Published:Updated:

ஷேர்லக்: எல்.ஐ.சி முதலீடு செய்த பங்குகள்!

ஷேர்லக்: எல்.ஐ.சி முதலீடு செய்த பங்குகள்!
பிரீமியம் ஸ்டோரி
ஷேர்லக்: எல்.ஐ.சி முதலீடு செய்த பங்குகள்!

ஓவியம்: அரஸ்

ஷேர்லக்: எல்.ஐ.சி முதலீடு செய்த பங்குகள்!

ஓவியம்: அரஸ்

Published:Updated:
ஷேர்லக்: எல்.ஐ.சி முதலீடு செய்த பங்குகள்!
பிரீமியம் ஸ்டோரி
ஷேர்லக்: எல்.ஐ.சி முதலீடு செய்த பங்குகள்!

“பல இடங்களில் கோடை மழை பெய்வதாகச் சொல்கிறார்கள். சென்னையிலும் மழை பெய்தால் பரவாயில்லை” என்றபடி தனது கோட்டைக் கழற்றினார் ஷேர்லக். நாம் ஆர்டர் செய்து தயாராக வைத்திருந்த சாத்துக்குடி ஜூஸை அவருக்குத் தந்தோம். வாங்கிப் பருகிக் கொண்டே நம் கேள்விகளுக்குப் பதில் சொல்ல ஆரம்பித்தார்.

ஷேர்லக்: எல்.ஐ.சி முதலீடு செய்த பங்குகள்!

ஹெச்.டி.எஃப்.சி பேங்க், பங்கின் முக மதிப்பைக் குறைப்பது பற்றி பரிசீலித்து வருகிறதே அந்த நிர்வாகம்? 

“நாட்டின் பெரிய தனியார் வங்கிகளில் ஒன்றான ஹெச்.டி.எஃப்.சி பேங்க் பங்குகளின் முக மதிப்பைப் பிரிப்பது தொடர்பாக மே 22-ம் தேதி பரிசீலிக்க உள்ளது. முகமதிப்பை ரூ.2-லிருந்து ரூ.1-ஆகக் குறைக்க, அந்த வங்கி திட்டமிட்டுள்ளதாகக் கூறப்படுகிறது. பங்குகளின் வர்த்தகத்தை அதிகரிக்கவே இந்த நடவடிக்கையை மேற்கொள்கிறது.

 கடந்த ஓராண்டில் ஹெச்.டி.எஃப்.சி பங்கின் விலை 17% ஏற்றம் கண்டுள்ளது. கடந்த திங்களன்று வர்த்தக முடிவில் இதன் பங்கு விலை ரூ.2,328.40-ஆகக் காணப்பட்டது. கடந்த 2011-ம் ஆண்டுக்குப்பிறகு, இந்த வங்கி தற்போது இரண்டாவது முறையாகப் பங்கு பிரித்தல் நடவடிக்கையை மேற்கொள்கிறது.’’

ஃபெடரல் வங்கியின் இலக்கு விலையைத் தரகு நிறுவனங்கள் அதிகரிக்க  என்ன காரணம்?


“முடிவடைந்த மார்ச் காலாண்டில்,  ஃபெடரல் வங்கியின் நிகர லாபம் எதிர்பார்த்ததைவிட  அதிகமாக  (170%) இருந்ததைத் தொடர்ந்து, அந்த வங்கியின் பங்கு இலக்கு விலையை 30% வரை தரகு நிறுவனங்கள் அதிகரித்துள்ளன.

புரோக்கரேஜ் இன்வெஸ்டெக் என்ற தரகு நிறுவனம் இந்த வங்கியின் இலக்கு விலையை 30 சதவிகிதமும், கோட்டக் செக்யூரிட்டீஸ் நிறுவனம் இதன் இலக்கு விலையை 130 ரூபாயும்  அதிகரித்துள்ளது. ஃபெடரல் வங்கி சரியான திசையில் பயணிப்பதாக ஐ.சி.ஐ.சி.ஐ செக்யூரிட்டீஸ் கூறியுள்ளது. இந்தப் பங்கின் விலை வெள்ளிக்கிழமை சந்தை முடிவில் ரூ.96.90-ஆக இருந்தது.”

பி.என்.பி ஹவுஸிங் ஃபைனான்ஸ், புதிய பங்கு வெளியீடு மூலம் நிதித் திரட்டுவது வெற்றி பெறுமா?

“பி.என்.பி ஹவுஸிங் ஃபைனான்ஸ், நடப்பு நிதியாண்டில் புதிய பங்கு வெளியீட்டின்மூலம் முதலீட்டாளர்களிடமிருந்து சுமார் ரூ.2,000 கோடி  நிதி திரட்டத் திட்டமிட்டுள்ளது. 2016-ம் ஆண்டில் பங்குச் சந்தையில் பட்டியலிடப்பட்டபின், தற்போதுதான் முதன்முறையாக அந்த நிறுவனம் புதிய பங்கு வெளியீட்டின்மூலம் நிதி திரட்ட உள்ளது.

இந்த மாதத்தின் கடைசி வாரத்தில் நடைபெற உள்ள நிர்வாகக் குழுவின் கூட்டத்தில், இதற்கான திட்டத்தை முன்வைத்து ஒப்புதல் கோர உள்ளது. கடந்த 2019-ம் நிதியாண்டில் இந்த நிறுவனம் ரூ.30,843 கோடி கடன் வாங்கியிருந்த நிலையில், மார்ச் 31-ம் தேதிப்படி, ரூ.7,000 கோடிக்கும் அதிகமான ரொக்கக் கையிருப்பும், ரொக்க முதலீடும் இருப்பதாகத் தெரிவித்துள்ளது.”

எல்.ஐ.சி நிறுவனம் 35 நிறுவனப் பங்குகளில் தனது முதலீடுகளை மாற்றியமைத்ததன் ரகசியம் என்ன? 

“எல்.ஐ.சி நிறுவனம் வழக்கமாகச் சந்தை நிலவரங்களுக்கேற்ப தனது போர்ஃபோலியோவை மாற்றியமைக்கும். இந்த நிலையில், 2019 மார்ச் 31-ம் தேதியுடன் முடிவடைந்த நான்காவது காலாண்டில் இந்த நிறுவனம் 70-க்கும் அதிகமான கம்பெனிகளின் பங்குகளை விற்று ஆதாயம் பார்த்துள்ளது. தவிர, 35 கம்பெனிகளில் தனது பங்குகளை அதிகரித்துள்ளது.

அலசி ஆராய்ந்து தேர்ந்தெடுத்தக்கப்பட்ட சில ஸ்மால் & மிட்கேப் பங்குகளில் தனது முதலீட்டை  எல்.ஐ.சி அதிகரித்துள்ளது. குறிப்பாக, ஹெச்.இ.ஜி, ஜே.பி இன்ஃப்ராடெக், டாடா கெமிக்கல்ஸ், பிரிட்டானியா இண்டஸ்ட்ரீஸ், டாடா காபி, கெயில் இந்தியா, என்.எம்.டி.சி மற்றும் அதானி போர்ட்ஸ் உள்ளிட்ட 35 நிறுவனங்களில் தனது பங்குகளை அதிகரித்துள்ளது. மேலும், எம் & எம், ஹெச்.டி.எஃப்.சி  பேங்க், பஜாஜ் ஆட்டோ, ஐ.டி.சி, ஓ.என்.ஜி.சி, ஐ.ஓ.சி, விப்ரோ, அல்ட்ராடெக் சிமென்ட்ஸ், பி.பி.சி.எல், ஆயில் இந்தியா உள்ளிட்ட சில புளூசிப் பங்குகளிலும் தனது முதலீட்டை அதிகரித்துள்ளது. 

அதேசமயம், பங்குகளை விற்று ஆதாயம் பார்த்த பட்டியலில் ரிலையன்ஸ் கம்யூனிகேஷன்ஸ்,  ரிலையன்ஸ் இன்ஃப்ரா, புஞ்ச் லாய்டு, பேங்க் ஆஃப் இந்தியா மற்றும் சி.ஜி பவர் உள்ளிட்ட நிறுவனங்கள் இடம்பெற்றுள்ளன. இதெல்லாம் ஒரு தகவலுக்காகத்தான். எல்.ஐ.சி வாங்கிய பங்குகளை முதலீட்டாளர்களும் வாங்க வேண்டும் என்பதில்லை.”

நியோஜென் கெமிக்கல்ஸ் பங்கு, பட்டியலிடப்பட்ட அன்றே விலை உயர்வு கண்டிருக்கிறதே?

“சந்தையின் சாதகமற்ற சூழலிலும்கூட நியோஜென் கெமிக்கல்ஸ் நிறுவனத்தின் புதிய பங்கு வெளியீட்டுக்கு அமோக ஆதரவு கிடைத்தது. பங்குகள் வேண்டி 41 மடங்கு விண்ணப்பங்கள் வந்தன.  இதனால் இந்தப் பங்கு பட்டியலிடப்பட்ட அன்றே வெளியீட்டு விலையைவிட 22.58% அதிகரித்து,  ரூ.251-ஆகப் பட்டியலிடப்பட்டது.”

 அதிக முதலீட்டாளர்களால் விரும்பப்படும் பங்காக எல் & டி இருக்கிறதே?


“ஆம், சென்செக்ஸ் பங்குகளின் பட்டியலில் எல் & டி முதல் இடத்தைப் பிடித்திருக்கிறது.  இந்தப் பங்கு கடந்த ஆண்டைவிட 11 இடங்கள் முன்னேறி முதலிடத்தைப் பெற்றுள்ளது. இதற்கு மாறாக, வேதாந்தா நிறுவனத்தின் பங்குகள் மிகவும் பின்தங்கியுள்ளன.”

முனிசிபல் பாண்டுகளில் முதலீடு செய்ய செபி  அனுமதி வழங்கியிருக்கிறதே?

“முனிசிபல் பாண்டுகளில் அந்நிய முதலீட்டாளர்கள் முதலீடு செய்வதற்கு தற்போது செபி ஒப்புதல் வழங்கியுள்ளது. முனிசிபல் பாண்டுகளில் முதலீடு செய்ய அந்நிய முதலீட்டாளர்களுக்கு ரிசர்வ் வங்கி அனுமதி வழங்கிய இரண்டு வாரங்களில் செபியும் தனது ஒப்புதலை அளித்துள்ளது. வெளிநாடுவாழ் இந்தியர்களின் முதலீடுகளைக் கடன் சார்ந்த பாண்டுகளில் ஈர்க்கும்வண்ணம் இத்தகைய நடவடிக்கை எடுக்கப்பட்டுள்ளது.”

மைண்ட்ட்ரீ பங்குகளை எல் அண்டு டி வாங்கி வருவது பற்றி...


‘‘மைண்ட்ட்ரீ நிறுவனத்தின் பெரும்பகுதி பங்குகளை எல் அண்டு டி வாங்கத் திட்டமிட்டது.  மைண்ட்ட்ரீ-யின் நிறுவனர்கள் இதற்கு எதிர்ப்புத் தெரிவித்தார்கள். ஆனால், கடந்த வாரத்தில் தொடர்ந்து மூன்று தினங்களாக மைண்ட்ட்ரீ பங்குகளை எல் அண்டு டி வாங்கியது. 37.53 லட்சம் பங்குகளை (ஒரு பங்கின் விலை ரூ.979.96) ரூ.368 கோடிக்கு பங்குச் சந்தை பிளாக் டீல் மூலம்  மூலம் வாங்கியிருக்கிறது. இது மைண்ட்ட்ரீ-யின் பங்கு மூலதனத்தில் 2.28% ஆகும். அதேசமயத்தில்,  பெரு முதலீட்டாளரான ரேகா ஷா,  26.84 லட்சம் மைண்ட்ட்ரீ பங்குகளை ரூ.263 கோடிக்கு விற்பனை செய்திருக்கிறார். சமீபத்தில்  கபே காபி டே-யின் உரிமையாளர் வி.ஜி.சித்தார்த்தா விடமிருந்து மைண்ட்ட்ரீ-யின் 20% பங்குகளை (இதன் மொத்த மதிப்பு ரூ.3,210 கோடி) எல் அண்டு டி வாங்கியதை யாரும் மறந்திருக்க முடியாது.’’
   
யெஸ் பேங்க் தர மதிப்பீடு குறைக்கப்பட்டுள்ளதே?

‘‘முடிந்த நான்காவது காலாண்டில் யெஸ் பேங்க் முதன்முறையாக  இழப்பைச் சந்தித்துள்ளது. இதைத் தொடர்ந்து, பங்கு விலை கடுமையாக இறங்கியது. இதனால், இக்ரா மற்றும் இந்தியா ரேட்டிங்ஸ் போன்றவை யெஸ் பேங்கின்  தரக் குறியீட்டைக் குறைத்துள்ளன. இந்த வங்கி வழங்கியுள்ள குறிப்பிட்ட சில கடன்கள், வாராக் கடன் பட்டியலில் சேர்வதற்கான வாய்ப்பு உள்ளதாக இந்தியா ரேட்டிங்ஸ் எச்சரித்துள்ளது.’’

ரிலையன்ஸ் நிறுவனத்தின் மதிப்பீடும் குறைக்கப்பட்டுள்ளதே?


‘‘கடன் அதிகரிப்பு உள்ளிட்ட பல்வேறு காரணங்களால் முகேஷ் அம்பானி தலைமை யிலான ரிலையன்ஸ் இண்டஸ்ட்ரீஸ்  நிறுவனத்தின்  தர மதிப்பீட்டை மார்கன் ஸ்டேன்லி ‘ஓவர் வெயிட்’ என்கிற நிலையிலிருந்து ‘ஈக்வல் வெயிட்’ என்கிற நிலை மாற்றியுள்ளது. இதனால் இந்த நிறுவனப் பங்கு விலை தொடர்ந்து குறைந்து வருகிறது. 

எனினும், எண்ணெய் சுத்திகரிப்பின்மூலம் இந்த நிறுவனத்தின் லாபம் 2020-ம் நிதியாண்டில் பேரல் ஒன்றுக்கு 11 டாலராகவும், 2021-ம் நிதியாண்டில் 12.75 டாலராகவும் இருக்கும் என மார்கன் ஸ்டேன்லி மதிப்பிட்டுள்ளது. இதனால் இதன் இலக்கு விலையை ரூ.1,230-லிருந்து ரூ.1,349-ஆக மாற்றியமைத்துள்ளது.’’
 
நமது பங்குச் சந்தையில் வந்த வெளிநாட்டு முதலீடுகள் தொடர்ந்து வெறியேற என்ன காரணம்?

‘‘இந்திய பங்குச் சந்தையின் வளர்ச்சியில் வெளிநாட்டு முதலீட்டாளர்களின் பங்கு முக்கியத்துவம் வாய்ந்ததாகக் கருதப்படுகிறது. அந்தவகையில், கடந்த 25 ஆண்டுகளாக வெளிநாட்டு நிறுவனங்கள் இந்திய பங்கு மற்றும் கடன் சந்தைகளில் முதலீடு செய்துவருகின்றன.

நடப்பு ஆண்டு ஜனவரி மாதத்தில் அந்நிய முதலீட்டாளர்கள் இந்திய மூலதனச் சந்தையிலிருந்து ரூ.5,264 கோடியை விலக்கினர். ஆனால், பிப்ரவரியில் ரூ.1,17,900 கோடியை முதலீடு செய்தனர். மார்ச் மாதத்தில் நம்  பங்குச் சந்தையில் செய்யப்பட்ட வெளிநாட்டு முதலீடு ரூ.38,211 கோடியாக இருந்தது. ஏப்ரல் மாதத்தில் ரூ.17,219 கோடி முதலீடு செய்யப்பட்டது.

இந்த நிலையில், நடப்பு மே மாதத்தில் பங்குச் சந்தை மற்றும் கடன் சந்தையிலிருந்து வெளிநாட்டு முதலீட்டாளர்கள் முதலீட்டைக் கணிசமாக வெளியே எடுத்து வருகிறார்கள். நடப்பு மே மாதத்தில் தேர்தல் முடிவுகள் வெளியாக இருப்பதும், அந்நிய முதலீடு வெளியேற்றமும் பங்குச் சந்தை இறக்கத்துக்கு முக்கியமான காரணங்களாகப் பார்க்கப்படுகின்றன’’ என்றவர் கிளம்பும்முன், ‘‘கடந்த ஏழு டிரேடிங் தினங்களில் முதலீட்டாளர்கள் ரூ.3.22 லட்சம் கோடி அளவுக்கு முதலீட்டை இழந்திருப்பதாகச் சொல்கிறார்கள். தேர்தல் ரிசல்ட் வந்தவுடன் சந்தை மீண்டும் ஏற்றப்பாதையில் செல்ல வாய்ப்புண்டு’’ என்று சொல்லிவிட்டு, வீட்டுக்குப் புறப்பட்டார்!

ஷேர்லக்

ஒட்டுமொத்த விகடனுக்கும் ஒரே ஷார்ட்கட்!

ஷேர்லக்: எல்.ஐ.சி முதலீடு செய்த பங்குகள்!

டிரேடர்ஸ் பகுதியைப் படிக்க: https://bit.ly/2PVd1dX