Published:Updated:

மைண்ட்ட்ரீ... எல் அண்டு டி-க்கு விற்பது சரியா?

மைண்ட்ட்ரீ... எல் அண்டு டி-க்கு விற்பது சரியா?
பிரீமியம் ஸ்டோரி
News
மைண்ட்ட்ரீ... எல் அண்டு டி-க்கு விற்பது சரியா?

வாசு கார்த்தி

ங்குச் சந்தை முதலீட்டாளர்களைத் தாண்டி, பலரும் பேசும் விஷயமாக மாறியிருக்கிறது மைண்ட்ட்ரீ விவகாரம். இந்த நிறுவனத்தின் கணிசமான பங்குகளை எல் அண்டு டி நிறுவனம் வாங்கு வதற்கு முற்பட, இதற்கு மைண்ட்ட்ரீ நிறுவனத்தைத் தொடங்கியவர்களிடமிருந்து கடும் எதிர்ப்புக் கிளம்ப, ஏறக்குறைய க்ளைமாக்ஸை நோக்கிச் சென்றிருக்கிறது இந்த டேக் ஓவர் ட்ராமா! 

மைண்ட்ட்ரீ... எல் அண்டு டி-க்கு விற்பது சரியா?

மைண்ட்ட்ரீ நிறுவனத்தின் பங்குகளை எல் அண்டு டி நிறுவனம் வாங்குவதில் என்னதான் பிரச்னை என்பதைத் தெரிந்து கொள்ள இந்த நாடகத்தில் இதுவரை நடந்த காட்சிகளைக் கொஞ்சம் ஃப்ளாஷ்பேக்கில்  பார்ப்போம்.

விப்ரோ நண்பர்களும், சித்தார்த்தும்...

விப்ரோவில் பணியாற்றிய 10 பேர்  இணைந்து, 1999-ம் ஆண்டு மைண்ட்ட்ரீ நிறுவனத்தை உருவாக்கினார்கள். 1999-ம் ஆண்டே மைண்ட்ட்ரீ நிறுவனத்தில் முதலீடு செய்து, 6.6% பங்குகளை வாங்கினார்.  இதன்பிறகு இந்த நிறுவனம் தொடர்ந்து வளர்ச்சியடைவதால், தனது முதலீட்டைக் காலந்தோறும் அதிகப்படுத்திக்கொண்டே வந்தார். அப்படியே தன்னுடைய நிறுவனமான `காபிடே’வின் வளர்ச்சியில் கவனம் செலுத்தினார் சித்தார்த்தா.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
மைண்ட்ட்ரீ... எல் அண்டு டி-க்கு விற்பது சரியா?



2011-ம் ஆண்டு மைண்ட்ட்ரீ நிறுவனத்தில் முக்கியமான பிரச்னை எழுந்தது. மைண்ட் ட்ரீ நிறுவனத்தைத் தொடங்கியவர்களில்  ஒருவரான அசோக் சூட்டாவுக்கும், மற்ற நிறுவனர்களுக்கும் கருத்து வேறுபாடு உருவானதால், அந்த நிறுவனத்திலிருந்து உடனடியாக வெளியேறவேண்டிய கட்டாயம் அசோக் சூட்டாவுக்கு உருவானது. அவர் தன்னுடைய பங்குகளை 2011-ம் ஆண்டில் சித்தார்த்தாவுக்கே விற்றார்.  அடுத்த ஆண்டே மைண்ட்ட்ரீயின் 6.8% பங்குகளைச் சந்தையில் வாங்கி, மொத்தமாக  20.3% பங்குகளைச் சேர்த்தார். 

கடனைச் சமாளிக்க...

கடந்த சில ஆண்டுகளாகத் தனது பிற தொழில்களில் கடன் அதிகரித்ததால், மைண்ட்ட்ரீ நிறுவனத்தின் பங்குகளை விற்க நினைத்தார் சித்தார்த்தா. ஓராண்டுக்குமுன்பே மைண்ட்ட்ரீ இயக்குநர் குழுவிலிருந்தும் வெளியேறினார்.  தனது பங்கினை விற்பதற்காகப் பலரையும் கலந்துபேசினார். கடைசியில் எல் அண்டு டி நிறுவனத்துடன் உடன்பாடு ஏற்பட்டது.  தன்வசம் உள்ள பங்குகளை பங்கொன்றுக்கு 980 ரூபாய்க்கு விற்க ஒப்பந்தம் செய்துகொண்டார். இதன் மொத்த மதிப்பு ரூ.3,269 கோடியாகும். (20% பங்கினை வாங்க சித்தார்த்தா மொத்தமாக முதலீடு செய்த தொகை ரூ.340 கோடி) 

எல் அண்டு டி-க்கு விற்காதே!

இப்போதுதான் பிரச்னை எழத் தொடங்கியது.  காரணம், சித்தார்த்தா தன்வசமுள்ள பங்குகளை விற்கப்போவது எல் அண்டு டி குழுமத்துக்கு. அந்தக் குழுமத்தின் வசம் ஏற்கெனவே இரண்டு ஐ.டி நிறுவனங்கள் (எல்  & டி இன்ஃபோடெக் மற்றும் எல் அண்டு டி டெக்னாலஜி) இருக்கின்றன. இந்த 20% பங்குகளை வாங்குவது மட்டுமல்லாமல், மைண்ட்ட்ரீ நிறுவனத்தை ஒட்டுமொத்தமாகக் கையகப் படுத்தவும் நினைக்கிறது. சித்தார்த்தாவிடம் இருக்கும் 20% பங்குகளை வாங்கியபிறகு, சந்தையில் 15% பங்குகளை வாங்க முயற்சி செய்து வருகிறது எல் அண்டு டி நிறுவனம். இதனைத் தொடர்ந்து `ஓப்பன் ஆஃபர்’ மூலம் 31% பங்குகளை வாங்கவிருக்கிறது. ஆகமொத்தம், மைண்ட் ட்ரீயின் 66% பங்குகளை வாங்க சுமார் ரூ.10,000 கோடி அளவுக்கு மேலான தொகையை எல் அண்டு டி ஒதுக்கி வைத்திருக்கிறது.

நிறுவனர்கள் எதிர்ப்பு

எல் அண்டு டி நிறுவனம், மைண்ட்ட்ரீ நிறுவனத்தைக் கையகப்படுத்த செய்யும் முயற்சிக்கு மைண்ட்ட்ரீ நிறுவனர்கள் கடும் எதிர்ப்புத் தெரிவித்திருக்கின்றனர். மைண்ட்ட்ரீ நிறுவனத்தின் 13% பங்குகள் அதன் நிறுவனர்கள் வசம் இருப்பதால், அந்த நிறுவனத்தை எல் அண்டு டி கையகப்படுத் தாமல் இருக்கத் தேவையான நடவடிக்கையை எடுத்து வருகின்றனர்.

மைண்ட்ட்ரீ... எல் அண்டு டி-க்கு விற்பது சரியா?



மைண்ட்ட்ரீ நிறுவனத்தைத் தொடங்கியவர்களில்  ஒருவரான சுப்ரதோ பக்‌ஷி, ஒடிசா அரசின் திறன் மேம்பாட்டுப் பிரிவின் தலைவராக இருந்துவந்தார்.  மைண்ட்ட்ரீ நிறுவனத்தின் நிர்வாகம் வேறு நிறுவனத்துக்குச் செல்லக்கூடாது என்பதற்காக அந்தப் பணியை ராஜினாமா செய்துவிட்டு வந்திருக்கிறார் சுப்ரதோ பக்‌ஷி.

ஐந்து கேள்விகள்

சில நாள்களுக்குமுன் சுப்ரதோ பக்‌ஷி, கிருஷ்ண குமார் மற்றும் ராஸ்தோ ராவணன் ஆகியோர் செய்தியாளர்களைச் சந்தித்தனர். இந்தச் சந்திப்பில் ஐந்து கேள்விகளை எல் அண்டு டி நிர்வாகத்திடம் கேட்டனர்.

1.  மைண்ட் ட்ரீ நிறுவனத்தைக் கட்டாயப்படுத்தி வாங்கும் பட்சத்தில் 50 ஆண்டு கால ஐ.டி வரலாற்றில் அது தவறான முன்னுதாரணம் ஆகிவிடாதா?

2. எல் அண்டு டி ரூ.1.20 லட்சம் கோடி ஆண்டு வருமானம் ஈட்டும் நிறுவனம். எங்களைவிட 18 மடங்கு பெரிய நிறுவனம். எங்களைப் போன்ற ஒரு நிறுவனத்தை எல் அண்டு டி-யினால் ஏன் உருவாக்க முடியாது?

3. எங்களுடைய சிறப்பான செயல்பாடுகளினால் வாடிக்கையாளர்கள் எங்களிடம் இருக்கிறார்கள். எங்கள் நிறுவனத்தை எல் அண்டு டி வாங்கும் போது இந்தக் கலாசாரம் மாறுபடும். அதனால் வாடிக்கையாளர்களை இழக்க நேரிடுமே.

4. தகவல் தொழில்நுட்பத்தில் பணியாளர்கள் தான் முக்கியம். இங்கு யாரும் சம்பளத்துக்காக இல்லை. நிறுவனத்தின் இலக்குக்காக இங்கு உள்ளனர். நிறுவனத்தின் இலக்கு மற்றும் கலாசாரம் மாறும்போது இந்தப் பணி யாளர்கள்  இருக்க மாட்டார்கள். அப்போது நிறுவனத்தை வாங்கி என்ன பயன்?

5. நாங்கள் அனைவரும் முதல் தலைமுறை தொழில் முனைவோர்கள். இதுபோல, கட்டாயப்படுத்தி நிறுவனத்தை வாங்குவதன்மூலம் ஸ்டார்ட் அப் உலக்குக்கு என்ன சொல்ல விரும்புகிறீர்கள்?

இதுபோல,  உணர்வுப் பூர்வமான பல கேள்விகளை மைண்ட்ட்ரீ முன்வைத்தது. அதேசமயம், மைண்ட்ட்ரீ நிறுவனத்தின் பங்குகளைச் சந்தையில் திரும்பி வாங்கும் நடவடிக்கையையும் எடுக்கத் திட்டமிட்டது. இதற்காக கடந்த 20-ம் தேதி இயக்குநர் குழுவின் கூட்டம் நடந்தது. நிறுவனத்தில் உள்ள கையிருப்புத் தொகையில் 10% தொகைக்கு மட்டுமே பங்குகளைத் திரும்பி வாங்க முடியும். சிறப்புத் தீர்மானம் நிறைவேற்றினாலும் அதிகபட்சம் 25% பங்குகளை மட்டுமே வாங்க முடியும். கையிருப்பில் உள்ள தொகை சுமார் ரூ.2,800 கோடி. அதனால் இந்தத் தொகையை வைத்துக் கொண்டு ஒற்றை இலக்கில் மட்டுமே பங்குகளை வாங்க முடியும் என்பதால், பைபேக் குறித்து இயக்குநர் குழு எந்த முடிவையும் எடுக்கவில்லை.

பிரைவேட் ஈக்விட்டியிடம் விற்றால் என்ன?

மைண்ட்ட்ரீ நிறுவனத்தின் பங்குகளை வாங்க வைப்பதற்கு அந்த நிறுவனத்தின் நிறுவனர், சில நிறுவனங்களிடம் பேசி வந்தாலும், மைண்ட்ட்ரீ நிறுவனத்தின் பெரும்பான்மை பங்குகளை வாங்க அந்த நிறுவனம் தயாராக இருக்குமா என்பது கேள்விக்குறிதான். அப்படியே வாங்கினாலும், அந்த நிறுவனமும் சில ஆண்டுகளுக்குப்பிறகு அதை வேறு யாருக்கோ விற்கும்போது, இப்போது உருவாகியுள்ள சிக்கல் மீண்டும் உருவாக வாய்ப்புள்ளது. தவிர, ஏதாவது ஒரு பிரைவேட் ஈக்விட்டி நிறுவனத்துக்குத் தனது பங்கினை விற்க முயற்சி செய்தார் சித்தார்த்தா. ஆனால், அந்தத் அந்தத் திட்டம் நிறைவேறவில்லை.

ஆனால், எல் அண்டு டி நிறுவனம் ஏற்கெனவே ஐ.டி துறையில் இருப்பதால், மைண்ட்ட்ரீ நிறுவனத்தை வாங்க நினைப்பதில் எந்தத் தவறும் இல்லை என்றே நினைக்கிறது.

மியூச்சுவல் ஃபண்டுகளும் எதிர்ப்பு

சில மியூச்சுவல் ஃபண்ட் நிறுவனங்கள் இந்த இணைப்புக்கு எதிர்ப்புத் தெரிவித்திருக்கின்றன. மைண்ட்ட்ரீ நிறுவனத்தில் மியூச்சுவல் ஃபண்ட் 8.3% பங்குகளை வைத்துள்ளன. 68 மியூச்சுவல் ஃபண்ட் திட்டங்களில் உள்ள இந்தப் பங்குகளின் மதிப்பு ரூ.1,300 கோடி. எல் அண்டு டி மிகப் பெரிய நிறுவனம். மைண்ட்ட்ரீ நிறுவனத்தை சுதந்திரமாகச் செயல்பட வைக்குமா அல்லது அந்த குழுமத்தில் உள்ள நிறுவனங்களுடன் இணைக்குமா என்னும் நிச்சயமற்ற சூழல் இருக்கிறது.

இது காதல், போர் அல்ல

மைண்ட்ட்ரீ நிறுவனத்தை நாங்கள் கட்டாயப் படுத்தி வாங்கவில்லை என எல் அண்டு டி குழுமத்தின் தலைமைச் செயல் அதிகாரி எஸ்.என்.சுப்ரமணியன் தெரிவித்திருக்கிறார். ‘‘நண்பர் ஒருவர் மூலமாக சித்தார்த்தாவின் அறிமுகம் கிடைத்தது. அவர் வசமுள்ள பங்குகள் குறித்துக் கேட்டோம். சில கட்ட பேச்சுவார்த்தை களுக்குப் பிறகு தலைவரிடம் (ஏ.எம்.நாயக்) இதுகுறித்து விவாதித்தோம். அவரின் அனுமதியுடன்தான் இது நடக்கிறது.

தவிர, மைண்ட்ட்ரீ நிறுவனர்களுடனும்  இது குறித்து விவாதித்தோம். சித்தார்த்தாவின் பங்குகளை நாங்கள் வாங்கவில்லை என்றாலும் வேறு ஒருவர் இந்தப் பங்குகளை வாங்குவார் என்று விளக்கினோம். இதே நிர்வாகக் குழு தொடரும் என்றும் உறுதியளித்தோம். நாங்கள் சொன்னதை எல்லாம் ஏற்றுக்கொண்டுவிட்டு, இப்போது வேறு மாதிரி பேசுகிறார்கள்’’ என்று சொல்லியிருக்கிறார் அவர்.

வேறு வழியில்லை

இப்போதுள்ள நிலையில், மைண்ட்ட்ரீ நிறுவனர்களுக்கு வேறு வாய்ப்புகள் இல்லை. அந்த நிறுவனத்தை எல் அண்டு டி நிறுவனம் வாங்குவதை யாரும் தடுக்க முடியாது என்பதே சந்தை வல்லுநர்களின் கருத்து. ‘welcome to          possible’ என்பது மைண்ட்ட்ரீயின் ஸ்லோகன். சாத்தியங்களை வரவேற்கும் மைண்ட்ட்ரீ இனி என்னவாகும் என்பது அடுத்த சில நாள்களில் தெரிந்துவிடும்.

எல் அண்டு டி-யின் திட்டம் என்ன?

ல் அண்டு டி வசம் ரூ.16,000 கோடி தொகை கையிருப்பாக இருக்கிறது. முக்கியமல்லாத சொத்துகளை விற்றது மற்றும் ஐ.பி.ஓ மூலம் இந்தத் தொகை கிடைத்திருக்கிறது. ஆனால், நிறுவனத்தில் `ரிட்டன் ஆன் ஈக்விட்டி’ தொடர்ந்து சரிந்து வருகிறது. 2003 முதல் 14 - 24 சதவிகிதமாக இருந்தது. ஆனால், தற்போது 15 சதவிகிதமாகக் குறைந்துவிட்டது. அடுத்த ஆண்டில் 21 சதவிகிதமாக உயர்த்தத் திட்டமிட்டிருக்கிறது. இந்தத் தொகையை வைத்து பங்குகளைத் திரும்ப வாங்கத் திட்டமிட்டது. ஆனால், அந்தத் திட்டம் தோல்வியடைந்தது. அதனால் புதிய நிறுவனத்தை வாங்குவதன்மூலமே கையிருப்புத் தொகையை பயனுள்ள வகையில் செலவழிக்க முடியும் என எல் அண்டு டி நினைக்கிறது. இதுதவிர, இன்னும் சில ஆண்டுகளில் சில ஆயிரம் கோடிகள் கையிருப்புத் தொகை உயரும் எனக் கணிக்கப்பட்டிருப்பதால், ரூ.10,000 கோடியில் மைண்ட் ட்ரியினைக் கையகப்படுத்த முடிவெடுத்திருப்பதாகச் சந்தை வல்லுநர்கள் தெரிவிக்கிறார்கள்..