Published:Updated:

முதலீட்டு வருமானத்துக்கு டி.டி.எஸ் குறைப்பு! - என்ன லாபம்?

நிறுவனங்கள் முதலீட்டாளர்களுக்கு டிவிடெண்ட் வழங்கும் சூழல் இல்லை. வழங்கினால் மட்டுமே டி.டி.எஸ் தொகை மிச்சமாகும்.

செய்திகளை உடனுக்குடன் தெரிந்துகொள்ள... இங்கே க்ளிக் செய்து இன்றே விகடன் ஆப் இன்ஸ்டால் செய்யுங்கள்!

பிரீமியம் ஸ்டோரி
த்திய அரசு கொரோனா பாதிப்பிலிருந்து பொருளாதாரத்தை மீட்டெடுக்க ரூ.20 லட்சம் கோடி நிதியுதவித் திட்டங்களை அறிவித்திருக்கிறது.

`டி.டி.எஸ் மற்றும் டி.சி.எஸ் (Tax Deduction at Source & Tax Collection at Source) ஆகிய இரண்டுக்குமான வரி 25% குறைவாகப் பிடிக்கப்படும்’ என்று மத்திய அரசு அறிவித்திருக்கிறது. `இதன் மூலம் ரூ.50,000 கோடி முதலீட்டாளர்கள் கையில் புழங்கும்’ என அறிவிக்கப்பட்டிருக்கிறது.

டி.டி.எஸ்
டி.டி.எஸ்

`மூலத்தில் வரிப் பிடித்தம்’ (TDS) மற்றும் `மூலத்தில் வரி வசூல்’ (TCS) என்ற முறையில் மத்திய அரசு தனக்கு வர வேண்டிய வரியை முன்கூட்டியே பெறுகிறது. 25% குறைவான டி.டி.எஸ் மற்றும் டி.சி.எஸ் பிடித்தம் என்பது ஒப்பந்தங்கள், நிபுணத்துவக் கட்டணம் (Professional Fees), வட்டி, வாடகை, டிவிடெண்ட், கமிஷன் மற்றும் தரகுக் கட்டணம் ஆகியவற்றுக்கான பட்டுவாடாக்களுக்குப் பொருந்தும். இந்த நடைமுறை நடப்பு 2020-21-ம் ஆண்டின் முழு நடப்பு நிதியாண்டுக்கும் அதாவது, 2021, மார்ச் 31-ம் தேதி வரை நடைமுறையில் இருக்கும்.

பலரும் டி.டி.எஸ் மற்றும் டி.சி.எஸ் பிடித்தம் குறைப்பு என்பதை வருமான வரி குறைக்கப்பட்டிருப்பதாக நினைக்கிறார்கள். அது தவறு. குறைவாகப் பிடிக்கப்பட்ட வரியை நிதியாண்டு இறுதிக்குள் செலுத்த வேண்டும் அல்லது வரிக் கணக்கு தாக்கல் செய்வதற்குள் செலுத்திவிட வேண்டும். இது ஓர் ஒத்திவைப்பு நடவடிக்கைதானே தவிர, வரி நீக்கமல்ல என்பதைப் புரிந்துகொள்ள வேண்டும்.

பான் மற்றும் ஆதார் எண் தராதவர்களுக்கு 20% வரி பிடிக்கப்படும். `அவர்களுக்கு இந்த டி.டிஎஸ் மற்றும் டி.சி.எஸ் குறைப்பு பொருந்தாது’ என மத்திய நேரடி வரிகள் வாரியம் அறிவித்துள்ளது. ஒருவர் 10% வரி மட்டுமே செலுத்த வேண்டுமென்றாலும் அவர் பான், ஆதார் விவரம் தரவில்லையென்றால், அவர் 20% வரி செலுத்த வேண்டும்.

முதலீட்டு வருமானத்துக்கு டி.டி.எஸ் குறைப்பு! - என்ன லாபம்?

இதை ஓர் உதாரணம் மூலம் பார்த்தால் புரியும். ஒருவருக்கு வங்கி ஃபிக்ஸட் டெபாசிட் மூலம் ரூ.50,000 வட்டி வருமானம் கிடைக்கிறது என்று வைத்துக் கொள்வோம். அதில் 10% டி.டி.எஸ் எனில், ரூ.5,000 என்பது இனி 7.5% என்ற வகையில் ரூ.3,750 பிடிக்கப்படும். இதன் மூலம் டெபாசிட்தாரரின் கையில் ரூ.1,250 கூடுதலாகப் புழங்கும். குறைவாக பிடிக்கப்பட்ட டி.டி.எஸ்-ஐ நிதியாண்டு இறுதியில் கணக்கிட்டு அதற்கும் வரி செலுத்த வேண்டும். இதுவே அந்த டெபாசிட்தாரர் பான், ஆதார் எண் தரவில்லையென்றால், அவருக்கு 20% அதாவது, ரூ.10,000 டி.டி.எஸ் பிடிக்கப்படும். அவர் நிதியாண்டு முடிவில் அவரின் அடிப்படை வருமான வரம்புக்கு ஏற்ப வரி செலுத்த வேண்டிவரும். உதாரணமாக, ஃபிக்ஸட் டெபாசிட் போட்டவர் 30% வரி விகிதத்தில் இருந்தால், அவர் டி.டி.எஸ் பிடிக்கப்பட்ட 20% போக மீதி 10% (ரூ.5,000) வரி செலுத்த வேண்டிவரும்.

முதலீட்டு வருமானத்துக்கு டி.டி.எஸ் குறைப்பு! - என்ன லாபம்?

கொரோனா ஊரடங்கால் தொழில்கள் பாதிக்கப்பட்டிருப்பதால், நிறுவனங்கள் வருமானம் எதுவும் இல்லாமல் இருக்கின்றன. மேலும், பங்குச் சந்தை இறக்கத்தில் இருக்கிறது. இந்த நிலையில், நிறுவனங்கள் மற்றும் மியூச்சுவல் ஃபண்ட் நிறுவனங்கள் முதலீட்டாளர்களுக்கு டிவிடெண்ட் வழங்கும் சூழல் இல்லை. அப்படி வழங்கினால் மட்டுமே டி.டி.எஸ் தொகை மிச்சமாகும். முதலீட்டாளர் கணக்கில் கூடுதலாகப் பணம் புழங்கும். மிகச் சிலருக்கு மட்டுமே பயன்படும் இந்த விஷயம், எல்லோருக்கும் பயன்படுவதுபோலக் காட்டப்பட்டிருப்பதுதான் இதில் வேடிக்கை!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு