Published:Updated:

பாலியல் வழக்கில் முன்னாள் எம்.எல்.ஏ... விடுதலை செய்த உயர் நீதிமன்றம்...

வேதனையில் மாதர் சங்கத்தினர்!

பிரீமியம் ஸ்டோரி

சிறுமியைக் கூட்டுப் பாலியல் வன்கொடுமை செய்த வழக்கில் பத்து ஆண்டுகள் சிறைத் தண்டனை விதிக்கப்பட்ட தி.மு.க முன்னாள் எம்.எல்.ஏ-வான ராஜ்குமாரை சென்னை உயர் நீதிமன்றம் விடுதலை செய்துள்ளது. இந்தத் தீர்ப்பால், அந்தப் பிரச்னையைக் கையிலெடுத்துப் போராடிவந்த மாதர் சங்கத்தினர் கடும் அதிர்ச்சிக்குள்ளாகியிருக்கின்றனர்.

பெரம்பலூர் மாவட்டம், துரைமங்கலத்தைச் சேர்ந்தவர் ராஜ்குமார். முன்னாள் எம்.எல்.ஏ-வான இவர், 2012-ம் ஆண்டு, ஜூன் மாதம் `வீட்டு வேலைக்கு ஆள் தேவை’ என்று விளம்பரம் கொடுத்துள்ளார். அதன் பேரில் கேரளாவிலிருந்து 15 வயது சிறுமி வேலைக்குச் சேர்ந்துள்ளார். வேலைக்குச் சேர்ந்த இரண்டு தினங்களிலேயே தன் தந்தைக்கு போன் செய்து, `இரவு நேரத்தில் என்னைத் துன்புறுத்துகிறார்கள். உடனே அழைத்துச் செல்லுங்கள்’ என்று தகவல் சொல்லியிருக்கிறார். நிலைமையின் விபரீதம் புரியாத அவர்களோ, சிறுமியைச் சமாதானப்படுத்தி, தங்கவைத்துள்ளனர்.

இந்த நிலையில் சிறுமிக்கு உடல்நிலை சரியில்லை என்று தகவல் வரவே, பெரம்பலூருக்குப் புறப்பட்டு வந்துள்ளனர். பெற்றோர் வந்து பார்த்தபோது சிறுமி சுயநினைவு இல்லாமல் மருத்துவமனையில் இருந்துள்ளார். அங்கு மூன்று நாள்கள் சிகிச்சையளிக்கப்பட்டும் எந்தவித முன்னேற்றமும் இல்லாததால் கேரளாவுக்கு அழைத்துச் செல்ல முயன்றனர். வழியில் உடல்நிலை மோசமானதால் தேனி அரசு மருத்துவமனையில் சேர்க்கப்பட்டார். அங்கு சிகிச்சை பலனளிக்காமல் இறந்துபோனார்.

பாலியல் வழக்கில் முன்னாள் எம்.எல்.ஏ... விடுதலை செய்த 
உயர் நீதிமன்றம்...

சிறுமிக்கு இறுதிச்சடங்கு செய்யும்போதுதான் அவர் பலாத்காரம் செய்யப்பட்ட விஷயத்தைப் பெற்றோர் தெரிந்துகொண்டனர். மார்க்சிஸ்ட் கட்சியினர் மற்றும் மாதர் சங்கத்தினரின் தொடர் போராட்டங்களால், சிறுமியின் உடல் மறு பிரேத பரிசோதனை செய்யப்பட்டது. அதில், சிறுமி பலாத்காரம் செய்யப்பட்டது உறுதியானது.

‘‘பிறந்தநாள் கொண்டாடிய ராஜ்குமார், தன் வீட்டில் நண்பர்களுக்கு மது விருந்து கொடுத்ததுடன், நண்பர்களுடன் சேர்ந்து அந்தச் சிறுமிக்கு பாலியல் தொந்தரவு கொடுத்ததால், அவள் உடல்நலம் குன்றி இறந்து போனாள்’’ என்று ராஜ்குமார் மீது குற்றம்சாட்டப்பட்டது.

ராஜ்குமார் மற்றும் அவரின் நண்பர்கள்மீது வழக்கு பதிவு செய்யப்பட்டது. சென்னை சிறப்பு நீதிமன்றத்தில் நடந்த வழக்கில், ராஜ்குமாருக்கும் அவரின் நண்பர் ஜெய்சங்கருக்கும் தலா 10 ஆண்டுகள் கடுங்காவல் தண்டனையும், 42,000 ரூபாய் அபராதமும் விதிக்கப்பட்டது. இந்தத் தீர்ப்பை எதிர்த்து சென்னை உயர் நீதிமன்றத்தில் ராஜ்குமார் மேல்முறையீடு செய்ததில், அவர் தற்போது விடுவிக்கப்பட்டுள்ளார்.

இந்த விவகாரம் தொடர்பாக கடந்த 10.02.2019 தேதியிட்ட ஜூ.வி-யில், ‘தி.மு.க முன்னாள் எம்.எல்.ஏ-வுக்கு பத்தாண்டுகள் சிறை!’ என்ற தலைப்பில் கட்டுரை எழுதியிருந்தோம். அதில் சிறுமியின் தந்தை அளித்த பேட்டியில், ‘‘நாங்கள் குழந்தைக்குச் சிகிச்சையளித்த ஒவ்வொரு மருத்துவமனையிலும் எங்களைப் பின்தொடர்ந்து வந்த எம்.எல்.ஏ-வின் ஆட்கள், மருத்துவமனை நிர்வாகத்தினரை மிரட்டி எங்களுக்கு உண்மை தெரியாமல் பார்த்துக்கொண்டார்கள். பிரேத பரிசோதனையின்போதும் அவள் பாலியல் வன்கொடுமை செய்யப்பட்டதைச் சொல்லவில்லை. இறுதிச் சடங்கின்போதுதான், மார்பிலும் பிறப்பு உறுப்பிலும் காயங்கள் இருந்ததைப் பார்த்தோம். உடனே மார்க்சிஸ்ட் கட்சி, மாதர் சங்கத் தோழர்களிடம் விஷயத்தைச் சொன்னோம். அவர்கள் போராட்டம் நடத்தினார்கள். அதன் பிறகே உண்மை வெளியானது’’ என்று சொல்லியிருந்தார்.

ராஜ்குமார்
ராஜ்குமார்

ராஜ்குமாரை விடுதலை செய்திருக்கும் நிலையில் ஜனநாயக மாதர் சங்க நிர்வாகிகளிடம் பேசினோம். ‘‘நாங்கள் இந்த விவகாரத்தை கையிலெடுத்துப் போராடியபோதே ராஜ்குமார் தரப்பினர் எங்களை மிரட்டினர்; பேரம் பேசினர். நாங்கள் மசியவில்லை. சாட்சிகளையும் மிரட்டினார்கள். நாங்கள் அவர்களிடமிருந்து சாட்சிகளைப் பாதுகாத்து கோர்ட்டில் ஆஜர் செய்தோம். நாங்கள் சமர்ப்பித்த ஆதாரங்களின் அடிப்படையில்தான் சிறப்பு நீதிமன்றம் அவர்களுக்கு தண்டனை வழங்கியது.

தீர்ப்பு வந்த பிறகும் அவர்களின் மிரட்டல்கள் தொடர்ந்தன. சிறுமியின் பெற்றோரே பயந்து தலைமறைவு வாழ்க்கை நடத்தினர். தற்போது ராஜ்குமார் விடுதலை செய்யப்பட்டிருப்பது அதிர்ச்சியாக இருக்கிறது. ஆனாலும் விட மாட்டோம். இந்த வழக்கை அடுத்த கட்டத்துக்கு எடுத்துச் செல்வோம். இதற்கிடையில், ராஜ்குமார் தரப்பினர் பாதிக்கப்பட்ட குடும்பத்தினரை சரிக்கட்டவும் முயன்று வருகிறார்கள்’’ என்றனர்.

ராஜ்குமாரிடம் பேசினோம். “இந்த வழக்கில் நியாயம் வென்றுள்ளது. ஆதாரங்கள் இல்லாத காரணத்தால் நீதிமன்றம் என்னை விடுதலை செய்துள்ளது. இந்த நிலையில், நான் மிரட்டுகிறேன்; பாதிக்கப்பட்ட குடும்பத்தினரை சரிக்கட்ட முயல்கிறேன் என்றெல்லாம் சொல்வது தவறு” என்றார்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு