நீண்டகால அடிப்படையில் பார்க்கும்போது, சி.சி.பி (Consistant Compounder Portfolio) பங்குகளின் விலை என்பது 80% - 90% அளவிலான நேரத்தில் அவற்றின் நீண்ட நாள்கள் அடிப்படையிலான சம்பாத்தியத்தை அடிப்படையாகக்கொண்டு அமைவதே இதற்குக் காரணமாகும்.

இதுபோன்ற நடுத்தர அளவைத் தாண்டிய (அல்லது அதிக) வருமானத்தைத் தருகிற நிறுவனங்களில் முதலீடு செய்யும்போது நேரம் பார்த்து முதலீடு செய்வதற்கான தேவைகள் இருப்பதேயில்லை. ஏனென்றால், பங்கின் விலை நிறுவனத்தினுடைய சம்பாத்தியத்தை அடிப்படையாகக் கொண்டே இருக்கிறது. நிறுவனத்தின் சம்பாத்தியமோ தொடர்ந்து முன்னேற்றம் கண்டுகொண்டே இருக்கிறது. எனவே, ஒருவர் அந்தப் பங்கின் இன்றைய விலையில் முதலீடு செய்கிறாரா அல்லது இன்றைய விலையைவிட 20% குறைந்த விலையில் முதலீடு செய்கிறாரா என்பதையெல்லாம் கணக்கில் கொள்ள வேண்டியதே இல்லை.

மேலும், நீண்ட நாள்கள் அடிப்படையில் பங்கின் விலை மாறுதல் என்பது அதன் சம்பாத்தியத்தை அடிப்படையாகக்கொண்டே வருகிறது என்பதால், வருமானரீதியாகப் பெரிய மாறுதல் எதையும் அது கொண்டுவந்துவிடாது என்பதுதான் நிதர்சனமான உண்மை.

வெறுமனே பி/இ ரேஷியோவை வைத்துக்கொண்டு நிறுவனங்களின் பங்குகளின் விலையைக் கணித்து முதலீடு செய்ய முயற்சி செய்வது தவறு என்று நான் பலமுறை கூறிவந்திருக்கிறேன். உதாரணத்துக்கு, இங்கே தரப்பட்டுள்ள சார்ட்டுகளைக் கொஞ்சம் பாருங்கள். வரிக்கு முந்தைய லாபத்தை அதிகமாக ஈட்டிய நிறுவனங்கள் அதிக அளவிலான பங்கின் விலை ரீதியான வருமானத்தைத் தந்துள்ளன என்பது உங்களுக்குப் புரியும்.

ஒரு மிகச் சாதாரணமான நிறுவனம் 10x பி/இ-யில் வர்த்தகம் ஆகும்போது அது மிகவும் குறைவான விலையில் இருப்பதைப் போல நமக்குத் தெரியும். ஆனால், அந்த நிறுவனத்தின் உண்மையான உள்மதிப்பு என்பது அப்போதைக்கு 5x என்ற அளவில்தான் இருக்கும். அதே நேரத்தில், ஒரு சி.சி.பி பங்கு 50x என்ற பி/இ-யில் வர்த்தகம் ஆகிக்கொண்டிருக்கும். அது நமக்கு மிகவும் அதிகமான விலைபோலத் தெரியும். ஆனால், அதன் உண்மையான உள்மதிப்பு என்பது அப்போதே 100x என்ற அளவில் இருக்கும். பி/இ அடிப்படையில் விலை நிர்ணயம் செய்யும் நடைமுறையில் நிறுவனத்தின் போட்டிரீதியிலான அனுகூலமும் தொடர்ந்து திடமானதொரு ரிட்டர்ன் ஆன் கேப்பிட்டல் எம்ப்ளாயிடைத் (RoCE) தரும் நிலைமையும் எப்போதுமே சரிவரக் கணக்கில் எடுத்துக் கொள்ளப்படுவதே இல்லை என்பதை நீங்கள் புரிந்துகொள்ள வேண்டும்.

முதலீட்டுத் திட்டத்தை பி/இ-யின் மடங்காக மட்டுமே நிர்ணயிப்பதால், பெரிய அளவிலான அனுகூலங்கள் எதுவும் இல்லை என்பதைப் பின்வரும் மூன்று சார்ட்டுகள் உணர்த்துகின்றன. விற்றுவரவின் வளர்ச்சி (சார்ட்-1), லாபத்தின் வளர்ச்சி (சார்ட்-2) மற்றும் ஃப்ரீ கேஷ் ஃப்ளோவின் வளர்ச்சி (சார்ட்-3) என்ற மூன்று விஷயங்களின் அடிப்படையில் பிஎஸ்இ-100 குறியீட்டில் இருக்கும் பங்குகளின் கடந்த 10 ஆண்டுகளில் இருந்த விலைகள் காட்டப் பட்டுள்ளன.

சார்ட்-1 மற்றும் சார்ட்-2-ஐ பார்த்தால், நமக்குப் புரிவது என்ன..?

விற்று வரவு என்பது பங்கின் விலையில் 14% அளவிலான தாக்கத்தையே கொண்டுள்ளது. அதே நேரத்தில், லாப அதிகரிப்பு என்பது 47.59% அளவிலான தாக்கத்தைக் கொண்டுள்ளது.

இந்த இரண்டு விஷயங்களையும் தாண்டி ஜொலிப்பது ஃப்ரீ கேஷ் ஃப்ளோவின் வளர்ச்சிதான் என்பதை சார்ட்-3 காட்டுகிறது. ஃப்ரீ கேஷ் ஃப்ளோவின் வளர்ச்சி பங்கின் விலையில் 59.39% அளவிலான தாக்கத்தை பி.எஸ்.இ-100-ல் உள்ள பங்குகளில் கொண்டு வந்துள்ளது. இதிலிருந்து நீங்கள் புரிந்துகொள்ள வேண்டியது, அடிப்படையாக ஃப்ரீ கேஷ் ஃப்ளோவின் வளர்ச்சி குறித்த எதிர்பார்ப்பே பங்கின் எதிர்கால விலையை நிர்ணயம் செய்வதாகவும், பங்கு உரிமையாளர்களின் சொத்து மதிப்பை அதிகரிக்கும் ஒரு காரணியாகவும் இருக்கிறது. அது என்ன ஃப்ரீ கேஷ் ஃப்ளோ என்று பார்ப்போம்.

ஃப்ரீ கேஷ் ஃப்ளோ என்பது, ஒரு நிறுவனம் செலவினங்கள் மற்றும் அது செய்யும் விரிவாக்கத்துக்கான முதலீடுகளைத் தாண்டி ஒரு வருடத்தில் எந்த அளவுக்குப் பணத்தைச் சம்பாதிக்கிறது என்பதேயாகும். ஃபார்முலாவாகப் பார்த்தால், ஃப்ரீ கேஷ் ஃப்ளோ என்பது ‘ஆபரேட்டிங் கேஷ் ஃப்ளோ’வில் இருந்து விரிவாக்கத்துக்காக செய்த செலவு மற்றும் அதற்காகத் தரப்பட்ட முன்பணம், துணை நிறுவனங்களில் செய்த முதலீடு மற்றும் நிறுவனங்களுக்கு இடையேயான டெபாசிட் என்ற இரண்டையும் கழித்தால் வரும் தொகை ஆகும்.

ஃப்ரீ கேஷ் ஃப்ளோவுக்கு மாறாக, ட்ரெயிலிங் பி/இ-யை அளவீடாக எடுத்துக்கொண்டு அதற்கும் பங்கின் விலைக்கும் உள்ள தொடர்பைப் பார்த்தால் (பார்க்க சார்ட் 4) , பி/இ என்ற அளவீட்டுக்கும் பங்கின் விலைக்கும் எந்தவிதமான தொடர்பும் இல்லை என்பதையே (R2=0.25%) காட்டுகிறது. அதாவது, இந்தத் தொடர்பு என்பது பூஜ்யத்துக்கு வெகு அருகிலேயே இருக்கிறது. பி/இ மல்ட்டிபிலுக்கும் பி.எஸ்.இ-100-ல் இருக்கும் பங்குகளின் விலை ஏற்ற/இறக்கத்துக்கும் எந்தவித சம்பந்தமும் இல்லை என்பதையே இது காட்டுகிறது.

முக்காலமும் உணர்ந்த ஆண்டவனாக நாம் இருந்தால்!

கடந்த 10 ஆண்டுகளில் பி.எஸ்.இ-100 பங்குகளில் ஃப்ரீ கேஷ் ஃப்ளோ எவ்வளவு இருந்தது என்பது நமக்கு இன்றைக்குத் தெளிவாகத் தெரியும். ஆனால், மார்ச் 2008-ல் நாம் முதலீடு செய்யும் எண்ணத்தில் கையில் பணத்துடன் இருக்கிறோம் என்று வைத்துக்கொள்வோம். கடந்தகாலம், நிகழ்காலம், எதிர்காலம் எல்லாம் நமக்குத் தெரியும் என்று ஆண்டவனின் அவதாரமாக நம்மை வைத்துக்கொண்டு யோசிப்போம்.

அதாவது, மார்ச்-2008-லேயே நமக்கு 2019-ம் நிதியாண்டு வரையிலான இந்த நிறுவனங்களின் ஃப்ரீ கேஷ் ஃப்ளோ நமக்குத் தெரிந்துவிடும் இல்லையா? அடுத்துவரும் 10 ஆண்டுகளுக்கான ஃப்ரீ கேஷ் ஃப்ளோவை 15% அளவில் தள்ளுபடி செய்து மார்ச் 2008-ல் நிகழ்கால மதிப்புக்குக் கொண்டுவருவோம். அது மார்ச்-2008-ம் ஆண்டில் அடுத்த 10 ஆண்டுகளில் பி.எஸ்.இ-100 நிறுவனங்கள் உருவாக்கப்போகும் ஃப்ரீ கேஷ் ஃப்ளோவின் அன்றைய மதிப்பைக் காட்டும். இந்த அளவீட்டைக்கொண்டு பி.எஸ்.இ-100-ல் இருக்கும் ஒவ்வொரு நிறுவனத்துக்கும் அந்த நிறுவனத்தின் பங்கின் விலைக்கும் மார்ச் 2008-ல் இருக்கும் எதிர்கால ஃப்ரீ கேஷ் ஃப்ளோவின் மதிப்புக்கும் உள்ள தொடர்பு எவ்வளவு என்று கணக்கிட முடியும் இல்லையா? அந்தக் கணக்கின் போடப்பட்டதுதான் சார்ட் -5. (பார்க்க, சார்ட் - 5)

இந்த சார்ட் பங்கு விலைக்கும், 15 சதவிகிதத்தில் தள்ளுபடி செய்யப்பட்ட எதிர்கால ஃப்ரீ கேஷ் ஃப்ளோவுக்கும் இடையேயுள்ள தொடர்பை 8.89% என்று காட்டுகிறது. பி/இ-க்கும் பங்கு விலைக்கும் இடையே இருந்த 0.25 சதவிகிதத்தைவிட இது அதிகம் என்பது தெளிவாகத் தெரிகிறது. எனவே, இன்றைய பங்கின் விலை (பி/இ அடிப்படையில்) அந்தப் பங்கின் எதிர்காலப் போக்கைப் (விலை மாறுதல்களை) பற்றி ஒன்றுமே சொல்ல வாய்ப்பில்லை என்பதைப் புரிந்துகொள்ளுங்கள்.

‘ரிட்டர்ன் ஆன் கேப்பிட்டல் எம்ப்ளாயிட்’ என்பதே பங்கின் விலையை நிர்ணயிப்பதில் மிகப்பெரும் பங்கை வகிக்கிறது. வரிக்கு முந்தைய ஆர்.ஓ.சி.இ என்பது 15 சதவிகிதத்துக்கும் குறைவாக இருக்கும்பட்சத்தில் ஒரு முதலீட்டாளரால் அந்த நிறுவனத்தில் (ஆகக்குறைந்த பி/இ-ல் அந்தப் பங்குகள் வர்த்தகமாகிக் கொண்டிருந்தாலும்கூட) முதலீடு செய்து பெரிய அளவில் லாபம் பார்க்க முடியாது.

மாறாக, ஆர்.ஓ.சி.இ 34% இருக்கும் பிடிலைட் போன்ற பங்குகளில் முதலீடு செய்வதின் மூலமே நல்ல வருமானத்தை ஒரு முதலீட்டாளரால் பெறமுடியும்.

பி/இ என்ற அளவீட்டைத் தாண்டி ஃப்ரீ கேஷ் ஃப்ளோவின் வளர்ச்சியே முதலீட்டின் லாபத்தை நிர்ணயம் செய்கிறது. ஏனென்றால், ஃப்ரீ கேஷ் ஃப்ளோ என்பது ஆர்.ஓ.சி.இ-யிலிருந்து முதலீட்டுக்கான செலவைக் (Cost of Capital) கழித்தால் வருவது. எனவே, ஸ்திரமான ஃப்ரீ கேஷ் ஃப்ளோவின் வளர்ச்சிக்கு நல்லதொரு ஸ்திரமான ஆர்.ஓ.சி.இ-யின் வளர்ச்சி நிச்சயமாக வேண்டும். இதனாலேயே, சார்ட் 3-ல் உள்ள ஃப்ரீ கேஷ் ஃப்ளோ என்பதே 59.39% விலை ஏற்றத்துக்குக் காரணமாக உள்ளது என்ற சூழ்நிலையைக் காட்டுவதை நாம் பார்க்கிறோம் (பி.எஸ்.இ-100-ல் உள்ள பங்குகளை ஆராயும்போது இது தெரிகிறது).

ஆகையால், நீண்ட காலத்துக்கான முதலீடுகளைச் செய்ய நினைக்கும்போது, பி/இ மல்ட்டிபிள் என்ற அடிப்படையில் நிறுவனங்களை மதிப்பீடு செய்யாமல் விலைக்கும், எதிர்காலத்தில் வரவிருக்கும் ஃப்ரீ கேஷ் ஃப்ளோவின் தற்போதைய மதிப்புக்கும் இடையே உள்ள தொடர்பை மதிப்பீடு செய்து அதை மட்டுமே முழுமையாக நம்பி நீங்கள் முதலீடு செய்ய வேண்டும். அதுவே, உங்களுக்கு நல்ல வருமானத்தைத் தரும் என்பதே கோவிட்-19 போன்ற இக்கட்டான காலத்தில் நாம் அனைவரும் கற்றரிய வேண்டிய உண்மை ஆகும்!

சார்ட் ஆதாரம்: மார்செல்லஸ் இன்வெஸ்ட்மென்ட் மேனேஜர்ஸ், ஏஸ் ஈக்விட்டி

(நிறைவு பெற்றது)