Published:Updated:

கடன் ஃபண்டுகள்... தேர்வு செய்யும் கலை!

கடன் ஃபண்டுகள்... தேர்வு செய்யும் கலை!
பிரீமியம் ஸ்டோரி
கடன் ஃபண்டுகள்... தேர்வு செய்யும் கலை!

எஸ். வெங்கட்ராமன், செபி பதிவு முதலீட்டு ஆலோசகர், நிறுவனர் & சிஇஓ, 6 சிக்மா வெல்த் அட்வைஸர்ஸ்

கடன் ஃபண்டுகள்... தேர்வு செய்யும் கலை!

எஸ். வெங்கட்ராமன், செபி பதிவு முதலீட்டு ஆலோசகர், நிறுவனர் & சிஇஓ, 6 சிக்மா வெல்த் அட்வைஸர்ஸ்

Published:Updated:
கடன் ஃபண்டுகள்... தேர்வு செய்யும் கலை!
பிரீமியம் ஸ்டோரி
கடன் ஃபண்டுகள்... தேர்வு செய்யும் கலை!

திகமான முதலீட்டாளர்களின்  விருப்பமான முதலீட்டுத் தேர்வாகக் கடன் சார்ந்த மியூச்சுவல் ஃபண்டுகள் (Debt Mutual Funds)  உருவெடுத்து வருகின்றன. என்றாலும், முதலீட்டாளரின் ரிஸ்க்  எடுக்கும் திறனுக்கேற்ப சரியான ஃபண்டை முதலீட்டுக்காகத் தேர்ந்தெடுப்பது அவசியம். சமீபத்தில், பல கடன் சார்ந்த மியூச்சுவல் ஃபண்டுகளைப் பாதிப்புக்குள்ளாக்கிய ஐ.எல்.எஃப்.எஸ் நிதி நெருக்கடியைக் கவனத்தில் கொண்டால், இது எவ்வளவு முக்கியமானது என்பதை உணர்ந்துகொள்ளலாம்.

கடன் ஃபண்டுகள்... தேர்வு செய்யும் கலை!

   ஏன் கடன் சார்ந்த மியூச்சுவல் ஃபண்ட்?

கடன் சார்ந்த மியூச்சுவல் ஃபண்டுகள் உத்தரவாதமான வருவாயை அளிக்கா விட்டாலும், நீண்ட கால அடிப்படையில் நல்ல வருவாயை அளித்து வந்துள்ளன.  ஓப்பன் எண்டட் கடன் ஃபண்டுகளில்  முதலீடு செய்வதும், முதலீட்டைத் திருப்பப் பெறுவதும் சுலபமானது. பல ஃபண்டுகளில் முதலீட்டைக் குறிப்பிட்ட காலத்துக்கு வைத்திருந்தால் வெளியேறும் கட்டணம் எதையும் விதிப்பதில்லை.

கீழ்க்கண்ட விதிமுறைகளைக் கொண்டு கடன் சார்ந்த மியூச்சுவல் ஃபண்ட் திட்டங்களை மதிப்பிடவேண்டும்.

   தர மதிப்பீடு

தர மதிப்பீட்டு நிறுவனமான வேல்யூ ரிசர்ச் ஆன்லைன், நாட்டிலுள்ள பல்வேறு மியூச்சுவல் ஃபண்ட் திட்டங்களை தீர ஆய்வு செய்து நட்சத்திரங்கள் எண்ணிக்கையில் மதிப்பீடு அளிக்கிறது. அதன் அடிப்படையில் ‘5 நட்சத்திரம்’ (மிக உயர்ந்தது) முதல் ‘1 நட்சத்திரம்’ (மிகத் தரம் குறைந்தது) வரை ஒவ்வொரு திட்டத்துக்கும் மதிப்பீடு வழங்கப்படுகிறது. இவை தவிர, தரமதிப்பீடு செய்வதற்குப் போதுமான தகவல்கள் இல்லாதவற்றை ‘மதிப்பிடப்படாதவை’  என்ற ஒரு தனிப்பிரிவையும் ஏற்படுத்தியுள்ளது.  கடன் சார்ந்த ஃபண்டுகளில் மூலதனப் பாதுகாப்பு மிக முக்கியம் என்பதால், ‘5 நட்சத்திரங்கள்’ அல்லது ‘4 நட்சத்திரங்கள்’ தரமதிப்பீடு கொண்ட திட்டங்களை மட்டுமே பரிசீலிப்பது நல்லது.

ஒட்டுமொத்த விகடனுக்கும் ஒரே ஷார்ட்கட்!

கடன் ஃபண்டுகள்... தேர்வு செய்யும் கலை!

   செயல்படும் காலம்

தேர்வு செய்யும் ஃபண்ட் திட்டம்,  குறைந்தது சில  ஆண்டுகளாவது   நடைமுறையில் இருந்திருக்க வேண்டும். அப்படி இருந்தால்தான், கடந்த காலத்தில் அதன் செயல்பாடு எப்படி இருந்தது என்பதை மதிப்பிட முடிவதுடன், அதன் முதலீட்டு அணுகுமுறையையும் புரிந்துகொள்ள முடியும். குறைந்தது 5 ஆண்டுகளாவது  நடைமுறையில் இருக்கும் திட்டங்களை மட்டுமே பரிசீலனைக்கு எடுத்துக்கொள்வது நல்லது.

   நிர்வகிக்கும் தொகை

ஒரு திட்டத்தின் நிர்வகிக்கும் தொகை  அதிகமாக இருக்கவேண்டும். அப்போதுதான் இடையிடையே எழும் மீட்பு (ரிடம்ஷன்) அழுத்தங்களைச் சமாளித்து சிறப்பாகச் செயல்பட முடியும். தொகை அதிகமாக இருக்கும் பட்சத்தில், ஏதாவது ஒரு நிதித்தவறு (மூலதனம்/வட்டி வருமானம் / இரண்டுமே) நிகழ்ந்தாலும், அதனால் ஏற்படும் பாதக விளைவுகளையும் தாங்கிக்கொண்டு, தனிநபரின் முதலீட்டைச் சிறப்பாக வைத்திருக்க முடியும்.

நிர்வகிக்கும் தொகை குறைந்தது  1,000 கோடி ரூபாய் இருக்கும் திட்டங்களை மட்டுமே  முதலீட்டுக்குப் பரிசீலிக்கவேண்டும்.

   செலவு விகிதம்

சம்பளம், செலவு மற்றும் விநியோகஸ்தர் கமிஷன் உள்பட அனைத்து மேலாண்மை மற்றும் நிர்வாகச் செலவுகளுமே மியூச்சுவல் ஃபண்ட் நிறுவனத்தால் அந்தந்தத் திட்டத்துக்கு விதிக்கப்படும். இத்தகைய செலவுகளுக்கான அதிகபட்ச வரம்பை செபி வரையறுத்துள்ளது.

ஒவ்வொரு திட்டத்துக்கும் விதிக்கப்பட்ட மொத்தச் செலவு அந்தத் திட்டத்தின் செலவு விகிதமாக வெளிப்படும். இதுபோன்ற செலவு களுக்குப் பின்னரே என்.ஏ.வி (NAV) மதிப்பு கணக்கிடப்படும். செலவு விகிதம் அதிகரித்தால், முதலீட்டாளரின் வருவாய் விகிதம் குறையும்.

திட்டத்தில் செலவு விகிதம் 1 சதவிகிதத்துக்குக் கீழே இருப்பது நல்லது. நேரடித் திட்டத்துக்கான செலவு விகிதம், வழக்கமான திட்டத்தைவிடக் குறைவாக இருக்கும். ஏனெனில், நேரடித் திட்டத்துக்கு விநியோகஸ்தர் கமிஷன் கிடையாது. இதனால் முதலீட்டாளரின் வருவாயும் அதிகமாக இருக்கும்.

   நிலையான வருவாய்

முதலீட்டுத் திட்டம் நல்ல வருவாயைக் கொடுப்பதுடன் மட்டுமல்லாது, பலதரப்பட்ட காலவரம்புகளிலும்  தொடர்ந்து நல்ல  வருவாயைக் கொடுப்பதாக இருக்கவேண்டும். திட்டத்தின் நீடித்த வருவாயை,  இரண்டு அளவுகோல்களை வைத்து அளவிடலாம். ஓராண்டுக்கான தற்போதைய வங்கி எஃப்.டி  வட்டி  விகிதத்தை  அளவுகோலாகப் பயன்படுத்தலாம்.  முதலில் ஒரு திட்டம்,  1 ஆண்டு, 3 ஆண்டுகள், 5 ஆண்டுகள் மற்றும் 10 ஆண்டுகள் எனப் பலதரப்பட்ட கால வரம்புகளில் எவ்வளவு வருவாயைக் கொடுத்துள்ளது என்பதைக் கணக்கிட வேண்டும். திட்டத்தின் பல்வேறு காலகட்ட வருவாய் பெரும்பான்மை (நான்கில் மூன்று அல்லது மூன்றில் இரண்டு) வங்கி எஃப்.டி-யின் தற்போதைய வட்டி விகிதத்தைவிட அதிகமாக இருக்க வேண்டும்.

இரண்டாவதாக, கடந்த ஐந்து ஆண்டுகளில் (2014-2018), ஒவ்வோர் ஆண்டிலும் அந்தத் திட்டத்தின் வருவாய் எவ்வளவு என ஆராய வேண்டும். ஐந்து ஆண்டுகளில் குறைந்தது நான்கு ஆண்டு களாவது அந்தத் திட்டத்தின் வருவாய் வங்கி எஃப்.டி-யின் தற்போதைய வட்டி விகிதத்தை விட அதிகமாக இருக்க வேண்டும்.

கடன் ஃபண்டுகள்... தேர்வு செய்யும் கலை!

   முதலீடுகளின் கடன் தரம்

ஃபண்டுகளில் திரட்டப் படும் நிதி, எந்தக் கடன் பத்திரங்களில் முதலீடு செய்யப்படுகிறதோ, அவற்றின் கடன் தரம் கட்டாயம் உயர்வானதாக இருக்க வேண்டும்.  மொத்த முதலீட்டுத் தொகையில் 75 சதவிகிதத்துக்குக் குறையாமல், குறைந்த ரிஸ்க் கொண்ட  AAA/A1+/P1-ன் கடன் தரம் கொண்ட உயர் தரமான பத்திரங்கள் அல்லது அரசின் நிதிப் பத்திரங்கள் அல்லது வங்கி டெபாசிட்டுகள்/ரொக்கமாக முதலீடு செய்திருத்தல் நலம்.

   வட்டி விகித மாற்றம்

ஃபண்டின்  வட்டி விகித  மாற்றம் குறைவாக இருக்க வேண்டும். இதை அளவிடுவதற்கான ஒருமுறை என்னவெனில், அதன் சராசரி காலமும் மாற்றி அமைக்கப்பட்ட காலமும்தான். இந்த இரண்டு அளவீட்டு முறைகளும் ஒரு ஃபண்ட் திட்டத்தில் குறைவாக இருந்தால், அந்தத் திட்டம் நாட்டில் ஏற்படும் வட்டி விகித மாற்றங்களால் அதிக பாதிப்பு அடையாது. அதனால் ஃபண்டின் வருவாய் அதிக ஏற்றத் தாழ்வுகள் இல்லாமல் நிலையாக இருக்க அதிக வாய்ப்புள்ளது.

   ஏற்ற இறக்கத்துக்கேற்ப...

கடன் சார்ந்த மியூச்சுவல் ஃபண்டுகளிலிருந்து கிடைக்கும் வருவாய் இயல்பான ஏற்ற இறக்கத்துடன் இருக்கும். எனவே, அத்தகைய ஏற்ற இறக்கத்தைச் சரிசெய்தபின் திட்டத்தின் வருவாய் என்ன என்று கணக்கிட வேண்டும். இதற்கு  ஷார்ப் விகிதம்  மற்றும் சார்ட்டினோ விகிதம் (Sharpe Ratio and Sortino Ratio) இரண்டும்  உதவும். இவை இரண்டுமே பொதுத்தளத்தில் கிடைக்கின்றன. இவை அதிகமாக இருப்பது முதலீட்டாளர்களுக்கு நல்லது.  ஒரு திட்டத்தின் இந்த விகிதம் பல்வேறு கடன் ஃபண்டுகளின் சராசரி விகிதத்தைவிடக் குறைந்தது ஒன்றரை மடங்கு அதிகமாக இருத்தல் நலம்.

   க்ரைசில்

ஃபண்ட் திட்டத்தின் க்ரைசில் மதிப்பீடு, 4 நட்சத்திரம் அல்லது 5 நட்சத்திரமாக இருப்பது நல்லது. ஒரு ஃபண்டின் வேல்யூ ரிசர்ச் ஆன்லைன் மதிப்பீடு 5 நட்சத்திரமாக இருக்கும் பட்சத்தில், அதன் க்ரைசில் மதிப்பீடு 3 நட்சத்திரமாக இருந்தாலும், அந்தத் திட்டத்தின் மற்ற அளவுகோல்கள் நன்றாக இருந்தால், அந்தத் திட்டத்தில் முதலீடு செய்யலாம்.

   புரமோட்டரின் ஜாதகம்

இறுதியாக, முதலீட்டுத் திட்டத்தின் புரமோட்டர் அல்லது ஸ்பான்சரின் கடந்த கால ஜாதகத்தைக் கட்டாயம் பரிசீலனைக்கு எடுத்துக்கொள்ள வேண்டும். ஏதாவது பாதகமான காரணங்களுக்காக அவர்கள் செய்திகளில் அடிபட்டவர்களாக இருந்தால், அந்த ஃபண்ட் நிச்சயம் பரிசீலனையிலிருந்தே நீக்கப்படுவது நல்லது.

மேற்கண்ட அம்சங்களை அடிப்படையாக வைத்து, பல்வேறு கடன் ஃபண்டுகளை ஆராய்ந்ததில், ஃப்ராங்க்ளின் இந்தியா லிக்விட் ஃபண்ட், ஒரு நல்ல திட்டமாக உள்ளது. 2018, டிசம்பர் 31-ம் தேதிபடி, இந்தத் திட்டத்தின் முக்கிய அம்சங்கள் இனி...

13 ஆண்டுகளுக்கும்  மேலாகச் செயல்பட்டு வரும் இந்தத் திட்டம்,  7,200 கோடி ரூபாய்க்கும் அதிகமான நிதியை, 0.18% என்ற குறைந்த செலவின விகிதத்தில் கையாள்கிறது.

கடன் ஃபண்டுகள்... தேர்வு செய்யும் கலை!

இதன் ஆண்டு வருமானம் கடந்த 1 ஆண்டு, 3 ஆண்டுகள், 5 ஆண்டுகள் மற்றும் 10 ஆண்டுகள் காலகட்டங்களிலும், அதேபோன்று கடந்த 5 காலண்டர் ஆண்டுகளில் 4 ஆண்டுகளிலும் 7 சதவிகிதத்துக்கும் அதிகமாக உள்ளது. 

இதன் ஷார்ப் மற்றும் சார்ட்டினோ விகிதங்கள், 3 நட்சத்திர மற்றும் அதற்கு மேலான மதிப்பீடு கொண்ட அனைத்து வேல்யூ ரிசர்ச் ஆன்லைன் திட்டங்களுக்கான சராசரி விகிதத்தைவிட 2.5 மற்றும் 3 மடங்காக உள்ளன.

நிர்வகிக்கும் தொகையில் 93 சதவிகிதத்துக்கும் அதிகமான தொகை AAA/P1+/A1+ நிதிப் பத்திரங்களில் முதலீடு செய்யப்பட்டுள்ளதால், இந்தத் திட்டம் பாதுகாப்புமிக்கது என்பதை உணரலாம்.   இது ஒரு லிக்விட் ஃபண்டாக இருப்பதால், அதன் சராசரி முதிர்வுக் காலம் மிகவும் குறைவு; எனவே, வட்டி விகித மாற்றத்தால் ஏற்படும் பாதிப்பு மிகக் குறைவாகவே இருக்கும்.  இந்தத் திட்டம் வேல்யூ ரிசர்ச் ஆன்லைன் மற்றும் க்ரைசில் ஆகிய இரண்டு நிறுவனங்களின்            4 நட்சத்திர மதிப்பீட்டைப் பெற்றுள்ளது.

   கவனத்தில் கொள்ளப்பட வேண்டிய விஷயங்கள்

நேரடி பிளான்கள் குறித்த விவரங்கள் குறுகிய காலத்துக்கு மட்டுமே கிடைத்திருக்கிறது என்பதால், மேற்கூறிய பகுப்பாய்வு கடன் சார்ந்த மியூச்சுவல் ஃபண்டின் வழக்கமான ஃபண்டுகள்  தொடர்பான புள்ளிவிவரங்கள் அடிப்படையில் செய்யப்பட்டுள்ளது.

ஆனாலும், கூடுமான வரையில், குறைந்த செலவின விகிதம் மற்றும் அதிக வருவாயை ஈட்டும் கடன் ஃபண்டின் நேரடித் திட்டத்தில் முதலீடு செய்வது நல்லது.

மேற்கூறிய அளவீடுகள், குறைந்த அளவு ரிஸ்க் எடுக்கக்கூடிய முதலீட்டாளர்களுக்கானவை. அதிக ரிஸ்க் எடுக்கும் திறன்கொண்ட மற்றும் பெரிய ரிஸ்க்கைச் சகித்துக்கொள்ளக்கூடிய முதலீட்டாளர், இந்த அளவீடுகளில் சிலவற்றைக் குறைத்துக்கொண்டு, அதிக வருவாய் கண்ணோட்டத்தில் மற்ற முதலீட்டுத் திட்டங்களையும் தேர்ந்தெடுக்கலாம்.

ஒவ்வொரு திட்டத்தின் அம்சங்களும் காலப்போக்கில் மாறாமல் நிலையாக உள்ளதா என்று தொடர்ந்து பரிசீலனை செய்தல் அவசியம். ஆண்டுக்கு  2 அல்லது 4 முறையாவது இத்தகைய பரிசீலனையை மேற்கொள்வது நல்லது. அதற்கேற்ப ஃபண்டுகளில் மாற்றம் செய்வதும் அவசியம். 

தமிழில்: பா.முகிலன்

வரி எவ்வளவு கட்ட வேண்டும்?

ஃபண்டிலிருந்து முதலீட்டுத் தொகையைத் திரும்பப் பெறும்போதுதான் வருமான வரி  செலுத்தவேண்டி வரும்.  வங்கி டெபாசிட்டுகளைப் போல வட்டி கணக்கில் வரவு வைக்கும்போது  வரிக் கட்ட வேண்டியிருக்காது. கடன் சார்ந்த மியூச்சுவல் ஃபண்டில் 3 ஆண்டுகளுக்கும் மேலாக முதலீட்டை வைத்திருந்தால், பணவீக்க விகித சரிக்கட்டலுக்குப்பிறகு, நீண்ட கால மூலதன ஆதாயத்துக்கு 20% வரி + 4% செஸ் செலுத்த வேண்டும். இது, உயர் வருமான வரி வரம்பான 30% + 4% செஸ்ஸைவிடக் குறைவு. வருமானத்துக்கு மூலத்தில் வரிப் பிடித்தம் (TDS) கிடையாது. கடன் சார்ந்த மியூச்சுவல் ஃபண்டுகளின் நேரடி திட்டங்களில் விநியோகஸ்தர் கமிஷன் இல்லை என்பதால், கடன் சார்ந்த மியூச்சுவல் ஃபண்டுகளில் முதலீடு செய்யும் தொகைக்கு சில சதவிகிதம் அதிக வருவாய் கிடைக்கும்.