இந்தியாவைப் பொறுத்தவரை, இந்தத் தொற்றுநோய் காரணமாக நடைமுறைப்படுத்தப்பட்ட முழு அடைப்பின் விளைவாக, 26 பில்லியன் டாலர் அளவுக்குப் பொருளாதாரம் குறைந்திருப்பதாக மதிப்பிடப்பட்டுள்ளது. இது 2020-21-ம் நிதியாண்டுக்கான இந்தியாவின் ஜி.டி.பி கணிப்பில் பாதி அளவான 1.8% ஆகும். இது நம் நாட்டின் இறக்குமதி மற்றும் ஏற்றுமதியைப் பாதித்துள்ளது. இதனால் பலரும் வேலை இழந்ததால், குடும்பங்களின் வருமானம் கணிசமாகக் குறைந்துள்ளது.

கோவிட் கற்றுத்தந்த பாடங்கள்..!

ஒரு வகையில், இந்த கோவிட் நோய்த்தொற்று நமக்குப் பல பாடங்களைக் கற்றுத் தந்திருக்கிறது. குறிப்பாக, பொது முடக்கத்தால் ஏற்படும் பாதிப்புகளிலிருந்து நம்மையும் நம் தொழில் நிறுவனங்களையும் பாதுகாத்துக்கொள்வது எப்படி என்ற மிகப் பெரிய பாடத்தை நமக்குக் கற்றுத் தந்திருக்கிறது. கோவிட்-19 தொற்றுநோய் பரவத் தொடங்கியபின், அதிக அளவிலான தொழிற்சாலைகள், நிறுவனங்கள், வணிக நிறுவனங்கள், கட்டுமானம் போன்றவை ஊரடங்கு காலத்தில் மூட வேண்டியதாயிற்று. இதனால் பலரும் வேலை இழக்கும் நிலை ஏற்பட்டது. புலம்பெயர்ந்த தொழிலாளர்கள் சொந்த ஊர்களுக்குத் திரும்பச் செல்ல வேண்டிய கட்டாயம் உருவானது. நிறுவனங்களின் வருமானம் குறைந்ததால், ஊழியர்களின் சம்பளம் கணிசமாகக் குறைந்திருக்கிறது.

சர்வதேச அளவில் பரவிய ஒரு நோய் நம் சமூகத்தில் மற்றும் பொருளாதாரத்தில் எப்படி ஒரு பெரிய தாக்கத்தை ஏற்படுத்த முடியும் என்பதை நாம் இப்போது அறிந்திருக்கிறோம். இப்போது நம் மனதில் சில கேள்விகள் எழுகின்றன. கோவிட் ஏற்படுத்திய பாதிப்புகளிலிருந்து வேகமாகத் திரும்ப எழுவதற்கு நாம் என்ன செய்யப் போகிறோம், பொது முடக்கக் காலத்தின்போது தொழில்கள் நிலைத்து இருந்திட நம்மால் எப்படி உதவ முடியும், ஒரு தனிநபர் வேலையை இழக்க நேரிட்டால் அந்த நிதிச்சுமையை நம்மால் குறைக்க முடியுமா, தனிநபர், குடும்பங்கள், தொழில்கள், பொருளாதாரம் மற்றும் சமூகம் ஆகியவை இப்படிப்பட்ட ஒரு சர்வதேசப் பரவலில் சிக்காமல் பாதுகாத்துக்கொள்ள ஒரு கட்டமைப்பை உருவாக்க முடியுமா என்பதே அந்தக் கேள்விகள்.

இந்தக் கேள்விகளுக்கான பதில், முடியும் என்பதுதான். சர்வதேச பரவல் தொகுப்பை உருவாக்குவதன் மூலம் எதிர்காலத்தில் இதுபோன்ற சூழ்நிலை மீண்டும் ஏற்பட்டால், நாம் அதைச் சிறந்த முறையில் எதிர்கொள்ள முடியும்.

சர்வதேசப் பரவல் தொகுப்பு என்றால்..?

எதிர்காலத்தில் ஏற்பட சாத்தியமுள்ள ஒரு நிகழ்வுக்காக ஒரு நிதித் தொகுப்பை உருவாக்குவதுதான் சர்வதேசப் பரவல் தொகுப்பு என்பதாகும். சர்வதேசப் பரவல் காரணமாக நடைமுறைப்படுத்தபடும் ஊரடங்கு போன்ற நடவடிக்கைகளால் ஏற்படும் பொருளாதார இழப்புகளிலிருந்து நம்மைப் பாதுகாத்திட இந்த நிதித் தொகுப்பு நிச்சயம் உதவக்கூடியதாக இருக்கும். இந்த யோசனைக்கு எப்படி நாம் செயல்வடிவம் அளிக்கலாம் எனப் பார்ப்போம்.

இன்று, ஒரு தொழில் தடங்கல் பாலிசியை (business interruption policy), நிலையான சொத்து பாலிசியுடன் (standard property policy) எடுத்துக்கொள்ளும்போது, அது சர்வதேசப் பரவலின் ஏற்படும் பொது முடக்கத்தால் ஏற்படும் இழப்புகளைக் காப்பீடு செய்வதில்லை. நிறுவனங்களுக்காக, சொத்து பாலிசியுடன் ஒரு கட்டாய கூடுதல் காப்பீட்டை (ஆட்ஆன்) சர்வதேசப் பரவல் காப்பீட்டுக்காக நாம் செய்துகொள்கிற மாதிரி புதிதாக ஓர் ஏற்பாடு செய்யலாம். இந்தக் காப்பீடானது சர்வதேசப் பரவலால் பொது முடக்கத்தை அரசாங்கம் அறிவிக்கும்போது செயல்பாட்டுக்கு வரும். இந்தக் கூடுதல் காப்பீட்டுத் திட்டத்தின்கீழ் பொது முடக்கத்தில், நிறுவனங்களின் பொறுப்புகளையும் இடர்களையும் காப்பீடு செய்ய முடியும். அதாவது, ஊழியர்களின் சம்பளம், கட்டட வாடகை உட்பட பலவற்றின் மூலம் ஏற்படும் இழப்புகளை ஈடுகட்ட முடியும்.

இது பொது முடக்கம் நடைமுறையில் இருக்கும் 2 - 3 மாதங்களுக்கு இருக்கலாம். இது அதிகபட்ச கடன் வரையறையுடன் இருக்கலாம். இதனால், சம்பளக் குறைப்பு, பணி நீக்கம், தொழில் இழப்புக்கள் ஆகியவற்றைத் தவிர்க்க முடியும். மேலும், சர்வதேசப் பரவலிலிருந்து நிறுவனங்கள் மீண்டு வரவும் முடியும். தனி நபர்கள் இந்தக் கூடுதல் காப்பீட்டை அவர்களின் வீட்டுக் காப்பீடு பாலிசியுடன் வாங்கிக்கொள்ளலாம். இந்தப் பாலிசியை எடுக்கலாமா வேண்டாமா என்பதை வாடிக்கையாளர்களின் விருப்பத்துக்கு விடலாம். இந்தக் கூடுதல் காப்பீட்டின்கீழ், காப்பீடு செய்திருப்பவர் வேலை இழக்கும் நிலையில், அவரது வீட்டுக் கடனுக்கான மாதத் தவணையை 2 - 3 மாதங்களுக்கு காப்பீட்டு நிறுவனமே செலுத்தும். இதனால் ஓர் தனிநபர் நிதிச் சுமையை நன்கு குறைக்க முடியும்.

இந்தத் தொகுப்பை எப்படி உருவாக்கலாம்?

இந்தத் தொகுப்புக்கான நிதியைப் பொது மற்றும் தனியார் நிறுவனங்கள் கூட்டாகத் திரட்டலாம். இந்தத் தொகுப்புக்கான பங்கை அனைத்து நிறுவனங்களின் சமூகப் பொறுப்பு நிதியிலிருந்து (CSR) செலுத்தலாம். இதன்மூலம் நிறுவனங்களுக்கு மூன்று மாத காலத்துக்கு இழப்பீடு கிடைக்கும். மூன்று மாத காலத்துக்குமேல் இழப்பீடு பெற வேண்டு மெனில், மீண்டுமொருமுறை காப்பீட்டு பாலிசி எடுத்து இழப்பீட்டைப் பெறலாம். இந்த நிதித் தொகுப்பை ஒருமுறை பலமுள்ளதாகவும் சுய சார்புடனும் செயல்படக்கூடியதாக ஆக்கி விட்டால், அரசாங்கம் இந்தத் தொகுப்புக்கான பங்களிப்பைப் படிப்படியாகக் குறைத்துக் கொள்ளலாம். நெருக்கடி நேரும்போது நாம் பல விஷயங்களைக் கற்றுக்கொள்கிறோம். கோவிட்-19 தொற்று நோயானது, சர்வதேசப் பரவல் தொகுப்பு என்ற கற்றலை நமக்குச் சொல்லித்தந்திருக்கிறது. இதனால் எதிர் காலத்தில் ஏற்படும் பாதிப்புகளிலிருந்து நம் பொருளாதாரமும் சமூகமும் பாதிக்கப்படாமல் இருக்க பேருதவியாக இருக்கும்.