Published:Updated:

கேள்வி பதில் : பைபேக் பங்குகளை வாங்கினால் லாபமா? - நிபுணரின் ஆலோசனை

கேள்வி பதில்
பிரீமியம் ஸ்டோரி
கேள்வி பதில்

முதலீட்டாளர்களை ஈர்ப்பதற்காகப் பங்குகளைத் திரும்ப வாங்கும் நிறுவனங்கள் நிதிரீதியாக மிகவும் ஆரோக்கியமாக இருக்கும்.

கேள்வி பதில் : பைபேக் பங்குகளை வாங்கினால் லாபமா? - நிபுணரின் ஆலோசனை

முதலீட்டாளர்களை ஈர்ப்பதற்காகப் பங்குகளைத் திரும்ப வாங்கும் நிறுவனங்கள் நிதிரீதியாக மிகவும் ஆரோக்கியமாக இருக்கும்.

Published:Updated:
கேள்வி பதில்
பிரீமியம் ஸ்டோரி
கேள்வி பதில்

குறிப்பிட்ட சதவிகிதப் பங்குகளைத் திரும்ப வாங்கும் (Buyback) நிறுவனப் பங்குகளைத் தேர்வு செய்து வாங்கினால், நீண்டகாலத்தில் நல்ல லாபம் பார்க்க முடியும் என்பது எந்த அளவுக்குச் சரி?

- ஆ.பச்சைமலை, திருக்கழுகுன்றம்

ஜி.எஸ்.ராஜேஷ் குமார், ஈக்விட்டி ரிசர்ச் அனலிஸ்ட், சென்னை

“ஒரு நிறுவனம், கையிருப்பில் வைத்திருக்கும் அதிகப்படியான பணத்தைப் பல்வேறு வழிகளில் பயன்படுத்தும். அவற்றில் ஒரு வழி, பங்குதாரர்களுக்குப் பணம் கொடுத்து அவர்கள் வசமிருக்கும் பங்குகளைத் திரும்ப வாங்குவது. நிறுவனங்களின் இந்த நடவடிக்கையைத்தான் ஆங்கிலத்தில் `பைபேக்’ (Buyback) என்பார்கள்.

பங்கின் மதிப்பு குறைவாக மதிப்பிடப்பட்டதாகக் கருதப்பட்டால், முதலீட்டாளர்களுக்கு ஊக்கத்தை அளிக்க அதிகப்படியான பணம் மற்றும் நிறுவனத்துக்கு வேறு லாபகரமான முதலீட்டு வாய்ப்புகள் இல்லாதபோது, பங்கு முதலீட்டாளர்களுக்கு நம்பிக்கையை வளர்ப்பதற்கான நடவடிக்கை, பிற நிறுவனங்களின் சாத்தியமான கையகப்படுத்துதலுக்கு எதிரான தற்காப்பு உத்தி, முதலீட்டாளர்கள் மத்தியிலிருக்கும் பங்குகளின் எண்ணிக்கையைக் குறைத்தல் போன்ற பல காரணங்களுக்காக ஒரு நிறுவனம் முதலீட்டாளர்களிடமிருந்து பங்குகளைத் திரும்ப வாங்கும்.

முதலீட்டாளர்களை ஈர்ப்பதற்காகப் பங்குகளைத் திரும்ப வாங்கும் நிறுவனங்கள் நிதிரீதியாக மிகவும் ஆரோக்கியமாக இருக்கும்.

பைபேக் செய்யப்படும் கால அளவு மற்றும் அதிகபட்ச விலையைக் குறிப்பிடும் தீர்மானத்தை நிறுவனம் நிறைவேற்ற வேண்டும்.

எந்தவொரு பணப் பரிவர்த்தனையிலோ அல்லது கடன்களிலோ நிறுவனம் தவறு செய்திருக்கக் கூடாது. இது போன்ற நிறுவனங்கள் அடிப்படையில் வலுவாக இருந்தால், அந்தப் பங்குகளை வாங்கலாம். இந்தப் பங்குகள் மூலம் நீண்டகாலத்தில் நல்ல லாபம் பார்க்க முடியும்.”

ஜி.எஸ்.ராஜேஷ் குமார் , கே.அழகுராமன், ஸ்ரீகாந்த் மீனாட்சி
ஜி.எஸ்.ராஜேஷ் குமார் , கே.அழகுராமன், ஸ்ரீகாந்த் மீனாட்சி

என் தந்தையின் ஓய்வுக்கால தொகையில் சொத்து வாங்கும்போதே, அதைச் சரிபாதியாக என்னுடைய அண்ணன் மற்றும் என்னுடைய பெயரில் 2006-ம் ஆண்டு பிரிக்கப்பட்டது. முன்பாகம் அண்ணன் பெயரிலும், பின்பாகம் என் பெயரிலும் எழுதப்பட்டது. முன்பாகத்தில் அண்ணன் வீடு கட்டும்போது (2010) என்னுடைய இடத்தில் நான்கு அடி சேர்த்துக் கட்டிவிட்டார். பின்புறமுள்ள என் மீதி இடத்தில் உயர் அழுத்த மின் கம்பி செல்வதால், வீடு கட்ட முடியாத சூழ்நிலையில் என்னுடைய இடத்தையும் என் அண்ணன் வாங்கிக்கொண்டு பிரச்னையை முடிவுக்குக் கொண்டு வர எண்ணினேன்.

அண்ணன் தவறாகக் கட்டிய இடத்தில் முதல் தளம் கட்டாமல் விடப்பட்டிருந்தது. அந்தத் தளத்தில் ‘நீ வீடு கட்டிக்கொள்’ என்று அண்ணனும் தந்தையும் கூறினர். அப்போதும் வீட்டை இடிக்காமல் பிரச்னையை முடிவுக்குக் கொண்டு வர எண்ணி, முதல் தளத்தில் வீடு கட்டி 2013-லிருந்து நான் இருந்துவருகிறேன். இப்போது என்னுடைய அண்ணன், ‘நீ இப்போது வாடகை வீட்டில் இருக்கிறாய்’ என்கிறார். இவ்வாறு என்னுடைய இடம், முதல் தளத்தில் செலவு செய்த பணம் இரண்டையும் முடக்கியுள்ளார். இப்போது இந்தப் பிரச்னையை நான் எவ்வாறு கையாள்வது?

- கே.விஜய், இ-மெயில் மூலம்

கே.அழகுராமன், வழக்கறிஞர், உயர் நீதிமன்றம், சென்னை.

“உங்கள் இடத்தில் நான்கு அடி சேர்த்து உங்கள் அண்ணன் கட்டடம் கட்டியது தவறு. இந்த நிலையில், தந்தை மற்றும் சகோதரரின் முழுச் சம்மதத்தின் பேரில், 2013-ல் வீடு கட்டியிருக்கிறீர்கள்.

இந்த விவரத்தைத் தெளிவாகக் கூறி, நீங்கள் செலவழித்துக் கட்டியுள்ள முதல் தளப் பகுதிக்கு ‘நீங்கள்தான் உரிமையாளர்’ என ஒரு விளம்புகை உத்தரவு வேண்டி (Declaration Suit) அண்ணன்மீது ஒரு சிவில் வழக்கு தொடர்ந்து பரிகாரம் தேடலாம். இந்த வழக்கில் உங்கள் தந்தையின் வாக்குமூலம் மிக முக்கியமான ஒரு சாட்சியமாகக் கருதப்படும்.

மேலும், இதற்கு 2013-ல் கட்டுமானத்தின்போது, நீங்கள் செலவழித்த தொகைக்கான ஆவணச் சான்றுகளை (Documentary Evidences) நீதிமன்றத்தில் சமர்ப்பித்தால், முதல் தளத்தில், நீங்கள் குறிப்பிட்டுள்ள சூழ்நிலையில், உங்களால் கட்டப்பட்ட கட்டுமானமானது உங்களுக்கு முழுக்க பாத்தியப்பட்டது என்ற உத்தரவு கிடைக்க பிரகாசமான வாய்ப்புள்ளது.”

கேள்வி பதில்
கேள்வி பதில்

ஆன்லைன் மியூச்சுவல் ஃபண்ட் விநியோகஸ்தர்களான ஜீரோதா, பேடிஎம் மணி (Zerodha, Paytm Money,) போன்றவை டைரக்ட் பிளானில் முதலீடு செய்ய எந்த கமிஷனும், கட்டணமும் வாங்குவதில்லை என்பது உண்மையா... அவர்கள் எப்படி இலவசமாக முதலீட்டுச் சேவையை வழங்குகிறார்கள் என விளக்க முடியுமா?

- எல்.பானுமதி, மதுரை

ஸ்ரீகாந்த் மீனாட்சி, இணை நிறுவனர், Primeinvestor.in

“டைரக்ட் பிளானில் முதலீடு செய்ய, பல இணையதளங்கள் இலவசச் சேவை வழங்குகின்றன என்பது இன்றளவிலும் உண்மைதான். இருப்பினும், இந்த தளங்கள் நிரந்தரமாக இலவசமாக சேவை அளிக்கும் என்று உறுதியாகச் சொல்ல முடியாது. ஏதாவது ஒருவிதத்தில் உங்களிடமிருந்து இதற்கான கட்டணத்தை வசூல் செய்வார்கள் என்பதை நீங்கள் புரிந்துகொள்ள வேண்டும்.

சில நிறுவனங்கள் மற்ற சில பொருள்களை அதிக கமிஷனில் விற்று (உதாரணமாக, காப்பீடு பாலிசிகள்) அதை வருமானமாக்கிக் கொள்ளலாம்.

இன்னும் சில நிறுவனங்கள் இனிவரும் காலத்தில் கொஞ்சம் கொஞ்சமாகக் கட்டணம் வசூலிக்க ஆரம்பிக்கலாம். எப்படியாயினும், இரண்டு விஷயங்கள் உண்மை. ஒன்று, இன்றளவில் இவை இலவசச் சேவைகள்தான்; இன்னொன்று, இவை என்றுமே இலவசமாக இருக்கும் என்று எதிர்பார்க்க முடியாது.’’

விகடனின் அதிரடி ஆஃபர்!
தற்பொழுது ரூ.800 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா949 மட்டுமே! மிஸ் பண்ணிடாதீங்க!Get Offer

கடந்த காலத்தில் ஒரு மியூச்சுவல் ஃபண்ட் மிகச் சிறப்பாகச் செயல்பட்டது. அது ஒன்று அல்லது இரண்டு ஆண்டுகளுக்குமேல் சிறப்பாகச் செயல்படவில்லை. நீண்டகாலத்தில் என் இலக்கு பாதிக்கப்படுமா?

- ரவீந்திரன், கோயம்புத்தூர்

த.முத்துகிருஷ்ணன், நிதி ஆலோசகர், Wisewealthadvisors.com

“கவலைப்படத் தேவையில்லை. இது உங்கள் இலக்குகளில் பெரிய தாக்கத்தை ஏற்படுத்தாது. பங்குச் சந்தை இறக்கத்தால் என்.ஏ.வி குறைந்திருக்கும்பட்சத்தில், எஸ்.ஐ.பி தொகையை அதிகரிக்கலாம். மூன்று ஆண்டுகளுக்கு மேலும் அந்த ஃபண்டின் செயல்திறன் சரியில்லையென்றால், எஸ்.ஐ.பி-யை நிறுத்திவிடலாம். அந்த ஃபண்டிலிருக்கும் பணத்தை வேறு ஃபண்டுக்கு மாற்றிவிடவும். புதிய ஃபண்டில் எஸ்.ஐ.பி-யை தொடரவும். ஃபண்டுகள் புத்திசாலித்தனமாகத் தேர்வு செய்யப்பட்டிருந்தால், அது உங்கள் நீண்டகால இலக்கை பாதிக்காது.”

த.முத்துகிருஷ்ணன், என்.ஏ. விஸ்வநாத்கிருஷ்ணன்
த.முத்துகிருஷ்ணன், என்.ஏ. விஸ்வநாத்கிருஷ்ணன்

நான் மாதச் சம்பளம் வாங்கும் ஊழியர். மிதமான அளவு ரிஸ்க் எடுக்க முடியும். எனது வயது 30. என் முதலீட்டுக் காலம் 15 ஆண்டுகள். நீண்டகால முதலீட்டுக்கு மியூச்சுவல் ஃபண்டை எவ்வாறு தேர்வு செய்வது?

- முனிபாலா, முகநூல் மூலம்

என்.ஏ. விஸ்வநாத்கிருஷ்ணன், இயக்குநர், கன்சார்டியம் அட்வைஸரி சர்வீசஸ்

“ஐ.சி.ஐ.சி.ஐ புரூடென்ஷியல் அஸெட் அலோகேஷன் ஃபண்டில் நீண்ட காலத்துக்கு எஸ்.ஐ.பி முறையில் முதலீடு செய்துவரலாம். இந்த ஃபண்ட் ஈக்விட்டி மற்றும் கடன் சார்ந்த ஆவணங்களில் சூழ்நிலைக்கேற்றவாறு அதிகரித்து அல்லது குறைத்து முதலீடு செய்கிறது. இதனால் ரிஸ்க் சற்றுக் குறைவாக இருக்கும்.’’

கேள்விகளை அனுப்புபவர்கள் தங்கள் செல்போன் எண்ணையும் குறிப்பிடவும்.

அனுப்ப வேண்டிய முகவரி: கேள்வி-பதில் பகுதி, நாணயம் விகடன், 757, அண்ணாசாலை, சென்னை-2. navdesk@vikatan.com