பாலியல் வன்கொடுமைத் தீர்ப்பு... முக்கியக் குற்றவாளிகளைத் தப்பவிட்ட போலீஸ்?

“க டலூர் மாவட்டம் திட்டக்குடியில் பள்ளி மாணவிகளைப் பாலியல் வன்கொடுமை செய்து அவர்களின் வாழ்க்கையையே நிர்மூலமாக்கிய 16 பேருக்கு நீதிமன்றம் தண்டனை வழங்கியிருக்கிறது. அதேசமயம், பல பிரமுகர்களை வழக்கில் சேர்க்காமல் போலீஸார் காப்பாற்றியுள்ளனர்” என்று குற்றம்சாட்டுகிறது அனைத்திந்திய ஜனநாயக மாதர் சங்கம்.

கடலூர் மாவட்டம் திட்டக்குடி அரசு மகளிர் மேல்நிலைப் பள்ளியில் 7-வது மற்றும் 8-வது வகுப்பு படித்துவந்த இரண்டு சிறுமிகள் 2014-ம் ஆண்டு ஜூலை மாதம் 11-ம் தேதி காணாமல்போயினர். அவர்களின் பெற்றோர் திட்டக்குடிக் காவல் நிலையத்தில் கொடுத்த புகாரின் பேரில் விசாரணை நடத்திய போலீஸார் வடலூரில், பாலியல் தொழில் செய்துவந்த சதிஷ்குமார் என்பவரிடமிருந்து இரு மாணவிகளையும் மீட்டனர். மாணவிகளிடம் போலீஸார் நடத்திய விசாரணையில், தமிழகத்தின் வடக்கு மாவட்டங்களில் பாலியல் தொழிலில் ஈடுபட்ட ஒரு கும்பலுக்கு இதில் தொடர்பு இருப்பது தெரியவந்தது.

. மாணவிகள் அடையாளம் சொன்னதன் அடிப்படையில், 23 பேர் மீது வழக்குப்பதிவு செய்யப்பட்டது. வழக்கு நடந்துகொண்டிருந்தபோது செந்தில்குமார், நம்மாழ்வார், கபிலன் என்ற மூவர் இறந்துவிட்டனர். மற்ற 20 மீதான வழக்குகள் நடந்துவந்தன. மாணவிகளின் பெற்றோர் வைத்த கோரிக்கையின் அடிப்படையில் 2016-ம் ஆண்டு ஜூலை மாதம் சி.பி.சி,ஐ.டி-க்கு இந்த வழக்கு மாற்றப்பட்டது. கடலூர் மாவட்ட மகளிர் நீதிமன்றத்தில் குற்றப்பத்திரிகைத் தாக்கல் செய்யப்பட்டு, விசாரணை நடைபெற்றது. விசாரணையின்போதே வழக்கில் தொடர்புடைய சதிஷ்குமார், அவரின் மனைவி தமிழரசி, ஜெபீனா ஆகிய மூவர் தலைமறைவானார்கள்.

இந்த நிலையில்தான், இந்த வழக்கில் கடந்த 4-ம் தேதி தீர்ப்பு வழங்கிய நீதிபதி லிங்கேஸ்வரன், 16 பேர் குற்றவாளிகள் என அறிவித்து, அவர்களுக்குப் பத்து ஆண்டுகள் முதல் 42 ஆண்டுகள் வரை சிறைத்தண்டனை வழங்கினார்.

தீர்ப்பு குறித்துப் பேசிய அரசு வழக்கறிஞர் செல்வப்பிரியா, “மாணவிகளின் வாழ்க்கையைச் சீரழித்த பாலியல் புரோக்கர்களுக்குப் பாடம் புகட்டும் வகையில் நல்ல தீர்ப்பு வழங்கப்பட்டுள்ளது” என்றார்.

ஆனால், இந்த வழக்கில் பாதிக்கப்பட்ட மாணவிகளுக்காக ஆரம்பத்திலிருந்து போராடிவரும் கடலூர் மாவட்ட ஜனநாயக மாதர் சங்கம், “குற்றவாளிகள் பலரும் தப்பிவிட்டார்கள்” என்று குற்றம்சாட்டுகிறது. இதுகுறித்து பேசிய மாதர் சங்க மாவட்டச் செயலாளர் தேன்மொழி, “தீர்ப்பை வரவேற்கிறோம். ஆனால், மாணவிகளைப் பாலியல் வன்கொடுமை செய்த திட்டக்குடியைச் சேர்ந்த ஆளுங்கட்சிப் பிரமுகர்கள், முக்கியப் புள்ளிகள் பலரை வழக்கின் ஆரம்பத்திலேயே போலீஸார் வழக்குப்பதிவு செய்யாமல் விட்டுவிட்டனர். எனவே, இந்த வழக்கில் அரசே மேல்முறையீடு செய்து, சுதந்திரமாகச் சுற்றித் திரிபவர்களுக்கும் தண்டனைப் பெற்றுத்தர வேண்டும். ‘குற்றவாளிகளிடம் ரூ.5 லட்சம் வசூலித்து, அதை இழப்பீடாக மாணவிகளுக்கு வழங்க வேண்டும்’ என்று நீதிமன்றம் சொல்லியிருக்கிறது. இது நடைமுறைக்குச் சரியாக வராது. அரசே இழப்பீடு கொடுத்துவிட்டு, அந்தத் தொகையைக் குற்றவாளிகளிடமிருந்து வசூல் செய்துகொள்ள வேண்டும். மாணவிகளுக்கு ரூ.50 லட்சம் இழப்பீடு வழங்க வேண்டும். அவர்களின் உயர் படிப்பு வரையிலான செலவுகளை அரசே ஏற்க வேண்டும். அவர்களுக்கு அரசு வேலை வழங்க வேண்டும்” என்றார்.

. காவல்துறை தரப்பிடம் கேட்டதற்கு, “பாதிக்கப்பட்ட பள்ளி மாணவிகள் அடையாளம் காட்டியதன் அடிப்படையில்தான் குற்றவாளிகளுக்குத் தண்டனை வாங்கித் தரப்பட்டுள்ளது. முக்கியப் பிரமுகர்கள் விடுவிக்கப்பட்டதாகக் கூறப்படும் குற்றச்சாட்டில் உண்மை இல்லை” என்று மறுத்தார்கள்.

பாதிக்கப்பட்ட பெண்களில் ஒருவர் நர்ஸிங் படித்துவருகிறார். இன்னொருவர் வீட்டில் இருக்கிறார். வேதனையிலிருந்து இன்னமும் மீளாத அவர்கள், இந்தத் தீர்ப்புக்குப் பிறகு சற்று ஆறுதலையும் தெம்பையும் பெற ஆரம்பித்திருப்பார்கள் என்று நம்புவோம்! - ஜி.சதாசிவம், படங்கள்: எஸ்.தேவராஜன்

. தண்டனை விவரம்

கு ற்றவாளிகள் என்று அறிவிக்கப்பட்ட ஆனந்த்ராஜ், பாலசுப்பிரமணியன், கலா, தனலட்சுமி, ஸ்ரீதர், ஃபாத்திமா, மோகன்ராஜ், மதிவாணன், செல்வராஜ், அன்பழகன் ஆகிய 10 பேருக்கும் வாழ்நாள் முழுவதும் சிறைத்தண்டனை அனுபவிக்கும் வகையில் ஆயுள்தண்டனையும், பாதிரியார் அருள்தாஸுக்கு 30 ஆண்டுகள் சிறைத்தண்டனையும், கிரிஜா, ஷர்மிளா, ராஜலட்சுமி ஆகியோருக்கு 20 ஆண்டுகள் சிறைத்தண்டனையும், மற்றவர்களுக்கு 10 ஆண்டுகள் சிறைத்தண்டனையும், அபராதமும் விதித்துத் தீர்ப்பு வழங்கப்பட்டுள்ளது.