Published:Updated:

சுகர் இருப்பவர் கொரோனா பாலிசி எடுக்க முடியுமா? - ‘ஸ்டார் ஹெல்த்’ டாக்டர் எஸ்.பிரகாஷ்

கேளுங்கள், பதில் கிடைக்கும்!

பிரீமியம் ஸ்டோரி
ஹெல்த் இன்ஷூரன்ஸ் குறித்த பல்வேறு சந்தேகங்களுக்கு ‘கேளுங்கள், பதில் கிடைக்கும்!’ பகுதியின் வாயிலாக ஸ்டார் ஹெல்த் அண்ட் அலைடு இன்ஷூரன்ஸ் நிறுவனத்தின் நிர்வாக இயக்குநர் டாக்டர் எஸ்.பிரகாஷ் பதிலளிக்கிறார்...

என் உறவினர் ஒருவர் ஸ்டார் ஹெல்த் இன்ஷூரன்ஸில் ரூ.3 லட்சம் காப்பீடுள்ள பாலிசி ஒன்றை எடுத்து ஆறு மாதங்கள் ஆகின்றன. அவர் தற்போது மருத்துவமனையில் சிகிச்சை பெற்றுவருகிறார். தற்போது வரை அவருக்கு செலவு ரூ.2,50,000 ஆகியிருக்கிறது. அவருக்கு இதே சிகிச்சைக்கு மேலும் செலவானால், எவ்வளவு க்ளெய்ம் காப்பீட்டின் மூலம் கிடைக்கும்?

- எஸ்.துர்காதேவி, மெயில் மூலம்

“பொதுவாக, காப்பீட்டுத் தொகை (Sum Assured) எவ்வளவு இருக்கிறதோ, அந்தத் தொகை வரை க்ளெய்ம் செய்ய முடியும். பாலிசி எடுத்து நீண்டகாலம் ஆகியிருந்தால், நோ க்ளெய்ம் போனஸ் மூலம் கவரேஜ் தொகை அதிகரித்திருக்கும். அந்தத் தொகையையும் சேர்த்து க்ளெய்ம் செய்ய முடியும். மேலும், ரீசார்ஜ் பலன் 30% இருந்தால், அதையும் சேர்த்து க்ளெய்ம் செய்ய முடியும். உங்கள் உறவினர் பாலிசி எடுத்து ஆறு மாதங்கள் ஆகின்றன. எனவே, ரூ.3 லட்சம்தான் இழப்பீடு பெற முடியும்.”

ஹெல்த் இன்ஷூரன்ஸ்
ஹெல்த் இன்ஷூரன்ஸ்

நான் மாநில அரசுப் பணியிலும், என் மனைவி மத்திய அரசு மருத்துவமனையிலும் பணிபுரிகிறோம். இருவரின் ஊதியத்திலும் ஹெல்த் இன்ஷூரன்ஸுக்காக அரசால் பணம் பிடித்தம் செய்யப்படுகிறது. இருவரில் யாராவது ஒருவர் மட்டும் பணம் செலுத்தினால் போதுமானதாக இருக்குமா?

- தி.சங்கர் புதுச்சேரி.

“இருவரும் பாலிசிக்கு பிரீமியம் கட்டி வருவது நல்லதுதான். காரணம், மொத்த கவரேஜ் தொகை அதிகமாக இருக்கும். ஏதாவது ஒரு பாதிப்புக்கு அதிகம் செலவாகும்பட்சத்தில், அதிக தொகையை க்ளெய்ம் செய்ய இது உதவியாக இருக்கும். உங்களுக்கு எவ்வளவு கவரேஜ் இருக்கிறது என்று பார்க்க வேண்டும். தீவிர நோய் பாதிப்பு ஏற்படும்போது ரூ.2 லட்சம், ரூ.3 லட்சம் கவரேஜ் போதாது. குறைந்தபட்சம் ரூ.5 லட்சத்துக்கு பாலிசி இருந்தால்தான் நல்ல மருத்துவச் சிகிச்சை எடுத்துக்கொள்ள முடியும். இதற்குக் குறைவாக கவரேஜ் இருந்தால் குறைவான பிரீமியத்தில் கிடைக்கும் டாப்அப் பாலிசியை எடுக்கலாம்.’’

நான் பாலிசி எடுத்திருக்கும் ஹெல்த் இன்ஷூரன்ஸ் நிறுவனத்தின் சேவை எனக்குப் பிடிக்கவில்லை. காத்திருப்புக் காலம் உள்ளிட்ட பலன்களை இழக்காமல் வேறு நிறுவனத்துக்கு பாலிசியை மாற்ற வழி இருக்கிறதா?

- கணேஷ் குமார், தூத்துக்குடி

“கண்டிப்பாக முடியும். இதன் பெயர் போர்ட்டபிளிட்டி பாலிசி. இந்தியாவிலுள்ள 32 ஹெல்த் இன்ஷூரன்ஸ் நிறுவனங்களிலும் இந்த வசதி இருக்கிறது. கவரேஜ் தொகை குறையாமல் மற்றும் காத்திருப்புப் பலன்களை இழக்காமல் வேறு ஒரு நிறுவனத்துக்கு பாலிசியை மாற்றிக்கொள்ள முடியும். இப்படி நிறுவனம் மாறும்போது, உங்களுக்கு இதற்கு முன்னர் ஏதாவது நோய் பாதிப்பு இருந்தாலோ அல்லது அதற்குச் சிகிச்சை எடுத்திருந்தாலோ அதைப் புதிய நிறுவனத்திடம் சொல்லிவிட வேண்டும். விஷயத்தை மறைத்து, பின்னர் புதிய நிறுவனத்தால் கண்டுபிடிக்கப்பட்டால் பாலிசி ரத்து செய்துவிடும் அபாயம் இருக்கிறது. அப்படி நடக்கும்பட்சத்தில் பாலிசி இல்லாத நிலை ஏற்படக்கூடும்.”

பி.பி., சுகர் உள்ளவர்களுக்கு கொரோனா பாதுகாப்பு பாலிசி கிடைக்குமா?

- ஆர்.கே.சந்துரு, இ-மெயில் மூலம்

“ரத்த அழுத்தம் (பி.பி), சர்க்கரை பாதிப்பு உள்ளவர்கள் சாதாரணமாக எந்த இன்ஷூரன்ஸ் பாலிசியையும் எடுக்கலாம். அவர்கள் கொரோனா வைரஸ் பாலிசியும் எடுக்கலாம். பொதுவாக, எல்லா வைரஸ் பாதிப்புக்கும் ஹெல்த் இன்ஷூரன்ஸ் பாலிசியில் க்ளெய்ம் கிடைக்கும். பி.பி., சுகர், உள்ளவர்கள், நோய் எதிர்ப்பு சக்தி இல்லாதவர்களுக்கு கொரானா பாதிப்பு வந்தால், அவர்கள் ஏற்கெனவே எடுத்திருக்கும் பாலிசியிலேயே க்ளெய்ம் செய்துகொள்ளலாம். ஏற்கெனவே ஹெல்த் இன்ஷூரன்ஸ் பாலிசி வைத்திருப்பவர்கள் கொரோனா வைரஸுக்கு எனத் தனியே பாலிசி எதையும் எடுக்க வேண்டாம்.”

டாக்டர் எஸ்.பிரகாஷ்
டாக்டர் எஸ்.பிரகாஷ்

நான் எடுத்திருக்கும் ஹெல்த் பாலிசியின் கவரேஜ் இப்போது ரூ.2 லட்சமாக இருக்கிறது. இதை அடுத்த ஆண்டு ரூ.5 லட்சமாக அதிகரித்துக்கொள்ள முடியுமா?

- விநாயகம், அருப்புக்கோட்டை

“முடியும். புதிதாக அதிகரிக்கும் ரூ.3 லட்சம் கவரேஜுக்கு ஏற்கெனவே இருக்கும் நோய்களுக்கான சிசிக்சைச் செலவுக்கு நான்கு ஆண்டுகள் காத்திருப்புக் காலம் இருக்கும்.”

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

மற்ற ஹெல்த் இன்ஷூரன்ஸ் நிறுவனங்களைவிட நான் ஏன் ஸ்டார் ஹெல்த் இன்ஷூரன்ஸ் நிறுவனத்தைத் தேர்வு செய்ய வேண்டும்?

- சுரேஷ் பாபு, மெயில் மூலம்

“மற்ற நிறுவனங்கள் மோட்டார், தீ விபத்து, ஹெல்த் இன்ஷூரன்ஸ் எனப் பல்வேறு பாதிப்பு களுக்கு பாலிசிகளை வைத்திருப்பார்கள். எங்களைப் பொறுத்தவரை ஹெல்த் இன்ஷூரன்ஸ் பாலிசிகளை மட்டுமே விதவிதமாக அனைத்து பாதிப்புகளுக்கும் வழங்கிவருகிறோம். ஹெல்த் இன்ஷூரன்ஸ் பாலிசிகளை மட்டுமே வழங்க வேண்டும் என்பதற்காக இந்தியா முழுக்க சுமார் 10,000 மருத்துவமனைகளில் கேஷ்லெஸ் சிகிச்சை வசதியை ஏற்படுத்தித் தந்திருக்கிறோம். ஏற்கெனவே இதய பாதிப்பு, சர்க்கரை பாதிப்பு, ரத்த அழுத்தம் உள்ளவர்களுக்குத் தனி பாலிசிகளை அளித்துவருகிறோம். அனைத்து வயதினர் மற்றும் அனைத்துத் தரப்பினருக்குமான பாலிசிகளை வைத்திருக்கிறோம்.”

அலுவலகத்தில் இப்போதிருக்கும் குரூப் ஹெல்த் பாலிசியை என் பணி ஓய்வுக்குப் பிறகு என் தனி பாலிசியாக மாற்றிக்கொள்ள முடியுமா?

- சுந்தர பாண்டியன், தென்காசி

“தாராளமாக மாற்றிக்கொள்ள முடியும். பணி ஓய்வு பெறுவதற்கு மூன்று நான்கு ஆண்டுகளுக்கு முன்னர் டாப்அப் பாலிசி ஒன்றை எடுத்துக்கொள்ள வேண்டும். இந்த டாப்அப் பாலிசிக்கான கவரேஜ் மிகக் குறைவு. பணி ஓய்வு பெற்ற பிறகு அந்த பாலிசியை அடிப்படை பாலிசியாக மாற்றிக்கொள்ளலாம்.”

ஹெல்த் இன்ஷூரன்ஸ் பாலிசியை எந்த வயதில் எடுத்துக்கொள்வது நல்லது... இளம் வயதில் ஆரோக்கியமாக இருக்கும்போது இந்த பாலிசி தேவையில்லைதானே?

- எஸ்.கமலா, திருச்சி

“இப்போதெல்லாம் இளம் வயதிலேயே நோய் பாதிப்பு வந்துவிடுகிறது. `இதயநோய், புற்றுநோய் எல்லாம் வயதான பிறகுதான் வரும்’ என்பது அந்தக் காலம். மேலும், யார் எந்த நேரத்தில் விபத்தில் சிக்கிக்கொள்வார்கள் என்று சொல்ல முடியாது. அடுத்து நோய் பாதிப்பு இல்லாத இளவயதில் ஹெல்த் பாலிசி எடுக்கும்பட்சத்தில் பிரீமியம் குறைவாக இருக்கும். வயதான பிறகு பாலிசி எடுக்கும் பட்சத்தில் பிரீமியம் மிக அதிகமாக இருக்கும் அல்லது நோய் பாதிப்பு காரணமாக பாலிசி மறுக்கக்கூடப்படலாம்.”

ஹெல்த் இன்ஷூரன்ஸ் பாலிசிகளில் எதற்கெல்லாம் க்ளெய்ம் கிடைக்காது?

- கே.முருகன், திருவாரூர்

“பொதுவாக, பாலிசி எடுத்து முதல் இரண்டு/ மூன்று / நான்கு வருடங்களுக்கு ஏற்கெனவே இருக்கும் நோய்களுக்குச் சிகிச்சை எடுத்துக்கொள்ளும்பட்சத்தில் க்ளெய்ம் கிடைக்காது. இந்தக் காத்திருப்புக் காலம் என்பது நோய்களுக்கு ஏற்ப மாறுபடும்.

பிரீமியத் தொகை அதிகமாக இருக்கும் பாலிசிகள் இருக்கின்றன. அவற்றுக்கு ஓராண்டு அல்லது ஆறு மாத காலத்தில்கூட சிகிச்சை எடுத்துக்கொண்டு க்ளெய்ம் செய்ய முடியும்.”

ஹெல்த் இன்ஷூரன்ஸ் பாலிசி வைத்திருக்கும் மற்றும் எடுக்கப்போகும் என்னைப் போன்ற நாணயம் விகடன் வாசகர்களுக்கு உங்கள் ஆலோசனை என்ன?

- சுரேந்தர்.சி, மெயில் மூலமாக

“மருத்துவச் செலவுகளுக்காக ஒரு பாலிசி எடுத்து வைத்துக்கொண்டால், அந்த திருப்தியே எந்த நோயையும் வரவிடாமல் தடுக்கும். இப்போது வாழ்நாள் அதிகரித்திருக்கிறது. அப்போதெல்லாம் 60-ம் கல்யாணம் பெரிய விஷயம். இப்போது 80-ம் கல்யாணம் சாதாரணமாகிவிட்டது. 75 வயதுக்குப் பிறகு இன்ஷூரன்ஸ் எடுக்க முடியாது. எனவே, இளம் வயதிலேயே எடுத்துவிடுவது நல்லது. இதுவரை பாலிசி எடுக்காத 50 வயது, 60 வயதுக்காரர்கள் இப்போதே பாலிசி எடுத்துவிடுவது நல்லது. உடல்நலம் நன்றாக இருக்கும்போதே பாலிசி எடுத்துக்கொள்ள வேண்டும். நோய் வந்தால் பார்த்துக்கொள்வோம் என விட்டுவிட்டு, நோய் வந்த பிறகு எடுத்தால் பாலிசி கிடைக்காது அல்லது அதிக பிரீமியம் செலுத்த வேண்டி வரும். `உணவு, உடை மற்றும் இருப்பிடம் அவசியம்’ என்பதை இனி, `உணவு, உடை, இருப்பிடம் மற்றும் காப்பீடு அவசியம்’ எனச் சொல்லலாம்.”

கேளுங்கள், பதில் கிடைக்கும்!

ஆடிட்டர் ஜி.கார்த்திகேயன்
ஆடிட்டர் ஜி.கார்த்திகேயன்

வருமான வரி, வீடு, மனை, பங்குச் சந்தை, மியூச்சுவல் ஃபண்ட் முதலீடுகள் குறித்து வெளிநாடு வாழ் இந்தியர்களின் (என்.ஆர்.ஐ) பல்வேறு கேள்விகளுக்கு கோயம்புத்தூரைச் சேர்ந்த முன்னணி ஆடிட்டர் ஜி.கார்த்திகேயன் பதிலளிக்கிறார்.

உங்கள் கேள்விகளை navdesk@vikatan.com என்ற இ-மெயிலுக்கு அனுப்பி வைக்கலாம்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு