Published:Updated:

ஷேர்லக்: 52 வார இறக்கத்தில் 300 பங்குகள்: முதலீடு செய்யலாமா?

ஷேர்லக்: 52 வார இறக்கத்தில் 300 பங்குகள்: முதலீடு செய்யலாமா?
பிரீமியம் ஸ்டோரி
ஷேர்லக்: 52 வார இறக்கத்தில் 300 பங்குகள்: முதலீடு செய்யலாமா?

ஓவியம்: அரஸ்

ஷேர்லக்: 52 வார இறக்கத்தில் 300 பங்குகள்: முதலீடு செய்யலாமா?

ஓவியம்: அரஸ்

Published:Updated:
ஷேர்லக்: 52 வார இறக்கத்தில் 300 பங்குகள்: முதலீடு செய்யலாமா?
பிரீமியம் ஸ்டோரி
ஷேர்லக்: 52 வார இறக்கத்தில் 300 பங்குகள்: முதலீடு செய்யலாமா?

“அக்னி வெயில் தாங்க முடியவில்லை. ஜில்லென ஆப்பிள் ஜூஸ் ஆர்டர் செய்யுங்கள். அரைமணி நேரத்தில் வந்துவிடுவேன்’’ என ஷேர்லக்கிடமிருந்து வாட்ஸ்அப் தகவல் வந்தது. உடனே  ஜூஸ் ஆர்டர் செய்துவிட்டு, கேள்வி களுடன் தயாராக இருந்தோம். சொன்னபடி அரை மணி நேரத்தில் வந்து சேர்ந்தார் ஷேர்லக். ஆப்பிள் ஜூஸை அவருக்குத் தந்துவிட்டு, கேள்விகளைக் கேட்க ஆரம்பித்தோம்.

ஷேர்லக்: 52 வார இறக்கத்தில் 300 பங்குகள்: முதலீடு செய்யலாமா?

மியூச்சுவல் ஃபண்ட் நிறுவனங்கள், வாகனத்துறை பங்குகளில் முதலீட்டைக் குறைத்திருப்பது ஏன்?

“வாகன விற்பனையின் வேகம் குறைந்ததுதான் காரணம். மியூச்சுவல் ஃபண்ட் நிறுவனங்கள், வாகனத் துறை பங்குகளில் செய்துள்ள முதலீட்டினை கடந்த ஏப்ரலில் மிகவும் குறைத்திருக்கிறது. முந்தைய ஆண்டின் இதே மாதத்துடன் ஒப்பிடும்போது, மியூச்சுவல் ஃபண்ட் நிறுவனங்களின் மொத்தப் பங்கு முதலீட்டில் வாகனத் துறை நிறுவனப் பங்குகளின் பங்களிப்பு 3.4% குறைந்து, 6.3 சதவிகிதமாக உள்ளது. 

மியூச்சுவல் ஃபண்ட் நிறுவனங்கள் அதிகம் முதலீடு செய்துள்ள துறைகளில், 2018 ஏப்ரலில் இரண்டாவது இடத்தைப் பிடித்திருந்த வாகனத் துறை இப்போது ஏழாவது இடமாக இருக்கிறது. 

ஏப்ரல் மாதத்தில் மியூச்சுவல் ஃபண்ட் நிறுவனங்கள் தகவல் தொழில்நுட்பம், சிமென்ட், ஹெல்த்கேர், தனியார் வங்கிகள் மற்றும் கேப்பிட்டல் கூட்ஸ் நிறுவனங்களின் பங்குகளில் முதலீட்டை அதிகரித்துள்ளன. ஆனால், பொதுத் துறை வங்கிகள், வங்கிசாரா நிதி நிறுவனங்கள், ஆயில் அண்டு கேஸ், ரசாயனங்கள் மற்றும் இன்ஃப்ராஸ்ட்ரக்சர் நிறுவனப் பங்குகளில் முதலீட்டைக் குறைத்துள்ளன. தனியார் வங்கிப் பங்குகளில் முதலீடு 3.9% அதிகரித்து, 19.3 சதவிகிதமாக உள்ளது. ஹெச்.டி.எஃப்.சி பேங்க் பங்குகளில் 16 மியூச்சுவல் ஃபண்ட் நிறுவனங்கள் முதலீடு செய்துள்ளன.

முன்னணி மியூச்சுவல் ஃபண்ட் நிறுவனங்கள், கடந்த ஏப்ரல் மாதத்தில் எஸ்.பி.ஐ, கோல் இந்தியா, ஓ.என்.ஜி.சி மற்றும் பவர் கிரிட் கார்ப்பரேஷன் போன்ற பொதுத் துறை நிறுவனப் பங்குகளை அதிகம் விற்றுள்ளன.  சிப்லா, என்.டி.பி.சி, டி.சி.எஸ், அல்கெம் லேபாரட்டரீஸ் ஆகிய பங்குகளில் அதிக முதலீட்டை மேற் கொண்டுள்ளன.”

வங்கிசாரா நிதி நிறுவனங்களில் ரிஸ்க் மேலாண்மை அதிகாரிகளை நியமிக்க ஆர்.பி.ஐ அறிவுறுத்தக் காரணம் என்ன?

“வங்கிசாரா நிதி நிறுவனங்கள் நிதி நெருக்கடியில் சிக்கித் தவித்துவருகின்றன. இது போன்ற பிரச்னை இனியும் வரக்கூடாது என்பதற்காக வங்கிசாரா நிதி நிறுவனங்கள், ‘சீஃப் ரிஸ்க் ஆபீஸர்’களை நியமிக்க வேண்டும் என ஆர்.பி.ஐ சொல்லியிருக்கிறது. சொத்து மதிப்பு  ரூ.5,000 கோடிக்குமேல் இருக்கும் நிதி நிறுவனங்கள் இவ்விதம் அதிகாரிகளை நியமிக்க வேண்டும். இந்த அதிகாரி இந்தத் துறையில் நிபுணத்துவம் கொண்டவராகவும் ரிஸ்க் மேலாண்மையில் நல்ல அனுபவம் கொண்டவராகவும் இருப்பது அவசியம் என ஆர்.பி.ஐ சொல்லியிருக்கிறது.”

முந்நூறுக்கும் மேற்பட்ட பங்குகள் 52 வார விலை இறக்கத்தில் வர்த்தகமாவது கவலை தருகிறதே!

“நான்காம் காலாண்டு முடிவுகள், சர்வதேச நிலவரம், நிர்வாகச் சிக்கல்கள், இந்திய நாடாளுமன்றத் தேர்தல் முடிவு குறித்த எதிர்பார்ப்பு என பல்வேறு காரணங்களால் சுமார் 300 பங்குகளின் விலையானது அவற்றின் 52 வார இறக்கத்தில் வர்த்தகமாகி வருகின்றன.

யெஸ் பேங்க், அர்விந்த், மஹிந்திரா அண்டு மஹிந்திரா, அப்போலோ டயர்ஸ், பாரத் ஃபோர்ஜ், கெடிலா ஹெல்த்கேர் உள்ளிட்ட பங்குகள் அதிக இறக்கம் கண்டுள்ளன.

இந்தப் பங்குகளை இப்போது வாங்கலாமா என்றால், சற்றுக் காத்திருப்பது நல்லது. நாடாளு மன்றத் தேர்தல் முடிவுகள் வெளியாகி, புதிய ஆட்சி அமையும் வரை இந்தப் பங்குகளின் விலை ஏற்ற இறக்கமாகவே இருக்கும். எனவே, இன்னும் கொஞ்சம் பொறுக்கலாம்’’ என்கிறார்கள், முன்னணி அனலிஸ்ட்கள்.”

ரிட்மேன் இன்ஃப்ரா நிறுவனம் பங்கு வர்த்தகத்தில் ஈடுபட செபி தடை விதித்ததன் பின்னணி ரகசியம்..?

“பங்குச் சந்தை ஒழுங்குமுறை ஆணையமான செபியின் விதிமுறைகளை மீறியதாக ரிட்மேன் இன்ஃப்ரா நிறுவனம், ஆறு மாத காலத்துக்கு பங்குச் சந்தையில் பங்குகளை வாங்கவோ, விற்கவோ அல்லது எந்தவொரு விதத்திலும் பங்குப் பரிவர்த்தனையில் ஈடுபடவோ கூடாது எனத் தடை விதிக்கப்பட்டுள்ளது. இந்தத் தடை இந்த நிறுவனத்துக்கு மட்டுமல்லாது, அதன் ஐந்து இயக்குநர்கள் மற்றும் தலைமை நிதி அதிகாரி ஆகியோருக்கும் விதிக்கப்பட்டுள்ளது.’’

ஹெச்.டி.எஃப்.சி பங்கு விலை உயரும் எனத் தரகு நிறுவனங்கள் மதிப்பிட்டுள்ளனவே?

“நான்காவது காலாண்டில் ஹெச்.டி.எஃப்.சி-யின் நிகர லாபம் 27% உயர்ந்து, ரூ.2,862 கோடியாக அதிகரித்துள்ளது. இந்த நிலையில், சிட்டி, சி.எல்.எஸ்.ஏ, ஐ.ஐ.எஃப்.எல், பிரபுதாஸ் லீலாதர் மற்றும் நொமுரா போன்ற பங்குத் தரகு நிறுவனங்கள் ஹெச்.டி.எஃப்.சி நிறுவனத்தின் தரமதிப்பீட்டைத் தொடர்ந்து ‘வாங்கும்’ நிலையிலேயே வைத்துள்ளன. அத்துடன் இதன் பங்கு விலை, தொடர்ந்து ஏற்றமடையும் என்றும் அவை மதிப்பிட்டுள்ளன.”

 ரைட்ஸ் (RITES) நிறுவனப் பங்குகளை மத்திய அரசு மேலும் விற்பனை செய்யவிருக்கிறதே?

“ரைட்ஸ் இந்தியா (RITES India), ரயில்வே துறையில் முதலாவதாக இந்த நிறுவனம் பங்கு வெளியீட்டில் களம் இறங்கியது. இந்தப் பங்கு வெளியீட்டுக்கு அமோக ஆதரவு இருந்தது. இதன்மூலம் ரூ.466 கோடியை மத்திய அரசு திரட்டியது. வெளியீட்டு விலை ரூ.185-ஆக இருந்தது. தற்போது இந்தப் பங்கின் விலை          ரூ.233-ஆக விற்பனையாகி வருகிறது.

இந்த நிலையில், இந்த நிறுவனத்தின் மேலும் 15% பங்குகளை விற்பது குறித்து மத்திய அரசு ஆலோசித்து வருகிறது. இதன் வாயிலாக சுமார் ரூ.700 கோடி திரட்டும் எனத் தெரிகிறது. தற்போது அந்த நிறுவனத்தில் மத்திய அரசுக்கு 87.40% பங்குகள் இருக்கின்றன. இந்த விற்பனைக்குப் பிறகு, இது 72.40 சதவிகிதமாகக் குறையும்.”

ஆன்டனி வேஸ்ட் ஹாண்டிலிங் செல் நிறுவனம் புதிய பங்கு வெளியீட்டில் களமிறங்குகிறதே?

“திடக் கழிவு மேலாண்மை சேவைத் துறையில் முன்னணி நிறுவனமாகத் திகழும், ஆன்டனி வேஸ்ட் ஹாண்டிலிங் செல் (Antony Waste Handling Cell) நிறுவனம் புதிய பங்கு வெளியிட முடிவு செய்துள்ளது. இதன்மூலம் ரூ.300 கோடி முதல் ரூ.350 கோடி வரை நிதி  திரட்டத் திட்டமிட்டுள்ளது. இதற்கான அனுமதியை செபியிடம் கேட்டு விண்ணப்பித்துள்ளது. வருகிற ஜூன் மாதத்தில் இந்த நிறுவனம் புதிய பங்கு வெளியீட்டில் களமிறங்கும் என எதிர்பார்க்கப்படுகிறது.”

ரயில்டெல் நிறுவனப் பங்குகள் மூலம் மத்திய அரசு நிதி திரட்டுகிறதே... ஏன்?


“செப்டம்பர் மாதத்திற்குள் ரயில்டெல் (RailTel) நிறுவனத்தின் 25 சதவிகிதப் பங்குகளை புதிய பங்கு வெளியீடு மூலம் விற்பனை செய்ய  மத்திய அரசு திட்டமிட்டுள்ளதாகத் தெரிகிறது. இதன் மூலம் ரூ.300 கோடி திரட்ட இலக்கு நிர்ணயிக்கப் பட்டுள்ளது. இந்த நிறுவனம் தொலைத் தொடர்பு உள்கட்டமைப்பு வசதிகளை அளித்து வருகிறது.  நடப்பு நிதியாண்டில் (2019-20) அரசு நிறுவனப் பங்குகள் விற்பனை இலக்கு 90,000 கோடி ரூபாயாக நிர்ணயிக்கப்பட்டிருக்கிறது. இது இதற்கு முந்தைய நிதியாண்டின் இலக்கைவிட (ரூ.84,972 கோடி) 12.5% அதிகம்.”

மியூச்சுவல் ஃபண்ட் எஸ்.ஐ.பி முதலீடு இதுவரை இல்லாத அளவுக்கு உயர்ந்து இருக்கிறதே?

“இந்திய மியூச்சுவல் ஃபண்ட் நிறுவனங்கள் நிர்வகிக்கும் சொத்து மதிப்பு, ஏப்ரல் மாதத்தில் ரூ.25.27 லட்சம் கோடியாக அதிகரித்துள்ளது. இது கடந்த நிதியாண்டின் இதே காலத்தில் ரூ.23.25 லட்சம் கோடியாக இருந்தது. ஈக்விட்டி மியூச்சுவல் ஃபண்டுகளில் முதலீடு கடந்த ஏப்ரல் மாதத்தில் 61% சரிந்து, ரூ.4,609 கோடியாக இருக்கிறது. இது கடந்த மார்ச் மாதத்தில் ரூ.11,756 கோடியாக இருந்தது. உள்நாட்டுத் தேர்தல் நிலவரங்கள், முதலீட்டாளர்களின் சென்டிமென்ட் பாதிப்பு போன்றவை சந்தை இறக்கத்துக்கான காரணங்களாகச் சொல்லப்படுகின்றன. 

இதே காலகட்டத்தில், சிஸ்டமேட்டிக் இன்வெஸ்ட்மென்ட் பிளான் (எஸ்.ஐ.பி) மூலம்  ரூ.8,238 கோடி முதலீடு செய்யப்பட்டுள்ளது.  இது இதுவரை இல்லாத அளவுக்கு மாதத்தின் அடிப்படையில் செய்யப்பட்ட மிக அதிக முதலீடு ஆகும். கடந்த மார்ச் மாதத்தில்  எஸ்.ஐ.பி முறையில் ரூ.8,055 கோடியாக இருந்தது. இந்த முறையில் அண்மைக் காலத்தில் நகரங்கள் மற்றும் கிராமங்களில் முதலீடுசெய்வது அதிகரித்து வருவது இந்த உயர்வுக்கு முக்கியக் காரணமாகும்” என்றவர் புறப்படத் தயாரானார்.

‘‘வருகிற 23-ம் தேதி நாடாளுமன்றத் தேர்தல் முடிவு வெளியாகிறது. இதனையொட்டி பங்குச் சந்தைகள் ஏற்ற இறக்கத்துடனே இருக்கும். எனவே, சந்தைக்குப் புதியவர்கள் இந்தச் சமயத்தில் டிரேடிங்கிலிருந்து கொஞ்சம் ஒதுங்கி நிற்பது நல்லது’’ என்று சொல்லிவிட்டு, வீட்டுக்குப் புறப்பட்டார்!

ஷேர்லக்

ஒட்டுமொத்த விகடனுக்கும் ஒரே ஷார்ட்கட்!

கோவையில் பங்குச் சந்தை பயிற்சி!

நா
ணயம் விகடன் நடத்தும் பங்குச் சந்தை ஃபண்டமென்டல் பயிற்சி வகுப்பு கோயம்புத்தூரில் நடக்கிறது. ஜூன் 8 மற்றும் 9-ம் தேதிகளில் நடக்கும் இந்த வகுப்புக்கான கட்டணம் ரூ. 6,000. எக்ட்ரா பங்குச் சந்தை பயிற்சி மையத்தின் முதன்மை செயல் அதிகாரி தி.ரா.அருள்ராஜன்  பயிற்சி தருகிறார். முன்பதிவுக்கு https://bit.ly/2PsOcoS கூடுதல் விவரங்களுக்கு: 9940415222.