Published:Updated:

உச்சத்தில் விலை... தங்கத்தில் முதலீடு செய்ய சரியான வழிகள்!

தங்கம்
பிரீமியம் ஸ்டோரி
News
தங்கம்

தங்கம்

ங்கத்தின் விலை இப்போது உச்சத்தில் இருக்கிறது. 22 காரட் ஆபரணத் தங்கம் 8 கிராம் விலை ஆகஸ்ட் 13-ம் தேதி 29,000 ரூபாயைத் தாண்டியுள்ளது. தங்கத்தின் விலை இந்தியாவில் கடந்த ஓராண்டில் சுமார் 24%, மூன்று மாதங்களில் 15% அதிகரித்துள்ளது. இந்த நிலையில், நம்மில் பலர் தங்கத்தை முதலீட்டு நோக்கில் வாங்க ஆரம்பித்திருக்கிறார்கள். தங்கத்தை முதலீட்டு நோக்கில் வாங்கப் பல வழிகள் இருக்கின்றன. மத்திய அரசின் தங்கப் பத்திரங்கள் (Sovereign gold bonds), மியூச்சுவல் ஃபண்ட் நிறுவனங்களின் கோல்டு இ.டி.எஃப்-கள் மற்றும் கோல்டு ஃபண்டுகள் (Gold ETFs and funds) ஆகியவை முக்கியமான முதலீட்டு வழிகள். அவற்றில் உங்களுக்கு ஏற்ற வழி எது என்பதைப் பார்ப்போம்.

மத்திய அரசின் தங்கப் பத்திரங்கள்

இந்த பாண்டுகளை மத்திய அரசு சார்பாக ரிசர்வ் வங்கி வெளியிடுகிறது. இதை ஒரு கிராம் அளவுக்குக்கூட வாங்கலாம். ஒரு கிராமை ஒரு யூனிட் என்பார்கள். அதிகபட்சமாக ஒருவர், ஒரு நிதி ஆண்டில் 4 கிலோ வரைக்கும் வாங்கமுடியும்.

இதன் முதலீட்டுக் காலம் எட்டு ஆண்டுகள். அதன்பிறகு அதை விற்றால் நீண்ட கால மூலதன ஆதாய வரி கிடையாது. மேலும், ஆரம்ப முதலீட்டுத் தொகைக்கு 2.5% வட்டி வழங்கப்படும். இந்த பாண்டுகளை காகித வடிவில் அல்லது எலெக்ட்ரானிக் வடிவில் வாங்கமுடியும். ஆன்லைன்மூலம் வாங்கும்போது தங்கத்தின் விலையில் கிராம் ஒன்றுக்கு ரூ.50 தள்ளுபடி அளிக்கப்படுகிறது.

சா.ராஜசேகரன், நிதி ஆலோசகர், Wisdomwealthplanners.com
சா.ராஜசேகரன், நிதி ஆலோசகர், Wisdomwealthplanners.com

ஆன்லைன்மூலம் வாங்க டீமேட் கணக்கு அவசியம். பங்கு முதலீடு மற்றும் மியூச்சுவல் ஃபண்ட் முதலீட்டுக்கு உள்ள டீமேட் கணக்கின்மூலமே இந்த பாண்டு களை வாங்கிக்கொள்ளமுடியும். இந்த பாண்டுகள் என்.எஸ்.இ மற்றும் பி.எஸ்.இ பங்குச் சந்தைகளில் பட்டியலிடப்படுவதால், இடையில் எப்போது வேண்டுமானாலும் விற்றுப் பணமாக்கிக்கொள்ள முடியும். ஆனால், அப்படிச் செய்யும்போது அதற்கு வரி கட்ட வேண்டி வரும். யூனிட்டுகளை விற்றால், உங்கள் வங்கிக் கணக்குக்கு பணம் வந்துவிடும். அந்தத் தொகையைக் கொண்டு, தேவைப்படும் நகையை நீங்களே வாங்கிக்கொள்ள வேண்டும்.

இந்த பாண்டுகளை ஆண்டில் சில முறைகள் தான் ஆர்.பி.ஐ வெளியிடுகிறது. செப்டம்பர் 9-ம் தேதி முதல் 13-ம் தேதி வரை இந்த பாண்டுகளில் முதலீடு செய்யமுடியும். இந்த பாண்டுகளை பங்குச் சந்தைகள், வங்கிகள், தபால் அலுவலகங்கள் போன்றவற்றின்மூலம் முதலீடு செய்ய முடியும். டீமேட் கணக்கு இருந்தால், இடைப்பட்ட காலத்தில் எப்போது வேண்டுமானாலும் பங்குச் சந்தைகளில் இதன் யூனிட்டுகளை வாங்க முடியும்.

சிறப்பம்சம்: தங்கத்தின் விலை மாற்றம் மூலம் கிடைக்கும் லாபத்துடன், ஆண்டுக்கு 2.5% வட்டி வருமானமும் கிடைக்கும். டீமேட் வடிவில் இருக்கும்பட்சத்தில் தேவைக்கு விற்றுப் பணமாக்க முடியும்.

வருமானம்: கடந்த ஓராண்டில் சராசரியாக 27% கொடுத்திருக்கிறது.

கோல்டு இ.டி.எஃப்-கள்

மியூச்சுவல் ஃபண்ட் நிறுவனங்கள், இந்த கோல்டு எக்ஸ்சேஞ்ச் டிரேடட் ஃபண்டுகளை வெளியிடுகின்றன. இவை சுருக்கமாக, கோல்டு இ.டி.எஃப்-கள் என அழைக்கப்படுகிறது. இதிலும், ஒரு கிராம் என்பதை ஒரு யூனிட் என்கின்றன மியூச்சுவல் ஃபண்ட் நிறுவனங்கள். இந்த ஃபண்ட்மூலம் திரளும் தொகைக்கு இணையாகத் தங்கம் வாங்கிவைக்க வேண்டும். இதை செபி அமைப்பு கண்காணித்து வருகிறது.

தங்கத்தின் விலை ஏற்ற இறக்கத்துக்கேற்ப அதன் யூனிட் மதிப்பு மாறும். முதலீடு செய்ய டீமேட் கணக்கு அவசியம். யூனிட்டுகளை விற்கும்போது வங்கிக் கணக்குக்குப் பணம் வந்துசேரும். அதைக் கொண்டு நீங்கள்தான் தேவையான நகையை வாங்கிக்கொள்ள வேண்டும்.

சிறப்பம்சம்: தங்கத்தின் விலை மாற்றம் டீமேட் வடிவில் இருப்பதால், தேவைக்கு விற்று பணமாக்க முடியும்.

வருமானம்: கடந்த ஓராண்டில் 30%, இரண்டாண்டில் 15%, மூன்றாண்டில் 7%, ஐந்தாண்டில் 6% வருமானம் கொடுத்திருக்கிறது.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS

கோல்டு சேவிங்ஸ் ஃபண்டுகள்

தங்கத்தை வெட்டி எடுக்கும் சுரங்க நிறுவனங்கள், தங்க ஆபரண நிறுவனப் பங்குகள், கோல்டு இ.டி.எஃப் ஃபண்டுகளில் முதலீடு செய்யும் விதமாகப் பல மியூச்சுவல் ஃபண்ட் திட்டங்கள் இருக்கின்றன. இந்த கோல்டு சேவிங்ஸ் ஃபண்டில் மாதம் ரூ.100 மற்றும் ரூ.500 கூட முதலீடு செய்து வரலாம். எஸ்.ஐ.பி வசதியும் இருக்கிறது. மேலும், ஒருவரின் வசதியைப் பொறுத்து 500 ரூபாய், 1,000 ரூபாய் என மாதம் எவ்வளவு வேண்டுமானாலும் முதலீடு செய்ய வாய்ப்பிருக்கிறது.

Gold
Gold

இந்த ஃபண்ட், திரட்டப்படும் நிதியை வேறு ஒரு ஃபண்டில் முதலீடு செய்யும், ‘ஃபண்ட் ஆஃப் ஃபண்ட்ஸ் வகையைச் சேர்ந்தது. இந்த ஃபண்டில் திரட்டப்படும் நிதியின் பெரும்பகுதி, கோல்டு

இ.டி.எஃப் ஃபண்டில் முதலீடு செய்யப்படுகிறது. இதனால், அதைவிட சிறிது குறைவாக வருமானம் கிடைக்கும். காரணம், கோல்டு இ.டி.எஃப் ஃபண்டில் முதலீடு செய்வதற்கான நிர்வாகச் செலவு மற்றும் கட்டணம் இருக்கிறது. இந்த ஃபண்டில் முதலீடு செய்ய எஸ்.ஐ.பி முறையில் பல்வேறு தொகை மற்றும் பல்வேறு காலகட்டங்கள் அளிக்கப்படுகிறது. முதலீட்டாளர் தன் தகுதி மற்றும் வசதிக்கேற்ற ஒரு முறையைத் தேர்ந்தெடுத்துக்கொள்ளலாம்.

கோல்டு இ.டி.எஃப் முறையில் தங்கத்தில் முதலீடு செய்யும்போது செய்கூலி, சேதாரம் போன்ற விஷயங்களைத் தவிர்க்க முடியும். ஒரு பவுன் தங்கநகை வாங்கும்போது, ஒரு கிராம் தங்கம் செய்கூலி மற்றும் சேதாரத்துக்கே போய்விடுகிறது.

மாதம் 100 ரூபாய் என்றால் தொடர்ந்து 60 மாதங்கள் முதலீடு செய்துவர வேண்டும். மாதம் 500 ரூபாய் என்றால், தொடர்ந்து 12 மாதங்கள் முதலீடு செய்ய வேண்டும். மாதம் 1,000 ரூபாய் என்றால், தொடர்ந்து 6 மாதங்கள் முதலீடு செய்ய வேண்டும். காலாண்டுக்கு 500 ரூபாய் என்றால், தொடர்ந்து 12 காலாண்டு முதலீடு செய்ய வேண்டும். காலாண்டுக்கு 1,500 ரூபாய் என்றால், தொடர்ந்து 4 காலாண்டு முதலீடு செய்ய வேண்டும்.

உச்சத்தில் விலை... தங்கத்தில் முதலீடு செய்ய சரியான வழிகள்!

ஃபண்டைப் பொறுத்து ஓராண்டு அல்லது இரண்டு ஆண்டுக்குமுன் யூனிட்டுகளை விற்றால் வெளியேறும் கட்டணம் செலுத்த வேண்டி யிருக்கும். நம் தேவைக்கு யூனிட்டுகளை விற்று, அதன்மூலம் கிடைக்கும் பணத்தைக்கொண்டு நகையாக வாங்கிக்கொள்ளலாம்.

சிறப்பம்சம்: பான் கார்டு இருந்தால் போதும், இந்தத் திட்டத்தில் முதலீடு செய்துவிடலாம். எஸ்.ஐ.பி வசதி உண்டு. யூனிட்டுகளை விற்றால், சில தினங்களில் வங்கிக் கணக்குக்குப் பணம் வந்துவிடும்.

வருமானம்: கடந்த ஓராண்டில் 20-25%, மூன்றாண்டில் 5-7%, ஐந்தாண்டில் 5% வருமானம் கொடுத்திருக்கிறது.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

எது யாருக்கு ஏற்றது?

கோல்டு இ.டி.எஃப் திட்டத்தில் முதலீடு செய்ய டீமேட் கணக்கு தேவை என்பது பலருக்கும் இடைஞ்சலான விஷயம். இதைப் போக்கும் விதமாகத்தான் கோல்டு சேவிங்க்ஸ் ஃபண்ட் கொண்டு வரப்பட்டது. அந்தவகையில் டீமேட் கணக்குக்கான ஆண்டுப் பராமரிப்புக் கட்டணம் சுமார் 300 - 500 ரூபாய் மிச்சமாகும் என்பதால், சிறு முதலீட்டாளர்களுக்கு இது லாபகரமாக இருக்கும். அதேநேரத்தில் பங்கு முதலீட்டுக்காக டீமேட் கணக்கு வைத்திருப்பவர்கள், இந்த ஃபண்டையும் டீமேட் மூலமாக வாங்குவது லாபகரமாக இருக்கும்.

கோல்டு இ.டி.எஃப் முறையில் தங்கத்தில் முதலீடு செய்யும்போது செய்கூலி, சேதாரம் போன்ற விஷயங்களைத் தவிர்க்க முடியும். ஒரு பவுன் (8 கிராம்) தங்கநகை வாங்கும்போது, ஒரு கிராம் தங்கம் செய்கூலி மற்றும் சேதாரத்துக்கே போய்விடுகிறது.

மீண்டும் அதை விற்கும்போதும் சேதாரம் என்கிற பெயரில் பெரும் பணம் போகிறது. இப்படி நம் பணம் வீணாவதைத் தடுக்க கோல்டு இ.டி.எஃப் திட்டம் சிறந்ததாகும்.

ஓராண்டில் பெரிய தொகையைத் தங்கத்தில் முதலீடு செய்பவர்கள், அதிக லாபம் பார்க்க நேரடியாக கோல்டு இ.டி.எஃப்-ல் முதலீடு செய்யலாம்.

தங்கத்தில் முதலீடு... எப்போது லாபகரமாக இருக்கும்?

பொதுவாக, பங்குச் சந்தை வீழ்ச்சி இருக்கும் காலம், பொருளாதார வளர்ச்சி மந்தமாக இருக்கும் காலம், நிலையற்ற தன்மை நிலவும் காலம், நாடுகளுக்கு இடையே போர் வரும் சூழல் மற்றும் போர் நடக்கும் காலம் ஆகிய சூழ்நிலைகளில் தங்கத்தின் விலை ஏற்றம் காணும். ஆனால், இந்தியாவில் இந்தப் பிரச்னைகளையும் தாண்டி பல நேரங்களில் அதற்கான தேவை அதிகரிப்பு மற்றும் அமெரிக்க டாலருக்கு இணையான இந்திய ரூபாயின் மதிப்பு வீழ்ச்சி போன்ற காரணங்களால் தங்கத்தின் விலை உயரக்கூடும். தற்போது டாலருக்கு இணையான ரூபாய் மதிப்பு ரூ.71-க்கு மேலாக அதிகரித்திருப்பதால், தங்கத்தை இறக்குமதி செய்வதற்கான செலவு அதிகரித்துள்ளது. மேலும், அண்மையில் பட்ஜெட்டில் தங்கம் இறக்குமதி வரியும் அதிகரிக்கப்பட்டுள்ளதால் அதன் விலை உயர்ந்து வருகிறது. தற்போது தங்கத்தின் விலை உச்சத்தில் இருப்பதால் கோல்டு பாண்டு, கோல்டு இ.டி.எஃப், கோல்டு சேவிங்ஸ் ஃபண்டுகளில் முதலீடு செய்யத் திட்டமிட்டிருப்பவர்கள் மொத்தத் தொகையையும் ஒரே நேரத்தில் முதலீடு செய்திட வேண்டாம்; தங்கத்தின் விலை இப்படித் தொடர்ந்து ஏற்றம் காணும் எனச் சொல்ல முடியாது. காத்திருந்து இறக்கத்தில் வாங்கலாம். அல்லது மாதந்தோறும் தொடர்ந்து ஒரு குறிப்பிட்ட தொகை அல்லது யூனிட்களை வாங்கி வரலாம்.