிபுணர்

“உங்களுக்கு காப்பீடு கிடைத்த நாளிலிருந்து 15 நாள்கள் வரை இலவச பார்வை காலம் (Free looking period) உள்ளது. இந்த மாதிரி வேறுபாடுகள் இருக்கும்பட்சத்தில் அந்தத் திட்டம் பிடிக்க வில்லை எனில்,  நிறுவனத்திற்குச் சென்று திருப்பிக் கொடுத்துவிட்டால் எந்தவிதக் கட்டணமும் கழிக்காமல் கட்டிய மொத்த பிரீமிய தொகை யையும் திரும்பத் தந்துவிடுவார்கள்.”

தொகுப்பு: தெ.சு.கவுதமன்

வரிச் சலுகை... என்னென்ன வாய்ப்புகள்?

கேள்விகளை அனுப்புகிறவர்கள் தங்கள் செல்போன் எண்ணையும் குறிப்பிடவும்.

அனுப்ப வேண்டிய முகவரி:

கேள்வி-பதில் பகுதி,
நாணயம் விகடன், 757,
அண்ணாசாலை, சென்னை-2.
nav@vikatan.com.