Published:Updated:

ஷேர்லக்: டிசம்பருக்குள் சென்செக்ஸ் 42000..!

ஷேர்லக்: டிசம்பருக்குள் சென்செக்ஸ் 42000..!
பிரீமியம் ஸ்டோரி
ஷேர்லக்: டிசம்பருக்குள் சென்செக்ஸ் 42000..!

ஓவியம்: அரஸ்

ஷேர்லக்: டிசம்பருக்குள் சென்செக்ஸ் 42000..!

ஓவியம்: அரஸ்

Published:Updated:
ஷேர்லக்: டிசம்பருக்குள் சென்செக்ஸ் 42000..!
பிரீமியம் ஸ்டோரி
ஷேர்லக்: டிசம்பருக்குள் சென்செக்ஸ் 42000..!

ரசியல் கூட்டணி நிலவரத்தை  உறுதியாகச் சொல்ல முடியாத மாதிரி, பங்குச் சந்தையின் போக்கும் கணிக்க முடியாதபடியே இருக்கிறது. கடந்த சில நாள்களாக உயர்ந்து வந்த பங்குச் சந்தைகள், இன்று (வெள்ளிக் கிழமை) சிறிது இறக்கம் கண்டு முடிந்துள்ளன. இந்த இறக்கம் அடுத்த வாரமும் தொடருமா என நாம் ஷேர்லக்கிடம் கேட்க நினைத்துக் கொண்டிருக்க, அவரே நம்முன் வந்து நின்றார். நாம் கொடுத்த சப்போட்டா ஜூஸைக் கொஞ்சம் குடித்தவர், நம் கேள்விகளுக்குப் பதில் சொல்ல ஆரம்பித்தார்.

ஷேர்லக்: டிசம்பருக்குள் சென்செக்ஸ் 42000..!

மிட்கேப் மற்றும் ஸ்மால்கேப் பங்குகள் மீண்டும் விலை உயர்வது தொடருமா?

‘‘மிட்கேப் மற்றும் ஸ்மால்கேப் பங்குகள்  கடந்த வாரத்தில் மீண்டும் விலை ஏற்றம் அடைந்தன. உதாரணத்துக்கு, கடந்த செவ்வாய்கிழமை, சென்செக்ஸ் புள்ளிகள் 1% உயர்வடைந்த நிலையில், பி.எஸ்.இ ஸ்மால்கேப் இண்டெக்ஸ் மற்றும் மிட்கேப் இண்டெக்ஸ் முறையே 3.11% மற்றும் 2.01% ஏற்றமடைந்து காணப்பட்டன.

இறக்க நிலையிலிருந்து மீண்டு எழக்கூடிய வாய்ப்புள்ள மிட்கேப் மற்றும் ஸ்மால்கேப் பங்குகள், ஏற்புடைய விலைகளில் கிடைப்ப தால், அவற்றை வாங்கும் போக்கு அதிகரிப்பதைக் காண முடிகிறது. இது, குறுகிய காலத்தில் இவ்விரு பிரிவு பங்குகளும் ஏற்றமடைவதற்கான வாய்ப்புள்ளதையே  உணர்த்துகிறது.

மிட்கேப் மற்றும் ஸ்மால்கேப் குறியீடுகள், 2018 ஜனவரிக்கும் 2019 பிப்ரவரிக்கும் இடையேயான காலகட்டத்தில் அதிக வருவாய் வளர்ச்சியைப் பதிவு செய்துள்ள போதிலும், லார்ஜ்கேப் இண்டெக்ஸுடன்  ஒப்பிடுகையில், மிகவும் சரிவைச் சந்தித்துள்ளன. 2018, ஜனவரி 15-க்கும், 2019 பிப்ரவரி 18-க்கும் இடையே 32% சரிவைச் சந்தித்த பி.எஸ்.இ ஸ்மால்கேப் இண்டெக்ஸ், அப்போதைய காலகட்டத்திலிருந்து 10% மீண்டுள்ளது. இதேபோன்றுதான் 2018, ஜனவரி 9-ம் தேதிக்கும், 2019, பிப்ரவரி 18-ம் தேதிக்கும் இடையேயான காலகட்டத்தில் 25% சரிவைச் சந்தித்த பி.எஸ்.இ மிட்கேப் இண்டெக்ஸும், பிப்ரவரி 2-ம் தேதியிலிருந்து 7.32% ஏற்றம் கண்டுள்ளது.

இந்த நிலையில், அவை தற்போது மிட்கேப் மற்றும் ஸ்மால்கேப் பங்குகளுக்குச் சாதகமாக திரும்பியுள்ளதால், இந்த இரண்டு பிரிவு பங்குகளும் சிறப்பாகச் செயல்படும் என்ற நம்பிக்கை பங்குச் சந்தைத் தரகு நிறுவனங் களிடையே ஏற்பட்டுள்ளது.’’

பொதுத்துறை நிறுவனமான எம்.எஸ்.டி.சி ஐ.பி.ஓ மூலம் நிதித் திரட்ட உள்ளதே?

‘‘கொல்கத்தாவைச் சேர்ந்த பொதுத் துறை ஆன்லைன் வர்த்தக நிறுவனமான எம்.எஸ்.டி.சி, ஐ.பி.ஓ மூலம் ரூ.350 கோடி நிதி திரட்ட உள்ளது. இதற்கான ஒப்புதலை செபி அமைப்பு வழங்கிவிட்டது. மார்ச் இரண்டாவது வாரத்தில் ஐ.பி.ஓ பங்குகள் வெளியிடப்படலாம்.

இதில் ஆஃபர் ஃபார் சேல் (ஓ.எஃப்.எஸ்) மூலம் 1.76 கோடி பங்குகள் வெளியிடப்பட இருக்கிறது. அதேசமயம், பங்கு ஒன்றின் விலை இன்னும் தீர்மானிக்கப்படவில்லை. இதன்மூலம், 2019-ம் ஆண்டில் ஐ.பி.ஓ மூலம் நிதி திரட்ட உள்ள முதல் பொதுத்துறை நிறுவனம் என்ற பெயரை எம்.எஸ்.டி.சி பெற்றுள்ளது. அதேசமயம், நடப்பு 2018-19-ம் நிதியாண்டில் இதுதான் கடைசி ஐ.பி.ஓ-வாகவும் இருக்கும்.’’

நியூபவர் மற்றும் வீடியோகான் நிறுவனங்கள் விதிமுறை மீறல்களில் ஈடுபட்டதாகப் பேசப் படுகிறதே?

‘‘நியூபவர் மற்றும் வீடியோகான் இண்டஸ்ட்ரீஸ் ஆகிய இரண்டு நிறுவனங்களும், கம்பெனிகள் சட்டத்தைப் பின்பற்றுவதில் குறைந்தது 25 விதிமுறை மீறல்களிலாவது ஈடுபட்டுள்ளதாக  கம்பெனி விவகாரங்கள் துறை அமைச்சகம் கண்டறிந்துள்ளது. அதேசமயம், இந்த விதிமுறை மீறல்கள் பரிவர்த்தனைகள் தொடர்பானதல்ல என்றும் தெரிய வந்துள்ளது. இது தொடர்பாக இந்த அமைச்சகத்தின் மும்பை பிராந்திய இயக்குநர் அறிக்கை ஒன்றைத் தயாரித்துள்ளார். இந்த அறிக்கை நிதி அமைச்சகத்திடம் தாக்கல் செய்யப்பட்டுள்ளது.’’

ஏர்டெல் நிறுவனப் பங்குகளை சிங்கப்பூர் டெலிகாம் வாங்குகிறதே?


‘‘பார்தி ஏர்டெல் நிறுவனம் உரிமைப் பங்குகள் விற்பனையின்மூலம் ரூ.25,000 கோடியும், கடன் பத்திர விற்பனையின்மூலம் ரூ.7,000 கோடியும் சேர்த்து மொத்தம் ரூ.32,000 கோடியைத் திரட்டப் போவதாக ஏர்டெல் திட்டமிட்டிருந்தது. சிங்கப்பூர் டெலிகாம் நிறுவனங்களில் ஒன்றான சிங்டெல் மற்றும் ஜி.ஐ.சி, சிங்கப்பூர் ஆகிய நிறுவனங்கள் ஏர்டெல் நிதி திரட்டும் திட்டத்தில் பங்கெடுத்துக்கொள்வதாகத் தெரிவித்துள்ளன. அதன் அடிப்படையில் சிங்டெல் நிறுவனம் ரூ.3,750 கோடியையும், ஜி.ஐ.சி, நிறுவனம் ரூ.5,000 கோடியையும் ஏர்டெல் பங்குகளை வாங்கி,  முதலீடு செய்வதாக ஏர்டெல் நிறுவனம் தெரிவித்திருக்கிறது.’’
 
எல்  &  டி பங்கின் விலை அதிகரித்துள்ளதே?

‘‘கட்டுமானத் துறையில் முக்கியமான நிறுவனமான எல் அண்டு டி நிறுவனத்தின் பங்கு விலை, கடந்த வார வியாழனன்று மூன்று சதவிகிதத்திற்கும் மேலாக அதிகரித்து விற்பனை யானது. இதற்கு முக்கியக் காரணம், உள்நாட்டு சந்தையிலுள்ள பல்வேறு வாடிக்கையாளர் களிடமிருந்து பெறப்பட்ட பெரிய அளவிலான ஒப்பந்தங்கள்தான்.

ஐ.ஐ.டி ஹைதராபாத் கண்டி, தெலங்கானா வளாகம் அமைக்கும் பணிக்கான ஒப்பந்தகள் பெறப்பட்டுள்ளன. மேலும், அஸெட் 13 திட்டத்தின்கீழ், டெல்லியிலுள்ள ஏரோசிட்டியில் கட்டுமானப் பணிகளுக்கான ஒப்பந்தமும் பெறப்பட்டிருக்கிறது. இந்த ஒப்பந்தங்களின் அடிப்படையில், ஹோட்டல் கட்டடம், அலுவலக வளாகம், சர்வதேச மாநாடு மற்றும் வணிக மையம் மற்றும் கார் பார்க்கிங் இடங்கள் ஆகியவை கட்டப்பட இருக்கின்றன. இந்த கட்டுமானப் பணிகள் இன்னும் 22 மாதங்களுக்குள் முடிக்கப்படும் என எல் அண்டு டி நிறுவனம் தெரிவித்திருக்கிறது. தற்போது பெறப்பட்டிருக்கும் மொத்த ஒப்பந்தங்களின் மதிப்பை எல் & டி  நிறுவனம் தெரிவிக்கவில்லை என்றாலும், இதன் மதிப்பு தோராயமாக ரூ.2,500 முதல் ரூ.5,000 கோடி  வரை இருக்கும் எனக் கணிக்கப்பட்டுள்ளது.’’

 மிட்கேப் பங்குகளின் விலை இறக்கம் முடிவுக்கு வந்துள்ளதாக மோதிலால் ஆஸ்வால் நிறுவனம் தெரிவித்துள்ளதே?

‘‘மிட்கேப் பங்குகள் சமீபத்திய சரிவிலிருந்து மீண்டுவருவது உள்நாட்டுப் பங்குத் தரகு நிறுவனங்களின் கவனத்தை ஈர்த்துள்ளது. மிகவும் மோசமாகச் செயல்பட்டுவந்த மிட்கேப் பங்கு களின் சரிவு முடிவுக்கு வந்துள்ளதாக மோதிலால் ஆஸ்வால் நிறுவனம் தெரிவித்துள்ளது. இந்த மிட்கேப் பங்குகளின் விலை மேலே ஏறுவதற்கான வாய்ப்புகள் இருப்பதாக மோதிலால் ஆஸ்வால்  கருதுகிறது.

கடந்த 12 ஆண்டுகளாக மோதிலால் ஆஸ்வால் நிறுவனத்தின் ஆய்வுப்படி, ஒரேயொரு முறை தவிர்த்து அனைத்து முறையும் லார்ஜ்கேப் பங்குகள் சரிவைச் சந்திக்கும்போதெல்லாம் மிட்கேப் பங்குகளும் உச்சத்திலிருந்து அடி மட்டத்திற்குச் சரிந்திருக்கின்றன.  உச்சத்திலிருந்து அடிமட்டத்திற்கான சரிவில், மிட்கேப் 100 மற்றும்  நிஃப்டிக்கு இடையிலான சராசரி வித்தியாசம், கடந்த காலங்களில் 10-15 சதவிகிதமாக இருந்தது. தற்போது கிட்டத்தட்ட இருமடங்கு அதிகமாக  23 சதவிகிதமாக உள்ளது.’’ 
  
வெளிநாட்டு முதலீட்டு நிறுவனங்கள் இந்தியாவில் அலுவலகம் திறக்க இருக்கின்றனவே?

‘‘அந்நிய முதலீட்டு நிறுவனங்களுக்கான விதிமுறைகளை செபி அமைப்பு எளிமையாக்கி உள்ளது. வெளிநாட்டு முதலீட்டாளர்களை ஈர்க்கும்விதமாக, இந்தியாவில் ‘நிரந்தர நிறுவனம் (PE)’ தொடங்குவது தொடர்பான விதிமுறைகளை இந்திய அரசு தளர்த்தியதால் சிங்கப்பூர், ஹாங்காங் போன்ற நாடுகளில் நிறுவனத்தைத் தொடங்குவதற்குப் பதிலாக இந்தியாவில் தொடங்க முன்வருவார்கள் என எதிர்பார்த்தது. எட்டு வெளிநாட்டு நிறுவனங்கள் ஏப்ரல் மாதத்தில் இந்தியாவில் அலுவலகத்தைத் திறக்க திட்டமிட்டுள்ளன.’’

நிஃப்டி குறியீடு ஏற்றத்துக்கு சில பங்குகள் மட்டுமே காரணமாக இருக்கின்றவா?

‘‘உண்மைதான். நிஃப்டி குறியீட்டில் இடம் பெற்றுள்ள 50 பங்குகளில் சில பங்குகள் மட்டுமே விலையேற்றம் கண்டுவருவதால் குறியீட்டுப் புள்ளிகள் அதிகரித்து வருகின்றன. ரிலையன்ஸ்

இண்டஸ்ட்ரீஸ், ஹிந்துஸ்தான் யூனிலிவர், ஐ.டி.சி, ஹெச்.டி.எஃப்.சி, ஹெச்.டி.எஃப்சி பேங்க் போன்ற பங்குகள் விலை ஏற்றம் கண்டு வருகின்றன. இவை கடந்த ஓராண்டு மற்றும் மூன்றாண்டு காலத்தில் சராசரியாக முறையே 19% மற்றும் 75% வருமானம் கொடுத்துள்ளன.

இந்தக் காலகட்டத்தில் இந்த ஐந்து பங்குகள் தவிர, இதர 45 பங்குகள் முறையே 20.5% மற்றும் 17% வருமானம் தந்துள்ளன. இதே காலத்தில் நிஃப்டி குறியீடு முறையே 8% மற்றும் 47.7% வருமானம் தந்துள்ளன. நிஃப்டி குறியீட்டில் இந்த  ஐந்து பங்குகளின் வெயிட்டேஜ் 35.6 சதவிகிதமாக உள்ளது. கடந்த ஆண்டில் நிஃப்டி குறியீட்டில் இடம்பெற்றுள்ள 35 பங்குகள் நெகட்டிவ் வருமானம் தந்திருக்கின்றன. அந்த வகையில், பெரிய நிறுவனங்களின் பங்குகள் என்றாலும்  ஒட்டுமொத்த சந்தை இறக்கத்தில் இருக்கும்போது விலை இறங்கத்தான் செய்யும். அந்த வகையில், முதலீட்டுக்கான பங்குகளை மிகவும் கவனத்துடன் தேர்வு செய்ய வேண்டும் என அனலிஸ்ட்கள் தெரிவிக்கிறார்கள்.’’
 
பங்கு சார்ந்த மியூச்சுவல் ஃபண்ட் திட்டங்களில் முதலீடாகும் தொகை தொடர்ந்து நான்கு மாதங்களாகக் குறைந்து வருகிறதே!

‘‘பங்குச் சந்தை ஏற்ற இறக்கமாக இருப்பதினால், புதிய முதலீட்டாளர்கள் பலரும் கொஞ்சம் பயந்துபோயிருக்கிறார்கள். அதிலும் நேரடியாக மியூச்சுவல் ஃபண்டுகளில் முதலீடு செய்பவர்கள் தங்கள் முதலீட்டை நிறுத்தியிருக்கிறார்கள். இதனால்தான் பங்குச் சந்தை சார்ந்த மியூச்சுவல் ஃபண்டுகளில் முதலீடாகும் தொகை கடந்த நான்கு மாதங்களாகக் குறைந்து வருகிறது. கடந்த ஆண்டு அக்டோபரில் பங்கு சார்ந்த மியூச்சுவல் ஃபண்டுகளில் முதலீடான தொகை ரூ.12,622 கோடி. கடந்த நவம்பரில் ரூ.8,414 கோடி, டிசம்பரில் ரூ.6,606 கோடி, ஜனவரியில் ரூ.6,158 கோடி, பிப்ரவரியில் ரூ.5,122 கோடியாக இருக்கிறது. தேர்தல் முடிந்து மீண்டும் உயரத் தொடங்குகிற வரை இந்தப் போக்கு தொடரலாம். இன்னும் சில மாதங்களில்  பங்குச் சந்தை உயரும் என்பதால், எஸ்.பி.ஐ முதலீட்டை நிறுத்தாமல் இருப்பதே நல்லது என்கிறார்கள் மியூச்சுவல் ஃபண்ட் துறை நண்பர்கள்.’’

விப்ரோ பங்கு விலை இன்று மட்டுமே 5% குறைந்திருப்பது என்ன காரணம்?


‘‘தனக்குச் சொந்தமான பங்கிலிருந்து 0.44 சதவிகிதப் பங்குகளை விற்று ரூ.700 கோடி பணத்தைத் திரட்டியிருக்கிறார் விப்ரோ நிறுவனத்தின் தலைவரான அஜீம் பிரேம்ஜி. இந்த விற்பனைக்குப் பிறகும் அஜீம் பிரேம்ஜி டிரஸ்டுக்கு 274.3% விப்ரோ பங்குகளை வைத்திருக்கிறது. எனவே, அஜீம் பிரேம்ஜி விற்றதைப் பெரிய விஷயமாக நினைத்து அந்தப் பங்கினை விற்கத் தேவையில்லை.’’

வரும் டிசம்பருக்குள் சென்செக்ஸ் 42000 புள்ளி களை எட்டும் என மார்கன் ஸ்டான்லி  தெரிவித்துள்ளதே?


‘‘பி.எஸ்.இ-யின் சென்செக்ஸ் குறியீட்டில் இடம்பெற்றுள்ள 30 நிறுவனங்களின் வருமான வளர்ச்சி நடப்பு 2018-19-ம் ஆண்டில் 29%, அடுத்த நிதியாண்டான 2019-2020-ல் 26% வளர்ச்சி காணும் என பங்குத் தரகு நிறுவனமான மார்கன் ஸ்டான்லி எதிர்பார்க்கிறது. நாடாளுமன்றத் தேர்தலுக்கு முந்தைய நிலையில், தற்போது பங்குச் சந்தை ஏற்றம் காண ஆரம்பித்திருக்கிறது. தேர்தலுக்குப்பிறகு புதிய ஆட்சி அமைந்து, டிசம்பர் இறுதிக்குள் சென்செக்ஸ் 42000 புள்ளி களுக்கு உயரும் என மதிப்பிடப்பட்டிருக்கிறது. பாகிஸ்தான் தீவிர வாதப் பிரச்னையில் பா.ஜ.க-வுக்கு ஆதரவு அதிகரித்துள்ளது. அந்த வகையில், அந்தக் கட்சியே மீண்டும் ஆட்சிக்கு வரும் என எதிர்பார்க்கப்படுகிறது. 

வங்கிகள், நுகர்வோர் மற்றும் தொழில்துறை நிறுவனப் பங்குகள் விலை ஏற்றம் காணும் என அது தெரிவித்துள்ளது. மிட்கேப் பங்குகளான ஐ.ஜி.எல், இந்தியன் ஹோட்டல், சையன்ட் (Cyient), ஐ.பி.சி.ஏ. லேபாரட்டரீஸ், பிரிஸ்ட்டேஜ் எஸ்டேட்ஸ், அப்போலோ ஹாஸ்பிட்டல்ஸ் மற்றும் ஜுபிலன்ட் ஃபுட் ஒர்க்ஸ் போன்றவற்றை முதலீட்டுக்குக் கவனிக்கலாம் என மார்கன் ஸ்டான்லி தெரிவித்துள்ளது’’ என்றவர், நெடுநேர மாகிவிட்டதே என்று கிளம்பிச் சென்றார்.

ஷேர்லக்

ஒட்டுமொத்த விகடனுக்கும் ஒரே ஷார்ட்கட்!

ஷேர்லக்: டிசம்பருக்குள் சென்செக்ஸ் 42000..!

நாணயம் விகடன் ஸ்லாக்-ல் வந்தாச்சு!

பங்குச் சந்தை, மியூச்சுவல் ஃபண்ட், பொருளாதாரம், இன்ஷூரன்ஸ், தங்கம், ரியல் எஸ்டேட் தொடர்பாக நாணயம் விகடனில் வெளியாகும் செய்திகளை உடனுக்குடன் தெரிந்துகொள்ள வேண்டுமா?

உங்கள் செல்போனில் ஸ்லாக் (slack) ஆப்பை டவுன்லோட் செய்துகொள்ளுங்கள். bit.ly/2UBYnJx என்கிற லிங்கில் சென்று, உங்கள் மெயில் ஐடி-யை தந்து பெயரைப் பதிவு செய்துகொள்ளுங்கள்!

டிரேடர்ஸ் பக்கங்கள் பகுதியைப் படிக்க: https://bit.ly/2H6mwFA  

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism