தனிநபர் வருமான வரி மாற்றங்கள்... முதலீட்டை லாபகரமாக்கும் வழிகள்!

க டந்த 1-ம் தேதி அன்று மத்திய நிதியமைச்சர் நிர்மலா சீதாராமன் தாக்கல் செய்த மத்திய பட்ஜெட்டில் வருமான வரி தொடர்பாக பல மாற்றங்கள் கொண்டுவரப்பட்டுள்ளன. இந்த மாற்றங்கள் காரணமாக முதலீட்டில் நாம் கவனிக்க வேண்டிய விஷயங்கள் என்னென்ன என்பது பற்றி விரிவாகப் பார்ப்போம்.

. தனிநபர் வருமான வரி

இதுவரைக்கும் அனைவரும் வருமான வரிக் கணக்கீடு செய்யும்போது, ஒரே வகையில்தான் கணக்கிட வேண்டும். ஆனால், வரும் நிதியாண்டிலிருந்து (2020-21) ஏற்கெனவே இருக்கும் பழைய முறையிலும் வருமான வரியைக் கணக்கிடலாம்; புதிதாக அறிமுகப்படுத்தப்பட்டிருக்கும் முறையிலும் கணக்கிட்டுக் கொள்ளலாம். இதில் என்ன வசதி என்றால், ஒருவருக்கு எந்த முறை லாபகரமாக இருக்கிறதோ, அந்த முறையில் வருமான வரிக் கணக்கைத் தாக்கல் செய்யலாம்.

. வருமான வரியைக் கணக்கீடு செய்வதற்கான பழைய முறை என்பது நாம் அனைவரும் அறிந்த ஒன்று. அதில் 80சி பிரிவு, 80டி பிரிவு எனப் பல்வேறு பிரிவுகளின் கீழ் நாம் ஒவ்வொருவரும் வரிவிலக்கு எடுத்துக்கொள்ளலாம். இந்த வரிவிலக்கு போக இருக்கும் வருமானத்துக்கு நாம் வரி கட்ட வேண்டும்.

இதிலுள்ள பிரச்னை என்னவென்றால், வரியைச் சேமிக்க வேண்டும் என்பதற்காகப் பலரும் தங்களுக்குப் பெரிய அளவில் உதவாத முதலீடுகளில் பணத்தைப் போட்டு வந்தார்கள். வரிச் சலுகை பெற வேண்டும் என்பதற்காகப் பலரும் இரண்டாவது வீடு, மூன்றாவது வீடு என்று வாங்கினார்கள்.

இன்னும் சிலரோ, வீட்டுச் செலவுக்கு அதிக பணம் தேவை என்பதை அறிந்தும், முதலீடு செய்யாவிட்டால் அதிக வரி செலுத்த வேண்டியிருக்குமே என்று நினைத்து கட்டாயமாக முதலீடு செய்து, கேஷ் ஃப்ளோ பிரச்னையில் சிக்கித் தவித்தார்கள். இன்னும் பலருக்கு வருமான வரிக் கணக்கீட்டை ஆடிட்டர் துணை இல்லாமல் செய்ய முடியாது என்ற அளவுக்குப் பல விதிமுறைகள் இருந்தன.

. இந்த பிரச்னைகளையெல்லாம் புதிதாக அறிவிக்கப்பட்டிருக்கும் வருமான வரிக் கணக்கிடும் முறை தீர்த்திருக்கிறது. மேலும், இந்தப் புதிய முறையில் வரி செலுத்த அதிகமாக மூளையை குழப்பிக்கொள்ள வேண்டாம். புதிய முறையின் அடிப்படையில் ஒருவர் வரி செலுத்தும் போது வரியைச் சேமிக்க எந்த முதலீட்டையும் மேற்கொள்ள வேண்டாம்; அதேசமயம், எந்தத் தள்ளுபடியும் கிடைக்காது. ஆகவே, இன்ஷூரன்ஸ், பி.பி.எஃப்., இ.எல்.எஸ்.எஸ் ஃபண்டுகள் போன்ற எந்த முதலீட்டையும் மேற்கொள்ள வேண்டும் என்ற அவசியமில்லை.

. முக்கியமாக, வருமான வரிச் சேமிப்புக்காக யாரும் வீடு வாங்க வேண்டாம். ஆகவே, இனிமேல் முதலீட்டை முதலீடு என்ற அணுகுமுறையில் பார்க்கலாம்; வரிச் சேமிப்புடன் இணைத்துப் பார்க்க வேண்டிய அவசியம் இல்லை.

இந்தப் புதிய முறை அடுத்த நிதியாண்டிலிருந்துதான் நடைமுறைக்கு வருகிறது. என்றாலும், வரும் ஏப்ரல் மாதம் முதல் பல நிறுவனங்களும் தங்கள் ஊழியர்களிடம் எந்த முறையை பின்பற்றப் போகிறீர்கள் என்று கேட்க ஆரம்பிக்கும். ஆகவே, ஒவ்வொருவரும் தங்கள் வருமானத்துக்கு ஏற்ப எந்த முறையில் குறைவாக வரியைச் செலுத்தலாம் என்பதை இப்போதிருந்தே கணக்கிட்டு வைத்துக்கொள்வது சிறந்தது.

டிவிடெண்ட் வரி

இதுவரை முதலீட்டாளர்கள் கையில் வாங்கும் டிவிடெண்டுக்கு வரி ஏதும் இல்லாமலிருந்தது. டிவிடெண்ட் டிஸ்ட்ரிபியூஷன் டாக்ஸை (டி.டி.டி) நிறுவனமே அனைத்து முதலீட்டாளர்களுக்கும் சேர்த்து அரசாங்கத்திடம் செலுத்திவிடும்.

ஆனால், இந்த பட்ஜெட்டில் டிவி டெண்ட் டிஸ்ட்ரிபியூஷன் வரி நீக்கப்பட்டுவிட்டது. இனிமேல் வாங்கும் டிவிடெண்டுக்கு முதலீட்டாளர்கள் தங்கள் வருமான வரி வரம்பில் வரி செலுத்த வேண்டும். மேலும், ரூ.5,000-க்கு மேல் டிவிடெண்ட் கொடுக்கும்போது, நிறுவனங்கள் டி.டி.எஸ் (TDS – Tax Deduction at Source) பிடித்தம் செய்ய வேண்டும்.

சிறு முதலீட்டாளர்களுக்கு இது நற்செய்தி.ஏனென்றால், அவர்கள் ரூ.5 லட்சம் வருமானத்துக்குள் இருந்தால், வரி செலுத்த வேண்டிய தேவையில்லை. பிடித்த டி.டி.எஸ்-ஸும் திரும்ப அவர்கள் கைக்குக் கிடைத்துவிடும். ஆனால், பெரிய முதலீட்டாளர்கள் டிவிடெண்ட் பெறும்போது, அதிகமான வரியைச் செலுத்த வேண்டியிருக்கும்.

. ஒவ்வொருவரும் தங்கள் வருமானத்துக்கு ஏற்ப எந்த முறையில் குறைவாக வரியைச் செலுத்தலாம் என்று கணக்கிட்டு வைத்துக்கொள்வது சிறந்தது. . நாம் மேலே கூறியதுபோல, பங்குகளிலிருந்து பெறும் டிவிடெண்ட் மற்றும் மியூச்சுவல் ஃபண்டுகளிலிருந்து பெறும் டிவிடெண்ட் ஆகிய இரண்டுக்கும் இது பொருந்தும். இனிமேல் மியூச்சுவல் ஃபண்டுகளிலிருந்து டிவிடெண்ட் பெறாமல் இருப்பது முதலீட்டாளர்களுக்குப் பயனளிக்கும். அதற்கு பதிலாக, குரோத் ஆப்ஷனில் முதலீடு செய்துவிட்டு, மாதாந்தரத் தேவைகளுக்கு எஸ்.டபிள்யூ.பி மூலம் பணம் எடுத்துக்கொள்வது சிறந்தது. அப்படிச் செய்யும்போது ஓராண்டுக்கு மேல் ஈக்விட்டி மியூச்சுவல் ஃபண்டுகளுக்கும், மூன்று ஆண்டுகளுக்கு மேல் கடன் சார்ந்த மியூச்சுவல் ஃபண்டுகளுக்கும் நீண்டகால மூலதன ஆதாய வரி உரித்தாகும். அது அனைவருக்கும் லாபகரமானதாக அமையும்.

. கேப்பிட்டல் கெயின்ஸ் பற்றிய தகவல்

வரித் தாக்கல் செய்பவர்கள் பலரும் தங்களுக்குக் கிடைத்த மூலதன ஆதாயத்தை வரித் தாக்கலில் காண்பிப்பதில்லை. எனவே, இனிவரும் ஆண்டுகளில் வருமான வரித்துறையே வருமான வரித் தாக்கல் படிவத்தில் மூலதன ஆதாயத்தைப் பூர்த்தி செய்து தருவதாகக் கூறியிருக்கிறது. முதலீட்டாளர்கள் இனி மூலதன ஆதாயத்துக்கான சான்றினைத் தேடி அலைய வேண்டியதில்லை.

. பி.எஃப்/ பென்ஷன் வரி

நிறுவனங்கள் தங்கள் ஊழியர்களிடம் பிடித்தம் செய்யும் பி.எஃப்., பென்ஷன் திட்டங்கள், சூப்பர் அனுவேஷன் ஃபண்ட் போன்றவை ரூ.7.50 லட்சத்துக்கு மேல் இருந்தால், அந்தத் தொகைக்கு இனி ஊழியர்கள் வருமான வரி செலுத்த வேண்டும். அந்த வகையில், இதுவரை வரியைச் சேமித்த அதிக சம்பளம் வாங்கும் ஊழியர்கள், இனி சற்றுக் கூடுதல் வரி செலுத்த வேண்டியிருக்கும்.

என்.ஆர்.ஐ டாக்ஸ்

`வெளிநாடுவாழ் இந்தியர்கள், வெளிநாட்டில் சம்பாதிக்கும் பணத்துக்கு இங்கு வரி செலுத்த வேண்டும்’ என்ற தவறான செய்தி ஒன்று பட்ஜெட்டுக்குப் பிறகு பரப்பப்பட்டது. அது தவறு என்று நிதி அமைச்சகம் தெளிவு செய்துவிட்டது. ஆனால், வெளிநாடுவாழ் இந்தியர்கள் இந்தியாவில் ஏதாவது வருமானம் ஈட்டினால் அதற்கு இந்தியாவில் வரி செலுத்த வேண்டும்.

. என்.ஆர்.ஐ ஸ்டேட்டஸ்

வெளிநாடுவாழ் இந்தியர்களுக்கு ஒரு சிறிய மாற்றம் கொண்டு வரப்பட்டிருக்கிறது. இதுவரை ஒருவர் ஒரு நிதியாண்டில் 182 நாள்களுக்கு மேல் வெளிநாட்டில் இருந்தால், அவர் `என்.ஆர்.ஐ’ என்று வருமான வரி அலுவலகத்தால் கருதப்பட்டு, அவர் வெளிநாட்டில் சம்பாதித்த பணத்துக்கு இந்தியாவில் வரி செலுத்த வேண்டாம். அந்த 182 நாள்கள் இந்த பட்ஜெட்டில் 240 நாள்களாக மாற்றப்பட்டுள்ளது. ஆகவே, இனிவரும் (2020-21) நிதியாண்டிலிருந்து என்.ஆர்.ஐ என்று கருதப்படுவதற்கு 240 நாள்களுக்கு மேல் வெளிநாட்டில் ஒருவர் இருந்திருக்க வேண்டும். அதற்கும் குறைவாக வெளிநாட்டில் இருந்திருக்கும்பட்சத்தில், அவர் இந்தியாவில் வரி செலுத்த வேண்டும். இது குறிப்பாக, கப்பல்களில் வேலை பார்க்கும் இந்தியர்களை பாதிக்கும்.

டி.சி.எஸ்

எல்.ஆர்.எஸ் (LRS - Liberalised Remittance Scheme) திட்டத்தின் மூலம் ஒவ்வோர் இந்தியரும் வருடத்துக்கு ரூ.2.50 லட்சம் டாலர் வரை வெளிநாட்டுக்கு இலகுவாக பணம் அனுப்பலாம். அது மருத்துவத்துக்காகவோ, படிப்புக்காகவோ, முதலீட்டுக்காகவோ, வேறு கரன்ட் / கேப்பிட்டல் அக்கவுன்ட் செலவு களுக்காகவோ இருக்கலாம்.

வரும் நிதியாண்டிலிருந்து அவ்வாறு அனுப்பும் பணம் ஆண்டுக்கு ஏழு லட்சத்துக்கு மேல் இருந்தால், பான் கார்டு இருப்பவர்களுக்கு 5% டி.சி.எஸ் (TCS – Tax Collected at Source) பிடித்து வங்கிகள் கட்ட வேண்டும். பான் கார்டு/ஆதார் கார்டு இல்லாதவர்கள் 10% டி.சி.எஸ் கட்ட வேண்டும். பிறகு, வருமான வரிக் கணக்கைத் தாக்கல் செய்யும்போது அந்தப் பணத்தைத் திரும்ப பெற்றுக்கொள்ளலாம்.

அதேபோல், வெளிநாட்டுச் சுற்றுலா செல்பவர்களுக்கும் இனி டி.சி.எஸ் உண்டு. இதற்கு, 5% அல்லது 10% டி.சி.எஸ்-ஐ டூர் ஆபரேட்டர்கள் வசூலித்து, டிக்கெட் எடுப்பவர் பெயரில் கட்டிவிட வேண்டும். உதாரணமாக, உங்கள் குடும்பத்தில் நான்கு பேர் வெளிநாட்டுச் சுற்றுலா செல்கிறீர்கள் என வைத்துக்கொள்வோம். நால்வருக்கும் சேர்த்து மொத்த டூர் பேக்கேஜ் செலவு ரூ.2 லட்சம் என்றால், உங்களிடமிருந்து 5% (ரூ.10,000) அதிகமாக வசூலித்து, உங்கள் பெயரில் வருமான வரி அலுவலகத்தில் டூர் ஆபரேட்டர் கட்டிவிடுவார். அவ்வாறு செலுத்திய தொகையை நீங்கள் வருமான வரிக் கணக்கைத் தாக்கல் செய்யும்போது திரும்ப வாங்கிக்கொள்ளலாம்.

மேலே குறிப்பிட்டிருக்கும் மாற்றங்களைக் கருத்தில்கொண்டு, இனிவரும் நிதியாண்டில் முதலீட்டாளர்கள் வருமான வரிக் கணக்கைத் திட்டமிட்டுக்கொண்டால், செலவுக்குப் பணமில்லையே என்று கவலைப்பட வேண்டிய அவசியமே இருக்காது!

தனிநபர் வருமான வரி மாற்றங்கள்... முதலீட்டை லாபகரமாக்கும் வழிகள்!

சொக்கலிங்கம் பழனியப்பன்