Published:Updated:

வங்கி எஃப்.டி வட்டி இன்னும் குறையும்! - சுனில் சுப்ரமணியம்

சுனில் சுப்ரமணியம்
பிரீமியம் ஸ்டோரி
சுனில் சுப்ரமணியம்

வாகனம், கட்டுமானம், ரியல் எஸ்டேட், வங்கிசாரா நிதிச் சேவை போன்ற துறைகள் மெதுவாகத்தான் வளர்ச்சி காணும்.

வங்கி எஃப்.டி வட்டி இன்னும் குறையும்! - சுனில் சுப்ரமணியம்

வாகனம், கட்டுமானம், ரியல் எஸ்டேட், வங்கிசாரா நிதிச் சேவை போன்ற துறைகள் மெதுவாகத்தான் வளர்ச்சி காணும்.

Published:Updated:
சுனில் சுப்ரமணியம்
பிரீமியம் ஸ்டோரி
சுனில் சுப்ரமணியம்
ங்குச் சந்தை வீழ்ச்சிகண்டிருக்கும் இந்த நேரத்தில் இந்தியப் பொருளாதாரம் என்ன ஆகும், பங்குச் சந்தையின் எதிர்காலம் எப்படியிருக்கும், மியூச்சுவல் ஃபண்ட் முதலீடு லாபம் தருமா...

என்றெல்லாம் வாசகர்கள் மனதில் பல கேள்விகள். அந்தக் கேள்விகளுக்கெல்லாம் பதில் சொன்னார் சுந்தரம் மியூச்சுவல் ஃபண்ட் நிறுவனத்தின் நிர்வாக இயக்குநர் சுனில் சுப்ரமணியம். வாசகர்களின் கேள்விகளும், அவற்றுக்கு சுனில் சுப்ரமணியம் அளித்த பதில்களும்...

நான் நான்கு ஆண்டுகளாக மிட்கேப், ஸ்மால்கேப் ஃபண்டுகளில் எஸ்.ஐ.பி முறையில் முதலீடு செய்துவருகிறேன். தற்போது அதன் மதிப்பு 30% வரை குறைந்திருக்கிறது. இன்னும் ஆறு ஆண்டுகள் முதலீடு செய்யத் திட்டம். இந்த வகை ஃபண்டுகளின் எதிர்காலம் எப்படி இருக்கும்?

- முத்துராமலிங்கம், முகநூல் மூலம்

ஒட்டுமொத்த விகடனுக்கும் ஒரே ஷார்ட்கட்!

“ஊரடங்கு முடிவுக்கு வரும் வரை இந்த ஃபண்டுகளில் இறக்கம் இருக்கத்தான் செய்யும். உள்நாட்டுப் பொருளாதாரம் வளர்ச்சிக்குத் திரும்ப சிறிது காலம் ஆகும். ஊரடங்கு முடிவுக்கு வந்த பிறகு, இந்தியாவின் அதிக மக்கள்தொகை மற்றும் பரந்து விரிந்த பரப்பு ஆகிய காரணங்களால் 10, 12 ஆண்டுகளுக்கு உள்நாட்டு வளர்ச்சி சிறப்பாக இருக்கும். இதனால் மிட்கேப், ஸ்மால்கேப் நிறுவனங்கள் சிறப்பாகச் செயல்பட அதிக வாய்ப்பிருக்கிறது. உங்கள் முதலீட்டுக் காலம் இன்னும் ஆறு ஆண்டுகள் இருப்பதால், அந்த ஃபண்டுகளில் நல்ல வருமானம் கிடைக்க வாய்ப்பிருக்கிறது.’’

முதலீடு
முதலீடு

அடுத்த பத்து ஆண்டுகளில் சென்செக்ஸ் புள்ளிகள் என்னவாக இருக்கும்?

- கார்த்திக் ஜெயராமன், முகநூல் மூலம்

“பொதுவாக, பங்குச் சந்தையின் வருமானம், நாட்டின் மொத்த உள்நாட்டு (ஜி.டி.பி) வளர்ச்சி மற்றும் பணவீக்க விகிதத்தின் அடிப்படையில் கணக்கிடப்படும். இந்தியாவின் ஜி.டி.பி வளர்ச்சி சர்வதேச நிதியத்தின் மதிப்பீட்டின்படி, 2021-ல் சுமார் 7%-ஆக இருக்கும். பணவீக்க வளர்ச்சி 5% என்றால், பங்குச் சந்தையின் வளர்ச்சி 12%-ஆக இருக்கும் என எதிர்பார்க்கலாம். இதன்படி பார்த்தால், பட்டியலிடப்பட்ட நிறுவனங்களின் வருமான வளர்ச்சி 14-15 சதவிகிதமாக இருக்கக்கூடும். பங்குச் சந்தை வளர்ச்சி ஆண்டுக்குச் சராசரியாக 12%-ஆக இருக்கும்பட்சத்தில், இன்னும் பத்து ஆண்டுகளில் சென்செக்ஸ் புள்ளிகள் சுமார் 1,00,000 புள்ளிகளாக இருக்க வாய்ப்பிருக்கிறது.’’

நான் முதலீடு செய்திருக்கும் டாக்ஸ் சேவர் ஃபண்டின் மதிப்பு 50% குறைந்திருக்கும் நிலையில், இனி அதை என்ன செய்யலாம்?

- துரைமுருகன், முகநூல் மூலம்

“நீங்கள் முதலீடு செய்திருக்கும் டாக்ஸ் சேவர் ஃபண்டில் மிட் மற்றும் ஸ்மால்கேப் நிறுவனப் பங்குகளின் ஆதிக்கம் அதிகமாக இருப்பதால்தான், இந்த அளவுக்கு அதன் மதிப்பு இறக்கம்கண்டிருக்கிறது. தற்போது நடைமுறையிலிருக்கும் ஊரடங்கு முடிவுக்கு வந்த பிறகு மிட் மற்றும் ஸ்மால்கேப் நிறுவனங்கள் சிறப்பாகச் செயல்படும் என எதிர்பார்க்கலாம். சீனாவில் பல தொழிற்சாலைகள் மூடப்பட்டிருக்கும் நிலையில், இந்த நிறுவனங்களின் உற்பத்திப் பொருள்களுக்குத் தேவை அதிகரிக்கக்கூடும். அப்போது உங்களின் டாக்ஸ் சேவர் ஃபண்ட் சிறப்பாகச் செயல்படக்கூடும்.”

விகடனின் அதிரடி ஆஃபர்!
தற்பொழுது ரூ.800 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா949 மட்டுமே! மிஸ் பண்ணிடாதீங்க!Get Offer

ஊரடங்குக்குப் பிறகு உடனடியாக சிறப்பாகச் செயல்படும் துறைகள் எவை?

- குமார வடிவேலு, முகநூல் மூலம்

“இயல்பு வாழ்க்கை திரும்பியதும் வேகமாக லாபம் அடையும் துறை என்றால், எஃப்.எம்.சி.ஜி-யைக் குறிப்பிடலாம். பெரிய அளவில் முதலீடு தேவைப்படுவதால் கார் வாங்குவது, வீடு வாங்குவது போன்றவை நடக்கச் சிறிது காலம் ஆகலாம்.

அந்த வகையில் வாகனம், கட்டுமானம், ரியல் எஸ்டேட், வங்கிசாரா நிதிச் சேவை போன்ற துறைகள் மெதுவாகத்தான் வளர்ச்சி காணும்.

குறுகிய மற்றும் நீண்டகாலத்தில் பார்மா துறை சிறப்பான வளர்ச்சி காணும். கொரோனா பாதிப்புக்கான சிகிச்சைக்குத் தேவைப்படும் பல மருந்துகள் இந்தியாவிலேயே தயாரிக்கப்படுவதால், பார்மா துறை குறுகியகாலத்தில் மிகச் சிறப்பாகச் செயல்படும்.”

சுனில் சுப்ரமணியம்
சுனில் சுப்ரமணியம்

என்னுடைய மியூச்சுவல் ஃபண்ட் போர்ட்ஃபோலியோ 25% நஷ்டத்தில் இருக்கிறது. என்னிடமுள்ள ஃபண்ட் யூனிட்டுகளை விற்றுவிட்டு, சந்தை இன்னும் சரிந்த பிறகு வாங்குவது சரியா?

- சௌம்யா, திண்டுக்கல்

“நீங்கள் செய்வது சரியில்லை. இறங்கிய சந்தை ஏறத் தொடங்கியிருக்கிறது. ரிசர்வ் வங்கி வட்டி விகிதத்தைக் குறைத்திருப்பது நம் நாட்டில் பணப் புழக்கத்தை அதிகரித்துள்ளது. மேலும், கொரோனாவுக்கு மருந்து கண்டுபிடிக்கத் தீவிர முயற்சி மேற்கொள்ளப் பட்டுவருகிறது. அது நடந்துவிட்டால், பொருளாதாரம் வளர்ச்சிகாண ஆரம்பித்து விடும். பங்குச் சந்தை எப்போதும் எதிர்காலத்தை கணித்து, முன்கூட்டியே ஏற்ற இறக்கத்தைக் கண்டுவிடும். அந்த வகையில், இந்த இறக்கத்தில் கையில் போதிய பணம் இருக்கும்பட்சத்தில், பங்குச் சந்தையில் முதலீடு செய்தால், நீண்டகாலத்தில் நல்ல லாபம் ஈட்ட வாய்ப்பிருக்கிறது.”

ஒவ்வொரு மாதத்தின் முதலாவது அல்லது இரண்டாவது வாரத்தில் என்.ஏ.வி மதிப்பு குறைவாக இருக்கிறது. நான் 20-ம் தேதிக்கு பதில், முதலாவது அல்லது இரண்டாம் வாரத்துக்கு என் எஸ்.ஐ.பி தேதியை மாற்றலாமா?

- எஸ்.எஸ்.அசோக், கரூர், மெயில் மூலம்

“நீங்கள் நினைப்பது போல், ஓரிரு மாதங்கள் நடந்திருக்கலாம். பங்குச் சந்தைக்கு முதல் வாரம், இரண்டாம் வாரம் என்பதெல்லாம் தெரியாது. அதற்காக எஸ்.ஐ.பி தேதியை மாற்றத் தேவையில்லை. இப்போது எஸ்.ஐ.பி தேதியை மாற்றுகிறீர்கள்; ஆனால், அந்தத் தேதியில் என்.ஏ.வி குறையவில்லையென்றால், மீண்டும் மாற்ற வேண்டிவரும். அதற்கு பதிலாக, முதலாவது அல்லது இரண்டாவது வாரத்தில் முடிந்தால் கூடுதலாக எஸ்.ஐ.பி டாப்அப் செய்யுங்கள்.”

பொதுத்துறை வங்கிகளில் எஃப்.டி-க்கான வட்டி மேலும் குறைக்கப்படுமா?

- கே.செந்தில்குமார், இ-மெயில் மூலம்

“ரிசர்வ் வங்கி பணப்புழக்கத்தைக் அதிகரிக்க ரெப்போ, ரிசர்வ் ரெப்போ மற்றும் சி.ஆர்.ஆர் விகிதத்தைக் குறைத்திருக்கிறது. இதனால் வங்கிகளின் வசம் அதிக பணம் இருக்கும். எஸ்.பி.ஐ வங்கிச் சேமிப்புக் கணக்குக்கான வட்டியை 3 சதவிகிதத்திலிருந்து 2.75 சதவிகிதமாகக் குறைத்திருக்கிறது. வங்கி எஃப்.டி-க்கான வட்டி இன்னும் குறையும்.’’

அடுத்த 2-3 ஆண்டுகளில் நல்ல வருமானம் ஈட்ட எந்தெந்த ஃபண்ட் திட்டங்களில் முதலீடு செய்யலாம்?

- எஸ்.முருகேசன், கரூர்

“உங்கள் முதலீட்டுக் காலம் 2-3 ஆண்டுகள் என்பதால், பேலன்ஸ்டு அட்வான்டேஜ் ஃபண்ட் அல்லது ஈக்விட்டி ஹைபிரிட் ஃபண்ட் சரியாக இருக்கும். இவற்றில் லிக்விட் ஃபண்டைவிட ஓரிரு சதவிகிதம் கூடுதல் வருமானம் கிடைக்க வாய்ப்பிருக்கிறது.”

மியூச்சுவல் ஃபண்ட் முதலீட்டின் மூலம் அடைய வேண்டிய நிதி இலக்கை நான் அடைந்துவிட்டேன். இந்தப் பணத்தை வங்கி எஃப்.டி-யில் போட்டு வைக்கலாமா?

- முருகேசன் சவுண்டப்பன், மெயில் மூலமாக

“அப்படிச் செய்ய வேண்டாம். வங்கி எஃப்.டி-க்கான வட்டி இன்னும் குறைய வாய்ப்பிருக்கிறது. `கோவிட் 19 வைரஸ் பாதிப்பு வாழ்நாள் முழுக்க இருக்கும்’ என நினைப்பது தவறு.

எஃப்.டி மூலம் கிடைக்கும் வருமானம், பணவீக்க விகித அளவுக்கே இருக்க வாய்ப்புண்டு. பங்குச் சந்தை மற்றும் பங்குச் சந்தை சார்ந்த முதலீடு செய்ய இதுவே சரியான நேரம். எனவே, ஃபண்டை விற்காதீர்கள்.’’

கேளுங்கள், பதில் கிடைக்கும்!

பங்குச் சந்தை நிபுணர் ரெஜி தாமஸ் பதில்கள்..!

ரெஜி தாமஸ்
ரெஜி தாமஸ்

பங்குச் சந்தை வீழ்ச்சிகண்டிருக்கும் இந்த நேரத்தில் முதலீட்டாளர்களுக்குப் பலவிதமான கேள்விகள் இருக்கக்கூடும். உலகப் பொருளாதாரம், இந்தியப் பொருளாதாரம், பங்குச் சந்தையின் எதிர்காலம், குறிப்பிட்ட நிறுவனப் பங்குகளின் செயல்பாடு என உங்கள் கேள்விகள் எதுவாக இருந்தாலும் உடனே அனுப்புங்கள். பங்குச் சந்தை நிபுணர் ரெஜி தாமஸ் உங்கள் கேள்விகளுக்கு பதில் அளிக்கிறார்.

உங்கள் கேள்விகளை navdesk@vikatan.com என்ற இ-மெயிலுக்கு அனுப்பி வைக்கலாம்.