Published:Updated:

“பங்கு முதலீடு... கவனமாகச் செய்தால் லாபம்!” - ‘ஈக்னாமிக்ஸ்’ ஜி.சொக்கலிங்கம்

இப்போதுள்ள நிலையில் வேல்யூ இன்வெஸ்டர்கள் யாருமே பங்குச் சந்தையில் பெரிய அளவில் முதலீடு செய்ய யோசிப்பார்கள்!

பிரீமியம் ஸ்டோரி
கடந்த வாரம் திங்கள்கிழமை அன்று ஜூம் வீடியோ தளத்தின் மூலம் முதலீட்டாளர் பயிற்சி வகுப்பை நடத்தியது நாணயம் விகடன்.

இந்தப் பயிற்சி வகுப்பில், கொரோனாவுக்குப் பிறகு பங்குச் சந்தை முதலீட்டில் கவனிக்க வேண்டிய விஷயங்கள் பற்றி விளக்கமாகப் பேசினார் பங்குச் சந்தை நிபுணரான ‘ஈக்னாமிக்ஸ்’ சொக்கலிங்கம். பேசி முடித்த பிறகு முதலீட்டாளர்கள் கேட்ட பல கேள்விகளுக்கு பதில் சொன்னார் அவர். பயிற்சி வகுப்பில் பதில் சொல்லாத சில கேள்விகளுக்கு நாணயம் விகடன் மூலம் இப்போது பதில் சொல்கிறார்...

வங்கிசாரா நிதி நிறுவனங்களின் எதிர்காலம் எப்படியிருக்கும்?

- நித்தி

‘‘வங்கிசாரா நிதி நிறுவனங்களைப் பொறுத்தவரை, அடுத்த இரண்டு காலாண்டுகளுக்கு மோசமான நிலையைச் சந்திக்க வேண்டியிருக்கும். தற்போது பொருளாதார நிலை சரியில்லை என்பதால், யாருக்குக் கடன் கொடுப்பது, யாருக்குக் கடன் கொடுக்காமல் இருப்பது போன்ற பிரச்னைகள் இருக்கும். தவிர, `ஏற்கெனவே கடன் பெற்றவர்கள் சில மாதங்களுக்குக் கடன் தவணையைத் திருப்பித் தரத் தேவையில்லை’ என ஆர்.பி.ஐ சொல்லியிருப்பதால், இந்த நிறுவனங்களுக்கு வரும் பணமும் குறையும். இந்த நிலையில், பஜாஜ் ஃபின்சர்வ் போன்ற நிறுவனங்களின் பங்கு விலை இன்னும் கொஞ்சம் குறைந்த பிறகு, குறுகியகாலத்துக்கு வாங்கி வைத்து விற்க முயலலாமே தவிர, வங்கிசாரா நிதி நிறுவனங்கள் தொடர்பான வேறெந்தப் பங்கையும் வாங்கும்படி சொல்ல மாட்டேன்.’’

“பங்கு முதலீடு... கவனமாகச்  செய்தால் லாபம்!” - ‘ஈக்னாமிக்ஸ்’ ஜி.சொக்கலிங்கம்

வேல்யூ இன்வெஸ்ட்டிங் செய்வதற்கேற்ற மாதிரி 10 லார்ஜ்கேப் பங்குகளைச் சொல்லுங்கள்.

- கார்த்திகேயன் மனோகரன்

‘‘லார்ஜ்கேப் துறையிலிருக்கும் பத்து பங்குகளைச் சொல்வது பெரிய விஷயமல்ல. ஆனால், இன்றைக்குப் பொருளாதார நிலை அடியோடு மாறியிருக்கிறது. பல நிறுவனங்களின் அடிப்படைகள் ஒரே இரவில்கூட மாறிவிடுகின்றன. எனவே, நான் சொல்லிவிட்டேன் என்ற ஒரே காரணத்துக்காக நீங்கள் அந்தப் பங்கை வாங்கி வைத்துவிட்டு, சும்மா இருக்கக் கூடாது. அந்தப் பங்கு நிறுவனத்தின் செயல்பாடு எப்படி இருக்கிறது என்பதை வாரத்துக்கு ஒரு முறையோ அல்லது மாதத்துக்கு ஒரு முறையோ அலசி ஆராய்ந்து பார்ப்பது அவசியம். ஏர்டெல், நெஸ்லே, லூபின், எஸ்.பி.ஐ கார்ட்ஸ் ஆகிய பங்கு நிறுவனங்களின் பிசினஸ் கொரோனா பாதிப்பு வந்த பிறகும்கூட நன்றாக இருக்கிறது. ஆனால், இந்த நிறுவனங்களுக்கு வேறு ஏதாவது ஒருவகையில் பிரச்னை வருமா என்பதை கவனித்துக்கொண்டே இருக்க வேண்டும். கவனமாக இருந்தால்தான் பங்குச் சந்தையில் லாபம் ஈட்ட முடியும்.’’

ஒரு நிறுவனப் பங்கின் மதிப்பீட்டையும், உயர்ந்த தரத்தையும் எப்படி அலசி ஆராய்வது?

- வெங்கடேஷ் சம்பத்

‘‘பி.இ ரேஷியோ, எபிட்டா, பிரைஸ் டு் அட்ஜஸ்டடு புக் வேல்யூ ஆகிய மூன்று விஷயங்களை அவசியம் பார்க்க வேண்டும். பிரைஸ் டு அட்ஜஸ்டடு புக் வேல்யூ என்பதை வங்கி மற்றும் நிதி நிறுவனங்களை அலசி ஆராய்வதற்குப் பயன்படுத்தலாம். இந்த வேல்யூவைக் கண்டறிந்த பிறகு, அந்தத் துறையிலுள்ள மற்ற நிறுவனங்களுடன் ஒப்பிட்டுப் பார்த்து எது முதலீட்டுக்கேற்ற நிறுவனம் என்று முடிவெடுக்கலாம். எபிட்டாவை இன்ஃப்ரா நிறுவனங்களுக்கும், நிறைய மூலதனச் செலவு கொண்ட நிறுவனங்களுக்கும் பயன்படுத்தலாம். பி.இ என்பது ஒவ்வொரு துறைக்கும் ஒவ்வொரு விதத்தில் இருக்கும். ஒரு துறையிலிருக்கும் ஒரு சிறப்பான நிறுவனத்தின் பி.இ இவ்வளவு எனில், நாம் முதலீடு செய்ய நினைக்கும் நிறுவனத்தின் பி.இ இவ்வளவு இருந்தால் போதுமா என்பதையெல்லாம் பார்த்துவிட்டுத்தான் முடிவு செய்ய வேண்டும்.

ஜி.சொக்கலிங்கம்
ஜி.சொக்கலிங்கம்

அடுத்து, ஒரு நிறுவனத்தின் உயர்ந்த தரத்தைப் பற்றி எப்படிக் கண்டறிவது என்று பார்ப்போம். சில நிறுவனங்கள் மேனேஜ்மென்ட் குவாலிட்டிக்குப் பெயர்போனவையாக இருக்கும். உதாரணமாக, சுந்தரம் ஃபைனான்ஸ், விப்ரோ ஆகிய நிறுவனங்கள்மீது யாருக்கும் சந்தேகம் வராது. அடுத்து, கடந்த 10, 20 ஆண்டுகளில் அந்த நிறுவனங்கள் செய்யப் போவதாக அறிவித்த விஷயங்களையெல்லாம் செய்திருக்கின்றனவா என்பதைப் பார்ப்பதன் மூலம் கண்டறிய முடியும். சில நிறுவனப் பங்குகளின் விலை 7 ரூபாயிலிருந்து 700 ரூபாய்க்குப் போகும். பிறகு மீண்டும் 7 ரூபாய்க்கே வந்துவிடும். இந்த மாதிரி ஏதும் நடக்க அந்த நிறுவனத்தின் மேனேஜ்மென்ட் அனுமதித்திருக்கிறதா என்று பார்க்க வேண்டும். நிறுவனத்துக்குக் கடன் எந்த அளவுக்கு இருக்கிறது, கையில் பணமாக எவ்வளவு வைத்திருக்கிறது, நிறுவனத்தின் வொர்க்கிங் கேப்பிட்டல் நிலை எப்படியிருக்கிறது, நிறுவனர் தனது பங்குகளை எந்த அளவுக்கு அடமானம் வைத்திருக்கிறார், நிறுவனம் தொடர்ந்து டிவிடெண்ட் தரும் அளவுக்கு நன்றாக பிசினஸ் செய்கிறதா என்பதையெல்லாம் அலசி ஆராய்ந்தால் ஒரு நல்ல பங்கை நிச்சயமாகக் கண்டுபிடிக்க முடியும்.’’

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

ஐந்து ஆண்டுகள் முதலீடு செய்வதுபோல் 20 ஸ்மால்கேப் மற்றும் மிட் கேப் பங்குகளைச் சொல்லுங்கள்.

- கார்த்திகேயன்

‘‘நீங்கள் கொஞ்சம் அதிகமாகவே ஆசைப்படுகிறீர்கள். 20 பங்குகளைச் சொல்வது பெரிய விஷயமல்ல. இந்தப் பங்குகள் நாளைக்கு எப்படிச் செயல்படும் என்பதை கவனித்துப் பார்த்து, அதற்கேற்ப முடிவெடுக்க வேண்டும். தாம்பூர் சுகர்ஸ், எம்.ஆர்.எஃப்., பாம்பே பர்மா எனச் சில பங்குகளை மட்டுமே இப்போதுள்ள நிலையில் சொல்ல முடியும். இந்த நிறுவனங்களையும் வாரத்துக்கு ஒரு முறையோ, மாதத்துக்கு ஒரு முறையோ அலசி ஆராய்ந்து பார்ப்பது அவசியம்.’’

ஜி.சொக்கலிங்கம்
ஜி.சொக்கலிங்கம்

இந்த ஆண்டின் இறுதியில் நிஃப்டி எந்த அளவில் இருக்கும்?

- கார்த்திக்

‘‘உங்கள் கேள்விக்கு பதில் சொல்லாமல் தப்பிக்க எனக்கு இஷ்டமில்லை. ஆனால், நீங்கள் ஓர் உண்மையைப் புரிந்துகொள்ள வேண்டும். நமது பங்குச் சந்தையை மட்டுமல்ல, உலகம் முழுக்கவுமே உள்ள பங்குச் சந்தைகளின் போக்கை நிர்ணயிக்கப்போவது ஒரு விஷயம்தான். கோவிட்-19 தொற்று நோய்க்கு மருந்து கண்டுபிடிக்கப்படுமா, இல்லையா என்பதுதான் அது. கோவிட்-19-க்கு மருந்து கண்டுபிடிக்கப்படாமல் போனால், பலரும் வீட்டைவிட்டு வர யோசிப்பார்கள். செலவு செய்ய மாட்டார்கள். இதனால் பொருளாதாரம் வளர முடியாத நிலை ஏற்படும். அந்த நிலையில் உலகம் முழுக்கவுள்ள பங்குச் சந்தைகள் 10-15% இறங்கும். மருந்து கண்டுபிடிக்கப்படுமானால் பங்குச் சந்தைகள் 20-25% உயரும் என்பதே இன்றிருக்கும் நிலை.’’

என் சகோதரர் ரூ.10 லட்சம் கடன் வாங்கி முதலீடு செய்யப்போகிறார். எவ்வளவோ சொல்லியும் கேட்க மாட்டேன் என்கிறார். அவருக்கு உங்கள் ஆலோசனை என்ன?

- கே.கே

‘‘கடன் வாங்கி, பங்குச் சந்தையில் முதலீடு செய்வது தற்கொலைக்குச் சமம். நடுத்தர வர்க்கத்தைச் சேர்ந்த இருவர் கடந்த ஆறு மாதங்களில் தங்கள் வாழ்க்கைத்தரத்தையே இழந்த கொடுமையை நான் பார்த்தேன். பங்குச் சந்தை என்பதே ரிஸ்க் மிகுந்த முதலீடு. இதில் கடன் வாங்கி முதலீடு செய்யவே கூடாது. உதாரணமாக, ரூ.100 கடன் வாங்கி, மிட் அண்ட் ஸ்மால்கேப் பங்குகளில் நீங்கள் முதலீடு செய்திருந்தால், உங்கள் முதலீட்டுச் செலவு ரூ.135-ஆக உயர்ந்திருக்கும். ஆனால், நீங்கள் முதலீடு செய்த தொகை தற்போது ரூ.50-ஆகக் குறைந்திருக்கும். இந்த நஷ்டத்தைத் தாங்க முடியாமல் நல்ல பங்குகள் உங்களிடம் இருந்தால், அவற்றையும் விற்க வேண்டிய கட்டாயம் ஏற்படும். எனவே, ஓய்வுக்காலத்துக்கென வைத்திருக்கும் பணத்தையோ அல்லது கடன் வாங்கியோ முதலீடு செய்வது கூடவே கூடாது.’’

வாராக்கடன் பிரச்னையால் ஒரு வங்கிப் பங்கின் விலையில் எப்படி பாதிப்பு ஏற்படும்?

- பி.எம்.வண்ணன்

‘‘ஒரு நிறுவனம் ஆண்டொன்றுக்கு ரூ.1 கோடிக்கு பிசினஸ் செய்கிறது. இதில் ரூ.90 லட்சம் பணம் வராமலே இருக்கிறதென்றால், அந்த நிறுவனத்திடம் மேற்கொண்டு தொழில் நடத்த பணம் இருக்காது. இதேதான் வங்கிகளுக்கும். வங்கிகள் கடனாகத் தரும் தொகை திரும்பவில்லையெனில், லாபத்திலிருந்து பணத்தை எடுத்துத்தான் அதைச் சரிசெய்ய வேண்டியிருக்கும். இதனால் லாபம் குறையும். லாபம் குறைந்தால், சந்தை உங்களை தண்டிக்கும். கையைவிட்டுப் பணத்தைக் கொடுத்தால், உங்களிடமிருக்கும் மூலதனம் குறையும். இதனால் நீங்கள் கடன் கொடுப்பது குறையும். இதனால் லாபம் குறையும். இதனால் பங்கின் விலை குறையும்.’’

இப்போதைய நிலையில் வாரன் பஃபெட்கூட முதலீடு செய்யாமல் இருக்கிறார். சந்தையில் முதலீடு செய்ய எது சரியான நேரம், அடுத்த ஆறு மாதங்களில் இந்தியச் சந்தையில் முதலீடு செய்யலாமா?

- சதீஷ் சுப்பையா

‘‘இப்போதுள்ள நிலையில் வேல்யூ இன்வெஸ்டர்கள் யாருமே பங்குச் சந்தையில் பெரிய அளவில் முதலீடு செய்ய யோசிப்பார்கள். 2008-ல் அவர் நிறைய முதலீடு செய்ததற்குக் காரணம், அப்போது வங்கி மற்றும் நிதித்துறை தவிர, மற்ற துறைகள் பெரிய அளவில் பாதிப்படையவில்லை. ஆனால், இப்போது பாதிக்கப்படாத துறைகள் மிகச் சிலவே இருக்கின்றன. இந்த நிலையில், நீண்ட காலத்துக்குப் பிறகு தேவைப்படும் பணத்தைத் தரமான லார்ஜ்கேப் பங்குகளில் மட்டும் முதலீடு செய்வதே சரி.’’

தொற்றுநோயால் பாதிப்படைந்திருக்கும் பொருளாதாரத்தைச் சரிசெய்ய ஊக்குவிப்பு நடவடிக்கைகள் பயன்படுமா?

- சரவணன் லிங்கமூர்த்தி

‘‘கோவிட்-19 வைரஸால் ஏற்பட்ட பாதிப்பைச் சரிசெய்ய உலகம் முழுக்க எட்டு ட்ரில்லியன் டாலர் அளவுக்கு ஊக்குவிப்புத் திட்டங்கள் அறிவிக்கப்பட்டுள்ளன. இந்தத் திட்டங்களால் அங்கு பொருளாதார வளர்ச்சி மீண்டும் வேகமெடுக்கத் தொடங்கும். நம் நாட்டில் ரூ.20 லட்சம் கோடி அளவுக்கு ஊக்குவிப்புத் திட்டங்கள் அறிவிக்கப்பட்டாலும், அரசாங்கம் தன் கையைவிட்டுத் தரும் பணம் குறைவுதான். இந்திய அரசாங்கம் புதிதாகப் பணத்தை அச்சடித்து, ஊக்குவிப்பு நடவடிக்கை மேற்கொள்ளாதது நல்லதுதான். அப்படிச் செய்திருந்தால், குறுகியகாலத்தில் சில நன்மைகள் கிடைத்திருக்கும். ஆனால், நீண்டகாலத்தில் பல கஷ்டங்களை அனுபவித்திருக்க வேண்டிய கட்டாயம் ஏற்படும்.’’

2015-லிருந்து முதலீடு செய்கிறேன். 2018, ஜனவரியில் என் போர்ட் ஃபோலியோ 30% லாபத்தில் இருந்தது. இப்போது 30% நஷ்டத்தில் இருக்கிறது. நான் ஒரு நீண்டகால முதலீட்டாளர். ஒரு கோடி ரூபாய் முதலீடு செய்திருக்கிறேன். இனி என்ன செய்வது?

- வேலு, மெயில் மூலமாக

‘‘நீங்கள் ஒரு நல்ல அனலிஸ்ட்டைக் கலந்தாலோசிப்பது நல்லது.’’

இந்தியாவில் எஃப்.ஐ.ஐ முதலீடு எப்படி இருக்கிறது?

- ஸ்ரீ சிவகணேசன்

‘‘2008-ல் எஃப்.ஐ.ஐ-கள் நம் சந்தையைவிட்டுப் போய் நஷ்டமடைந்தார்கள். அப்போது செய்த தவற்றை இப்போது செய்யக் கூடாது என்பதைப் புரிந்துகொண்டிருக்கிறார்கள். இப்போதைய பங்குச் சந்தை இறக்கத்தில் எஃப்.ஐ.ஐ-கள் நம் நாட்டைவிட்டு அதிகம் வெளியேறவில்லை என்பது ஆரோக்கியமான விஷயம்.’’

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு