Published:Updated:

பழி தீர்ப்பதற்கா குண்டர் சட்டம்?

பழி தீர்ப்பதற்கா குண்டர் சட்டம்?
பிரீமியம் ஸ்டோரி
பழி தீர்ப்பதற்கா குண்டர் சட்டம்?

பழி தீர்ப்பதற்கா குண்டர் சட்டம்?

பழி தீர்ப்பதற்கா குண்டர் சட்டம்?

பழி தீர்ப்பதற்கா குண்டர் சட்டம்?

Published:Updated:
பழி தீர்ப்பதற்கா குண்டர் சட்டம்?
பிரீமியம் ஸ்டோரி
பழி தீர்ப்பதற்கா குண்டர் சட்டம்?

‘குண்டர் தடுப்புச் சட்டத்தை போலீஸார் தங்கள் இஷ்டம்போல் பயன்படுத்துகிறார்கள்... அதற்கு மாவட்ட ஆட்சியர்கள் கண்ணை மூடிக்கொண்டு ஒப்புதல் கையெழுத்திடுகிறார்கள்’ என்ற குற்றச்சாட்டில் உண்மை இருப்பது உயர் நீதிமன்றத்துக்கு வந்த ஒரு வழக்கின் மூலம் நிரூபணமாகியுள்ளது.

பழி தீர்ப்பதற்கா குண்டர் சட்டம்?

தேனி மாவட்டம் பி.சி.பட்டியைச் சேர்ந்த கலாதேவி என்பவர், கொலை வழக்கு ஒன்றில் சிறையில் இருந்தார். இவர், சென்னை உயர் நீதிமன்ற மதுரைக் கிளையில் தாக்கல் செய்த மனுவில், ‘நான் வசிக்கும் பகுதியில் பரமேஸ்வரி என்பவர் ஓர் இடம் வாங்கினார். பாதையைப் பயன்படுத்துவது சம்பந்தமாக எனக்கும் அவருக்கும் தகராறு ஏற்பட்டது. அப்போது, எங்களை விலக்கிவிட வந்தார் பரமேஸ்வரியின் தாயார். நான் தள்ளிவிட்டதில், எதிர்பாராதவிதமாக அவருக்குக் காயம் ஏற்பட்டது. மருத்துவமனையில் சேர்க்கப்பட்ட அவர் உயிரிழந்தார். இந்த வழக்கில் என்னைக் கைதுசெய்து மதுரை மத்திய சிறையில் அடைத்தனர். எனக்கு ஜாமீன் வழங்க வேண்டும்’ என்று கூறியிருந்தார்.

பழி தீர்ப்பதற்கா குண்டர் சட்டம்?

வழக்கு விசாரணையில் அரசுத் தரப்பு வழக்கறிஞர், ‘‘குண்டர் தடுப்புச் சட்டத்தின்கீழ் கலாவதி கைது செய்யப்பட்டுள்ளார். அதனால், அவரது ஜாமீன் மனுவைத் தள்ளுபடி செய்யவேண்டும்’’ என்றார். கலாவதி சார்பாக ஆஜரான வழக்கறிஞர் பிரபு ராஜதுரை, ‘‘ஒரேயொரு கொலை வழக்கில் கைதுசெய்யப்பட்டவர்மீது குண்டர் தடுப்புச் சட்டத்தில் வழக்குப்பதிவு செய்துள்ளனர். இது சட்டத்தை மீறிய செயல்’’ என்றுகூறி, இந்த வழக்கில் காவல்துறை செய்துள்ள தவறுகளைச் சுட்டிக்காட்டினார். அனைத்தையும் கேட்ட நீதிபதி ஜி.ஆர்.சுவாமிநாதன், ‘‘ஒரேயொரு வழக்கில் சம்பந்தப்பட்ட பெண்மீது எப்படி குண்டர் தடுப்புச் சட்டத்தில் வழக்குப் பதிவு செய்தீர்கள்? இதற்கு தேனி கலெக்டர் எப்படி ஒப்புதல் அளித்தார்? குண்டர் சட்டத்தின்கீழ் வழக்குப் பதிவுசெய்ய உச்ச நீதிமன்றம் பல வழிகாட்டுதல்களை வழங்கியுள்ளது. சாதாரண ஒரு வழக்குக்கு, ஒரு பெண்மீது, குண்டர் சட்டத்தின் கீழ் எப்படி வழக்குப் பதிவுசெய்ய முடியும்?’’ என்று கேள்வி எழுப்பினார். கலாவதிக்கு நிபந்தனை ஜாமீன் வழங்கிய நீதிபதி, ‘‘கலாவதிமீது குண்டர் சட்டத்தின்கீழ் வழக்குப்பதிவு செய்தது ஏன் என்பதை, தேனி மாவட்ட எஸ்.பி நேரில் ஆஜராகி விளக்கம் அளிக்க வேண்டும்’’ என்று உத்தரவிட்டார்.

நீதிமன்றத்தில் ஜூலை 23-ம் தேதி ஆஜரான தேனி மாவட்ட எஸ்.பி பாஸ்கரன், ‘‘கொலை வழக்கில் கைதானதால், குண்டர் தடுப்புச் சட்டத்தில் வழக்குப்பதிவு செய்தோம்’’ என்றார். எஸ்.பி-யின் பதிலில் நீதிபதி திருப்தி அடையவில்லை. அரசுத்தரப்பு வழக்கறிஞர், ‘மனுதாரர்மீது பதிவுசெய்யப்பட்ட குண்டர் சட்ட வழக்கு ரத்து செய்யப்பட்டுள்ளது’ என அதற்கான ஆவணங்களைக் காட்டினார். அதையடுத்து வழக்கை நீதிபதி முடித்துவைத்தார்.

பழி தீர்ப்பதற்கா குண்டர் சட்டம்?

வழக்கறிஞர் பிரபு ராஜதுரையிடம் பேசினோம். ‘‘கலாதேவியின் கணவர் வனத்துறை அதிகாரியாக இருந்து மரணமடைந்தவர். ஏற்கெனவே ஒரு பிரச்னை சம்பந்தமாக கலாவதி புகார் கொடுத்தபோது, புகாரைத் தீரவிசாரிக்காமல் போலீஸார் அதை முடித்துவைத்துள்ளனர். எனவே இன்ஸ்பெக்டர், எஸ்.பி ஆகியோருக்கு எதிராக உயர் நீதிமன்றத்தில் கலாவதி வழக்கு நடத்தினார். இதனால், இவர்மீது எஸ்.பி கோபத்தில் இருந்துள்ளார். இந்த நிலையில், கொலை வழக்கில் அவர் கைது செய்யப்பட்டதும், அதன் மூலம் தங்கள் பகையைத் தீர்க்கப் பார்த்துள்ளனர். வழக்கை விசாரித்த நீதிபதி, காவல்துறை செய்த பல தவறுகளைத் தீர்ப்பில் குறிப்பிட்டுள்ளார். இனிமேலாவது, இதுபோன்ற சட்டங்களில் கைதுசெய்வதைக் காவல்துறை நிறுத்த வேண்டும்’’ என்றார்.

சொந்த விருப்புவெறுப்புகளுக்காகச் சட்டங்களைத் தவறாகப் பயன்படுத்தக்கூடாது!

- செ.சல்மான்
படங்கள்: வீ.சக்தி அருணகிரி