சாக்லேட்டுகளில் பல வகை உண்டு. எல்லா சாக்லேட்டுகளும் இனிக்கும் என்றாலும், ஒரு சாக்லெட் போல இன்னொன்று இருப்பதில்லை. ஒவ்வொரு சாக்லேட்டும் ஒவ்வொரு விதமாக இருந்து நம் மனதில் நீங்காத இடத்தைப் பிடிக்கின்றன.

அதுபோல, லாபகரமான பங்கு முதலீட்டுக்கு அடிப்படையான விஷயங்கள் பல உண்டு. இந்த விஷயங்களை நன்கு புரிந்துகொண்டு செயல்படுவது பங்கு முதலீட்டுக்கு அடிப்படை. இனி நான்கு முக்கியமான சாக்லேட் தத்துவங்களைப் பார்ப்போம்.

சாக்லேட் தத்துவம் 1:  நல்ல ஒரு தொழிலைக் கண்டறிதல்.

வெறும் பங்கு விலை ஏற்ற இறக்க எண்களையும், நிறுவனத்தின் நிதி அறிக்கைகளையும் கொண்டு ஒன்றும் செய்துவிட முடியாது. முதலீட்டை ஒரு பண்பாடாகக் (Investing Culture) கருதி நாம் கற்க வேண்டும். இதற்கு நிதி மற்றும் முதலீடு தொடர்பான புத்தகங்களைப் படிப்பது அவசியம். இதன்மூலம் நல்லதொரு தொழிலை நம்மால் கண்டறிய முடியும்.

சாக்லேட் தத்துவம் 2: உங்களைச் சுற்றி 1,000 பங்கு நிறுவனங்கள்.

உங்கள் வீட்டில் உள்ள பெரும்பாலான பொருள்கள் மற்றும் சேவைகள், பங்குச் சந்தையில் பட்டியலிடப்பட்ட நிறுவனங்களின் படைப்பாகவே இருக்கும். நீங்கள் காலையில் எழுந்தது தொடங்கி, இரவில் தூங்கச் செல்வது வரை பயன்படுத்தும் பொருள்களைப் பட்டியலிடுங்கள். அந்தப் பொருள்களைத் தயாரிக்கும் நிறுவனங்களைப் பாருங்கள். அந்த நிறுவனத்தின் தயாரிப்புகளின் விற்பனை எப்படி என்று பார்த்தால், உங்களைச் சுற்றி 1,000 பங்கு நிறுவனங்கள் இருப்பதை நீங்கள் அறிவீர்கள். நீங்கள் வாங்க வேண்டிய நிறுவனத்தின் பங்கு என்ன என்பதும் உங்களுக்கு யாரும் சொல்லாமலே தெரியும்.

சாக்லேட் தத்துவம் 3: உங்களைச் சுற்றி இருப்பவர்கள் தேர்வு செய்யும் நிறுவனங்கள்.  

உங்களைச் சுற்றியுள்ளவர் என்னென்ன நிறுவனங்களின் பொருள்களை பயன்படுத்து கிறார்கள் என்று பாருங்கள். உங்கள் வீட்டில் பெயின்ட் அடிப்பவர் எந்த நிறுவனத்தின் பொருள்களை வாங்குகிறார், உங்கள் நண்பர்கள், உறவினர்கள் அடிக்கடி வாங்கும் பொருள்கள் பங்குச் சந்தையில் பட்டியலிடப் பட்டுள்ளதா என்று பாருங்கள். அந்த நிறுவனத்தின் நிர்வாகத்தைப் பற்றி தெரிந்து கொள்ளுங்கள். அந்த நிறுவனங்களின் நிர்வாகம் தொடர்ந்து லாபம் சம்பாதித்துத் தரும் திறமையைக் கொண்டிருந்தால், நீங்கள் அந்த நிறுவனத்தின் பங்குகளை வாங்கலாம்.

சாக்லேட் தத்துவம் 4: நிறுவனம் பற்றித் தெரிந்துகொள்ளுங்கள்.

நாம் முதலீடு செய்யப்போகும் நிறுவனத்தின் உரிமையாளரைப் பற்றி அவ்வளவாகத் தெரியாவிட்டாலும், நிறுவனத்தின் சேவை எப்படி உள்ளது, நிறுவனத்துக்கு கடன் எதுவும் உள்ளதா, அவர்கள் விற்பனை செய்யும் பொருள்களுக்கு வாடிக்கையாளர்களின் தேவை எவ்வாறு உள்ளது என அறிந்து வைத்திருப்பது அவசியமான ஒன்றாகும். 

இந்த நான்கு சாக்லேட் தத்துவங்களை நீங்கள் அறிந்து வைத்திருந்தால், பங்கு முதலீடு உங்களுக்கு என்றும் இனிப்பான அனுபவத்தைத் தரும் என்பதில் சந்தேகம் இல்லை!