கேள்வி பதில் : முதலீடுகளை பேசிவ் ஃபண்டுகளுக்கு மாற்றுவது லாபமா? - முதலீட்டு ஆலோசனை

பேசிவ் ஃபண்டுகளைவிட ஆக்டிவ்லி மேனேஜ்ட் லார்ஜ்கேப் மியூச்சுவல் ஃபண்டுகள் அதிக வருமானம் தரவில்லை. மேலும், எக்ஸ்பென்சிவ் ரேஷியோ அதிகமாக உள்ளது. இப்போது நான் எனது முதலீடுகளை பேசிவ் ஃபண்டுகளுக்கு மாற்றுவது லாபகரமாக இருக்குமா?

- டி.சாந்தகுமார், தேனி

. ‘‘மிகப்பெரிய நிறுவனங்களில் முதலீடு செய்யும் லார்ஜ்கேப் ஃபண்டுகளைப் பொறுத்தவரை, சமீபகாலமாக சரியான லாபம் தரவில்லை என்பது உண்மைதான். இரண்டு ஆண்டுகளுக்கு முன் செபி அமைப்பு விதித்த சில கட்டுப்பாடுகளும் இதற்குக் காரணம். ஒரு முதலீட்டாளர் என்ற முறையில், நீங்கள் செய்யவிருக்கும் தேர்வு சரியானதுதான். பங்குச் சந்தைக் குறியீட்டில் முதலீடு செய்யும் பேசிவ் ஃபண்டுகளில் முதலீடு செய்வது லார்ஜ்கேப் ஃபண்டுகளில் முதலீடு செய்வதைவிட சிறப்பானதுதான். நீங்கள் சொல்வதுபோல் செலவும் குறைவு. ஆகையால் டபுள் ஓகே!’’

. நான் திருநெல்வேலி அருகே தலா 3 சென்ட் பரப்பளவு கொண்ட 6 மனைகளை பத்திரப் பதிவு செய்ய இருக்கிறேன். 6 மனைகளையும் ஒரே பத்திரமாகப் பதிவு செய்யலாமா, தனித் தனி மனைகளாகப் பதிவு செய்யலாமா? எது பின்னர் மனைகளை விற்பனை செய்வதில் உதவியாக இருக்கும்?

- சுப்பிரமணி, சென்னை -20

. “நீங்கள் வாங்கப்போகும் 3 சென்ட் பரப்பளவு கொண்ட 6 மனைகளும், அதன் மூலப் பத்திரத்தில் எவ்வாறு கிரயம் பெறப்பட்டுள்ளன எனப் பார்த்தல் அவசியம். சில நேரங்களில் அவை, பெரும் பரப்பளவு கொண்ட நிலமாகவோ, சிறு சிறு மனைகளாகப் பிரிக்கப்பட்டோ பதிவு செய்யப்பட்டிருக்கும். பின்னாளில் விற்பனைக்கென கிரயப்பத்திரம் ஏற்படுத்துவது எப்படி என யோசிப்பதைவிட, நீங்கள் வாங்கப்போகும் இந்த மனைப் பிரிவுக்கென அங்கீகாரம் எவ்வாறு வழங்கப்பட்டுள்ளது என்பதைப் பார்க்க வேண்டும். பின்னர் கட்டடம் கட்டும் காலத்தில், கட்டுமானத்துக்கென அங்கீகாரம், ஒப்புதல் வழங்குவதற்குத் தோதாக உங்கள் கிரயப்பத்திரம் அமைந்திருப்பது முக்கியம். முறையான டி.டி.சி.பி (DTCP) அங்கீகாரம் பெற்ற மனைப் பிரிவில் இந்தச் சொத்து அமைந்திருந்தால், தனித் தனியான கிரயப்பத்திரம் மூலமாகக் கிரயம் பெற்றுக்கொண்டால், உங்கள் வசதிக்கேற்ப பின்னாளில் கிரயம் செய்யும்போது, தனித்தனியே ஒரிஜினல் பத்திரத்தை வாங்கும் நபர் வசம் ஒப்படைத்து, கிரயத்தை நிவர்த்தி செய்ய வசதியாக இருக்கும்.”

. நான் கடந்த ஐந்து ஆண்டுகளாக மியூச்சுவல் ஃபண்டில் முதலீடு செய்து வருகிறேன். எனது முதலீட்டை 10 வருடம் தொடரும் நோக்கத்துடன் தொடங்கினேன். ஒவ்வொரு வருடமும் போர்ட்ஃபோலியோவை மறுபரிசீலனை செய்ய வேண்டும் என நிபுணர்கள் சொல்கிறார்கள். நான் முதலீடு செய்துள்ள ஃபண்டுகளில் ஒன்று, கடந்த ஒரு வருடமாக சிறப்பாகச் செயல்படவில்லை. இந்த ஃபண்ட் லாபத்தில் இருந்தாலும் கேட்டகிரி சராசரியுடன் ஒப்பிடும்போது நன்றாக இல்லை. இப்போது என்ன செய்வது?

- கணேஷ், கரூர்

. ‘‘சச்சின் , சேவாக் போன்ற நட்சத்திர கிரிக்கெட் வீரர்கள் அவர்கள் களமிறங்கும் எல்லா போட்டிகளிலும் செஞ்சுரி அடிப்பதில்லை. சில சமயங்களில் ஜீரோ ரன் அடித்து வெளியேறிவிடுகிறார்கள். அதற்காக அணியில் இருந்து நீக்கப்படுவதில்லை. அதேபோல், சில காரணங்களால் சில ஃபண்டுகள் ஒரு குறிப்பிட்ட காலத்துக்கு கேட்டகிரி சராசரிக்கு குறைவாக வருமானம் ஈட்டியிருக்கலாம்.

. ஒரு ஃபண்டை மறுஆய்வு செய்யும்போது குறிப்பிட்ட ஃபண்டானது அதன் அறிவிக்கப்பட்ட நோக்கத்திலிருந்து விலகிச் செல்கிறதா என்பதுடன், அதன் ஃபண்ட் மேனஜரின் செயல்பாடு, அதன் ஆண்டு அறிக்கை, வருமானம் ஆகியவற்றைக் கணக்கில் எடுத்துக்கொள்ள வேண்டும். தொடர்ந்து சரிவையே நோக்கிச் செல்கிறது என்றால் அந்த ஃபண்டிலிருந்து வெளியேறி இன்னொரு ஈக்விட்டி ஃபண்டில் முதலீடு செய்யலாம். மாற்றாக, ஒரு சிறந்த அஸெட் அலொகேஷனுடன்கூடிய (ஈக்விட்டி, டெப்ட், லிக்விட் ஃபண்டுகள்) டைனமிக் அஸெட் அலோகேஷன் ஃபண்டுகளை ஒரு போர்ட்ஃபோலியோவாகத் தேர்வு செய்து பங்குச் சந்தையின் ஏற்ற இறக்கத்தை எளிதாகக் கையாளலாம்.’’

. மூத்த குடிமக்கள் பங்குச் சந்தை மற்றும் மியூச்சுவல் ஃபண்ட் முதலீடுகளைவிட, ஃபிக்ஸட் டெபாசிட் போன்றவற்றை அதிகம் விரும்புவது ஏன்?

- மலர்மதி, சென்னை – 17

. “பங்குச் சந்தை மற்றும் மியூச்சுவல் ஃபண்ட் முதலீடுகளை, ஃபிக்ஸட் டெபாசிட்டுடன் ஒப்பிட்டுப் பார்க்கும்போது, ஃபிக்ஸட் டெபாசிட்டில் செய்யப்படும் முதலீட்டானது பாதுகாப்பானதாகும். மேலும், அதில் கிடைக்கும் வருமானம் ஏற்கெனவே நிர்ணயிக்கப்பட்டது என்பதால், முதலீட்டாளர்கள் வருங்காலத்தில் தங்களது செலவுகளைச் சமாளிக்கத் தேவையான பணத்தைக் கணக்கிட்டு முன்னதாக இதில் முதலீடு செய்யலாம். மேலும், பங்குச் சந்தை சார்ந்த முதலீடுபோல், ஃபிக்ஸட் டெபாசிட்டில் முதலீடு செய்த பணத்தை இழந்துவிடுவோமோ என்று பயப்பட வேண்டிய அவசியம் இருக்காது. இருப்பினும் ஃபிக்ஸட் டெபாசிட் முதலீட்டால் விலைவாசி ஏற்றத்தைச் சமாளிக்கும் விதமான வருமானத்தைத் தர முடியாது. அதனால்தான் மூத்த குடிமக்கள் அவர்களது அஸெட் அலொகேஷனில் குறைந்தபட்சம் 20 சதவிகிதத்தை பங்குச் சந்தை அல்லது ஈக்விட்டி ஃபண்டுகளில் முதலீடு செய்ய அறிவுறுத்தப்படுகிறார்கள்.”

. அரசுக் கல்லூரிகளில்கூட பொறியியல் படித்து முடிக்க இப்போது மொத்தம் ரூ.5 லட்சம் செலவாகிவிடுகிறது. என் மகள் இன்னும் 10 ஆண்டுகள் கழித்து படிக்க எவ்வளவு செலவாகும்? இப்போது என்னிடம் எஃப்.டி-யில் ரூ.2 லட்சம் இருக்கிறது. நான் எப்படி முதலீடு செய்ய வேண்டும்?

- மே.விக்னேஷ், நாகப்பட்டினம்

. “பணவீக்க விகிதத்தின்படி கணக்கிட்டுப் பார்த்தால், தற்போதைய செலவு ரூ.5 லட்சம் என்பது 10 ஆண்டுகளுக்குப் பிறகு ரூ.10.79 லட்சம் - ரூ.13 லட்சம் வரை ஆகும். நீங்கள் இந்த இலக்கை அடைய உங்கள் எஃப்.டி-யில் இருக்கும் ரூ.2 லட்சத்தை உங்கள் ரிஸ்க் எடுக்கும் திறனுக்கேற்ப 10 வருட காலத்துக்கு ஈக்விட்டி மியூச்சுவல் ஃபண்டுகள் மற்றும் கடன் ஃபண்டுகளில் பிரித்து முதலீடு செய்யுங்கள்.

இது தவிர, நீங்கள் மாதத்துக்கு ரூ.4,000 முதல் ரூ.8,000 வரை உங்கள் முதலீட்டைப் பொறுத்து 10 ஆண்டுகளுக்கு முதலீடு செய்தால், இலக்குத் தொகையை அடையலாம். உங்கள் முதலீடுகளை ஆண்டுக்கொருமுறை தவறாமல் மதிப்பாய்வு செய்வதுடன், இலக்கை அடைவதற்கு சில ஆண்டுகளுக்கு முன் பாதுகாப்பான முதலீட்டுக்கு மாற்றிவிடுவது அவசியம்.’’

. கேள்விகளை அனுப்புபவர்கள் தங்கள் செல்போன் எண்ணையும் குறிப்பிடவும்.

அனுப்ப வேண்டிய முகவரி: கேள்வி-பதில் பகுதி, நாணயம் விகடன், 757, அண்ணாசாலை, சென்னை-2. navdesk@vikatan.com

கேள்வி பதில் : முதலீடுகளை பேசிவ் ஃபண்டுகளுக்கு மாற்றுவது லாபமா? - முதலீட்டு ஆலோசனை

சி.சரவணன்