Published:Updated:

ட்ரம்ப் அதிரடி அறிவிப்பு... இந்தியாவில் என்ன பாதிப்பை ஏற்படுத்தும்?

ட்ரம்ப் அதிரடி அறிவிப்பு... இந்தியாவில் என்ன பாதிப்பை ஏற்படுத்தும்?
பிரீமியம் ஸ்டோரி
ட்ரம்ப் அதிரடி அறிவிப்பு... இந்தியாவில் என்ன பாதிப்பை ஏற்படுத்தும்?

ஆர்.மோகனப் பிரபு, cfa

ட்ரம்ப் அதிரடி அறிவிப்பு... இந்தியாவில் என்ன பாதிப்பை ஏற்படுத்தும்?

ஆர்.மோகனப் பிரபு, cfa

Published:Updated:
ட்ரம்ப் அதிரடி அறிவிப்பு... இந்தியாவில் என்ன பாதிப்பை ஏற்படுத்தும்?
பிரீமியம் ஸ்டோரி
ட்ரம்ப் அதிரடி அறிவிப்பு... இந்தியாவில் என்ன பாதிப்பை ஏற்படுத்தும்?

சீனாவிலிருந்து இறக்குமதியாகும் பொருள்களின் மீதான சுங்கவரி மேலும் அதிகரிக்கப்படும் என இந்த வாரத் தொடக்கத்தில் ட்ரம்ப் அறிவித்ததைத் தொடர்ந்து, வர்த்தக யுத்தம் மீண்டுமொருமுறை தொடங்கும் என்ற அச்சம், பன்னாட்டு பங்குச் சந்தைகளில் கடுமையாக எதிரொலித்தது. குறிப்பாக, ஏற்றுமதியைச் சார்ந்துள்ள ஆசிய நாடுகளின் பங்கு சந்தைகள் கடந்த வாரத்தில் பெருமளவில் சரிந்தன. சீனத் துணைப் பிரதமரின் அமெரிக்க விஜயம் மற்றும் அமெரிக்காவுடனான வர்த்தகப் பேச்சுவார்த்தைகள், பதற்றத்தை ஓரளவுக்குத் தணிக்க உதவும் என்ற முதலீட்டாளர் களின் சிறிதளவு நம்பிக்கையும் சிதைந்துபோகும் வகையில், சீனாவுடனான வர்த்தகப் பேச்சு வார்த்தை முறிவடைந்தது என அமெரிக்க அதிபர் ட்ரம்ப் ட்விட்டரில் இரண்டு நிலைத் தகவல்களை வெளியிட்டதைத் தொடர்ந்து, பல நாடுகளில் உள்ள பங்குச் சந்தைகள் கணிசமான  அளவுக்கு இறக்கம் கண்டன. அமெரிக்காவின் இந்த நடவடிக்கையின் காரணமாக, இந்தியாவுக்கு என்னென்ன பாதிப்புகள் ஏற்படும் என்று  பார்ப்போம்.

ட்ரம்ப் அதிரடி அறிவிப்பு... இந்தியாவில் என்ன பாதிப்பை ஏற்படுத்தும்?

யுத்தம் – இது வர்த்தக யுத்தம்

அமெரிக்காவுடனான வர்த்தகத்தில் வளரும் நாடுகள் முறையற்ற வகையில் சலுகைகளை அனுபவிக்கின்றன. இது அமெரிக்காவின் உள்நாட்டு உற்பத்தி மற்றும் வேலைவாய்ப்புகளைப் பாதிப்பதாக பிரசாரம் செய்துவரும் ட்ரம்ப், இந்தியா - சீனா உள்ளிட்ட பல வளரும் நாடு களுக்கு வழங்கப்பட்டுள்ள சலுகைகளைத் திரும்பப் பெறுவதுடன், இறக்குமதி வரியையும் பலமடங்கு உயர்த்தி வருகிறார். 

உலகின் உற்பத்திச் சாலையாக அறியப்படும் சீனாவோ, தனது பொருளாதார வளர்ச்சிக்கும் அரசியல் அமைதிக்கும் ஏற்றுமதியையே சார்ந்துள்ளது. அமெரிக்காவுடனான வர்த்தகப் பேச்சுவார்த்தைகளின்மூலம் இறக்குமதி வரியைக் குறைக்கவும் சீனா கடுமையாக முயற்சி செய்துவருகிறது.

அமெரிக்க நலன்களைக் கருத்தில்கொள்ளும் அதிபர் என்ற இமேஜ் ட்ரம்ப்பிற்கு அரசியல் ரீதியில்  சிறப்பான அனுகூலத்தை வழங்குவதினால், அவர் தனது நிலையைத் தொடர்ந்து கடுமை யாக்கிக்கொண்டே போகிறார். ட்ரம்ப்பின் வர்த்தக முடிவுகளை நேரடியாக எதிர்கொள்ள முடியாத சீனா, தனது கரன்சியான யுவான் நாணயத்தின் (அமெரிக்க டாலருக்கு நிகரான) மதிப்பினைக் குறைப்பதின் மூலம் தனது ஏற்றுமதி பொருள்களின் விலைகளைக் கட்டுக்குள் வைத்திருக்க முடிவதுடன், போட்டித் திறனை தொடர்ச்சியாக நிலைநிறுத்திக்கொள்ளவும் முடியும் என்று நம்புகிறது.

உலக நாடுகளுக்கான பாதிப்புகள்

பொருளாதார ரீதியாகவும் அரசியல் செல்வாக்கு ரீதியாகவும் உலகின் இரண்டு  பெரிய வல்லரசுகளாகத் திகழும் அமெரிக்கா மற்றும் சீன நாடுகளுக்கு இடையேயான இந்த வர்த்தகப் போராட்டம் பன்னாட்டு வணிகத்தில் கடும் பாதிப்புகளை விளைவிக்கும் வாய்ப்புள்ளது. இதனால் உலக நாடுகளின் ஒட்டுமொத்த பொருளாதாரமும் குறிப்பாக, ஏற்றுமதியைச் சார்ந்திருக்கும் நாடுகளின் பொருளாதார வளர்ச்சி பெருமளவு பாதிக்கப்படும் என்று எதிர்பார்க்கப் படுகிறது.

இந்தியாவிற்கான பாதிப்புகள்

இந்தியா இறக்குமதி அதிகம் கொண்டதொரு நாடு என்றாலும், அமெரிக்காவுடனான வர்த்தகத்தில் சிறப்பாகவே செயல்பட்டு வருகிறது. இந்தியாவின் மிகப் பெரிய இறக்குமதியாளராகத் திகழும் அமெரிக்காவிற்கு, வருடந்தோறும் சுமார் 48 பில்லியன் டாலர் (சுமார் ரூ.3,36,000 கோடி) மதிப்பிலான பொருள்கள் இந்தியாவிலிருந்து ஏற்றுமதி செய்யப்படுகின்றன.  சுமார் 26 பில்லியன் டாலர் மதிப்புக்கு மட்டுமே அமெரிக்காவிலிருந்து இறக்குமதி செய்யப்படுவதால், இந்தியாவிற்கு 22 பில்லியன் டாலர் அளவுக்கு அந்நிய செலாவணி அமெரிக்க வர்த்தகத்தின்மூலம் கிடைக்கிறது.       எனவே, அமெரிக்க அதிபரின் அணுகுமுறை, ஏற்றுமதி சார்ந்த இந்திய நிறுவனங்களுக்கு எதிராகவே அமையும். 

ஒட்டுமொத்த விகடனுக்கும் ஒரே ஷார்ட்கட்!

ட்ரம்ப் அதிரடி அறிவிப்பு... இந்தியாவில் என்ன பாதிப்பை ஏற்படுத்தும்?

மறுபக்கம், சீனாவுடனான வர்த்தகத்தில் இந்தியா பெருமளவுக்கு இறக்குமதியைச் சார்ந்துள்ளது. கடந்த ஆண்டில் (2018-19) மட்டும் இந்தியாவின் வர்த்தகப் பற்றாக்குறை சுமார் 53 பில்லியன் டாலர் (சுமார் ரூ.3,71,000 கோடி);  அதிகப்படியான இறக்குமதி இந்தியாவின் உள்நாட்டு உற்பத்தியைப் பாதித்தாலும், அமெரிக்கா போலவே சீனாவைக் கடுமையாக எதிர்கொள்ளும் அளவுக்கு இந்தியாவின் அரசியல் தலைமை தற்போது வலுவானதாக இல்லை. எனவே, சீன யுவான் நாணயத்தின் அதிகப்படியான மதிப்புக் குறைப்பு,  இந்தியாவின் இறக்குமதியை இன்னும் அதிகப்படுத்தும் அபாயங்கள் உள்ளன. எனவே, சீனாவின் போட்டியைச் சமாளிக்க முடியாத நமது உள்நாட்டு நிறுவனங்கள் பாதிக்கப் படக்கூடும்.

வர்த்தக யுத்தத்தின் தொடர்ச்சியாக உருவாகக் கூடிய உலகளாவிய பொருளாதார தளர்ச்சி, சர்வதேச முதலீட்டாளர்களின் நம்பிக்கை யின்மையை அதிகரிக்கும் அபாயம் உள்ளதால்,  நமது நாட்டுக்கு வரும் அந்நிய முதலீடுகள் பெருமளவு குறைய வாய்ப்பிருப்பதை யாரும் மறுக்க முடியாது.

சில நன்மைகளும் உண்டு

அமெரிக்க-சீன வர்த்தக யுத்தத்தில் இந்தியாவிற்கு சில நன்மைகளும் உண்டு. உலகப் பொருளாதார வளர்ச்சி தடைபடும் என்ற அச்சத்தினால், சர்வதேச அளவில் கச்சா எண்ணெய் விலை சரிந்து வருகிறது. இந்தியாவின் மிகப் பெரிய இறக்குமதிப் பொருளான கச்சா எண்ணெயின் விலைச் சரிவு, பொருளாதார ரீதியாக நமக்கு நன்மை பயக்கும்.

சந்தை நிர்ணயிக்கும் அகக் காரணிகள்

இந்தியா இறக்குமதி சார்ந்த ஒரு நாடு என்பதினால், பொருளாதார ரீதியான பாதிப்பு சீனா போன்ற ஏற்றுமதி சார்ந்த நாடுகளைவிடக் குறைவாக இருக்கும். ஏற்கெனவே கூறியபடி, அந்நிய முதலீட்டாளர்களின் தாக்கமும் சமீப காலங்களில் பெருமளவு குறைந்துவிட்டது. எனவே, உள்நாட்டுக் காரணிகளே நமது பங்குச் சந்தையின் போக்கினைத்  தீர்மானிக்கும் மிகப் பெரிய சக்தியாக இருக்கும். வாகன விற்பனை வீழ்ச்சி, விமானப் பயணிகளின் எண்ணிக்கை சரிவு, நுகர்ப்பொருள்கள் விற்பனையில் ஏற்பட்டுள்ள தளர்ச்சி,  மறைமுக வரி வசூலிப்பில் ஏற்பட்டுள்ள சுணக்கம் ஆகியவை இந்தியப் பொருளாதாரத்தின் தற்போதைய நிலையைப் புடம்போட்டுக் காட்டுகின்றன.

பட்டியலிடப்பட்ட நிறுவனங்களின் நான்காம் காலாண்டு முடிவுகளும் திருப்தியாக இல்லாதது,   வங்கிசாரா நிதி நிறுவனங்கள் எதிர்கொள்ளும் சிக்கல்கள், எதிர்காலத்திற்கு எச்சரிக்கை மணி அடிப்பதாக உள்ளன. வரி வசூலிப்பில் ஏற்பட்டுள்ள சுணக்கம் நிதிப் பற்றாக்குறையை ஏற்கெனவே அதிகரித்துள்ள சூழ்நிலையில், தேர்தலுக்குப்பிறகு அரசியல் கட்சிகள் தமது தேர்தல் அறிக்கையில் அறிவித்துள்ளபடி வாக்குறுதிகளை நிறைவேற்ற முயற்சி செய்தால், நிதிப் பற்றாக்குறை பன்மடங்கு அதிகரிக்கும் அபாயம் உள்ளது. இதனால் இந்தியாவின் தர மதிப்பு பாதிப்படையலாம்.

எனவே, தற்போதைய நிலையில் பங்குச் சந்தை முதலீட்டாளர்கள் கவனத்துடன் செயல்படுவது நல்லது!

(குறிப்பு: இந்தக் கட்டுரையில் சொல்லப்பட்டுள்ள கருத்துகள் கட்டுரையாளரின் தனிப்பட்ட கருத்துகளே.)