Published:Updated:

உருண்டது அமைச்சர்கள் தலை... கடைசியில் எல்லாமே பிழை!

சிலைக்கடத்தல் விவகாரம்...

பிரீமியம் ஸ்டோரி

‘தமிழகத்தில் நடைபெற்ற தொடர் சிலைக்கடத்தல் சம்பவங்களில், இரண்டு அமைச்சர்களுக்குத் தொடர்பு இருக்கிறது’ - இப்படி ஒரு தகவலைச் சிலைக்கடத்தல் தடுப்புப் பிரிவு சிறப்பு அதிகாரி பொன்.மாணிக்கவேல் தரப்பு சொன்னதாகத் தகவல் பரவியதையடுத்து, தமிழகமே திமிலோகப்பட்டது. ‘அவரா... இவரா?’ என்று சில அமைச்சர்கள் பெயர்களையும் அதற்கான காரணங்களையும் குறிப்பிட்டு வாட்ஸ் அப் உள்ளிட்ட சமூக வலைதளங்களில் பரபரப்பாக விவாதிக்கப்பட்டது. இறுதியில், அனைத்துமே வதந்தி எனத் தெரியவர, விவகாரம் புஸ் என்றானது.

சிலைக்கடத்தல் வழக்கில் பொன்.மாணிக்கவேலால் குற்றம்சாட்டப்பட்டு கைதுசெய்யப்பட்டவர் டி.எஸ்.பி-யான காதர் பாட்ஷா. இந்த நிலையில், ‘பழவலூர் சிலைக்கடத்தல் வழக்கில் தொடர்புடைய தீனதயாளனைத் தப்பிக்கவைக்க நினைத்தார் பொன்.மாணிக்கவேல். என்னைப் பழிவாங்கும் நோக்கிலும் பொய்வழக்கு பதிவுசெய்தார்’ என சென்னை உயர் நீதிமன்றத்தில் பொன்.மாணிக்கவேலுக்கு எதிராக மனுதாக்கல் செய்தார் காதர் பாட்ஷா.

உருண்டது அமைச்சர்கள் தலை... கடைசியில் எல்லாமே பிழை!

அந்த வழக்கு, ஜூலை 24-ம் தேதி விசாரணைக்கு வந்தது. அப்போது, சிலைக்கடத்தல் சிறப்பு அதிகாரி பொன்.மாணிக்கவேல் மற்றும் வழக்கறிஞர் யானை ராஜேந்திரன் ஆகியோர் தங்களையும் இந்த வழக்கில் இணைத்துக் கொள்ளுமாறு மனுதாக்கல் செய்தனர். பொன்.மாணிக்கவேலின் இணைப்பு மனுவை விசாரணைக்கு ஏற்றுக்கொண்ட நீதிபதி, யானை ராஜேந்திரன் மனுவைத் தள்ளுபடி செய்தார். இதையடுத்து, சிலைக் கடத்தலில் இரண்டு அமைச்சர்களுக்குத் தொடர்பு இருப்பதாக பொன்.மாணிக்க வேலின் வழக்கறிஞர் நீதிமன்றத்தில் தெரிவித்ததாகத் தகவல் பரவியது. தமிழகத்தையே உலுக்கிய நிலையில், அந்தத் தகவல் வதந்தி என்று, மறுதினம் இரு தரப்பு வழக்கறிஞர்களும் மறுத்துள்ளனர்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

காதர் பாட்ஷா தரப்பு வழக்கறிஞர் இன்ஃபேன்ட் தினேஷ், ‘‘காதர் பாட்ஷா தொடர்ந்த வழக்கில், பொன்.மாணிக்கவேல் தன்னை இணைத்துக்கொள்ளச் சொல்லி மனு தாக்கல் செய்தார். அப்போது, அவர் தரப்பில் கொடுக்கப்பட்ட அஃபிடவிட்டிலும் அமைச்சர்கள் குறித்த எந்தத் தகவலும் இல்லை. சிலைக்கடத்தலில் இரண்டு அமைச்சர்களுக்குத் தொடர்பிருப்பதாகவும் பொன்.மாணிக்கவேல் தரப்பில் யாரும் பேசவுமில்லை’’ என்றார்.

பொன்.மாணிக்கவேல் தரப்பு வழக்கறிஞர் செல்வராஜ், ‘‘தலைமைச் செயலர் மற்றும் டி.ஜி.பி மீது, பொன்.மாணிக்கவேல் தொடர்ந்த நீதிமன்ற அவமதிப்பு வழக்கு, ஏற்கெனவே நிலுவையில் உள்ளது. சிலைக்கடத்தல் வழக்குகளை விசாரிக்க, சிறப்பு அமர்வு இருந்தது. சிறப்பு அதிகாரியாக பொன்.மாணிக்கவேல் நியமிக்கப்பட்ட பிறகு, விசாரணை நடத்துவதற்கு அரசு எந்தவித உதவியையும் செய்யவில்லை என்று கூறியிருந்தோம். அதோடு, விசாரணையில் இரு அமைச்சர்கள் தலையிடுவதாக, சிறப்பு அமர்வு இருக்கும்போதே குறிப்பிட்டிருந்தோம். இந்த நிலையில், காதர் பாட்ஷா தொடர்ந்த இந்த வழக்கில், இதற்காகவே இணைப்பு மனு தாக்கல் செய்யப்பட்டது. அதற்கான விசாரணையில் அரசுத் தரப்பு வழக்கறிஞர் குறுக்கிட்டபோது, பழைய விஷயங்களைத் தெரிவித்தோம். மற்றபடி அமைச்சர்கள் சிலைக்கடத்தலில் ஈடுபட்டதாக நாங்கள் தெரிவிக்கவில்லை. நீதிமன்றத்தில் நாங்கள் பேசியது தவறாக எடுத்துக்கொள்ளப்பட்டிருக்கிறது’’ என்றார்.

காதர் பாட்ஷா தொடர்ந்த வழக்கு தொடர்பாக குளறுபடியான தகவல்கள் மீடியாக்களில் வெளிவருவதால், இந்த விஷயத்தை நீதிமன்றம் மிகவும் கவலையுடன் பார்க்கிறது. அதனால், அந்த வழக்கு தொடர்பாக எவ்வித செய்தியையும் வெளியிடக்கூடாது என்று உத்தரவிட்டிருக்கிறது.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு