Published:Updated:

பழனிக்கும் மொட்டை... திருத்தணிக்கும் மொட்டை!

பழனிக்கும் மொட்டை... திருத்தணிக்கும் மொட்டை!
பிரீமியம் ஸ்டோரி
News
பழனிக்கும் மொட்டை... திருத்தணிக்கும் மொட்டை!

சேதாரக் கணக்கில் 12 கிலோ தங்கம்

‘காஞ்சிபுரம் ஏகாம்பரேஸ்வரர் கோயிலுக்கு ஐம்பொன் உற்சவர் சிலை செய்வதற்காக நன்கொடை என்ற பெயரில் கிலோகணக்கில் திரட்டிய தங்கத்தில் மோசடி நடந்துள்ளது’ என்கிற புகாரை அடுத்து, தமிழக அறநிலையத் துறையின் தலைமை ஸ்தபதி முத்தையாமீது வழக்குப் பதிவானது. தோண்டத்தோண்ட புதையல் கிடைப்பது போல, சிலைக்கடத்தல் தடுப்புப் பிரிவு ஐ.ஜி-யான பொன்.மாணிக்கவேல் தோண்டத் தோண்ட, ஸ்தபதி முத்தையா பற்றி பல புகார்கள் வெளியில் வந்தன.

காஞ்சிபுரம் ஏகாம்பரேஸ்வரர் கோயில் விவகாரம் வெளியில் வந்ததுமே, இதை ஒன்றுமில்லாமல் செய்ய ஏகப்பட்ட முயற்சிகள் நடந்தன. இந்த வழக்கில் முன்ஜாமீன் பெற்றிருந்த நிலையில், பழனி தண்டாயுதபாணி சுவாமி கோயிலின் மூலவர் சிலைக்காக நன்கொடையாகப் பெறப்பட்ட 100 கிலோ தங்கத்தில் முறைகேடு செய்த குற்றச்சாட்டில் முத்தையா ஸ்தபதி கைது செய்யப்பட்டார். அவருடன், அறநிலையத் துறை நிர்வாக ஆணையராக இருந்த கே.கே.ராஜாவும் கைது செய்யப்பட்டுள்ளார். இந்நிலையில், இதேபோல தமிழகம் முழுக்க அறநிலையத் துறை கோயில் பணிகளில் முத்தையா ஸ்தபதியுடன் கூட்டுசேர்ந்து பணம் பார்த்த அறநிலையத்துறை அதிகாரிகள், ஓய்வுபெற்ற உயர் அதிகாரிகள், அமைச்சர்களுடன் தொடர்புடையவர்கள், ஆன்மிகவாதிகள், உதவி ஸ்தபதிகள் என்று பலரின் பட்டியலைச் சேகரித்து வருகிறது சிலைக்கடத்தல் தடுப்புப் பிரிவு.

பழனிக்கும் மொட்டை... திருத்தணிக்கும் மொட்டை!

இந்தச் சூழலில், பழனியை அடுத்து திருத்தணி முருகன் கோயிலில் நடந்த மோசடி விவகாரம் ஒன்றைக் கையில் எடுத்துள்ளார், சிலைக்கடத்தல் தடுப்புப் பிரிவு ஐ.ஜி பொன்.மாணிக்கவேல். திருத்தணி முருகன் கோயில் விமானத்துக்கு சுமார் 75 கிலோ தங்கத்தில் கவசம் செய்யப் பட்டது. ‘‘பொதுவாக இதுபோன்ற தங்கக்கவசம் செய்யும்போது, ஒரு சதவிகித அளவில்தான் சேதாரம் இருக்கும். ஆனால், இதற்கு 16 சத விகிதம் சேதாரம் என்று கணக்கிடப் பட்டு, 12 கிலோ தங்கம் ஸ்வாஹா செய்யப்பட்டுள்ளது’’ என்கிறார்கள் சிலைக்கடத்தல் தடுப்புப் பிரிவு போலீஸார். இதன் அன்றைய மதிப்பு சுமார் நான்கு கோடி ரூபாய். கிட்டத்தட்ட இதேசமயத்தில், சோளிங்கரில் உள்ள நரசிம்மர் ஆலய விமானத்துக்கும் தங்கக் கவசம் செய்யப் பட்டது. அதற்காக செலவிடப்பட்டது 102 கிலோ தங்கம். அதற்கான சேதாரம், சுமார் 900 கிராம் மட்டுமே. அதாவது ஒரு சதவிகிதத்துக்கும் குறைவாகவே சேதாரம் இருந்தது.

இப்படிக் கோயில் தங்க மோசடிகள் பற்றிய விசாரணை சூடுபிடித்திருக்கும் நிலையில், பழனி கோயில் வழக்கை சி.பி.சி.ஐ.டி பிரிவுக்கு மாற்றி தமிழக டி.ஜி.பி உத்தரவிட்டார். ‘சிலைக்கடத்தல் பற்றி மட்டும்தான் அந்தப் பிரிவு விசாரிக்க வேண்டும். கோயில்களுக்கான புதிய சிலைகள் தொடர்பாக நடந்த மோசடி வழக்குகளை விசாரிக்கத் தேவையில்லை’ என்றும் டி.ஜி.பி கூறியிருந்தார். ஆனால், சென்னை உயர் நீதிமன்றத்தின் மதுரை கிளை, ‘இந்த வழக்கை சிலைக்கடத்தல் தடுப்புப் பிரிவே விசாரிக்கட்டும்’ என்று உத்தரவிட்டுள்ளது.

பழனிக்கும் மொட்டை... திருத்தணிக்கும் மொட்டை!

சிலைக்கடத்தல் தடுப்புப் பிரிவினரிடம் பேசிய போது பல தகவல்களைப் பகிர்ந்து கொண்டார்கள். ‘‘கடந்த 15 ஆண்டுகளில் தமிழ்நாட்டில் பல கோயில்களில் தங்கத்தால் திருப்பணிகள் நடந்தன. அங்கெல்லாம் தலைமை ஸ்தபதி முத்தையாவும், இந்து சமய அறநிலையத்துறையைச் சேர்ந்த ஓர் அதிகாரியும் இணைந்து, உள்ளூர் கோயில் நிர்வாகிகளைக் கையில் போட்டுக்கொண்டு பல மோசடிகளில் ஈடுபட்டுள்ளார்கள். இவர்கள் இருவரும் தப்பிக்கவே முடியாது. காஞ்சிபுரம் சோமாஸ்கந்தர் சிலையில் ஒரு சதவிகிதம்கூட தங்கம் இல்லை என்பது உறுதியாகியுள்ளது. சிலைகளில் உள்ள தங்கத்தின் அளவைக் கண்டுபிடிக்க, ஐ.ஐ.டி நிறுவனத்தின் ஆய்வகத்தைப் பயன்படுத்தியதுடன், ஆய்வு முடிவுகளையும் ஐ.ஜி பொன்.மாணிக்கவேல் அதிகாரபூர்வமாகப் பெற்றுள்ளார்’’ என்று சொன்னார்கள்.

பழனிக்கும் மொட்டை... திருத்தணிக்கும் மொட்டை!

‘100 ஆண்டுகளுக்கு மேல் தொன்மையான கோயில்களுக்குப் புதிதாகச் சிலைகளைச் செய்யக் கூடாது, இதற்கென நன்கொடையும் வாங்கக்கூடாது’ என அறநிலையத் துறையின் விதிமுறைகளில் சொல்லப்பட்டுள்ளது. மோசடி நடைபெற்றிருக்கும் காஞ்சிபுரம், பழனி உள்ளிட்ட கோயில்கள் எல்லாமே பல நூறு ஆண்டுகள் தொன்மைமிக்கவை என்பது குறிப்பிடத்தக்கது.

திருத்தணி கோயில் தங்கக் கவச மோசடி தொடர்பாகக் கோயிலின் தற்போதைய இணை ஆணையர் சிவாஜியிடம் கேட்டதற்கு, ‘‘நான் இங்கு பதவிக்கு வந்தே ஏழெட்டு மாதங்கள்தான் ஆகின்றன. எனக்கு ஒன்றும் தெரியாது. கோயில் இளநிலை உதவியாளர் அருணா சலத்திடம் கொடுக்கிறேன். அவரிடம் கேளுங்கள்’’ என்று போனைக் கொடுத்தார். ‘‘தங்க விமானம் பற்றி எனக்கு எந்தத் தகவலும் தெரியாது. நான் 15 ஆண்டுகளாக இந்தத் கோயிலில் உதவியாளராக வேலை பார்க்கிறேன். இதைத் தவிர வேறு ஒன்றும் தெரியாது. உங்கள் கேள்விக்குப் பதில் சொல்லும் அதிகாரம் எனக்கு இல்லை. அதிகாரி களைத்தான் நீங்கள் கேட்க வேண்டும்’’ என்று முடித்துக் கொண்டார் அருணாசலம். கோயில் மேலாளர் பழனியிடம் கேட்டபோது, ‘‘நான் விடுமுறையில் இருக்கிறேன். நீங்கள் கேட்கும் தகவல் எதுவும் எனக்குத் தெரியாது. ஃபைலைப் பார்த்துத்தான் சொல்லவேண்டும்’’ என்று மட்டும் சொன்னார்.

சேதாரம் என்கிற பெயரில் 12 கிலோ தங்கம் கொள்ளையடிக்கப் பட்டிருக்கும் தகவல்கள் கோயில் வட்டாரத்தில் பலருக்கும் தெரிந்தே இருக்கிறது. ஆனால், பலரும் பயத்தில் ஒதுங்கிக்கொள்கிறார்கள் என்பது புரிந்தது. பொன்.மாணிக்கவேல் இந்த விஷயத்தில் குற்றவாளிகள் மீது வேலைப் பாய்ச்சாமல் விடவே மாட்டார் என்றுதான் தோன்றுகிறது!

- கு.ராமகிருஷ்ணன், இரா.தேவேந்திரன்