முதலீட்டில் ரிஸ்க்... மூன்று விதமான பரிசோதனைகள்..! - நீங்கள் எப்படி என்று தெரிந்துகொள்ளுங்கள்!

ப ணத்தை முதலீடு செய்து லாபம் ஈட்ட அடிப்படைத் தகுதி ஒன்று உள்ளது. அது என்ன தெரியுமா? உங்களின் ரிஸ்க் புரொஃபைல் (Risk Profile)! . நிலத்தையோ, தங்கத்தையோ வாங்கிய உடனே அதன் விலை ஏறுவதில்லை. அதைப்போலத்தான் பங்குச் சந்தை. ஒரு நிறுவனத்தின் பங்குகளை வாங்கிய பிறகு, ஒரே நாளில் அதன் விலை அதிகரிக்காது. நீங்கள் முதலீடு செய்துள்ள பங்குகளின் விலை நாள்கள் செல்லச் செல்ல ஏறலாம் அல்லது இறங்கலாம். இந்த ஏற்ற இறக்கங்களை எல்லாம் சமாளித்து நீங்கள் செய்த முதலீட்டில் லாபத்தை ஈட்ட உங்களின் ரிஸ்க் புரொஃபைல் மிகவும் முக்கியம்.

. ரிஸ்க் புரொஃபைல் என்றால் என்ன... நம் ரிஸ்க் புரொஃபைலை எப்படிச் சோதனை செய்து பார்ப்பது, முதலீட்டில் ரிஸ்க் புரொஃபைல் ஏன் முக்கியத்துவம் பெறுகிறது என்பது குறித்து சி.எஃப்.பி நிதி ஆலோசகரும் கோமோமைல் இன்வெஸ்ட்மென்ட் கன்சல்டன்ட் நிறுவனத்தைச் சேர்ந்தவருமான ஸ்ரீதேவி கணேஷிடம் பேசினோம். விளக்கமாக எடுத்துச் சொன்னார் அவர்.

“நிறுவனப் பங்குகள் தொடங்கி, கடன் ஃபண்ட் வரை எதில் முதலீடு செய்ய விரும்பினாலும் ரிஸ்க் புரொஃபைல் சோதனை செய்யப்பட வேண்டும். இதை ஒரு நிதி ஆலோசகர் மூலம் மேற்கொள்ளலாம் அல்லது ஒருவர் தனக்குத்தானேகூட இந்தச் சோதனையைச் செய்துகொள்ளலாம். ஆனால், ஒரு நிதி ஆலோசகரிடம் உங்கள் ரிஸ்க் புரொஃபைலை செக் செய்துகொள்வது துல்லியமான ரிசல்ட்டைக் கொடுக்கும். அதற்கு ஏற்ப முதலீட்டு ஆலோசனைகளையும் அந்த நிதி ஆலோசகரிடமிருந்து பெற்றுக்கொள்ளலாம்.

. ரிஸ்க் புரொஃபைல் என்பது...

ரிஸ்க் புரொஃபைல் என்றால் என்ன? நீங்கள் ஒரு குறிப்பிட்ட தொகையைப் பங்குச் சந்தையில் குறிப்பிட்ட காலத்துக்கு முதலீடு செய்துள்ளீர்கள் என்று வைத்துக்கொள்வோம். திடீரென்று அந்த நிறுவனப் பங்குகளின் விலை சரிவடைகிறது எனில் ‘அய்யோ... விலை குறைந்துவிட்டதே!’ என்று பயந்து முதலீட்டை முடித்துக்கொள்கிறீர்களா அல்லது அந்தப் பின்னடைவை ஏற்றுக்கொண்டு வரும் காலங்களில் விலை ஏறும் என்ற நம்பிக்கையில் முதலீட்டைத் தொடர ரிஸ்க் எடுக்கிறீர்களா என்பது முதலீட்டில் உங்களின் ரிஸ்க் எடுக்கும் திறனைப் பொறுத்தது. இதை ‘ரிஸ்க் புரொஃபைல்’ என்று குறிப்பிடுவார்கள். இது ரிஸ்க் டாலரன்ஸ் (Risk tolerance), ரிஸ்க் கெப்பாசிட்டி (Risk capacity), ரிஸ்க் ரெக்கொயர்டு) Risk Required) என்ற மூன்று விதமான முறைகளை உள்ளடக்கியது.

. ரிஸ்க் சகித்துக்கொள்ளும் திறன் (Risk tolerance)

உங்கள் ரிஸ்க் புரொஃபைலில் முதலாவதாக மற்றும் முக்கியமானதாகப் பார்க்கப்படுவது ரிஸ்க் டாலரன்ஸ். இது முதலீட்டில் ஏற்படும் லாப, நஷ்டங்களைச் சகித்துக்கொள்ளும் திறன். நீங்கள் ரூ.10 லட்சத்தை முதலீடு செய்துள்ளீர்கள் என்று வைத்துக் கொள்வோம். முதலீடு செய்த ஒரு மாதம் கழித்தோ, ஒரு வருடம் கழித்தோ, உங்களின் முதலீடு நஷ்டத்தில் இருக்கிறது என்றால் அந்த நஷ்டம் உங்கள் மனநிலையில் எந்தவிதமான மாற்றங்களை ஏற்படுத்துகிறது, அந்த மாற்றங்களை நீங்கள் சகித்துக்கொள்கிறீர்களா என்பதைப் பற்றியது.

ஒருவரின் ரிஸ்க் சகிப்புத்தன்மை அவரின் மாத வருமானம், லாப நஷ்டங்களைக் கையாளும் திறன், குடும்பச் சூழல், மனநிலை என்று மொத்த காரணிகளையும் கொண்டு கணக்கிடப்படுகிறது. ஒருவருக்கு ரிஸ்க் சகிப்ப்புத்தன்மையை சோதித்தறிய சில கேள்விகள் அவரிடம் கேட்கப்படும். அந்தக் கேள்விகள் அனைத்தும் அவரின் நிதிநிலையைச் சார்ந்தே இருக்கும். எடுத்துக்காட்டுக்கு ஒருவர் ரூ.10 லட்சம் முதலீடு செய்யும்போது, அது குறிப்பிட்ட காலத்துக்குப் பிறகு 10% நஷ்டமடைந்து, ரூ.1 லட்சம் இழக்க வேண்டி வருகிறது. அந்த இழப்பை அவரால் ஏற்றுக் கொள்ள முடியுமா, அவர் என்ன தொழில் செய்கிறார், மாத வருமானம் என்ன, மாத வருமானம் குடும்பத்தைக் கவனிக்க போது மானதாக உள்ளதா என்பது போன்ற கேள்விகள் கேட்கப்பட்டு, அவரின் ரிஸ்க் சகிப்புத்தன்மை சதவிகிதத்தில் கணக்கிடப்படும். காலத்தைப் பொறுத்தும், சூழ்நிலையைப் பொறுத்தும் ஒருவரின் ரிஸ்க் சகிப்புத்தன்மை மாறிக் கொண்டே இருக்கும்.

. ரிஸ்க் எடுக்கும் திறன் (Risk capacity)

ரிஸ்க் புரொஃபைலில் அடுத்ததாகப் பார்க்கப்படும் பண்பு ரிஸ்க் எடுக்கும் திறன். முதலீட்டில் ரிஸ்க் எடுப்பதற்கான திறன் உங்களுக்கு எவ்வளவு உள்ளது என்பதை இந்த ரிஸ்க் எடுக்கும் திறன் மூலம் கணக்கிடலாம். ஒருவரின் ரிஸ்க் எடுக்கும் திறன் அவரின் படிப்பு, முதலீடு மற்றும் மார்க்கெட்டிங்கில் அவருக்குள்ள அறிவு, வருவாய் ஈட்டும் திறன், அவருக்கு உள்ள மொத்தச் சொத்து ஆகிய பின்னணிகளைப் பொறுத்தது. ஒருவருக்கு மேற்சொன்ன காரணிகள் எல்லாம் வலுவாக இருப்பின் அவருக்கு ரிஸ்க் கெப்பாசிட்டி அளவு அதிகமாக உள்ளது, அவர் தைரியமாக முதலீட்டில் இறங்கலாம் என்று பரிந்துரை செய்யப்படும்.

எந்த அளவு ரிஸ்க் (Risk Required)

இது நாம் செய்யும் முதலீட்டின் கால அளவைப் பொறுத்தது. 20 வருட முதலீட்டுக்கு எந்த அளவு ரிஸ்க் எடுக்க வேண்டும், ஒரு வருட முதலீட்டுக்கு எந்த அளவுக்கு ரிஸ்க் எடுக்க வேண்டும் என்பதைப் பகுப்பாய்வு செய்வதே இதுவாகும். ஒருவருக்கு ரிஸ்க் சகிப்புத்தன்மையும் ரிஸ்க் எடுக்கும் திறனும் நன்றாக இருந்தால், அவர் 20 வருட முதலீட்டுக்கு எவ்வளவு ரிஸ்க் எடுக்க வேண்டும், அதுவே ஒரு வருட முதலீடாக இருந்தால் ரிஸ்க் எடுக்கலாமா, வேண்டாமா என்பதை இந்தச் சோதனை மூலம் நமக்குத் தெளிவான பதில் கிடைக்கும்.

இந்த அளவீடு, இலக்குகளை அடைய மீதமிருக்கும் கால அளவு, முதலீடு செய்யும் தொகை, ஏற்கெனவே பகுப்பாய்வு செய்யப் பட்டுள்ள நம் ரிஸ்க் சகிப்புத்தன்மை மற்றும் ரிஸ்க் எடுக்கும் திறன் ஆகிய பண்புகளை அடிப்படையாகக் கொண்டு கணக்கிடப்படும். இவற்றை நீங்கள் நிதி ஆலோசகர் மூலம் அல்லது ஆன்லைன் இணையதளங்கள் மூலம் பரிசோதித்துக்கொள்ளலாம்.

லாபம், நஷ்டம் ஆகிய இரண்டையும் கடந்து முதலீட்டில் வெற்றி பெற நினைப் பவர்கள், முதலீடு செய்வதற்கு முன் அவர்களின் ரிஸ்க் புரொஃபைலைப் பரிசோதனை செய்துகொள்வது அவசியம்!

முதலீட்டில் ரிஸ்க்... மூன்று விதமான பரிசோதனைகள்..! - நீங்கள் எப்படி என்று தெரிந்துகொள்ளுங்கள்!

மா.அருந்ததிFollow

மா.அருந்ததி Follow