Published:Updated:

“இலக்குகளின் அடிப்படையில் முதலீடு செய்கிறேன்!”

SIP Investment
பிரீமியம் ஸ்டோரி
News
SIP Investment

நானும் எஸ்.ஐ.பியும்!

மாதந்தோறும் ஏதோ ஒரு குறிப்பிட்ட தொகையை மிச்சப்படுத்தி னோம், முதலீடு செய்தோம் என்றில்லாமல், சரியான இலக்குகளைத் தீர்மானித்து, முதலீடு செய்பவர்கள் சிலர் மட்டுமே. அவர்களில் சென்னை, பள்ளிக்கரணையைச் சேர்ந்த தி.பாலமுருகனும் ஒருவர். 43 வயதாகும் இவர் தனியார் நிறுவனம் ஒன்றில் பணியாற்றுகிறார். மனைவி சுகன்யா, தனியார் நிறுவனத்தில் பணியாற்றுகிறார். இந்தத் தம்பதிக்கு அச்சரா, ஆர்நவ் என இரட்டைக் குழந்தைகள்.

பாலமுருகனுடன் பேசினோம். “ஆரம்பத்தில் சம்பளத்தில் 5% தொகையை மியூச்சுவல் ஃபண்டில் எஸ்.ஐ.பி முறையில் முதலீடு செய்தோம். இப்போது அதனை 15 சதவிகிதமாக அதிகரித்துள்ளோம். எங்களின் முதலீடுகள் இரண்டு குழந்தைகளின் படிப்பு, திருமணம் மற்றும் எங்களின் ஓய்வுக்காலத் தேவைகளை நோக்கியதாக இருக்கிறது.

“இலக்குகளின் அடிப்படையில் முதலீடு செய்கிறேன்!”

சில ஆண்டுகளுக்குமுன் நிதி ஆலோசகர் சுரேஷ் பார்த்த சாரதியைச் சந்தித்து, நிதித் திட்டமிடல் தொடர்பான ஆலோசனை பெற்றோம். “தங்கம், ரியல் எஸ்டேட், எஃப்.டி, பங்குச் சந்தை சார்ந்த முதலீடு எனப் பிரித்து முதலீடு செய்தால், எந்தக் காலத்திலும் நல்ல லாபம் பார்க்க முடியும்” என்றார். அவர் தந்த ஆலோசனைப்படி, தற்போது ஆறு மியூச்சுவல் ஃபண்டுகளில் முதலீடு செய்துவருகிறோம். ஒரு லார்ஜ்கேப் ஃபண்ட், இரண்டு மல்டிகேப் ஃபண்டுகள், ஒரு மிட்கேப் ஃபண்ட், ஒரு ஸ்மால்கேப் ஃபண்ட் என முதலீடு செய்து வருகிறோம்.

எனக்கு இரட்டைக் குழந்தைகள் என்பதால், இருவருக்கும் ஒரே நேரத்தில் கல்லூரிச் செலவு இருக்கும். திருமணம்தான் சில ஆண்டுகள் வேறுபடும். அதற்கேற்ப முதலீடுகளை செய்துவருகிறோம். இலக்குத் தொகைகளை நிர்ணயித்துக் கொண்டு, ஆண்டுக்கு 12% வருமான எதிர்பார்ப்பில் அதற்கு இருக்கும் கால அவகாசத்துக்கு ஏற்ப மாத முதலீட்டுத் தொகையை முடிவு செய்து முதலீடு செய்து வருகிறோம். பணவீக்க விகிதம் மற்றும் முதலீட்டு மீதான லாபத்துக்குச் செலுத்த வேண்டிய வரி ஆகியவற்றையும் கணக்கில் கொண்டே முதலீடு செய்து வருகிறோம்.

எஸ்.ஐ.பி தொகையை ஆண்டுக்கு எவ்வளவு அதிகரிக்க வேண்டும் என்பதை முன்னரே முடிவுசெய்து அதன்படி செயல்பட்டு வருகிறோம். எங்கள் முதலீடுகளின் மூலம் நீண்ட காலத்தில் ஆண்டுக்குச் சராசரியாக 12% வருமானம் மட்டுமே எதிர்பார்ப்பதால், பங்குச் சந்தையின் ஏற்ற இறக்கத்தை நாங்கள் அதிகம் கண்டுகொள்வதில்லை. குறைவான வருமானத்தை நிர்ணயம் செய்திருப்பதால், நாங்கள் எதிர்பார்க்கும் தொகை எங்களுக்குக் கிடைத்துவிடும்’’ என்று நம்பிக்கையுடன் பேசி முடித்தார் பாலமுருகன்.

எதிர்கால இலக்குகளுக்குத் திட்டமிட்டு முதலீடு செய்யும் இவரை நிச்சயம் பாராட்டலாம்!

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS

உங்களின் எஸ்.ஐ.பி முதலீட்டு அனுபவங்களை finplan@vikatan.com என்ற மெயிலுக்கு அனுப்பிவைக்கலாம்.