பி.என்.பி ஹவுஸிங் ஃபைனான்ஸ் ஃபிக்ஸட் டெபாசிட்

பி.என்.பி ஹவுஸிங் ஃபைனான்ஸ் நிறுவனம் ஃபிக்ஸட் டெபாசிட் திட்டங்களை அறிமுகப்படுத்தி இருக்கிறது. இந்த ஃபிக்ஸட் டெபாசிட் திட்டங்கள் 12-23, 24-35, 36-47, 48-59, 60-71, 72-84 மற்றும் 120 மாதங்கள் என முதிர்வுக் காலங்களைக் கொண்டிருக்கின்றன. இந்தச் சேமிப்புத் திட்டத்தில் மாதம், காலாண்டு, அரையாண்டு மற்றும் வருடாந்தர அடிப்படையில் வருமானத்தைப் பெற்றுக்கொள்ளலாம்.

மாதாந்தர வருமானத் திட்டத்தைத் தேர்ந்தெடுப்பவர்கள் குறைந்தபட்சம் ரூ.25,000 முதலீடு செய்ய வேண்டும். காலாண்டு, அரையாண்டு மற்றும் வருடத்துக்கு ஒரு முறை வட்டி வருமானம் வேண்டும் என்கிறவர்கள் குறைந்தபட்சம் ரூ.10,000 முதலீடு செய்ய வேண்டும். இந்தச் சேமிப்புத் திட்டங்களுக்கான வட்டி விகிதம் குறைந்தபட்சம் 6.20% முதல் அதிகபட்சம் 9.13% வரை வழங்கப்படும். மூத்த குடிமக்களுக்கு 0.5% கூடுதல் வட்டி வழங்கப்படுகிறது. இந்த ஃபிக்ஸட் டெபாசிட் திட்டத்தைப் பயன்படுத்திக்கொள்வதற்கான கடைசி தேதி செப்டம்பர் 30, 2020.

ஐ.சி.ஐ.சி.ஐ புரூடென்ஷியல் இ.எஸ்.ஜி ஃபண்ட்

ஐ.சி.ஐ.சி.ஐ புரூடென்ஷியல் மியூச்சுவல் ஃபண்ட் நிறுவனம், ‘ஐ.சி.ஐ.சி.ஐ புரூடென்ஷியல் இ.எஸ்.ஜி ஃபண்ட்’ (ICICI Prudential ESG Fund) திட்டத்தை அறிமுகம் செய்துள்ளது. ஓப்பன் எண்டட் வகையைச் சேர்ந்த இதில் குறைந்தபட்சம் 5,000 ரூபாயிலிருந்து முதலீட்டை ஆரம்பிக்கலாம். அக்டோபர் 5-ம் தேதி வரை விண்ணப்பிக்கலாம். முதலீட்டாளர்களிடமிருந்து திரட்டப்படும் நிதி, சுற்றுச்சூழலுக்குப் பாதிப்பை ஏற்படுத்தாத, சமூகத்தின் வளர்ச்சிக்குப் பங்களிக்கும் மற்றும் சிறந்த நிர்வாகத்தைக் கொண்ட நிறுவனப் பங்குகளில் முதலீடு செய்யப்படுகிறது. இந்த ஃபண்டில் ஓரளவுக்கு ரிஸ்க் இருக்கிறது என்பதால், ரிஸ்க் எடுக்கக்கூடியவர்கள் மற்றும் இளம் வயதினர் முதலீடு செய்யலாம்.

எஸ்.பி.ஐ மேக்னம் சில்ட்ரன்ஸ் பெனிஃபிட் ஃபண்ட் – இன்வெஸ்ட்மென்ட் பிளான்

எஸ்.பி.ஐ மியூச்சுவல் ஃபண்ட் நிறுவனம், ‘எஸ்.பி.ஐ மேக்னம் சில்ட்ரன்ஸ் பெனிஃபிட் ஃபண்ட் – இன்வெஸ்ட்மென்ட் பிளான்’ (SBI Magnum Children’s Benefit Fund - Investment Plan) திட்டத்தை அறிமுகம் செய்துள்ளது. சேமிப்பு மற்றும் முதலீடு ஆகிய இருவேறு திட்டங் களையும் இந்த ஃபண்ட் கொண்டிருக்கிறது.

ஓப்பன் எண்டட் வகையைச் சேர்ந்த இதில் குறைந்தபட்சம் 5,000 ரூபாயிலிருந்து முதலீட்டை ஆரம்பிக்கலாம். செப்டம்பர் 22-ம் தேதி வரை விண்ணப்பிக்கலாம். இதில் குரோத் மற்றும் டிவிடென்ட் ஆப்ஷன்கள் இருக்கின்றன. முதலீட்டாளர்களிடமிருந்து திரட்டப்படும் நிதி, ஈக்விட்டி மற்றும் ஈக்விட்டி சார்ந்த ஆவணங்களிலும், கடன் மற்றும் கடன் சாந்த ஆவணங்களிலும் முதலீடு செய்யப்படுகிறது. இந்த ஃபண்டில் ரிஸ்க் ஓரளவு குறைவு, பிள்ளைகளின் கல்வி, திருமணம் போன்ற தேவைகளுக்கு இந்த ஃபண்டைக் கவனிக்கலாம்.

கோவிட் 19 ரைடர் பாலிசி

மேக்ஸ் லைஃப் இன்ஷூரன்ஸ் நிறுவனம், ‘கோவிட் -19 ஒன்-இயர் டேர்ம் ரைடர்’ என்ற ரைடர் பாலிசியை அறிமுகம் செய்கிறது. இந்த பாலிசியை ஏற்கெனவே உள்ள 12 மேக்ஸ் லைஃப் மற்றும் டேர்ம் இன்ஷூரன்ஸ் பாலிசிகளுடன் எடுத்துக்கொள்ளலாம். 16 - 65 வயது வரை உள்ளவர்கள் எடுத்துக்கொள்ளும் வகையில் இந்த பாலிசி வடிவமைக்கப் பட்டுள்ளது. இதற்கான ஆண்டு பிரீமியம் ரூ.320. ரூ.1 லட்சம் வரை இழப்பீடு பெற முடியும்!