Published:Updated:

கேள்வி பதில்: ஹெல்த் இன்ஷூரன்ஸ்... சூப்பர் டாப்அப் பாலிசியை எப்போது எடுக்கலாம்? - வழிகாட்டும் ஆலோசனை

கேள்வி பதில்
பிரீமியம் ஸ்டோரி
News
கேள்வி பதில்

சூப்பர் டாப்அப் பாலிசியின் பிரீமியமானது வயது மற்றும் காப்பீடு தொகைக்கு ஏற்ப இருக்கும்.

ஹெல்த் இன்ஷூரன்ஸ் பாலிசி எடுத்திருக்கும் ஒருவர் எப்போது சூப்பர் டாப்அப் பாலிசியை எடுக்க வேண்டும்?

சபரி, கடலூர்

கேள்வி பதில்: ஹெல்த் இன்ஷூரன்ஸ்... சூப்பர் டாப்அப் பாலிசியை எப்போது எடுக்கலாம்? - வழிகாட்டும் ஆலோசனை

“சூப்பர் டாப் அப் பாலிசி என்பது அடிப்படை பாலிசியில் குறிப்பிடப்பட்டுள்ள காப்பீடு தொகையின் க்ளெய்ம் தொகைக்கு மேலே உள்ள தொகைக்கு மட்டுமே பொருந்தும். ஒருவர், அடிப்படை மருத்துவக் காப்பீடு ரூ.5 லட்சத்துக்கும், சூப்பர் டாப்அப் பாலிசி ரூ.10 லட்சத்துக்கும் எடுத்திருப்பின், அவர் ரூ.3 லட்சத்துக்கு க்ளெய்ம் செய்தால் அது அடிப்படை பாலிசியில் க்ளெய்ம் ஆகும். அதுவே அவர் ஆறு மாதங்கள் கழித்து மேலும் ரூ.5 லட்சம் க்ளெய்ம் செய்தால் அதில் ரூ.2 லட்சம் அடிப்படை பாலிசியிலும் மீதமுள்ள ரூ.3 லட்சம் சூப்பர் டாப்அப் பாலிசியிலும் க்ளெய்ம் செய்துகொள்ளலாம். உங்கள் நிறுவனம் ரூ.3 லட்சத்துக்கு மருத்துவக் காப்பீடு கொடுத்திருந்தாலும், மேலும் அதிக தொகைக்கு நீங்கள் தனியாகக் காப்பீடு எடுக்காமல், குறைந்த பீரிமியத்தில் சூப்பர் டாப்அப் பாலிசி எடுப்பது நல்லது. சூப்பர் டாப்அப் பாலிசியின் பிரீமியமானது வயது, காப்பீடு தொகைக்கு ஏற்ப இருக்கும்.”

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS

எங்களுக்கு 2 ஏக்கர் பவர் பட்டா நிலம் உள்ளது. ஆனால், எங்களுக்கு பவர் செய்தவர் இப்போது உயிரோடு இல்லை. அவரின் குடும்பத்தினர் யாரையும் எங்களுக்குத் தெரியாது, இப்போது எப்படி அந்த நிலத்தை எங்கள் பெயருக்கு மாற்றி பட்டா மற்றும் பத்திரம் பெறுவது?

செங்கோட்டுவேல் பழனியப்பன், மெயில் மூலம்

கேள்வி பதில்: ஹெல்த் இன்ஷூரன்ஸ்... சூப்பர் டாப்அப் பாலிசியை எப்போது எடுக்கலாம்? - வழிகாட்டும் ஆலோசனை

“ஒருவர் தன் சார்பாக அல்லது தனக்குப் பதிலாகச் சில பணிகளைச் செய்ய மற்றொருவருக்கு அளிக்கும் அனுமதி அல்லது அதிகாரம்தான், அதிகார பத்திரம் (பவர் ஆஃப் அட்டர்னி) என்றழைக்கப்படுகிறது. அதிகாரம் பெறுபவர், முகவர் அல்லது ஏஜென்ட் என்றும் அதிகாரம் அளிப்பவர் முதல்வர் என்றும் அழைக்கப்படுவர். முதல்வர் எப்போது வேண்டுமானாலும் அதிகார பத்திரத்தை ரத்து செய்ய முடியும். முதல்வர் அல்லது முகவர் இறந்து போனாலும் அதிகார பத்திரம் தானாக ரத்து ஆனதாகக் கருதப்படும். அந்தச் சொத்தில் முகவருக்கு எவ்வித உரிமையும் ஏற்படாது. அசையாச் சொத்து தொடர்பாக வழங்கப்படும் அதிகார பத்திரம் பதிவு செய்யப்பட வேண்டும்.

இன்ஷூரன்ஸ்
இன்ஷூரன்ஸ்

உங்கள் வழக்கில் பவர் கொடுத்தவர் இறந்த பிறகு, அதிகார பத்திரம் தானாகச் செல்லாததாகிவிட்டது. பவர் பத்திரம் அல்லது அதிகார பத்திரம் என்பது உரிமை மாற்று ஆவணம் அல்ல. அதனால், உங்களுக்கு சொத்தில் எவ்வித உரிமையும் இல்லை. கோரவும் முடியாது.”

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

நான் டி.என்.பி.எஸ்.சி பயிற்சி நிலையம் ஒன்றைப் புதிதாகத் தொடங்க இருக்கிறேன். இந்த மையத்தை எங்கு, எப்படிப் பதிவு செய்ய வேண்டும்? மேலும் அதன்மூலம் கிடைக்கும் வருமானத்துக்கு எவ்வாறு வருமான வரி செலுத்த வேண்டும்?

செந்தில்குமார், ஈரோடு.

கேள்வி பதில்: ஹெல்த் இன்ஷூரன்ஸ்... சூப்பர் டாப்அப் பாலிசியை எப்போது எடுக்கலாம்? - வழிகாட்டும் ஆலோசனை

“இது, சேவை நிறுவனத்தின் கீழ் வரும். தனிநபர் அல்லது கூட்டு நிறுவனம் என்றாலும் பான் நம்பர் வேண்டும். முதலில் பான் எண் வாங்கிக் கொள்ள வேண்டும். அதன் பிறகு உத்யம் (UDYAM) எம்.எஸ்.எம்.இ-யில் பதிவு செய்ய வேண்டும். நிறுவனத்தின் ஆண்டு டேர்ன்

ஓவர் ரூ.20 லட்சத்துக்குக் கீழ் மற்றும் உள்ளீட்டு வரிக் கழிவு (Input credit) சலுகை எதுவும் பெறத் தேவையில்லை என்றால் ஜி.எஸ்.டி பதிவு தேவை இல்லை. இந்த இரண்டில் ஏதாவது ஒன்று உங்களுக்குப் பொருந்தும் என்றால் ஜி.எஸ்.டி பதிவு அவசியம். வருமான வரி என்கிறபோது தனிநபருக்கு ரூ.2.5 லட்சம் வரையிலான வருமானத்துக்கு வரி கிடையாது. அதன் பிறகு அவரின் அடிப்படை வருமான வரம்புக்கு (5%, 10%, 15%, 20%, 25% மற்றும் 30%) வரிச் செலுத்த வேண்டும். கூட்டு நிறுவனம் என்றால் நிகர லாபத்தில் 30% வரி கட்ட வேண்டும்.”

அவசரகால நிதியாக, எனது வங்கி சேமிப்புக் கணக்கில் ரூ.3 லட்சம் வைத்திருக்கிறேன். இப்படியே வங்கி சேமிப்புக் கணக்கில் வைத்திருக்கலாமா அல்லது குறுகியகால மியூச்சுவல் ஃபண்டுகளில் வைத்திருக்கலாமா? மியூச்சுவல் ஃபண்ட் என்றால், அவசரகால தொகையை வைத்திருக்க குறுகியகாலத்துக்கு ஏற்ற நல்ல ஃபண்டுகளைக் குறிப்பிடவும்.

சத்தியா, சென்னை

கேள்வி பதில்: ஹெல்த் இன்ஷூரன்ஸ்... சூப்பர் டாப்அப் பாலிசியை எப்போது எடுக்கலாம்? - வழிகாட்டும் ஆலோசனை

“அவசரகால செலவுக்காகக் குறிப்பிட்ட தொகையை நாம் அனைவரும் கையிருப்பு வைத்திருப்பது அவசியம். இந்தக் கையிருப்பு நம் ஆறு மாத செலவுகளைப் பார்த்துக்கொள்ளும் அளவுக்கு இருப்பது நல்லது. அப்படி ஒதுக்கீடு செய்யப்பட்ட பணத்தை நம் வங்கி சேமிப்பு கணக்கில் வைத்திருந்தால், அதற்கு சேமிப்பு கணக்கு வட்டியாக 3% முதல் 4% வரை மட்டுமே கிடைக்கும். ஆனால், இந்தப் பணத்தை குறுகியகால கடன் பத்திரத்தில் முதலீடு செய்யும் மியூச்சுவல் ஃபண்டில் முதலீடு செய்தால், நமக்கு அதிக வருமானம் கிடைக்க வாய்ப்புள்ளது. இதற்கு மணி மார்க்கெட் மியூச்சுவல் ஃபண்ட், ஷார்ட் டேர்ம் ஃபண்ட் மற்றும் லோ டியூரேஷன் ஃபண்டுகளில் முதலீடு செய்யலாம்.”

தன்னிடம் உள்ள பல சொத்துகளை, வேறு வேறு உயில்கள் மூலம் எழுதி, தன் பிள்ளைகளுக்கு தனித்தனியே கொடுத்துவிடும் வழக்கம் உள்ளது. இது சரியா?

ஆர்.வெங்கடேசன், ஈரோடு்

கேள்வி பதில்: ஹெல்த் இன்ஷூரன்ஸ்... சூப்பர் டாப்அப் பாலிசியை எப்போது எடுக்கலாம்? - வழிகாட்டும் ஆலோசனை

“நீங்கள் குறிப்பிட்டுள்ளபடி இன்னமும் சில பகுதிகளில் இதுபோல, ஒவ்வொரு சொத்துக்கும் ஓர் உயில் என எழுதி ஒவ்வொரு பிள்ளைக்கும் கொடுக்கும் வழக்கம் உள்ளது. பொதுவாக, ஒருவரின் இறுதி உயில்தான் செல்லத்தக்கது என்ற விதி இருந்தாலும், இதுபோன்ற வழக்கம் உள்ள பகுதிகளில், உயில் மூலம் பலன் பெரும் மற்ற நபர்கள் எவரும் முன் எழுதிய உயில் குறித்து கேள்வி எதுவும் கேட்டு, அதைச் செல்லாதென உரிமை கோராத நிலைதான் இன்றும் காணப்படுகிறது. இதுபோன்ற சூழ்நிலையில், இவ்வாறான உயில்கள் எழுதப்பட்ட கால இடைவெளியைக் கவனத்தில் கொள்ள வேண்டும். அதிக ஆண்டுகளுக்குப் பின் இவ்வாறான உயில்கள் எழுதப்பட்டிருந்தால், இறுதியாக எழுதிய உயில்தான் நடைமுறைக்கு வரக்கூடிய ஆவணமாகும். சில நடைமுறை வழக்கங்களை ஒப்புக்கொள்வது போல, இவ்வாறான செயலை அந்தக் குடும்ப நபர்கள் ஒப்புக்கொள்வது, அந்த உயில்களைச் செல்லக் கூடியதாக்குகிறது.”

கேள்விகளை அனுப்புபவர்கள் தங்கள் செல்போன் எண்ணையும் குறிப்பிடவும்.

அனுப்ப வேண்டிய முகவரி: கேள்வி-பதில் பகுதி, நாணயம் விகடன், 757, அண்ணாசாலை, சென்னை-2. navdesk@vikatan.com