Published:Updated:

உங்கள் முதலீடு சரியானதா? - கவனிக்க வேண்டிய 5 அம்சங்கள்!

முதலீடு
பிரீமியம் ஸ்டோரி
News
முதலீடு

எந்தவொரு முதலீட்டுத் திட்டத்தில் முதலீடு செய்வதாக இருந்தாலும் முக்கியமான ஐந்து கேள்விகளைக் கேட்க வேண்டும்!

ல்லோருக்கும் இன்றைக்கு இருக்கும் பெரிய பிரச்னை எதில் முதலீடு செய்வது என்பதுதான். தங்கம், ரியல் எஸ்டேட் என்கிற முதலீடுகளைத் தாண்டி, பங்குச் சந்தை, மியூச்சுவல் ஃபண்ட் போன்றவற்றில் முதலீடு செய்யும்போது, ‘அந்த முதலீடு எப்படிப்பட்டதாக இருக்குமோ!’ என்கிற குழப்பம் பலருக்கும் இருக்கவே செய்கிறது.
உங்கள் முதலீடு சரியானதா? - கவனிக்க வேண்டிய 5 அம்சங்கள்!

நீங்கள் முதலீட்டை ஆரம்பிக்கும் முன் முக்கியமான ஐந்து அம்சங்களை நீங்கள் கவனிப்பது அவசியம். இந்த நீங்கள் அலசி ஆராய்ந்து முதலீடு செய்தால், பிற்பாடு ஏமாற்றம் என்கிற அனுபவத்துக்கு வேலை இருக்காது. இந்த ஐந்து விஷயங்கள் நீங்கள் சிறந்த முதலீட்டுத் திட்டங்களைத் தேர்வு செய்ய உதவும். நிதித் திட்டம் ஒன்றில் முதலீடு செய்யும் முன் உங்களை நீங்களே கேட்க வேண்டிய அந்த முக்கியமான ஐந்து கேள்விகளை இப்போது பார்ப்போம்.

1. முதலீடு செய்யும் நோக்கம் என்ன?

எப்போதும் ஏதாவது ஓர் இலக்குடன் முதலீடு செய்ய வேண்டும். ‘நான் எதற்காக இந்தத் திட்டத்தில் முதலீடு செய்கிறேன்’ என்கிற கேள்வியை முதலில் உங்களுக்கு நீங்களே கேட்டுக்கொள்ளுங்கள். அதற்கு ஒரு நிதி இலக்கை நிர்ணயத்துக் கொள்ளுங்கள். அப்படிச் செய்யும்போதுதான் அது அர்த்தம் உள்ளதாக இருப்பதுடன், அந்த முதலீட்டை நீங்கள் தொடர்ந்து மேற்கொள்வீர்கள்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS

உதாரணத்துக்கு நீங்கள் ஓர் ஆயுள் காப்பீட்டு பாலிசியை எடுக்கிறீர்கள். இதை உங்களின் குடும்ப உறுப்பினர்களின் எதிர்கால நிதிப் பாதுகாப்புக்கு எடுத்திருப்பதாக நீங்கள் கருதுவதுதான் சரியான புரிந்துகொள்ளலாக இருக்கும். இதை நீங்கள் வரிச் சேமிப்புக்காக எடுத்திருப்பதாக நினைத்தால், பிற்பாடு இதைவிட அதிகம் வரிச் சலுகை தரும் திட்டத்தில் நீங்கள் சேரும்போது, இன்ஷூரன்ஸ் பாலிசிக்கான பிரீமியம் கட்டாமல் விட்டுவிட வாய்ப்பு இருக்கிறது. எனவே, உங்களின் எந்த முதலீடு அல்லது செலவையும் நிதி இலக்குடன் இணையுங்கள்.

உங்கள் முதலீடு சரியானதா? - கவனிக்க வேண்டிய 5 அம்சங்கள்!

இதேபொல, பப்ளிக் பிராவிடெண்ட் ஃபண்டில் (பி.பி.எஃப்) முதலீடு செய்தால், அதை உங்களின் ஓய்வுக் காலத்துக்கு என இலக்கு நிர்ணயுங்கள்.

நீங்கள் மியூச்சுவல் ஃபண்ட் திட்டம் ஒன்றில் மாதம் 4,000 முதலீடு செய்து, அதற்கு ஆண்டுக்கு 10% வருமானம் கிடைத்தால், இரண்டு ஆண்டு களுக்குப் பிறகு, அது ரூ. 1.06 லட்சம் கிடைக்கும். இந்த முதலீட்டை உங்கள் பிள்ளைகளின் உயர்கல்வி செலவுக்குப் பயன்படும் என இலக்கு நிர்ணயம் செய்துகொண்டால், சுற்றுலா செல்ல அதிலிருந்து பணத்தை எடுக்க மாட்டீர்கள். அப்படிப்பட்ட இலக்கு எதுவும் இல்லாதபட்சத்தில், அதிலிருக்கும் பணத்தை எடுத்து தாராளமாக எந்தச் செலவு செய்து விடுவீர்கள். அந்த மியூச்சுவல் ஃபண்ட் முதலீட்டையும் தொடர மாட்டீர்கள். எனவே, ஒவ்வொரு முதலீட்டுக்கும் ஒரு நோக்கம் வேண்டும்.

உங்கள் முதலீடு சரியானதா? - கவனிக்க வேண்டிய 5 அம்சங்கள்!

செயல்திட்டம்:

ஏற்கெனவே குறிக்கோள் எதுவும் இல்லாமல் முதலீடு அல்லது செலவு (டேர்ம் இன்ஷூரன்ஸ் பிரீமியம்) செய்துவந்தால், அதற்கென ஓர் இலக்கைக் கண்டுபிடித்து நிர்ணயம் செய்து கொள்ளுங்கள்.

நீங்கள் ஒரு முதலீட்டுத் திட்டத்தைத் தேர்வு செய்யும்போது, “இந்த முதலீட்டுத் திட்டம் எனது நிதி இலக்கில் எதை அடைய உதவும்?” என்கிற கேள்வியை உங்களுக்கு நீங்களே கேளுங்கள்.

முதலீடு செய்ய உங்களிடம் கூடுதல் பணம் இருக்கும்போது, “எனது நிதி இலக்குகளில் எதற்கு இப்போது முன்னுரிமை கொடுக்க வேண்டும்’’ என உங்களை நீங்களே கேட்டு அதற்கேற்ப முதலீடு செய்யுங்கள்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

2. எவ்வளவு வருமானம் எதிர்பார்க்கலாம்?

நீங்கள் முதலீடு செய்திருக்கும் திட்டங்களி லிருந்து எதிர்பார்க்கும் வருமானம் எவ்வளவு, அது கிடைக்கிறதா, நீங்கள் எதிர்பார்க்கும் வருமானம், பணவீக்க விகிதம், வரி போக எவ்வளவு என்று பாருங்கள். உங்கள் முதலீட்டி லிருந்து வரி மற்றும் பணவீக்கத்துக்குப் பிந்தைய வருமானம், பாசிட்டிவாக இருந்தால், அந்த முதலீட்டைத் தொடரலாம். அது மைனஸ் ஆக இருந்தால், அந்த முதலீட்டில் இருந்து வெளியேறுவதைப் பற்றி பரிசீலிக்க வேண்டும். உதாரணமாக, ஒரு முதலீட்டின் மூலம் உங்களுக்கு நீண்ட காலத்தில் ஆண்டுக்கு சராசரியாக 12% வருமானம் கிடைக்கிறது. இந்த வருமானத்துக்கு 10% வரி கட்ட வேண்டும். சராசரி பணவீக்க விகிதம் 5% என வைத்துக் கொள்வோம். 12% வருமானத்துக்கு 10% வரி கட்டினால், 10.8 சதவிகிதமாக வருமானம் குறைந்துவிடும். இதிலிருந்து பணவீக்க விகிதம் 5% கழித்தால், 5.8% வருமானம் கிடைக்கும். இந்த முதலீட்டைத் தொடரலாம்.

உங்கள் முதலீடு சரியானதா? - கவனிக்க வேண்டிய 5 அம்சங்கள்!

எண்டோமென்ட் இன்ஷூரன்ஸ் பாலிசி மூலம் சுமார் 5% வருமானம் கிடைக்கும். இந்தத் தொகைக்கு வருமான வரி கிடையாது என்றாலும் பணவீக்க விகிதத்தைக் கழித்தால் அதன் மூலம் லாபம் எதுவும் கிடையாது.

செயல்திட்டம்

நீங்கள் செய்துவரும் முதலீடுத் திட்டங்களைப் பட்டியலிடுங்கள். வரி மற்றும் பணவீக்கத்துக்குப் பிந்தைய வருமானத்தைக் கணக்கிடுங்கள். நீங்கள் ஒரு புதிய முதலீட்டுத் திட்டத்தைத் தேர்வு செய்யும்போது, வரி மற்றும் பணவீக்கத்துக்கு பிந்தைய வருமானத்தைக் கணக்கிடவும்.

3. ரிஸ்க் எவ்வளவு?

நீங்கள் மேற்கொள்ளும் முதலீட்டில் எவ்வளவு ரிஸ்க் இருக்கிறது என்பதைக் கவனியுங்கள். அதற்காக ரிஸ்க் உள்ள முதலீடுகளில் பணத்தைப் போடக் கூடாது என்பதில்லை.

குறுகிய காலத்தில் பங்குச் சந்தை மற்றும் பங்குச் சந்தை சார்ந்த முதலீடு ரிஸ்க் ஆனது. இந்த முதலீடுகளில் ஏற்ற இறக்கம் அதிகம் இருக்கும். இவற்றில் புரிந்து முதலீடு செய்வது நல்லது. அப்போதுதான், சந்தையின் இறக்கத்தால் முதலீடு செய்த தொகையின் மதிப்பு குறைந்தாலும் கவலைப்படாமல் இருக்க முடியும். அதே நேரத்தில், இந்த முதலீடுகள் நீண்ட காலத்தில் நல்ல நியாயமான வருமானத்தைத் தரக்கூடியவை. எனவே, எந்தத் திட்டத்தில் முதலீடு செய்வதாக இருந்தாலும், அதில் உள்ள ரிஸ்க் அளவு அறிந்து முதலீடு செய்ய வேண்டும். உங்களுக்கு அதில் உள்ள ரிஸ்க் தெரியும் என்பதால், நீங்கள் நிதானமாக செயல்பட முடியும்.

ஒவ்வொரு பங்குச் சந்தை இறக்கத்தின்போதும் பலர் தங்களின் முதலீட்டு மதிப்பு குறைந்து வருவதாகப் புகார் கூறுகிறார்கள். காரணம், ரிஸ்க்கை புரிந்துகொள்ளாமல் இருப்பதாகும்.

செயல்திட்டம்

உங்களின் முதலீடுகளைப் பட்டியலிடுங்கள் ரிஸ்க் உள்ள முதலீடுகள் மற்றும் ரிஸ்க் இல்லாத முதலீடுகளை வகைப்படுத்துங்கள். புதிய முதலீட்டுத் திட்டத்தை நீங்கள் தேர்வு செய்யும் போதெல்லாம், அது கொண்டிருக்கும் ரிஸ்க் அளவைக் கவனியுங்கள். இதே அளவு வருமானத்தைக் குறைந்த ரிஸ்க் உடன் கொடுக்கக்கூடிய முதலீட்டுத் திட்டம் இருக்கிறதா என்று பாருங்கள்.

உங்கள் முதலீடு சரியானதா? - கவனிக்க வேண்டிய 5 அம்சங்கள்!

4. எளிதில் பணமாக்க முடியுமா?

நிதித் திட்டங்களை எவ்வளவு எளிதில் பணமாக்க முடியும் என்பதையும் உங்கள் நிதி இலக்குகளைப் பூர்த்தி செய்ய தேவைப்படும் உடனடியாகப் பணமாக்க முடியுமா எனப் பாருங்கள். ஏதாவது, லாக் இன் பிரீயட் இருக்கிறதா, எந்த நேரத்திலும் வெளியேற முடியுமா என்று பார்க்கவும்.

எண்டோவ்மென்ட் பாலிசியில், முதிர்வுக் காலத்துக்கு முன்பு, பாலிசிக்கு பிரீமியம் கட்டுவதை நிறுத்தினால் எவ்வளவு தொகை கிடைக்கும் என்பது பாலிசியை எடுக்கும் நேரத்தில் பலருக்குத் தெரியாது. மேலும், எந்த ஒரு முதலீடாக இருந்தாலும், அதை அவசரக் காலத்தில் முதலீடுகளைப் பணமாக மாற்ற முடியுமா, பணமாக மாற்றுவது எப்படி என்பதை அறிந்திருப்பது முக்கியமாகும்.

எந்தவொரு நிதித் திட்டத்தையும் எப்படிப் பணமாக மாற்றுவது என்கிற விவரங்களைத் திட்ட விவரக் குறிப்பு (product brochure) மற்றும் ஆன்லைனில் எளிதாகப் பார்க்கலாம்.

செயல் திட்டம்:

எந்த ஒரு புதிய திட்டத்தில் முதலீடு செய்வது என்றாலும் அதைப் பணமாக மாற்றும் காலம் எவ்வளவு எனப் பாருங்கள். ஒரே வருமானம் கிடைக்கும் திட்டங்களில் எந்தத் திட்டத்தில் முதலீட்டை விரைவில் பணமாக்க முடியும் என் பதைக் கவனித்து, அதற் கேற்ப முதலீடு செய்யுங்கள்.

5. செலவு எவ்வளவு?

பெரும்பாலான முதலீட்டுத் திட்டங்களில் ஒவ்வொருகட்டத்திலும் கட்டணம் அல்லது செலவு உள்ளது. இந்தக் கட்டணம் எவ்வாறு வசூலிக்கப்படுகிறது என்பதைக் கண்டறியுங்கள். இந்தக் கட்டணங்கள் உங்கள் வருமானத்தைக் குறைக் கின்றன என்பதைப் புரிந்து கொள்ளுங்கள். எனவே, முதலீடு செய்வதற்கு முன் அனைத்துக் கட்டணங்கள், மொத்தச் செலவு ஆகியவற்றை அறிந்துகொள்ளுங்கள். மறைமுகச் செலவுகள் மற்றும் கட்டணங்கள் பற்றி அதிகபட்ச புகார்கள் உள்ளன.

ஒரு முதலீட்டை மேற்கொள்ள எவ்வளவு செலவு ஆகும் என்பதைத் தெரிந்துகொள்ள அதிக நேரம் ஒன்றும் ஆகாது. பெரும்பாலான முதலீட்டுத் திட்டங்களுக்கு, விவரக் குறிப்புகள் புத்தகங்கள் உள்ளன. ஆன்லைனில் எல்லா செலவு விவரங்களையும் நீங்கள் காணலாம். இது போன்ற செலவுகள் யூலிப் பாலிசிகள், ரியல் எஸ்டேட் முதலீட்டில் இருக்கின்றன. நீங்கள் வீட்டை வீட்டுக் கடன் மூலம் வாங்குகிறீர்கள் எனில், பரிசீலனைக் கட்டணம், திட்ட அறிக்கைக் கட்டணம், வழக்கறிஞர் கட்டணம், பத்திரப் பதிவு மற்றும் முத்திரைத் தாள் கட்டணம், தரகர் கமிஷன் என முதலீட்டின் மதிப்பில் சுமார் 25% சென்று விடுகிறது. இதைத் தாண்டி வீட்டின் விலை உயர்ந்தால்தான், அதை முதலீட்டு நோக்கில் வாங்கினால் லாபம்.

செயல்திட்டம்

நீங்கள் ஏற்கெனவே செய்திருக்கும் முதலீடு களின் செலவு விகிதம், கட்டணங்கள் ஆகியவற்றைப் பட்டிய லிடுங்கள்.

புதிய முதலீடு ஒன்றைத் தேர்வு செய்யும்போது என்னென்ன கட்டணங்கள், செலவுகள் இருக்கின்றன என்பதைக் கவனியுங்கள். இதே வருமானத்தைத் தரக் கூடிய கட்டணங்கள் செலவுகள் குறைவாக இருக்கிற முதலீட்டுத் திட்டத்தைத் தேர்வு செய்வது லாபகரமாக இருக்கும்.

உதாரணத்துக்கு, தங்கத்தின் விலை உயர்வால் லாபம் அடைய விரும்புகிறீர்கள் எனில், ஆபரண நகையாக வாங்குவதற்குப் பதில் கோல்டு சேவிங்ஸ் ஃபண்ட், கோல்டு இ.டி.எஃப், கோல்டு பாண்ட் போன்றவற்றில் முதலீடு செய்யும்போது செய்கூலி, சேதாரம், விற்கும்போது பழைய நகை என்பதற்கான தள்ளுபடி போன்ற செலவுகள் மிச்சமாகும். இவை எல்லாம் சேர்ந்தால் சுமார் 15%-20 சதவிகிதமாக இருக்கும். இவை இல்லை எனில், அதுவே அதிக வருமானமாக இருக்கும்.

இனி எந்த முதலீடாக இருந்தாலும், இந்த ஐந்து அம்சங்களையும் அலசி ஆராய்ந்து முதலீட்டைத் தேர்வு செய்தால், உங்களுக்கு நல்ல வருமானம் கிடைப்பதுடன், பிற்பாடு வருத்தப்பட வேண்டிய அவசியமும் இருக்காது!