Published:Updated:

தமிழகம் இன்ஃபோ ஸ்பெஷல் #7 - புதுச்சேரி 200 - இன்ஃபோ புக்

ஒட்டுமொத்த விகடனுக்கும் ஒரே ஷார்ட்கட்

Use App
தமிழகம் இன்ஃபோ ஸ்பெஷல் #7 - புதுச்சேரி 200 - இன்ஃபோ புக்
தமிழகம் இன்ஃபோ ஸ்பெஷல் #7 - புதுச்சேரி 200 - இன்ஃபோ புக்

தமிழகம் இன்ஃபோ ஸ்பெஷல் #7 - புதுச்சேரி 200 - இன்ஃபோ புக்

பிரீமியம் ஸ்டோரி

வணக்கம் சுட்டி நண்பர்களே...

‘இந்தியாவின் தலைநகரம் புது டெல்லியாக இருக்கலாம்... ஆனால், நம் ஒவ்வொருவருக்கும் ஒரு தலைநகர் என்பது, அவரவர் பிறந்த ஊர்தான்’ என்கிறார் ஒரு பிரபல கவிஞர்.

தமிழகம் இன்ஃபோ ஸ்பெஷல் #7 - புதுச்சேரி 200 - இன்ஃபோ புக்

உலகில் நடக்கும் ஒவ்வொரு விஷயத்தையும் உடனுக்குடன் தெரிந்துகொள்ளும் அதே நேரம், நாம் பிறந்த மண்ணின், நம் ஊரின் வரலாற்றையும் பண்பாட்டையும் தெரிந்துகொள்ளும் அவசியத்தை நோக்கமாகக் கொண்டு உருவாக்கிவருவதுதான் இந்த இணைப்பிதழ். இதில், புதுச்சேரியின்  வரலாற்றுச் சிறப்புமிக்க இடங்கள், சாதனைகள், பிரபலங்கள் எனப் பல்வேறு தகவல்களைத் திரட்டிக்கொடுத்திருக்கிறோம். இது, உங்களுக்கு நிச்சயம் மகிழ்ச்சியை அளிக்கும். அத்துடன், பிரமாண்டமான போட்டியும் வைத்துப் பரிசும் அளித்தால், மகிழ்ச்சி இரட்டிப்பாகும் அல்லவா?

சேலம், சென்னை, தருமபுரி, மதுரை, நெல்லை, கோவை மற்றும் ஆகிய இணைப்பிதழ்களைத் தொடர்ந்து, அந்தந்த மாவட்டங்களில் நடத்திய போட்டிகளில், பல்வேறு பள்ளிகளைச் சேர்ந்த மாணவர்கள் ஆர்வத்துடன் பங்கேற்றனர். அந்தப் புத்தகத்துக்கும், நீட் தேர்வு போன்று OMR ஷீட் முறையில் நடத்தப்பட்ட தேர்வுக்கும் பெரும் வரவேற்பு கிடைத்தது.

‘ஒரே கல்லில் இரண்டு மாங்காய் போல, எங்கள் மாவட்டத்தைப் பற்றித் தெரிந்துகொள்ளவும், வருங்காலத்தில் பல போட்டித் தேர்வுகளைக் குழப்பமின்றி எதிர்கொள்ளவும் இணைப்பிதழ் வழிவகுத்தது’ என மாணவர்கள் சொல்லியிருந்தனர். ஆசிரியர்களும், ‘எங்கள் மாணவர்களுக்குக் கிடைத்த இந்த நல்ல வாய்ப்பை, தமிழ்நாட்டின் மற்ற மாணவர்களும் பெற வேண்டும். உங்கள் பணி தொடரட்டும்’ என வாழ்த்தியிருந்தனர். அந்த வரவேற்பு கொடுத்த உற்சாகத்தில் தொடர்கிறோம்.

‘சேலம் 150’, ‘சென்னை டே 2018’ ‘தருமபுரி 200’, `மதுரை 200' `நெல்லை 200'  `கோவை 200' ஆகியவற்றைத் தொடர்ந்து,  இப்போது புதுச்சேரி 200 இன்ஃபோ புக் இதோ... உங்கள் கைகளில்.

அன்பு புதுச்சேரி சுட்டிகளே... வாருங்கள் நம்மைச் சுற்றி உள்ளவற்றை அறிவோம்.

தமிழகம் இன்ஃபோ ஸ்பெஷல் #7 - புதுச்சேரி 200 - இன்ஃபோ புக்

1. கடலோரக் கவிதை

புதுச்சேரியை ‘கடலோரக் கவிதை’ என்று சொல்லலாம். புதுச்சேரி யூனியன் பிரதேசத்தில் புதுச்சேரி, மாஹே, யேனம், காரைக்கால் ஆகிய நான்கு மாவட்டங்களும் கடற்கரைப் பகுதியில் அமைந்துள்ளன.

2. ஒன்றியப் பகுதி

இந்திய அரசியல் அமைப்புச் சட்டப்படி மாநிலங்களைப் போல யூனியன் பிரதேசங்கள் இருப்பதில்லை. யூனியன் பிரதேசம், குடியரசுத் தலைவரால் நேரடியாக நிர்வாகம் செய்யப்படுகிறது. குடியரசுத் தலைவரால் நியமிக்கப்படும் துணை நிலை ஆளுநர், குடியரசுத் தலைவரின் பிரதிநிதியாக யூனியன் தலைவரின் பிரதிநிதியாக யூனியன் பிரதேசத்தை நிர்வாகம்செய்வார்.

3. ஸ்பெஷல் அதிகாரங்கள்

சில யூனியன் பிரதேசங்களில் சட்டப்பேரவை அல்லது அமைச்சரவை அல்லது இரண்டையும் அமைத்துக்கொள்ளலாம். இதற்கு அரசியல் அமைப்புச் சட்டம் வழி வகுக்கிறது. அந்த வகையில், தற்போது இந்தியாவில் உள்ள 7 யூனியன் பிரதேசங்களில் பாண்டிச்சேரி மற்றும் புது டெல்லியில் மட்டும் சட்டப்பேரவை உள்ளது.

தமிழகம் இன்ஃபோ ஸ்பெஷல் #7 - புதுச்சேரி 200 - இன்ஃபோ புக்

4.ஆறில் ஒருவன்

இந்தியாவில் 7 யூனியன் பிரதேசங்கள் உள்ளன. இந்த 7 யூனியன் பிரதேசங்களில் டெல்லிக்கு, தலைநகர் யூனியன் பிரதேசம் என்ற சிறப்புத் தகுதி வழங்கப்பட்டிருக்கிறது. மீதியுள்ள 6 யூனியன் பிரதேசங்களில் சட்டமன்றமும், மக்களால் தேர்ந்தெடுக்கப்பட்ட அரசும் உள்ள ஒரே யூனியன் பிரதேசம், புதுச்சேரி மட்டுமே.

5. புதுச்சேரியான பாண்டிச்சேரி

1947 ஆம் ஆண்டு, இந்தியாவின் பிற பகுதிகள் சுதந்திரம் பெற்றபோதும் பிரான்ஸின் ஆட்சிக்கு உட்பட்ட பகுதிகள், அவர்களின் கட்டுப்பாட்டிலேயே இருந்தன. 1962 ஆம் ஆண்டு, இப்பகுதிகளை இந்திய அரசிடம் ஒப்படைப்பதற்கான சட்டப் பிரிவுகள் நிறைவேற்றப்பட்டன. அதைத் தொடர்ந்து, இந்தியாவில் பிரான்ஸ் நாட்டின் கட்டுப்பாட்டில் இருந்த நான்கு பகுதிகளும் ஒன்றிணைக்கப்பட்டு, யூனியன் பிரதேசம் ஆனது. 2006 ஆம் ஆண்டு பாண்டிச்சேரி என்ற பெயர் `புதுச்சேரி' என்று மாற்றப்பட்டது.

ஆதாரங்கள்

6. நாட்குறிப்பு தரும் நல்ல செய்தி

புதுச்சேரி பற்றிய அறிய செய்திகளை அழகாகத் தருவது ஆனந்தரங்கம் பிள்ளையின் டைரிக் குறிப்புகள்தாம். ஆனந்தரங்கம் பிள்ளை, தன்னுடைய புகழ்பெற்ற டைரிக் குறிப்புகளை தமிழில் எழுதியதுதான் தனிச் சிறப்பு. ஐரோப்பியர்களின் ஆட்சிக்கு இந்தியா உட்பட்டிருந்த காலத்தில், இந்தியரால் எழுதப்பட்ட முதலாவது நாட்குறிப்பு இதுதான். வரலாற்றுச் செய்திகளை, நிகழ்ச்சிகளை நெஞ்சைத் தொடும் விதத்தில் விளக்குவதால், இந்த நாட்குறிப்புகள் ரொம்பவே பிரபலம்.

7. திருபுவனைத் திருப்பம்

ஆயிரம் ஆண்டுகளுக்கு மேற்பட்ட வரலாற்றை உடையது திருபுவனை. கி.பி 10ஆம் நூற்றாண்டைச் சேர்ந்த பராந்தகச் சோழன், தன்னுடைய மனைவியான திரிபுவன மாதேவியின் பெயரால் திருவாண்டார் கோயில் மற்றும் சுற்றுப்புற கிராமங்களையும் வடுகூரையும் இணைத்தார். அதற்கு, `திரிபுவன மாதேவி சதுர்வேதி மங்கலம்' என்று பெயர் வைத்து பிராமணர்களுக்கு வழங்கினார். இந்த இடம்தான் திருபுவனை என்று அழைக்கப்படுகிறது.

8. வீர (பட்டினம்) வரலாறு

இன்று புதுச்சேரியில் `வீராம்பட்டினம்' என்று அழைக்கப்படும் ஊருக்கு சங்க காலத்தில் `வீரப்பட்டினம்' என்று பெயர். சங்க காலத்தில் புகழ் பெற்று விளங்கிய புலவர்களான வீரை வெளியனாரின் சொந்த ஊர் இது. இவர் புறநானூற்றில் 320-வது பாடலை எழுதியிருக்கிறார். இவரது மகன் வீரை வேளியின் தித்தனார் அகநானூற்றில் 188-வது பாடலைப் பாடியிருக்கிறார்கள்.

9. அரசு ஆதாரங்கள்

கடலூர் மாவட்ட கெசட், தஞ்சாவூர் மாவட்ட கெசட், பிரெஞ்சுக்காரர்களின் ஆட்சியில் வெளிவந்த தினசரிப் பத்திரிகைகள், வாரப் பத்திரிகைகள், மாத இதழ்களில் எல்லாம் புதுச்சேரி பற்றி நுட்பமான, சுவையான பல செய்திகள் கிடைக்கப்பெற்றன. அத்துடன், `ஆனந்த ரங்கம் பிள்ளையின் நாட்குறிப்பு' அற்புதமான இலக்கிய ஆதாரம்.

10. அயல் நாட்டு ஆதாரங்கள்

கிரேக்க நில நூல் ஆசிரியர் தாலமியும், எரித்திரியக் கடலின் பெரிப்ளுசு என்ற நூலின் ஆசிரியரும் தங்கள் பயண நூல்களில் `புதுக்கே' என்று ஒரு துறைமுகத்தைப் பற்றிக் கூறுகின்றனர். இந்தியாவில் இருந்த ஐரோப்பா நாட்டைச் சேர்ந்த சில கம்பெனிகள், தங்களுக்குள் எழுதிக்கொண்ட கடிதங்களும் அதற்கு நல்ல ஆதராங்கள்தாம்.

11. ஓவியங்களின் குரல்

புதுச்சேரி பிரதேசத்தில் உள்ள கோயில்களில் காணப்படும் ஓவியங்களும் சிற்பங்களும், நம் சிந்தையைக் கவர்கின்றன. மேலும், அந்தக் கால மக்களின் அரசியல், சமுதாயப் பொருளாதார நிலையை ஓரளவு தெரிந்துகொள்ள உதவிசெய்கின்றன. அப்படிப்பட்ட சில ஓவியங்களையும் சிற்பங்களையும், பாகூர், திருபுவனை, வில்லியனூர், திருவாண்டனூர் கோயில், காரைக்கால் போன்ற ஊர்களில் உள்ள கோயில்களில் நாம் பார்க்க முடியும்.

தமிழகம் இன்ஃபோ ஸ்பெஷல் #7 - புதுச்சேரி 200 - இன்ஃபோ புக்

12. இலக்கியங்களில் இன் சொல்

புதுச்சேரி பற்றி தெரிந்துகொள்வதற்கு தமிழ் இலக்கியங்கள்தாம் பெரிய அளவில் உதவி செய்கின்றன. விக்கிரம சோழன் உலா, வில்லைப் புராணம், வில்லை முத்துக்குமாரர் பிள்ளைத் தமிழ், பெரிய புராணம் போன்றவற்றிலிருந்து புதுச்சேரி பற்றிய செய்திகளைத் தெரிந்துகொள்ளமுடிகிறது.

13. சொல் வெட்டுகள் பாகூர் பட்டயம்

புதுச்சேரி பிரதேசத்தில் பல்லவர்கள், ராஷ்ட்டிரக்கூடர்கள், சோழர்கள், பாண்டியர்கள் ஆகிய மன்னர்களின் பல்வேறு கல்வெட்டுகள் கண்டுபிடிக்கப்பட்டிருக்கின்றன. இது தவிர, பல்லவ மன்னன் நிருபதுங்கவர்மனின் செப்புப் பட்டயம் ஒன்று பாகூரில் கிடைத்திருக்கிறது. இவை எல்லாம் நமக்குக் கிடைத்திருக்கக்கூடிய பிக் சோர்ஸ்.

14. காஸ்ட்லி காயின்ஸ்

திருபுவனைக்கு அருகே, முதலாம் ராஜ ராஜ சோழன் காலத்திய நாணயங்கள் கண்டு பிடிக்கப்பட்டுள்ளன. புதுச்சேரியின் வரலாற்றை எழுதுவதற்கு இந்த நாணயங்கள்தாம் பெரிய அளவில் உதவிபுரிகின்றன. இவை தவிர, புதுச்சேரிக்கு அருகே கண்டுபிடிக்கப்பட்டுள்ள நாணயங்கள், மேலை நாடுகளிடம் புதுச்சேரி கொண்டிருந்த வியாபார உறவை அறிந்துகொள்ள உதவுகின்றன.

15. புதைபொருள் புதையல்கள்

சர். மார்டிமர் வீலர் என்கிற புதைபொருள் ஆராய்ச்சியாளர்தான் அரிக்கமேட்டில் ஆராய்ச்சிகள் மேற்கொண்டார். அந்த ஆராய்ச்சியின் முடிவில், அரிக்கமேட்டில் ஒரு ரோம் நாட்டுக் குடியிருப்பும், முன்பு பிசினஸில் கொடிகட்டிப் பறந்த வணிக நிலையமும் கண்டுபிடிக்கப்பட்டன. இவற்றின் மூலம் புதுச்சேரி மக்களின் வாழ்க்கை, பண்பாடு முதலியவற்றைத் தெரிந்துகொள்ள முடிகிறது.

வரலாறு

16. காஞ்சிப் பல்லவர்கள் கைப்பற்றுதல்

மாமல்லபுரத்தைத் தலைமையிடமாகக் கொண்டு ஆட்சி செய்த பல்லவர்கள், தங்கள் ஆட்சிப் பகுதியைத் தெற்கில் விரிவுப்படுத்தியபோது, புதுச்சேரி, பல்லவர்களின் கீழ் வந்தது. 4ஆம் நூற்றாண்டின் தொடக்கத்தில், புதுச்சேரி பல்லவப் பேரரசின் கீழ் வந்தது.

17. சோறு படைத்த சோழர்கள்

கி.பி 6ஆம் நூற்றாண்டின் தொடக்கத்திலிருந்தே, தமிழகத்தில் சோழர்களின் கொடி உயரத் தொடங்கியது. கொஞ்சம் கொஞ்சமாக விரிவடைந்த சோழப் பேரரசு புதுச்சேரி பகுதியையும் கைப்பற்றியது. 10ஆம் நூற்றாண்டிலிருந்து 13ஆம் நூற்றாண்டு வரை சுமார் 400 ஆண்டு காலம் புதுச்சேரி பகுதி, சோழர்களின் கீழ் இருந்தது.

18. பாண்டியர்களின் கீழ் பாண்டிச்சேரி

மூவேந்தர்களான சேர, சோழ, பாண்டியர்கள் எப்போதுமே தங்களுக்குள் முட்டி மோதிக்கொண்டே இருந்தனர். சோழர்கள் பகுதியை பாண்டியர்கள் பிடிப்பதும், பாண்டியர்கள் பகுதியை சோழர்கள் பிடிப்பதும் வாடிக்கை. அப்படித்தான் 13-ம் நூற்றாண்டில் சோழர்களைத் தோற்கடித்து பாண்டியர்கள் பாண்டிச்சேரியைக் கைப்பற்றினர்.

தமிழகம் இன்ஃபோ ஸ்பெஷல் #7 - புதுச்சேரி 200 - இன்ஃபோ புக்

19. விஜயநகரத்திடம் வீழ்ந்தது

தக்காணத்தில் இஸ்லாமியர்களின் ஆட்சிக்கு எதிராக எழுந்த விஜய நகரப் பேரரசு கர்நாடகம், தமிழ் நாடு, ஆந்திரா என்று விறுவிறுவென்று வளர்ந்தது. 14ஆம் நூற்றாண்டின் இறுதியில், பாண்டிச்சேரி விஜய நகரப் பேரரசிடம் வீழ்ந்தது.

20. பீஜப்பூர் அரசின் பிடி

விஜய நகரப் பேரரசின் கீழ் ஏறத்தாழ 200 ஆண்டுக்காலம் இருந்த பாண்டிச்சேரி, பிறகு பீஜப்பூர் சுல்தான் அரசின் பிடிக்குள் சென்றது. பீஜப்பூர் சுல்தான்கள், கி.பி1638ஆம் ஆண்டு பாண்டிச்சேரியைக் கைப்பற்றினர்.

21. பிரான்ஸ் பிடித்துக் கொண்டது

17ஆம் நூற்றாண்டின் தொடக்கத்தில், ஐரோப்பிய நாடு உலகமெங்கும் தங்கள் காலனிகளை நிறுவின. அந்த வகையில் இந்தியாவுக்கு வியாபாரத்திற்காக வந்த பிரெஞ்சுக்காரர்கள் பாண்டிச்சேரி பகுதியில் தங்களது வியாபார நிறுவனத்தை நிறுவினார்கள். பிறகு, ஆட்சியாளர்களிடம் நிலவிய ஒற்றுமையின்மையைப் பயன்படுத்திக்கொண்டு, புதுச்சேரியை பிரெஞ்சுக்காரர்கள் பிடித்துக்கொண்டார்கள்.

22. பிரெஞ்சுக்காரர்களின் தலைநகரம்

வியாபாரத்துக்காக இந்தியாவுக்கு வந்த போர்ச்சுக்கீசியர்கள் கோவாவையும், டச்சுக்காரர்கள் தரங்கம்பாடியையும், பழவேற்காட்டையும், ஆங்கிலேயர்கள் கொல்கத்தாவையும் கைப்க்பற்றிக் கொண்டு ஆட்சியைத் தொடங்கினர். அதுபோல பிரெஞ்சுக்காரர்களுக்கு பாண்டிச்சேரி கடற்கரைப் பட்டினம் தலைநகரமாக அமைந்தது.

23. அந்நியர்களிடம் பாண்டிச்சேரி பட்டபாடு

வியாபாரத்திற்காக இந்தியாவுக்கு வந்த ஐரோப்பிய நாடுகள், இந்தியாவில் பல பகுதிகளை ஆக்கிரமித்துக் கொண்டதோடு, தங்கள் எல்லையை விரிவாக்க, ஆதிக்கப் போட்டியின் இறுதியுத்தமாக பிரெஞ்சுக்காரர்களுக்கும் ஆங்கிலேயர்களுக்கும் இடையே நடந்தது. இரண்டு நாடுகளுக்கும் இடையே மூன்று முறை பெரும்போர்கள் (கர்நாடகப் போர்கள்) நடந்தன. இந்தக் காலகட்டத்தில், பாண்டிச்சேரி பிரான்ஸ் மற்றும் இங்கிலாந்தின் ஆட்சிக்குக் கீழ் மாறி மாறி வந்தது.

24. புதுச்சேரி - புதுமையான யூனியன் பிரதேசம்

இந்தியாவில் உள்ள 7 யூனியன் பிரதேசங்களில் பாண்டிச்சேரியும் ஒன்று. மற்ற யூனியன் பிரதேசங்களை விட பாண்டிச்சேரி கொஞ்சம் வித்தியாசமானது. புதுச்சேரி யூனியனில் புதுச்சேரி, காரைக்கால், மாஹே, யேனம் ஆகிய நான்கு பகுதிகள் இருக்கின்றன. புதுச்சேரி, தமிழ்நாட்டில் பெண்ணையாற்றுக்கு வடக்கிலும், காரைக்கால், தஞ்சை மாவட்டத்தில் அரிசல் ஆற்றங்கரையிலும், மாஹே கேரளாவிலும், ஏனாம், ஆந்திரப் பிரதேசத்திலும் இருக்கின்றன.

25. பிரான்ஸ் நாட்டின் ஆட்சி

கி.பி 1674ஆம் ஆண்டு தொடங்கி, 1954ஆம் ஆண்டு வரை ஏறத்தாழ 300 ஆண்டுகள் பாண்டிச்சேரி பகுதி, பிரான்ஸ் நாட்டின் காலனி ஆதிக்கப் பகுதியாகவே இருந்தது. 1954ஆம் ஆண்டு நவம்பர் மாதம் 1ஆம் தேதி புதுச்சேரி விடுதலை பெற்றது.

26. புதுச்சேரியின் அடிமைகள்

எல்லா ஐரோப்பியர்களையும் போலவே பிரெஞ்சுக்காரர்களும் அடிமை வியாபாரத்தில் ஈடுபட்டு இருந்தார்கள். ஆனந்த ரங்கம் பிள்ளையின் நாட்குறிப்பில்கூட அடிமை வியாபாரம் பற்றிய குறிப்புகள் இருக்கின்றன. பிரெஞ்சுக்காரர்கள், அடிமைகள் பற்றிய ரிஜிஸ்டர் ஒன்றையும் பராமரித்து வந்திருக்கிறார்கள். அடிமைச் சந்தையில் 7 முதல் 15 வயதுக்கு உட்பட்ட சிறுமிகளின் விலை எவ்வளவு தெரியுமா? மூன்று ரூபாய்.
 
27. சுதந்திரமும் குடியரசும்

புதுச்சேரிக்கு 1954ஆம் ஆண்டு நவம்பர் மாதம் முதல் தேதி சுதந்திரம் கிடைத்தாலும், இதற்கான ஒப்பந்தம் முறைப்படி ஆகஸ்ட் 16ஆம் தேதியே கையொப்பம் ஆகிவிட்டது. எனவே, நீண்ட காலம் ஆகஸ்ட் மாதம் 16ஆம் தேதியே சுதந்திர தினமாக கொண்டாடப்பட்டு வந்தது. ஆனால், சில பிரெஞ்சு  அமைப்புகளின் கோரிக்கைகளை அடுத்து, நவம்பர் முதல் தேதி புதுச்சேரியின் சுதந்திர தினமாகவும், ஆகஸ்ட் 16ஆம் தேதி குடியரசு தினமாகவும் கொண்டாடப்பட்டுவருகிறது.

28. பிரெஞ்சு குடியுரிமை பாசத்தை விடாத பாண்டிச்சேரி

புதுச்சேரியில் பல இந்தியர்களும், சிறுபான்மையாக உள்ள இந்திய வம்சாவளி அல்லாதவர்களும் இன்னும்கூட பிரான்ஸ் நாட்டு கடவுச் சீட்டு வைத்திருக்கிறார்கள். 1954ஆம் ஆண்டு புதுச்சேரி சுதந்திரம் பெறும்போது, பிரான்ஸ் அரசு, அவர்கள் விருப்பப்படி சிலருக்கு சலுகை அளித்தது. அதன்படி சிலர் இரட்டைக் குடியுரிமை வைத்திருக்கிறார்கள்.

29. காங்கிரஸின் காலம்

புதுச்சேரி சுதந்திரம் அடைந்தது முதல் அதிக காலம் ஆட்சி புரிந்துவந்தது காங்கிரஸ் கட்சிதான். இடையே, தி.மு.க., அ.தி.மு.க. ஆட்சி செய்திருந்தாலும், காங்கிரஸ் கட்சியே பெரும்பாலும் ஆட்சிபுரிந்துள்ளது. காங்கிரஸ் கட்சியிலிருந்து பிரிந்து வந்த என்.ஆர். காங்கிரஸ் கட்சி மட்டுமே புதுச்சேரியில் 5 ஆண்டுகள் முழுமையாக ஆட்சிசெய்த ஒரே மாநிலக் கட்சி.

தமிழகம் இன்ஃபோ ஸ்பெஷல் #7 - புதுச்சேரி 200 - இன்ஃபோ புக்

நிர்வாகம்

30. மாவட்டங்கள் 4

புதுச்சேரி யூனியனின் நிர்வாக வசதிக்காக, புதுச்சேரி, காரைக்கால், மாஹே, ஏனாம் என்று நான்கு மாவட்டங்களாகப் பிரிக்கப்பட்டுள்ளன. புதுச்சேரி சென்னையிலிருந்து 170 கி.மீ தொலைவிலும், காரைக்கால் நாகப்பட்டினத்தின் அருகிலும், ஏனாம் ஆந்திராவின் காக்கிநாடாவுக்கு அருகிலும், மாஹே கேரளாவின் கோழிக்கோட்டுக்கு அருகிலும் உள்ளன.

31. வட்டங்களும் மாவட்டங்களும்

புதுச்சேரி யூனியன் பிரதேசத்தில் புதுச்சேரி, காரைக்கால் என்று இரண்டு மாவட்டங்கள் உள்ளன. புதுச்சேரியில் புதுவை, உழவர்கரை, வில்லியனூர், பாகூர் என்று 4 தாலுகாக்களும், காரைக்கால் மாவட்டத்தில் காரைக்கால், திருநள்ளாறு என்று இரண்டு தாலுகாக்களும் உள்ளன. இது தவிர மாஹேயும், யேனம் பகுதியும் துணை வட்டம் என்ற புவியியல் அமைப்பில் பிரிக்கப்படுகின்றன.

32. புதுச்சேரி மாவட்டம்

புதுச்சேரி, ஒழுக்கரை, வில்லியனூர் மற்றும் பாகூர் ஆகிய 4 தாலுகாக்கள் இணைந்து புதுச்சேரி மாவட்டமாகப் பிரிக்கப்பட்டுள்ளது. இந்த 4 பகுதிகளில் ஒழுக்கரை வட்டத்தில் மட்டும் ஊரகப் பகுதி எதுவும் இல்லை.

தமிழகம் இன்ஃபோ ஸ்பெஷல் #7 - புதுச்சேரி 200 - இன்ஃபோ புக்

33. காரைக்கால் மாவட்டம்

புதுச்சேரி ஒன்றியப் பிரதேசத்தின் 4 மாவட்டங்களில் புதுச்சேரிக்கு அடுத்த பெரிய மாவட்டம் காரைக்கால். இந்த மாவட்டத்தில் காரைக்கால், திருமலைராஜன் பட்டினம், திருநள்ளாறு, அம்பகரத்தூர், நெடுங்காடு, கோட்டுச்சேரி, நிரவி ஆகிய ஊர்கள் உள்ளன.

34. மாஹே மாவட்டம் (சின்ன மாவட்டம்)

புதுச்சேரியின் 4 மாவட்டங்களில் ஒன்று மாஹே. இந்தியாவிலேயே அளவில் சிறிய மாவட்டம் மாஹே தான். கேரளாவில் வடக்கு மலபார் பகுதியால் சூழப்பட்டுள்ள மாவட்டம் மாஹே. மூன்று பக்கம் கண்ணூர் மாவட்டத்திலும், ஒரு பக்கம் கோழிக்கோடு மாவட்டத்திலும் சூழப்பட்டுள்ளது. இந்தியாவில், குறைந்த மக்கள் தொகை கொண்ட மாவட்டங்களின் வரிசையில் ஆறாவது இடம் வகிக்கிறது.

35. தென்னைமரத் தோப்புக்குள்ளே - ஏனாம்

ஆந்திராவின் கோதாவரிக் கரையில் உள்ளது யேனம். அதிகமாகத் தென்னை மரங்கள் நிறைந்த பகுதி. ஈரப்பதமும், குளிர்காற்றும் நிறைந்து தழுவிச் செல்லும் கடற்கரை, ஏனாம். கோதாவரி நதியின் கிளை நதியான கௌதமி, 12 கிலோ மீட்டர் தூரம் ஏனாமில் பாய்ந்த பிறகு வங்கக் கடலில் கலக்கிறது.

போக்குவரத்து

36. போக்குவரத்து (பயண வழிச்சாலை)

புதுச்சேரியின் போக்குவரத்து பெரும்பாலும் தமிழ்நாடு அரசுப் போக்குவரத்துக் கழகத்தாலும், புதுச்சேரி சாலைப் போக்குவரத்துக் கழகத்தாலும் பூர்த்தி செய்யப்பட்டுவருகிறது.

37. பயணங்கள் முடிவதில்லை

புதுச்சேரி சாலைப் போக்குவரத்துக் கழகத்தின் கீழ் நூற்றுக்கும் மேற்பட்ட பேருந்துகள் உள்ளன. இது புதுவையிலிருந்து சென்னை, பெங்களுர், திருப்பதி, நாகப்பட்டினம், காரைக்கால், நாகர்கோவில், மாஹே, நெய்வேலி, கடலூர், விழுப்புரம், திண்டிவனம், திருவண்ணாமலை ஆகிய ஊர்களுக்கு நேரடிப் பேருந்து சேவையை வழங்குகிறது.

38. முத்துக்கள் முப்பது சட்டமன்றம்

புதுச்சேரி யூனியன் பிரதேசத்தில் மொத்தம் 30 சட்டமன்றத் தொகுதிகள் உள்ளன. அதில் 23 தொகுதிகள் புதுச்சேரி மாவட்டத்திலும், 5 தொகுதிகள் காரைக்கால் மாவட்டத்திலும், ஏனாம் மற்றும் மாஹேயில் தலா ஒரு தொகுதியும் உள்ளன.

39. இரண்டு அவைகள் - ஒர் உறுப்பினர்

புதுச்சேரியில் ஒரேயொரு மக்களவைத் தொகுதி உள்ளது. அது, புதுச்சேரி மக்களவைத் தொகுதிதான். அதுபோல புதுச்சேரியிலிருந்து பாராளுமன்றத்தின் மாநிலங்கள் அவைக்கு ஓர் உறுப்பினர் தேர்ந்தெடுக்கப்படுகிறார்.

40. அலுவல் மொழிகள்

புதுச்சேரியின் அலுவல் மொழிகளாக தமிழ், மலையாளம், தெலுங்கு மற்றும் பிரெஞ்சு ஆகியவை பயன்படுத்தப்படுகின்றன. வெவ்வேறு மொழி பேசும் மாவட்டங்களுக்கு இடையே பேசிக்கொள்வதற்கு ஆங்கிலம் பொது மொழியாகப் பயன்படுத்தப்படுகிறது.

41. வணிகத் தலம்

இரண்டாயிரம் ஆண்டுகளுக்கு முன் இப்பகுதியுடன் ரோம் நாட்டு மக்கள் வியாபாரரீதியாகத் தொடர்பு கொண்டிருந்தார்கள். ரோம் நாட்டு வியாபாரக் குறிப்புகள் இப்பகுதியை, புதுகே, பொருகே என்றும் குறிப்பிடுகின்றன. எனவே, முதலாம் நூற்றாண்டில் இருந்தே இப்பகுதியில் முற்கால சோழர்களின் ஆட்சி நடைபெற்று வந்திருக்கிறது.

42. பரப்பளவு

புதுச்சேரியின் பரப்பளவு 293 சதுர கிலோ மீட்டர், காரைக்காலின் பரப்பளவு 160 சதுர கிலோ மீட்டர். கேரளாவில் உள்ள மாஹேயின் பரப்பளவு ரொம்பவே கம்மிதான். கேரளாவில் தெளிச்சேரிக்குத் தெற்கே உள்ள 9 சதுர கிலோ மீட்டர் இடம்தான் மாஹே. ஆந்திராவின் கோதாவரி மாவட்டத்தில் உள்ள ‘ஏனாம்’, 30 சதுர கிலோ மீட்டர் பரப்பளவுடையது.

43. எல்லை இல்லை

புதுச்சேரிக்குக் கிழக்கே வங்காள விரிகுடாவும் மற்ற பெரும்பாலான பகுதிகளில் (தமிழகத்தின்) கடலூர் மாவட்டமும் சூழ்ந்து இருக்கின்றன. இந்தியாவின் பெரும் பகுதி ஆங்கிலேயரிடம் இருந்தபோது, புதுச்சேரி பகுதி மட்டும் பிரெஞ்சுக்காரர்களிடம் இருந்ததால், புதுச்சேரியின் எல்லை ஒழுங்கற்று இருக்கிறது.

44. காற்று வாங்கப் போவோம்

புதுச்சேரி கடற்கரை ஓர் அழகிய கடற்கரை. கடற்கரை தட்டையாகவும், மணற்பாங்காகவும் அமைந்திருப்பதால், மக்கள் கொண்டாடும் கடற்கரையாக புதுச்சேரி கடற்கரை இருக்கிறது.

45. புதுவைக்குப் புது அழகு

புதுச்சேரி நகரத்தின் சாலைகள் பெரும்பாலும் பிரெஞ்சுக்காரர்களால் அமைக்கப்பட்டவை. அவர்கள் எப்போதும் நேர்க்கோட்டு வரிசையிலேயே சாலைகளை அமைப்பார்கள். அந்த வகையில் புதுச்சேரியின் நேர்ச்சாலைகள் குறிப்பிடத்தக்கவை. “நீதி அழகு இல்லையென்றாலும் வீதி அழகு” என்று ஒரு சொலவடையே இப்பகுதியில் வழங்கப்படுகிறது.

46. மற்றுமொரு பயணவழி

காரைக்காலிலிருந்து மயிலாடுதுறை, நாகப்பட்டினம், வேளாங்கண்ணி, திருவாரூர், திருச்சி ஆகிய ஊர்களுக்கு பேருந்துகள் இயக்கப்படுகின்றன. இது தவிர, தமிழ்நாடு அரசுப் போக்குவரத்துக் கழகத்தின் மூலம் சென்னை, கோயம்புத்தூர், மதுரை, பெங்களுரு, திருவனந்தபுரம், செங்கோட்டை ஆகிய ஊர்களுக்கு விரைவுப் பேருந்துகள் இயக்கப்படுகின்றன.

47. ரயில் பயணங்களில்

புதுச்சேரி விழுப்புரம் மற்றும் சென்னையுடன் அகலப் பாதையில் இணைக்கப்பட்டுள்ளது. இங்கிருந்து சென்னை, பெங்களுரு, விழுப்புரம், மும்பை, கொல்கத்தா, புது டெல்லி முதலிய பல பெரு நகரங்களுக்கு விரைவு ரயில்கள் இயக்கப்படுகின்றன. சென்னையிலிருந்து பாண்டிச்சேரிக்கு மூன்மறரை மணி நேரத்தில் சென்றுவிடலாம்.

48. வானுயுயர்ந்த சோலையிலே விமான நிலையம்

புதுச்சேரி விமான நிலையம் லாஸ்பேட்டையில் அமைந்துள்ளது. இது, 2012 ஆம் ஆண்டு புதுப்பிக்கப்பட்டு பெரிய விமானங்களும் பயன்படுத்தும் வகையில் மேம்படுத்தப்பட்டது. இந்த புதிய விமான நிலையம் 2013 ஆம் ஆண்டு ஜனவரி மாதத்தில் திறக்கப்பட்டு, பெங்களூருக்குச் செல்லும் விமான சேவை ஆரம்பிக்கப்பட்டது.

49. பச்சைப் பழசுப் பாடல்

திருநள்ளாறில் உள்ள சனீஸ்வரன் கோயில் என்றாலும், சனீஸ்வரன் கோயிலின் மூலக்கடவுள் சிவபெருமான்தான். சிவபெருமான் தர்பாரண்யேஸ்வரர் என்ற திருநாமத்துடன் காட்சி தருகிறார். தர்பாரண்யேஸ்வரர்  அருள்புரிவதால், இவ்வூர் பகுதி தர்பாரண்யேஸ்வரம் என்று அழைக்கப்படுகிறது. இவ்வூரைப் புகழ்ந்து எழுதப்பட்ட பாடல்களின் தொகுப்பை ‘பச்சைப் படிகம்’ என்று அழைக்கிறார்கள், எழுதியவர் பெயர் தெரியவில்லை.

50. இருமொழி இலக்கியம்

மகாகவி பாரதியார் புதுச்சேரிக்கு வருவதற்கு முன்பே இலக்கிய வளர்ச்சி தொடங்கி விட்டது. பெருஞ்சித்திரனார், பாரதிதாசன், தேவநேயப் பாவாணர் ஆகியோரை புதுவைத் தமிழ் இலக்கிய வளர்ச்சியின் முன்னோடிகள் என்று சொல்லலாம். புதுச்சேரி நீண்ட காலம் பிரான்ஸ் அரசாங்கத்தின் கீழ் இருந்ததால், இங்கு பிரெஞ்சு மொழி இலக்கியமும் வளர்ச்சிபெற்றிருக்கிறது. பல பிரெஞ்சு இலக்கியக் கழகங்கள் இன்னும் செயல்பட்டுவருகின்றன.

51. அரவிந்தரின் ஆர்யா

ஸ்ரீஅரவிந்த அடிகளார் 1914 ஆம் ஆண்டு ஆகஸ்ட் 15ஆம் தேதி  அன்னையுடன் சேர்ந்து ‘ஆர்யா’ என்ற ஆங்கிலப் பத்திரிகையைத் தொடங்கினார், இந்தப் பத்திரிகையில் தெய்விக வாழ்க்கை, யோகா, வேத ரகசியங்கள், கீதை கட்டுரைகள், இந்தியப் பண்பாடு போன்ற தலைப்புகளில் கட்டுரைகள் எழுதி வந்தார்.

52. புதுவை அரசு

இந்திய விடுதலைப் போராட்ட காலத்தின்போது பல பத்திரிகைகள் வெளிவந்து மக்களிடம் போராட்ட விதையை விதைத்தன. அப்படி வெளிவந்த ஒரு பத்திரிகைதான், `புதுவை முரசு.' 10.11.1930 -ல் இருந்து சில ஆண்டுகள் வெளிவந்துள்ளது. தேங்காய்திட்டு ராமகிருஷ்ணன், குத்தூசி குருசாமி, பூவாளூர் பொன்னம்பலம் போன்றோர் வெவ்வேறு காலகட்டங்களில் இதழின் ஆசிரியர் பொறுப்பேற்று நடத்தி வந்துள்ளனர்.

53. மணவெளி

போக்குவரத்து முக்கியத்துவம் வாய்ந்த மணவெளி அரியாங்குப்பத்திலிருந்து ஒன்றரை கிலோ மீட்டர் தொலைவில் உள்ளது. முக்கியமான ஊர் மணவெளி. மணவெளியிலிருந்து அரியாங்குப்பம், பாண்டிச்சேரி, சின்ன வீராம்பட்டினம் ஆகிய பகுதிகளுக்குத் தொடர்ந்து பேருந்துப் போக்குவரத்து உள்ளது.

54. கோட்டுச்சேரி கோலாகலம்

புதுச்சேரி யூனியன் பிரதேசத்தில், காரைக்கால் மாவட்டத்தில் உள்ள ஒரு முக்கியமான ஊர் கோட்டுச்சேரி. பூவம், திருவேட்டக்குடி, வரிச்சிக்குடி ஆகிய ஊர்கள் கோட்டுச்சேரி கம்யூனில் உள்ளன. அனைத்து வகையான வியாபாரத்திற்கும் பெயர் பெற்று வளர்ந்துவரும் ஊர் கோட்டுச்சேரி.

ஊரும், பேரும்

55. நெடுங்காடு தோண்டியெடுத்த நகரம்

காரைக்கால் மாவட்டத்தில் உள்ளது நெடுங்காடு. 1948 ஆம் ஆண்டு, இங்கு தொல்பொருள் அகழாய்வுப் பணி மேற்கொள்ளப்பட்டது. அப்போது விநாயகர், முருகன், திருஞானசம்பந்தர், மாணிக்கவாசகர் ஆகியோரின் வெண்கலச் சிலைகள் எடுக்கப்பட்டன. நெடுங்காட்டில் உள்ள தான்தோன்றீஸ்வரர் சிவன் கோயில் தொல்லியல் துறையில் பாதுகாக்கப்பட்ட சின்னமாக அறிவிக்கப்பட்டுள்ளது.

56. அம்பகரத்தூர்

யூனியன் பிரதேசமாக, காரைக்கால் பகுதிக்கும்தமிழ்நாட்டின் பேரளத்துக்கும் இடையில் தமிழ் நாட்டின் எல்லையைத் தொட்டு நிற்கும் ஊர். திருநள்ளாறிலிருந்து 8 கிலோ மீட்டர் மேற்கே உள்ள ஊர் அம்பகரத்தூர். இந்த ஊரில் உள்ள பத்திரகாளி அம்மன் கோயிலும், அங்கு நடக்கும் எருமைக்கடா வெட்டுத் திருவிழாவும் புகழ்பெற்றவை.

57. வில்லியனூர்

புதுச்சேரி மாநிலத்தின் ஒரு முக்கியமான சிறு நகரம் வில்லியனூர். வில்லியனூர், புதுச்சேரி நகராட்சிப் பகுதியிலிருந்து தெற்கே 9 கிலோ மீட்டர் தூரத்தில் உள்ளது.

58. அரிக்கமேடு

புதுச்சேரிக்கு அருகே இருக்கும் அரிக்கமேடு, தெற்கே 6 கிலோ மீட்டர் தூரத்தில் அரியாங்குப்பம் ஆற்றின் கரையில் அமைந்துள்ளது. இது தொல்பொருள் ஆய்வு சார்ந்த இடமாகும். ரோம் நகருடன் வியாபாரம் நடந்த செய்திகள் இங்குதான் கிடைக்கின்றன.

59. திருக்கனூர் சந்தை

வில்லியனூர் வட்டத்தில் உள்ள சிறிய கிராமம் திருக்கனூர். மண்ணாடிப்பட்டு நகராட்சிக்கு உட்பட்டது. தன்னிறைவுபெற்ற கிராமம் என்று திருக்கனூரைச் சொல்லலாம். நெல் சாகுபடிதான் முக்கியத் தொழில். இங்கு நடைபெறும் சந்தையில், சுற்று வட்டார கிராமங்களுக்குத் தேவையான எல்லா பொருள்களும் கிடைக்கின்றன என்பதுதான் இந்த கிராமத்தின் ஸ்பெஷல்.

கல்வி

60. கல்வியில் சிறந்த புதுச்சேரி

பிரெஞ்சுக்காரர்கள் ஆதிக்கத்தின்போதே கல்வி நிறுவனங்களின் எண்ணிக்கை அதிகரித்துக் கொண்டே இருந்தது. சிறிய யூனியன் பிரதேசமான புதுச்சேரியில், 9 மருத்துவக் கல்லூரிகளும், 15 பொறியியல் கல்லூரிகளும், பல கலை அறிவியல் கல்லூரிளும் அமைந்துள்ளன. அதனால்தான் புதுச்சேரியைத் தேடி மாணவர்கள் படையெடுக்கிறார்கள்.

தமிழகம் இன்ஃபோ ஸ்பெஷல் #7 - புதுச்சேரி 200 - இன்ஃபோ புக்

61. மூன்று கல்லூரிகள்

புதுச்சேரியின் கல்வே காலேஜ் சென்னைப்பல்கலைக்கழகத்தின் அங்கங்களாக இணைக்கப்பட்டிருந்தது. மாஹேயில் தொடங்கப்பட்ட (லா&போர்டனைஸ்) கல்லூரி, சென்னைப் பல்கலைக்கழகத்தின் இணைப்பைப் பெற்றிருந்தது. சந்திர நாகூரில் தொடங்கப்பட்ட டியூப்ளே (Dupleix) கல்லூரி, கல்கத்தா பல்கலைக்கழகத்துடன் இணைக்கப்பட்டிருந்தது.

62. கல்வே கல்லூரி

1877 ஆம் ஆண்டில்தான் கல்வே சுப்பராய செட்டியார் கல்வே கல்லூரியை புதுச்சேரியில் நிறுவினார். முதலில் இது, உயர்நிலைப் பள்ளியாகவே தொடங்கப்பட்டது. இங்கு மாணவர்களுக்கு தமிழ், ஆங்கிலம் மற்றும் பிரெஞ்சு மொழிகள் கற்றுத் தரப்பட்டன. இக்கல்லூரியில், அப்போது கல்வி இலவசமாக வழங்கப்படவில்லை. கட்டணம் வசூலிக்கப்பட்டது.

63. சின்னதாய் ஒரு சிக்கல்

கல்வி, புதுச்சேரி பகுதியில் ஒரு மாதிரியாகவும், இந்தியாவின் பிற பிரதேசங்களில் வேறு மாதிரியாகவும் இருந்தது. பிரெஞ்சு மொழிதான் தொடக்கப் பள்ளியிலிருந்து கற்பிக்கப்பட்டது. இது தவிர, பிரான்ஸ் நாட்டு வரலாறும், புவியியலும்தான் சொல்லிக் கொடுக்கப்பட்டது. இது, இந்தியாவின் பிற பகுதிகளிலிருந்து புதுச்சேரி தனித்து இருப்பதற்கு ஒரு காரணமாக அமைந்துவிட்டது. நீண்ட காலத்துக்குப் பிறகுதான் புதுச்சேரி பாடத்திட்ட முறையில் மாற்றங்கள் கொண்டு வரப்பட்டன.

64. மகளிர் மட்டும்

பிரான்ஸ் அரசாங்கம் புதுச்சேரிக்குச் செய்த பெரிய உதவியாக, பெண்களுக்கு அளிக்கப்பட்ட கல்வியைச்  சொல்லலாம். 1827 ஆம் ஆண்டு பிப்ரவரி மாதம் 12 ஆம் தேதி, புதுச்சேரியில் முதலாவது பெண்கள் பள்ளி தொடங்கப்பட்டது. யேனம், மாஹே மற்றும் காரைக்கால் மாவட்டங்களிலும் பெண்களுக்கான பள்ளிகள் தொடங்கப்பட்டன. அதுவும் இலவச கல்விதான்.

65. கல்லூரிச் சாலை

புதுச்சேரியில், பிரெஞ்சு ஆதிக்கத்தால் கல்வித் துறையில் குறிப்பிடத்தக்க மாற்றங்கள் நிகழ்ந்தன. பிராமணர்களும், பணக்காரர்களும் மட்டுமே படிக்க முடிந்த அந்த நேரத்தில், அனைத்து மக்களுக்கும் கல்வியைக் கொண்டு சேர்த்தவர்கள் பிரெஞ்சுக்காரர்கள் என்று சொல்லலாம். நிறைய பள்ளிகளும், கல்லூரிகளும், பிரெஞ்சு நிர்வாகத்தால் புதுச்சேரியில் திறக்கப்பட்டன.

66. பாண்டிச்சேரி பொறியில் கல்லூரி

புதுச்சேரியின் கிழக்கு கடற்கரைச் சாலையில், தமிழகம் - புதுச்சேரி எல்லையில் உள்ளது பாண்டிச்சேரி பொறியியல் கல்லூரி. 1984 ஆம் ஆண்டு ஆரம்பிக்கப்பட்டது. தன்னாட்சி பெற்ற கல்லூரி. பாண்டிச்சேரி பல்கலைக்கழக இணைப்பு பெற்று செயல்பட்டு வருகிறது.

67. பாண்டிச்சேரி பல்கலைக்கழகம்

பாண்டிச்சேரி பல்கலைக்கழகம் 1985 ஆம் ஆண்டு தொடங்கப்பட்டது. இது, ஒரு மத்திய பல்கலைக்கழகம். லட்சத்தீவுகள், அந்தமான் நிகோபர் தீவுகளில் உள்ள கல்லூரிகளும், பாண்டிச்சேரி பல்கலைக்கழகத்துடன் இணைக்கப்பட்டிருக்கின்றன. இதன் இணைவு பெற்ற 90 கல்லூரிகளில் 50,000 மாணவர்களும், இதன் தொலை தூரக் கல்வி முறையில் 10,000 மாணவர்களும் படிக்கின்றனர்.

68. ஆறு மனமே ஆறு

புதுச்சேரியின் 4 மாவட்டங்களுமே கடல் ஓரத்தில் தான் அமைந்துள்ளன. எந்த ஓர் ஆறும் புதுச்சேரியில் உற்பத்தியாவதில்லை. ஆனால் புதுச்சேரி மாவட்டத்தில் ஐந்து ஆறுகளும், காரைக்காலில் ஏழு ஆறுகளும், மாஹேயில் இரண்டு ஆறுகளும், ஏனாமில் ஓர் ஆறும் ஓடி, கடலில் கலக்கின்றன.

69. திருமலைராயன் ஆறு

காரைக்கால் பகுதியைக் கடந்துசெல்லும் ஆறு. நாகப்பட்டினம், திருவாரூர் மாவட்டங்களையும் கடந்துசெல்கிறது. ஐந்நூறு ஆண்டுகளுக்கு முன்பு, விஜயநகர அரசின் பிரதிநிதியாக இருந்து ஆட்சி செய்தவர், சாளுவத் திருமலைராயன். காரைக்கால் திருமலைராயன்பட்டினம்தான் இவரது தலை நகரம். இம்மன்னர் வெட்டி உருவாக்கியதால், இந்த ஆறு அவர் பெயரிலேயே திருமலைராயன் ஆறு என்று அழைக்கப்படுகிறது. மேலும், திருமலைராயன் பட்டினத்தில் காவிரியின் கிளை ஆறான முடிகொண்டான் ஆறு சேர்கிறது.

70. அரசலாற்றுத் துறைமுகம்

காரைக்காலில் அரசலாறு கடலில் கலப்பதற்கு முன்பாக, நூறு ஆண்டுகளுக்கு முன்பு ஆற்றுத் துறைமுகமாக இருந்திருக்கிறது என்பது ஆச்சர்யமான செய்தி. மரக்கலங்களில் பொருள்களை ஏற்றிச் செல்வதும், கொண்டு வந்து இறக்குவதும் நடந்திருக்கிறது. இப்படி வியாபாரம் செய்பவர்கள் காரைக்கால் மரைக்காயர்கள் என்று அழைக்கப்பட்டு இருக்கிறார்கள்.

தமிழகம் இன்ஃபோ ஸ்பெஷல் #7 - புதுச்சேரி 200 - இன்ஃபோ புக்

71. அரசலாற்றங்கரை நாகரிகம்

அரசலாறு பெரிய வரலாறு உடையதாக, பொருளாதார வளர்ச்சியில் பெரும் பங்கு வகித்த நதியாகவும் இருந்திருக்கிறது. கடற்கரையிலிருந்து இரண்டு கிலோ மீட்டர் தொலைவில் செயல்படும் ஹெச்.எம்.டி.எஸ்(HMTS) பண்டகசாலை, காரைக்காலில் பாரம்பர்யமான நதிக்கரைத் துறைமுகம் இருந்ததற்குச் சான்று.

72. சின்ன கடற்கரை

புதுச்சேரிக்கு அழகு சேர்க்கும் கடற்கரைகளில் ஒன்று, சின்ன வீராம்பட்டினம் கடற்கரை. மணவெளியிலிருந்து 2 கிலோ மீட்டர் தொலைவில் உள்ளது. வசதியான ரிசார்ட்டுகளும், அழகுக் கலை மையங்களும், சின்ன வீரம்பட்டினம் கடற்கரைக்கு அழகு சேர்க்கின்றன. சங்கரபாணி நதி இங்குதான் வங்கக்கடலில் கலக்கிறது.

73. புதுச்சேரியில் தமிழகத்தின் சாமி

காரைக்கால் பகுதியில் உள்ள திருமலைராஜன்பட்டினத்தில் நடக்கும் பெருமாள் ஆராட்டு விழா ரொம்பவே பிரபலம். தமிழ் நாட்டின் நாகப்பட்டினம் மாவட்டம் திருக்கண்ணபுரம் சௌரிராஜப் பெருமாள், ஆண்டுதோறும் மாசி மகம் அன்று திருமலைராயன்பட்டினத்தில் எழுந்தருளுகிறார். காரைக்கால் மீனவ குலப் பெண்ணை சௌரிராஜப் பெருமாள் மணந்துகொண்டதாகக் கூறுகிறார்கள்.  மீனவர்கள் இத்திருவிழாவை நடத்துகிறார்கள். விழா முடிந்ததும் சௌரிராஜப் பெருமாள் திருக்கண்ணபுரத்துக்குத் திரும்புவார்.

74. திருநள்ளாறு

காரைக்காலுக்கு அருகில் உள்ளது, திருநள்ளாறு. சனி பகவானுக்குக் கோயில் உள்ள பிரசித்திபெற்ற திருத்தலம் இது. இரண்டரை ஆண்டுகளுக்கு ஒரு முறை நடக்கும் சனிப் பெயர்ச்சி திருவிழாவுக்கு லட்சக்கணக்கான மக்கள் கூடுகிறார்கள். புராண கால மன்னன் நளன் நீராடி தோஷம் நீங்கியத்  தீர்த்தக்குளம் இந்தக் கோயிலி உள்ளது.

75. இரு நூற்றாண்டு கண்ட நூலகம்

ரோமன் ரோலண்ட் நூலகம் (Romand Rolland Library) 1827 ஆம் ஆண்டு, மே மாதம் 16 ஆம் தேதி திறக்கப்பட்டது. 5,000 புத்தகங்களுடன் ஆரம்பிக்கப்பட்ட லைப்ரரியில் இன்று உள்ள புத்தகங்களின் எண்ணிக்கை இரண்டு லட்சம். ஒயிட் டவுனில் உள்ளது இந்த நூலகம்.

76. ஆராய்ச்சிக்கான நூலகம்

ரோமன் ரோலண்ட் நூலகத்தில் அரிய, ஆச்சர்யமான நூல்களுக்கு  தனிப்பிரிவே செயல்படுகிறது. மிக மிக அரிதான 15,000 நூல்கள் இந்தப் பிரிவில் பராமரிக்கப்படுகின்றன. உலகின் பல்வேறு பகுதிகளிலிருந்தும் ஆய்வு மேற்கொள்ள பல அறிஞர்கள் நூலகத்தின் இந்தப் பிரிவைத் தேடி வருகிறார்கள்.

77. புதுச்சேரியில் கிறிஸ்தவம்

புதுச்சேரி 1674 ஆம் ஆண்டு வரை சிறு கிராமமாகத்தான் இருந்தது. போர்ச்சுகீசியர்கள்தான் குடியேற்றம் அமைத்து நகரமாக வளர்த்தார்கள். அப்போதே புதுச்சேரியில் கிறிஸ்தவ சமயம் பரவியது. 1689 ஆம் ஆண்டிலிருந்து இயேசு சபையினர் கிறிஸ்தவ மதத்தைப் பரப்பினர். இன்று புதுச்சேரியில் வாழ்கின்ற கிறிஸ்தவர்களில் கத்தோலிக்க கிறிஸ்தவர்களே அதிகம்.

78. சமயங்களின் சமரசம்

புதுச்சேரியில், இந்துக்கள் அதிக அளவில் (87 சதவிகிதம்) வசிக்கின்றனர் 7சதவிகிதம் பேர் முஸ்லிம்களும், 6 சதவிகிதம் பேர் கிறிஸ்துவர் களும் வசிக்கிறார்கள். இவர்களுடன் சீக்கிய மதத்தைச் சேர்ந்தவர்களும், புத்த மதத்தைச் சேர்ந்தவர்களும், சமண மதத்தைச் சேர்ந்தவர்களும் வசிக்கிறார்கள். பன்மைத்துவமும், சகோதரத்துவமும் புதுச்சேரிக்குப் பெருமைசேர்க்கும் விஷயங்கள்.

79. சித்தர் பூமி

புதுச்சேரியை சித்தர் பூமி என்றும் அழைக்கிறார்கள். இங்கு 30-க்கும் மேற்பட்ட சித்தர்களின் ஜீவ சமாதிகள் அமைந்துள்ளன. புதுச்சேரியைப் பற்றிய தனிப்பாடல் திரட்டு ஒன்று புதுச்சேரியை ‘சித்தர் வாழ் புதுவை’ என்று குறிப்பிடுகிறது.

80. ஆணுக்குப் பெண் இளைப்பில்லை

மக்கள் தொகையில் 6,12,000 ஆண்களும், 6,35,000 பெண்களும் இருக்கின்றனர். பாலின விகிதம் 1000 ஆண்களுக்கு 1037 பெண்கள். ஆண்களைவிட பெண்களே அதிக எண்ணிக்கையில் இருப்பது கவனத்துக்குரிய செய்தி. 6 வயதுக்கு உட்பட்ட சுட்டிகளின் எண்ணிக்கை 1,32,000 பேர்.

81. மக்கள் தொகை

புதுச்சேரியில் 2011 ஆம் ஆண்டு கணக்கெடுப்பின் படி, மக்கள் தொகை 12,47,000 பேர். கிராமப்புறங்களில் 32 சதவிகிதம் மக்களும், நகர்ப்புறங்களில் 68 சதவிகித மக்களும் வசிக்கின்றனர்.

82. புதுச்சேரியின் சின்னங்கள்

2007 ஆம் வருடம் ஏப்ரல் 16ஆம் தேதி, புதுச்சேரி அரசு அம்மாநிலத்தின் சின்னங்களை அறிவித்தது. அப்போதைய விவசாயத்துறை அமைச்சர் வி.வைத்தியலிங்கம், இந்தச் சின்னங்களை முன் மொழிந்தார். அவை: விலங்கு - அணில், பறவை - குயில், மலர் - நாகலிங்கப் பூ , மரம் - வில்வமரம்.

83. கலை பரிமாற்றம்

இந்தியாவின் சிறந்த தத்துவம் மற்றும் உரைநடை அறிஞரான ‘ழான் பில் லோசத்’ புதுச்சேரியில்       1955 ஆம் ஆண்டு மார்ச் மாதம் பிரெஞ்சு இந்தியக் கலைக் கழகத்தை நிறுவினார். French – Indian – Arts Society அமைப்பில் அறிவியல் மற்றும் பண்பாட்டுத் துறைகளில் இந்தியா மற்றும் பிரான்ஸின் கூட்டு முயற்சிகள் மேற்கொள்ளப்பட்டுவருகின்றன. புதுச்சேரி ஒயிட் டவுனில் உள்ளது.

84. பாலினாலஜி ஆய்வுக் கூடம்

பிரெஞ்சு - இந்தியக் கலைக் கழகத்தின் அறிவியல் பிரிவு, `பாலினாலஜி' என்ற ஆய்வுக் கூடத்தை நடத்தி வருகிறது. இந்த ஆய்வுக் கூடம், மகரந்தத் தூள்களைச் சேகரித்து அவற்றின் அமைப்புகளை அடிப்படையாக வைத்து வகைப்படுத்தும் வேலையைச் செய்து வருகிறது.

85. பீடாலஜி

பிரெஞ்சு - இந்தியக் கலைக்கழகம் சார்பில் இயங்குகிற இன்னோர் ஆய்வுக் கூடம் பீடாலச்சி. இது, மண்ணின் நயம், மண் தோன்றும் தன்மை, மண்ணின் முக்கியத்துவம், பலவகை மண்கள், மண்ணின் வேலைகள் ஆகியவை பற்றிய ஆராய்ச்சியில் ஈடுபட்டுவருகிறது.

தமிழகம் இன்ஃபோ ஸ்பெஷல் #7 - புதுச்சேரி 200 - இன்ஃபோ புக்

86. சுண்ணாம்பாறு படகுத்துறை

அரியாங்குப்பத்தில் உள்ள இன்னொரு முக்கியமான  டூரிஸ்ட் ஸ்பாட், சுண்ணாம்பாறு படகுத்துறை. புதுச்சேரியிலிருந்து 7 கிலோ மீட்டர் தூரத்தில் உள்ளது. சங்கரபாணி படகுத்துறை என்றும் அழைக்கிறார்கள். அரியாங்குப்பம் கம்யூனின் கட்டுப்பாட்டில் செயல்படுகிறது.

87. ஏரிக்கரை பறவைகளே!

பாகூருக்குப் பல்வேறு சிறப்புகள் உண்டு. பாகூர், ஒரு சட்டமன்றத் தொகுதி. மூலநாதர் கோயில் இங்கு தான் உள்ளது. இவற்றுடன் இங்கு இருக்கக்கூடிய பாகூர் ஏரி அழகு மிக்கது. மேலும், இந்த ஏரிக்கரையில் சங்கமிக்கும் பறவைக் கூட்டங்கள் நம்மை பரவசப்படுத்தும். தென்பெண்ணை ஆற்றிலிருந்து பாகூர் ஏரி நீர் பெறுகிறது.

88. ஒயிட் சிட்டி

சுற்றுலாப் பயணிகளை அதிகம் கவரும் இடம், வெள்ளை நகரம். (ஒயிட் டவுன்) இந்த நகரத்தை ‘வில் பிளான்ச்’ (Ville Blanche) என்று அழைக்கிறார்கள். 1674 -ல் பிரான்ஸ் தன்னுடைய முதல் குடியிருப்பை உருவாக்கியது. புதுச்சேரியில் ஓடிய கால்வாயின் இருபுறமும் பிரெஞ்சுக்காரர்கள் குடியிருப்பை உருவாக்கினார்கள். அப்படித்தான் கால்வாயின் ஒருபுறம் பிரெஞ்சுக் குடியிருப்பான `வில் ப்ளான்ச்சும்,' மறுபுறம் புதுச்சேரிக்காரர்களின் குடியிருப்பான `வில் நால் லே' உருவாக்கப்பட்டன (Ville Noll LE).

89. பிரெஞ்சு ஸ்டைல் வீடுகள்

புதுச்சேரி வெள்ளை நகரத்தில் உள்ள பிரெஞ்சுப் பாரம்பர்யத்தை உணர்த்தும் பிரெஞ்சு பாணி வீடுகள் நம்மை ஆச்சர்யப்படுத்துகின்றன. அத்துடன் அங்கு அமைக்கப்பட்டுள்ள சாலைகளும் பிரமிக்க வைக்கின்றன. வில் ப்ளான்ச்சில் பல தலைமுறைகளாக வாழும் பிரெஞ்சுக்காரர்கள் இன்னும் பிரெஞ்சுக் குடியுரிமையுடன் வாழ்கிறார்கள்.

90. ஆனந்தம் விளையாடும் வீடு

ஆனந்தரங்கம் பிள்ளை என்பவர், மொழி பெயர்ப்பாளராக (துபாஷி) பணியாற்றினார். இவரது நினைவாக புதுச்சேரியின் `வில் நாய்ஸ்' பகுதியில் 1738 ஆம் ஆண்டு கட்டப்பட்டது. `தி மேன்ஷன் ஆஃப் ஆனந்த ரங்கம் பிள்ளை.'  இதை இன்றைக்கும் நாம் பார்க்க முடியும். தமிழ் மற்றும் பிரெஞ்சு கட்டடக் கலை இணைந்த கலவையான வீடு இது.

91. தாகம் தணித்த ஆயிக்குளம்

`ஆயி’ என்பது அம்மாவைக் குறிக்கும் சொல். புதுச்சேரி, பிரான்ஸ் நாட்டின் ஆதிக்கத்தில் இருந்த போது, குடிநீர் பஞ்சம் அவ்வப்போது ஏற்பட்டு வந்திருக்கிறது. பிரான்ஸ் மன்னர் மூன்றாம் நெப்போலியன் லெமாரிசி, என்பவரை புதுச்சேரிக்கு அனுப்பினார். லெமாரிசி இங்கிருந்த ஆயிக்குளத்தில் நல்ல தண்ணீர் கிடைப்பதை அறிந்துகொண்டு அங்கிருந்து கால்வாய் வழியாக நல்ல தண்ணீர் கொண்டுவந்தார்.

92. ஆயிக்குளத்தின் கதை

கிருஷ்ணதேவராயர் ஒரு முறை புதுச்சேரி பகுதிக்கு வந்தபோது, ஒரு வீடு விளக்குகளாலும், பூக்களாலும் அழகாக அலங்கரிக்கப்பட்டிருந்தது. அதை கோயில் என்று நினைத்த கிருஷ்ண தேவராயர் வணங்கி உள்ளே சென்றார். பிறகுதான் அது ‘ஆயி’ என்பவரின் வீடு என்று தெரிந்திருக்கிறது. உடனே கிருஷ்ணதேவராயர் கோபம் கொண்டு உன் வீட்டை இடித்துவிட்டு குளமும், கிணறும் வெட்ட வேண்டும் என்று உத்தரவு போட்டுவிட்டார். அப்படித்தான் ஆயிக்குளம் உருவானது.

93. நெப்போலியன் பெயர் சூட்டிய குளம்

ஆயிக்குளத்தின் கதையைத் தெரிந்துகொண்ட பிரான்ஸ் மன்னர் நெப்போலியன், ஆயியை கௌரவிக்க நினைத்தார். லெமாரிசியுடன் ஆயி பெயரில் நினைவுச்சின்னம் எழுப்பும்படி கூறினார். அதனால் கட்டப்பட்டதுதான் இந்த ‘ஆயி’ மண்டபம்.

தமிழகம் இன்ஃபோ ஸ்பெஷல் #7 - புதுச்சேரி 200 - இன்ஃபோ புக்

சுற்றுலா

94. பாரதியார் குழந்தைகள் ரயில்

புதுச்சேரி பூங்காவில் குழந்தைகளுக்கான பொழுது போக்கு ரயில் 1974ஆம் ஆண்டு டிசம்பர் மாதம்  3ஆம் தேதி தொடங்கப்பட்டது. இந்த ரயிலுக்கு மகாகவி சுப்பிரமணிய பாரதியாரின் பெயர் வைக்கப்பட்டிருக்கிறது. ரயில் நிலையதத்தின் பெயர் ஜெகஜீவன்ராம் ரயில்வே ஸ்டேஷன். முக்கிகால் கிலோ மீட்டர் தூரம்தான் இந்த ரயிலின் சுற்றுப்பாதை.

95. ஹாலிவுட் பூங்கா

பிரான்ஸ் நாட்டு அரசிடமிருந்து புதுச்சேரி முழு அதிகாரம் பெற்ற பிறகு, புதுச்சேரி பூங்கா மாநிலத் தோட்டக்கலை நிர்வாகத்தின் கீழ் கொண்டு வரப்பட்டது. ஹாலிவுட் திரைப்படமான `லைஃப் ஆஃப் பை' (life of pie) புதுச்சேரியை மையமாகக்கொண்டு எடுக்கப்பட்டது. இப்படத்தின் பல காட்சிகள் இந்தப் பூங்காவில்தான் எடுக்கப்பட்டன.

96. மலருங்கள் மலர்களே!

புதுவையில் ஒவ்வோர் ஆண்டும் பிப்ரவரி அல்லது மார்ச் மாதத்தில், 1978 ஆம் ஆண்டு முதல் மலர் கண்காட்சி நடத்தப்படுகிறது. புதுவை அரசின் வேளாண்மைத்துறை சார்பில் நடத்தப்படும் இக்கண்காட்சியில், புதுவை மட்டுமின்றி உலகம் முழுவதுமிருந்து வந்து மக்கள் பார்த்து ரசிக்கின்றனர்.

97. ஜவஹர் பால பவன்

புதுச்சேரி பொட்டானிக்கல் கார்டனில் இருக்கக்கூடிய ஜவஹர் பால பவன், குழந்தைகளுக்கு இன்னொரு கொண்டாட்டம். இந்த ஜவஹர் பால பவனில் மிருதங்கம், வீணை மற்றும் பல இசைக் கச்சேரிகள் இசைக்க கற்றுத்தரப்படுகிறது. இந்த பால பவனில் ஒரு வேதியியல் ஆய்வுக்கூடம் உள்ளது. மாணவர்கள் இந்த ஆய்வுக்கூடத்தில் ஆய்வுகள் மேற்கொள்ள வசதிகள் செய்யப்பட்டுள்ளன.

98. கல்மரப் படிமங்கள்

புதுச்சேரி தாவரவியல் பூங்காவில் சில கல்லாகிய மரங்களைப்(Fossil tree)பார்க்க முடியும். பல நூறு ஆண்டுகளுக்கு முன்னால் இருந்த மரங்கள் தட்பவெப்ப மாறுதல்களால் கல்மரப் படிமங்களாக மாறிவிட்டன. இங்கு இருக்கும் கல் மரங்கள், திருவக்கரை பகுதியிலிருந்து கொண்டுவரப் பட்டவை.

தமிழகம் இன்ஃபோ ஸ்பெஷல் #7 - புதுச்சேரி 200 - இன்ஃபோ புக்

99. அருங்காட்சியகம்

புதுச்சேரி அருங்காட்சியகம் 1983ஆம் ஆண்டு மார்ச் மாதம் 25ஆம் தேதி திறக்கப்பட்டது. இந்த இடம், முதன் முதலில் பிரான்ஸ் நாட்டு வியாபாரியான கார்வல்ஹோ என்பவருடைய வீடாகத்தான் இருந்தது. சுதந்திரத்துக்குப் பிறகு, சட்டம் மற்றும் கல்வித் துறை அமைச்சகங்கள் செயல்பட்டன. 1998ல் சீர் செய்யப்பட்டு அருங்காட்சியகமாக மாற்றப்பட்டது.

100. சிற்ப அரங்கு, சிறப்பு அரங்கு

புதுவை அருங்காட்சியத்தின் ஒரு சிறப்பான கூடம் இது. இந்த அரங்கில் புதுவை மற்றும் காரைக்கால் பகுதிகளைச் சேர்ந்த பல இடங்களிலிருந்து கண்டெடுக்கப்பட்ட பல்லவ மற்றும் சோழர் காலத்தைச் சேர்ந்த சிற்பங்கள் காட்சிக்கு வைக்கப்பட்டுள்ளன. சங்க காலத்தைச் சேர்ந்த புத்தர் சிலையின் தலை மற்றும் தட்சிணாமூர்த்தி, சூரியத் தேவர், லிங்கோத்பவர், உமா மகேஸ்வரர் ஆகிய கடவுள் விக்ரகங்களையும் சிற்பக் கூடத்தில் பார்க்கலாம்.

101. அரிக்கமேடு அரங்கு

இந்தியாவுக்கும் ரோம் நாட்டுக்கும் இடையே வணிகத் தொடர்பு இருந்ததற்கு, மிக வலுவான ஆதாரங்கள் கிடைத்துள்ள இடம் புதுச்சேரியின் அரிக்க மேடுதான். அருகன் மேடு அல்லது அருகு மேடு என்பது பழைய பெயராக இருந்திருக்கலாம். அடிக்கடி கடல் அரிப்பில் பாதிக்கப்பட்ட பகுதி என்பதால், அரிக்கமேடு ஆகிவிட்டது. அரிக்க மேட்டில் கண்டெடுக்கப்பட்ட பல்வேறு பொருள்கள் அருங்காட்சியத்தின் தொல்லியல் அரங்கில் காட்சிக்கு வைக்கப்பட்டுள்ளன.

102. புதையல்களின் கூடம்

அருங்காட்சியகத்தின் அடுத்த அற்புதம் இது. புதுச்சேரி மற்றும் காரைக்கால் பகுதிகளில் பூமிக்கு அடியிலிருந்து புதையலாகக் கிடைத்த மிக அருமையான செப்புத் திருமேனிகளுக்கு என்று ஒரு தனி அரங்கு அமைக்கப்பட்டிருக்கிறது. சோழர்கால மற்றும் விஜய நகர ஆட்சிக் காலத்தைச் சேர்ந்த ஸ்தபதிகளின் கலைத்திறனுக்குச் சான்றாக இவை இருக்கின்றன.

103. புஸ் புஸ் வண்டி

புதுவை அருங்காட்சியகத்தில் போக்குவரத்துக்கு  என்று தனியாக ஓர் அரங்கு அமைத்திருக்கிறார்கள். இந்த அரங்கில் ‘புஸ் புஸ்’ வண்டி என்று ஒரு வண்டி இருக்கிறது. புஸ் புஸ் என்றால் பிரெஞ்சு மொழியில் ‘தள்ளு தள்ளு’ என்று அர்த்தம். பின் பக்கத்திலிருந்து ஆட்கள் தள்ளும் போது வண்டியில் உட்கார்த்திருப்பவர் கைப்பிடியைப் பிடித்துக்கொண்டு செல்லும் மாடலில் உள்ள ஏசி.

104. நாணயக் காட்சி சாலை

இந்த நாணயக் காட்சிசாலையில் 2,200   ஆண்டுகளுக்கு முற்பட்ட காலத்தைச் சேர்ந்த பழைமையான நாணயங்களை காட்சிக்கு வைத்திருக்கிறார்கள். (இதுவும் அருங்காட்சியத்தின் ஒரு பகுதிதான்) இந்தோ - சீனா வங்கி மூலம் வெளியிடப்பட்ட நாணயங்களையும் இங்கு பார்க்க முடியும்.

105. இரண்டு கால் மேஜை

அருங்காட்சியகத்தின் பிரெஞ்சு இந்திய அரங்கு ஆச்சர்யத்திலும் ஆச்சர்யம். இங்கு இருக்கக்கூடிய பொருள்களை உலகின் வேறு எந்தப் பகுதியிலும் பார்க்க முடியாது. அரிக்கமேட்டில் செய்யப்பட்ட கண்ணாடி மணி, 10,000 ஆண்டுகளுக்கு முற்பட்ட கல்லால் செய்யப்பட்ட கோடாரி, 18-ம் நூற்றாண்டைச் சேர்ந்த இரண்டு கால்கள் கொண்ட மேஜை போன்ற இன்னும் பல அதிசயமான பொருள்களை இங்கு பார்க்கலாம்.

106. பறவைகள் பலவிதம்

ஊசுடு ஏரி பறவைகள் சரணாலயம்

புதுச்சேரியிலிருந்து 10 கிலோ மீட்டர் தொலைவில் காவிரி நதியின் வடக்கே ஊசுடு ஏரி உள்ளது. 2008ஆம் ஆண்டு இந்த ஏரிப் பகுதியை பறவைகள் சரணாலயமாகப் புதுச்சேரி அரசு அறிவித்தது. 400 ஹெக்டேர் பரப்பளவில் உள்ள இந்தச் சரணாலயத்துக்கு நவம்பர் முதல் பிப்ரவரி வரை உலகம் முழுவதுமிருந்து பறவைகள் படையெடுக்கின்றன.

107. மூன்று (துறை) முகம்

புதுச்சேரி மாவட்ட எல்லைக்குள் வியாபாரத்திற்கென்று ஒரு துறைமுகமும், மீன் பிடித்தலுக்கு என்று ஒரு துறைமுகமும் உள்ளது. இது போல காரைக்கால் மாவட்டத்தில் மீன்பிடித் தொழிலுக்காக மட்டும் தனியார் பங்களிப்புடன் ஒரு துறைமுகம் செயல்பட்டுவருகிறது.

108. புதுமையான துறைமுகம்

புதுச்சேரி 1954ஆம் ஆண்டுதான் இந்தியாவுடன் இணைந்தது (அதற்கு முன் பிரான்ஸ் நாட்டின் காலனியாக இருந்தது). இந்த இணைப்புக்கு  முன்பிருந்தே புதுச்சேரி ஒரு துறைமுக நகரம்தான். அதிக வர்த்தகம் செய்த இடமாக இருந்தது. 2,100 ஆண்டுகளுக்கு முன்பே இந்த துறைமுகத்திலிருந்து ரோம் நாட்டுடன் வணிகம் நடைபெற்றிருக்கிறது. அந்தப் பழைமையுடன் முக்கியத்துவமும் மாறாமல் இன்னும் பரபரப்பாக இயங்குகிறது புதுச்சேரி துறைமுகம்.

தமிழகம் இன்ஃபோ ஸ்பெஷல் #7 - புதுச்சேரி 200 - இன்ஃபோ புக்

109. துறைமுக மீன்கள்

புதுச்சேரி தாலுகாவின் தேங்காய்த் திட்டுப் பகுதியில் ஒரு துறைமுகம் அமைந்துள்ளது. இது மீன்பிடித் துறைமுகம். 18 மீனவ கிராமங்களைச் சேர்ந்த சுமார் 30 ஆயிரம் மீனவர்கள் தேங்காய்த் திட்டு துறைமுகம் வழியாக கடலுக்குச் சென்று மீன் பிடிக்கின்றனர்.

110. புதிய கலங்கரை விளக்கம்

புதுச்சேரியின் இரண்டாவது கலங்கரை விளக்கம், துப்ரா பேட்டையில் உள்ளது. 1979 ஆம் ஆண்டு டிசம்பர் மாதம் 10 ஆம் தேதி திறந்து வைக்கப்பட்டது. மத்திய அரசின் கப்பல் கட்டுமானத் துறையின் கீழ் செயல்பட்டுவருகிறது. தினமும் மாலை 3 மணி முதல் 5 மணி வரை பொது மக்கள் சுற்றிப் பார்க்கலாம்.

111. பழைய கலங்கரை விளக்கம்

புதுச்சேரியில் இரண்டு கலங்கரை விளக்கங்கள் உள்ளன. பழைய கலங்கரை விளக்கம் 1836 ஆம் ஆண்டு ஜூலை முதல் தேதி பயன்பாட்டுக்கு வந்தது. 1800ஆம் ஆண்டுகளில், உலகில் இருந்த 250 கலங்கரை விளக்கங்களில் இதுவும் ஒன்று. அந்த அளவுக்கு பழைமையானது. 1954 ஆம் ஆண்டு வரை பிரெஞ்சு அரசாங்கம் கொடியேற்றுவதற்காக இந்தக் கலங்கரை விளக்கக் கட்டடத்தைப் பயன்படுத்தியது. இது கோரபர்ட் அவென்யூவில் உள்ளது.

தமிழகம் இன்ஃபோ ஸ்பெஷல் #7 - புதுச்சேரி 200 - இன்ஃபோ புக்

112. மாஹே கலங்கரை விளக்கம்

மாஹேயில் இருக்கும் கலங்கரை விளக்கம், அரபிக் கடலின் ஓரத்தில் மையாழி ஆற்றின் நுழைவாயிலில் அமைந்திருக்கிறது. இதுவும் மத்திய அரசின் கப்பல் கட்டுமானத் துறையின் கீழ் செயல்படுகிறது. இதன் உயரம் 13 மீட்டர்.

113. புதுச்சேரி அறிவியல் பூங்கா

புதுச்சேரி அறிவியல் மையம் மற்றும் கோளரங்கம்தான் புதுச்சேரி அறிவியல் பூங்கா என்று அழைக்கப்படுகிறது. லாஸ்பேட்டையில் 3 ஏக்கர் பரப்பளவு உள்ள இடத்தில் 1,500 சதுர அடி பரப்பளவில் இக் கோளரங்கம் கட்டப்பட்டிருக்கிறது. இந்தக் கோளரங்கத்தில் உள்ள ‘சில்ரன்ஸ் கார்னர்’ குழந்தைகளுக்கு மிகவும் பிடிக்கும். இங்கு, சுட்டீஸ்களுக்குப் பிடித்த சின்னச்சின்ன செயல் விளக்கங்களைச் செய்து காட்டுகிறார்கள்.

114. கஃபே டாசி

பாண்டிச்சேரி, மிஷன் தெருவில் வ.உ.சி. பள்ளி எதிரில் இருக்கிறது கஃபே டாசி. இங்கு தொண்டைக்கு இதமாக காபியுடன் நொறுக்குத் தீனிகளை நொறுக்கலாம். பாண்டிச்சேரியின் ஸ்பெஷல் உணவு அயிட்டங்கள் பரிமாறப்படுகின்றன. இது தவிர பீட்சா, பெரி பெரி சிக்கன், பஸ்தா ஆகியவை கிடைக்கும். ஒரு பிடி பிடிக்கலாம்.

115. பிரமிடு கோயில்

எகிப்து நாட்டின் கிஸே நகரில் உள்ள பெரிய பிரமிடு வடிவத்தில் (Great Pyramid of Giza)கட்டப்பட்டுள்ள ஸ்ரீ காரணீஸ்வர நடராஜர் கோயில் சுற்றுலாப் பயணிகளையும் பக்தர்களையும் கவர்ந்து இருக்கிறது. புதுக்குப்பம் கடற்கரைப் பகுதியில் உள்ளது. இந்த சிவபெருமான் கோயில், பாண்டிச்சேரி பேருந்து நிலையத்திலிருந்து 17 கிலோ மீட்டர் பயணத்தில் கோயிலை அடையலாம்.

116. காந்தி சிலை

பாண்டிச்சேரி பேருந்து நிலையத்திலிருந்து 4 கிலோ மீட்டர் தொலைவில், ஒயிட் டவுன் கடற்கரைச் சாலையில் உள்ளது தேசப் பிதா காந்தி சிலை. காந்தி சிலையைச் சுற்றிலும் எட்டு கிரானைட் தூண்கள் நிறுத்தப்பட்டுள்ளன. இந்த கிரானைட் தூண்கள்,  செஞ்சி மலையிலிருந்து கொண்டு வரப்பட்டவை. நீலக் கடல் பின்னணியில்  பூங்காவுடன்கூடிய காந்தி சிலை பார்க்க வேண்டிய இடம்.

117. டியூப்ளே சிலை

பாண்டிச்சேரியில் உள்ள டூரிஸ்ட் அட்ராக் ஷன்களில் ஒன்று டியூப்ளே சிலை. கோபர்ட் அவென்யூ தெருவில் உள்ளது (Goubert Ave Street) புதுச்சேரியின் வலிமை மிக்க பிரெஞ்சு ஆளுநராக இருந்த டியூப்ளே நினைவாக 1870 ஆம் ஆண்டு கட்டப்பட்டது. கிரானைட் கற்களால் உருவாக்கப்பட்டுள்ள இச்சிலையின் அருகிலேயே குழந்தைகள் பூங்காவும் அமைந்துள்ளது குறிப்பிடத்தக்கது.

118. பாரதி பூங்கா

புதுச்சேரியில் அவசியம் பார்க்க வேண்டிய இடங்களில் ஒன்று, பாரதி பூங்கா. இது, புதுச்சேரி அரசின் கட்டுப்பாட்டில் உள்ளது. பிரெஞ்சு நகர வடிவமைப்பில் உருவாக்கப்பட்டுள்ளது. ஒயிட் டவுன், புனித கெல்லீஸ் தெருவில் உள்ள இந்தப் பூங்கா, பசுமை மாறாக்காடுகள் போல பச்சைப் பசேல் தாவரங்களால் சூழப்பட்டிருக்கிறது. உள்ளூர் வாசிகள் குழந்தைகளுடன் வந்து குதூகலிக்கிறார்கள்.

119. பாரதியார் நினைவில்லம் மகாகவி நினைவுகள்

‘ஓடி விளையாடு பாப்பா’ என்று பாப்பாவுக்குப் பாடல் சொன்ன பாரதியார், சில ஆண்டுகள் புதுச்சேரியில் வாழ்ந்தார். எண்.20, ஈஸ்வரன் கோயில் தெரு, புதுச்சேரி என்ற முகவரியில் பாரதியார் வாழ்ந்த வீடு, பாரதியார் நினைவு இல்லமாக மாற்றப்பட்டுள்ளது.

120. வீராம்பட்டினம் கடற்கரை

பழைய மீனவர் குப்பத்தையொட்டி அமைந்துள்ள கடற்கரை. இரண்டு பக்கமும் நதிகளால் சூழப்பட்டு பசுமை போர்த்தி நிற்கிற வித்தியாசமான கடற்கரை. ஆறுகள் சங்கமிக்கும் இடம் என்பதால் அழகிய மரங்கள் சூழ்ந்து நிற்கின்றன. இக்கடற்கரையில் நடைபெறும் செங்கழு நீர் அம்மன் திருவிழாவும், மாசிமகப் பெருவிழாவும் பிரபலமானவை.

121. செரினிட்டி கடற்கரை

மரப்படகுகள் வரிசைகட்டி நிற்கும் கடற்கரை. கோட்டகுப்பம் கடற்கரை என்றும் சொல்கிறார்கள். அவை, சவாரி செய்பவர்களுக்குக் கொண்டாட்டமான கடற்கரை. கைவினைப் பொருள்கள், பல்வேறுஉதிரிப் பாகங்களும் இக்கடற்கரையில் விற்கப் படுகின்றன. மாலை 6.30 மணி வரை அனுமதி உண்டு.

தமிழகம் இன்ஃபோ ஸ்பெஷல் #7 - புதுச்சேரி 200 - இன்ஃபோ புக்

122. பாரடைஸ் கடற்கரை

பெயருக்கு ஏற்ற மாதிரியே சொர்க்கபுரி மாதிரியான கடற்கரைதான் இந்த பாரடைஸ் கடற்கரை. சுண்ணாம்பாறு ரிசார்ட்டில் அரசு அனுமதியுடன் இயங்கும் படகு இல்லத்திலிருந்து படகு மூலமே இந்த பாரடைஸ் தீவு கடற்கரைக்கு நீங்கள் போக முடியும். அலைகள் தீவிரமாக இருக்கும் என்பதால் நீச்சல் பழக முடியாது. குடும்பத்தோடு விடுமுறையைக் கழிக்கவும், நண்பர்களோடு வாலிபால் ஆடவும் வசதியான இடம்.

123. ஆரோவில் கடற்கரை

ஆரோவில் கடற்கரை என்றும், ஆரோ கடற்கரை என்றும் அழைக்கிறார்கள். ஆரோவில் கோயில் சாலைக்கு எதிர்ப் பக்கம் உள்ளது. இந்தக் கடற்கரை, நீச்சல் விரும்பிகளுக்கு ஏற்ற இடம். ஆழம் குறைந்த தண்ணீரில் குதியாட்டம் போடலாம். எரிமலைக் குழம்பு கொண்டுவந்து கொட்டிய மணலால் நிரம்பிய கடற்கரை. மாலை 6 மணி வரைதான் அனுமதி.

124. பரமனோடு கடற்கரை

புதுச்சேரியின் அழகிய கடற்கரை, இங்கு கடற்கரையைவிட அது அமைந்துள்ள சூழல் தனி அழகு. தண்ணீர் முகப்பும், தழுவிச் செல்கிற பிரெஞ்சு வில்லாக்கள் (Prench Villas) சிலைகள், போர் நினைவுச் சின்னம், தொன்மையான கட்டடங்கள் எல்லாம் இக்கடற்கரைக்கு அழகு சேர்க்கின்றன. காலை 7 மணிக்கு முன்பும், மாலை 6 மணிக்குப் பிறகும் போவது தான் என்ஜாய்ன்மென்ட். பாண்டிச்சேரி கடற்கரை என்றும் அழைக்கிறார்கள். போர் நினைவுச் சின்னம் முதல் டியூப்ளே பூங்கா வரை பரவியுள்ளது.

125. கடற்கரை காபி,

பரமனோடு கடற்கரையில் உள்ள ஒரு பரம ரகசியம் அங்கு உள்ள லே கபே. அங்கு கிடைக்கும் செம்பருத்தி ஜூஸ் செமையாக இருக்கும். இந்த லே கஃபேவுக்கு ஒரு வரலாறு உண்டு. இந்த இடம் ஏற்கெனவே துறைமுகம் அலுவலமாக இருந்திருக்கிறது. 1952 ஆம் ஆண்டு வீசிய புயலில் அது சேதமடைந்துவிட்டது.

126. ராஜ் நிவாஸ் - ராஜ அரண்மனை

ராஜ் நிவாஸ், புதுச்சேரி அரசின் நிர்வாகியான துணைநிலை ஆளுநரின் அரசு இல்லம். இங்கு  அமைந்திருக்கிறது. முன்பு இது, பிரெஞ்சு ஆளுநர்களின் மாளிகையாகச் செயல்பட்டுவந்தது. கலை நுட்பத்துடன்கூடிய கட்டடம். பழங்காலப் பித்தளை, வெள்ளிப் பொருள்களின் சேகரிப்பு நம்மை ஆச்சரியத்தில் ஆழ்த்தும்.

127.ஆழ்கடல் அருங்காட்சியகம்

பழைய துறைமுக பாலத்திலிருந்து 8 கிலோ மீட்டர் தொலைவில் கடலுக்குள் கடல் சார்ந்த பல்நோக்கு அருங்காட்சியகம் அமைக்கும்பணி நடந்து வருகிறது. இந்தியக் கப்பற்படையில் 61.3 மீட்டர் நீளமும், 10.2 மீட்டர் அகலமும், 11.98 மீட்டர் உயரமும் கொண்ட பயன்பாடற்ற `ஐ.என்.எஸ் கடலூர்' என்ற கப்பலின் இயந்திரங்கள், உதிரிபாகங்களை முழுமையாக நீக்கிவிட்டு கடலுக்குள் 26.2 அடி ஆழத்தில் அருங்காட்சியமாக நிறுத்தப்பட இருக்கிறது. கடலுக்கடியில் இருக்கும் இந்தக் கப்பல் கண்காட்சியகத்தைக் காண கடலுக்குள் செல்லும்போது டால்பின், திமிங்கிலம் மற்றும் கடல் சார்ந்த உயிரினங்களைக் கண்டுகளிக்கலாம்.

ஆன்மிகம்

128. புதுமணத் தம்பதிகளின் கடவுள்

ஏனாம் மாவட்டத்தின் அன்ன வாரம் பகுதியில் இருக்கிறது, சத்ய நாராயணா ஸ்வாமி கோயில். ஏனாமிலிருந்து 80 கிலோ மீட்டர். புதிதாக திருமணம் ஆன தம்பதிகள் விரதம் இருந்து வழிபடுகின்றனர். திருப்பதி ஏழுமலையான் கோயிலுக்குப் பிறகு புகழ் பெற்ற கோயில் இந்தச் சத்திய நாராயணா கோயில்தான்.

129. தர்க்ஷ்ராமம்

யேனம் பகுதியில் உள்ள இன்னொரு கோயில் தர்க்ஷராமம் என்ற ஊரில் உள்ளது. பீமேஸ்வர ஸ்வாமி கோயில். இங்குள்ள சிவலிங்கத்தின் உயரம் 14 அடி. ஏனாமிலிருந்து 16 கிலோ மீட்டர் தூரத்தில் உள்ளது தர்க்ஷராமம். இங்குள்ள சக்தி சக்கரத்தின் மீது அமர்ந்துள்ள பார்வதி தேவி பக்தர்களுக்கு அருள் பாலிக்கிறாள். ஏனாமிலிருந்து 16 கிலோ மீட்டர் தூரத்தில் உள்ளது தர்க்ஷராமம்.

130. மணக்குள விநாயகர்

புதுச்சேரி மக்களால் ‘குட்டி திருப்பதி’ என்று அழைக்கப்படுவது அருள்மிகு மணக்குள விநாயகர் கோயில். துறைமுகப் பகுதியில் மணற்குளங்கள் அதிகம். மணற்குளம் அருகில் இருந்த கோயில் என்பதால் மணற்குள விநாயகர் என்று அழைக்கப்பட்டு மணக்குள விநாயகர் ஆகிவிட்டது. ஒயிட் டவுனில் உள்ளது இக்கோயில்.

தமிழகம் இன்ஃபோ ஸ்பெஷல் #7 - புதுச்சேரி 200 - இன்ஃபோ புக்

131. ஒரு தங்க ரதத்தில் முந்தி விநாயகர்

மணக்குள விநாயகர் கோயிலில், பக்தர்களின் நிதியைக் கொண்டு தங்கரதம் ஒன்றை உருவாக்கியுள்ளனர். ஆறு அடி அகலமும் பத்து அடி உயரமும் கொண்டது. ஏழரை கிலோ தங்கமும், தேக்கும் பயன்படுத்தி, இந்தத் தங்க ரதம் உருவாக்கப்பட்டுள்ளது. அலங்கார வளைவுகளுக்கு செப்புத் தகடுகள் பயன்படுத்தப்பட்டுள்ளன.

132. குருசாமி அம்மையார் கோயில்

புதுச்சேரியின் கண்டமங்கலம் என்ற ஊரில் அமைந்துள்ளது, குருசாமி அம்மையார் கோயில். இது குருசாமி அம்மையாரின் ஜீவ சமாதி ஆகும். குருசாமி அம்மையார் என்கிற சித்தர் 1890 ஆம் ஆண்டிலிருந்து 1895 வரை கண்டமங்கலத்தில் வாழ்ந்தவர் என்று கூறுகிறார்கள். தஞ்சாவூர் மாவட்டத்தைச் சேர்ந்த நடராஜ சுவாமிகள் என்பவர்தான் இத்திருக்கோயிலைக் கட்டினார்.

133. கோவில் பத்து -தேன் அமிர்தவள்ளி - யாழ்மூரி நாதர்

புதுச்சேரியின் காரைக்கால் மாவட்டம் தருமபுரத்தில் உள்ளது. யாழ்மூரி நாதர் திருக்கோயில் சமயக்குறவர்களால் பாடப் பெற்ற திருத்தலம். இந்த ஊர் இப்போது, கோவில்பத்து என்று அழைக்கப்படுகிறது. மூலவர் சிவபெருமான் அம்பாள் பெயர் தேன் அமிர்தவள்ளி.

134. ஆன்மிக அற்புதம் ஆரோவில்

ஸ்ரீஅரவிந்தரின் சிந்தனைகளால் ஈர்க்கப்பட்டு, அவருடைய சிஷ்யையாக புதுச்சேரியிலேயே வாழ்ந்த ஸ்ரீஅன்னையினால் புதுச்சேரிக்கு வடக்கே 12 கிலோ மீட்டர் தொலைவில் கடற்கரையையொட்டி உருவாக்கப்பட்ட ஒரு நகரம்தான் ஆரோவில்.

135. சமயங்களின் சமத்துவம்

ஆரோவில் ஒரு சமய நிறுவனம் இல்லை. எந்த மதத்தையும் சார்ந்ததும் இல்லை. சடங்குகளோ, சம்பிராதாயங்களோ இங்கு கிடையாது. ஆன்மிக ஈடுபாடு கொண்ட யார் வேண்டுமானாலும் நாடு, மொழி, மதம், போன்ற பாடுபாகு இல்லாமல் இங்கு வரலாம்.

136. திருக்காமேஸ்வரர் திருக்கோயில்

புதுச்சேரியின் வில்லியனூரில் உள்ளது ஸ்ரீகோகிலாம்பாள் உடனுறை திருக்காமேஸ்வரர் திருக்கோயில். புதுச்சேரி நகர் மையத்திலிருந்து 10 கிலோ மீட்டர் தூரத்தில் உள்ளது. இந்தக் கோயிலில் உள்ள 15 மீட்டர் உயரத் தேர், பக்தர்களைக் கவரும்.

137. சாய்பாபா சரணம்

வில்லியனூருக்குத் தெற்கே 1 கிலோ மீட்டர் தூரத்தில் உள்ளது உருவையாறு. உருவையாறு என்ற நதிக்கரையில் அமைந்திருப்பதால் ஊருக்கும் அதே பெயர்தான். ஆம். ஊர் பெயரும் உருவையாறு தான். இந்த உருவையாற்றின் கரையில் உள்ள சாய்பாபா கோயிலுக்கு மக்கள் கூட்டம் கட்டமாக வந்து வழிபடுகின்றனர்.

138. மூலநாத ஸ்வாமி கோயில்

பாகூர் நகரின் இதயப் பகுதியில் அமைந்திருக்கிறது மூலநாத சாமி கோயில். சோழர் காலத்தைச் சேர்ந்தது. சோழர் கால கலை நயமிக்க வேலைப்பாடுகளை இந்தக் கோயிலில் பார்க்க முடியும். இந்தியத் தொல்லியல் பாதுகாப்புத் துறையின் கட்டுப்பாட்டில் உள்ளது.

139. அரசு விடுமுறை தந்த அம்மன்

அரியாங்குப்பம் அருகே உள்ள வீராம்பட்டினம் செங்கழுநீர் அம்மன் கோயில் பிரசித்திபெற்றது. சிவன், வினாயகர், முருகன் சந்நிதிகளும் இக்கோயிலில் உள்ளன. ஆடி மாதம், தொடர்ந்து ஆறு வெள்ளிக்கிழமைகளில் ஆடித்திருவிழா நடைபெறும். இதில் ஐந்தாவது வெள்ளிக்கிழமை முக்கியமாகக் கருதப்படுகிறது. அதனால், புதுச்சேரி அரசு ஐந்தாவது வெள்ளிக்கிழமையை விடுமுறை நாளாக அறிவித்துள்ளது.

140. அவர் லேடி சர்ச்

ரோமன் கத்தோலிக்க கட்டட, சிற்பக்கலைக்கு எடுத்துக்காட்டாக இருக்கிறது புதுச்சேரியில் உள்ள அவர் லேடி தேவாலயம். தேவாலயத்தின் உள்ளே இருக்கும் அலங்கார வளைவுகள், தூண்கள், மர வேலைப்பாடுகள் ஆகியவை பார்வையாளர்களை அதிகம் கவரும்.

141. அன்பைப் பொழியும் அரவிந்தர் ஆசிரமம்

ஸ்ரீஅரவிந்தர், இந்திய சுதந்திரப் போராட்ட வீரர் கவிஞர், தத்துவ ஞானி, சிறந்த ஆன்மிகவாதி புதுச்சேரியில் உள்ள ஸ்ரீஅரவிந்தர் ஆசிரமம் ‘மாத்ரி  மந்திர்’ என்று அழைக்கப்படுகிறது. கோள வடிவத்தில் உள்ள மாத்ரி மந்திர் ஐ.நா.சபையின் யுனெஸ்கோ நிதிஉதவியுடன் அமைக்கப்பட்டுள்ளது.

142. பச்சை வாழி அம்மன் கோயில்

அரியாங்குப்பம்  பச்சை வாழி அம்மன் உடனுறை அருள்மிகு. மன்னாத ஸ்வாமி கோயிலுக்கும் சுண்ணாம்பாறு படகுத்துறைக்கும் இடையில் உள்ளது. அரியாங்குப்பத்திலிருந்து 1 கிலோ மீட்டர் தூரத்தில் இக்கோயில் உள்ளது.

143. ஏனாம் - புனித அன்னா தேவாலயம்

பிரெஞ்சு கத்தோலிக்க மிஷனரிகள் கட்டிய `புனித அன்னா தேவாலயம்' ஏனாமில் உள்ளது. இந்த தேவாலயத்துக்கு அடிக்கல் நாட்டியவர் மிக்கேல் லெக்னாம் என்பவர். 1846 ஆம் ஆண்டுதான் இந்த தேவாலயத்தின் பணிகள் நிறைவுபெற்று திறக்கப்பட்டது. ஆனால் மிக்கேல் லெக்னாம்     1836 ஆம் ஆண்டே இறந்துபோய்விட்டார்.

144. மலை தேவாலயம்

ஏனாமில், புனித அன்னா தேவாலயத்துக்கு   அருகில் ஒரு மலைக்கோயிலை பிரெஞ்சுக்காரர்கள் கட்டினர். அது போலவே புனித அன்னா தேவாலயத்தின் பின்புறம் மற்றொரு தேவாலயம் ஆங்கிலேயரால் கட்டப்பட்டிருக்கிறது.

145. காரைக்கால் அம்மையார் கோயில்

63 நாயன்மார்களில் ஒருவர் புனிதவதியார். இவர், `காரைக்கால் அம்மையார்' என்றும் அழைக்கப்பட்டார். காரைக்காலில் வாழ்ந்த இவருக்கு ஒரு பெரிய சிறப்பு உண்டு. ஆம், சிவபெருமானால் `அம்மையே,' என்று அழைக்கப்பட்டவர். இப்படிப்பட்ட சிறப்பு மிக்க புனிதவதியாருக்கு காரைக்காலில் கோயில் அமைந்துள்ளது. காரைக்கால் ரயில் நிலையத்தில் இருந்து 2 கிலோ மீட்டர் தூரத்தில் உள்ளது.

146. மாங்கனித் திருவிழா

காரைக்காலில் உள்ள காரைக்கால் அம்மையார் கோயில் ஒரு ஸ்பெஷல் என்றால், இக்கோயிலில் நடைபெறும் மாங்கனித் திருவிழா இன்னொரு ஸ்பெஷல். ஆண்டுதோறும் வைகாசி மாதம் நடைபெறும் மாங்கனித் திருவிழாவின்போது, மக்கள், மாங்கனிகளை ஊர்வலத்தில் வருவோர் மீது வீசிக் கொண்டாடுவார்.

147. இஸ்கான் கோயில்

அகில உலக கிருஷ்ண பக்தி இயக்கம் சார்பில் கட்டப்பட்டுள்ள பகவான் கிருஷ்ணர் கோயில். அமைதி தவழும் இடம். உள்ளே பக்தர்கள் மட்டுமல்லாமல் சுற்றுலாப் பயணிகளும் இங்கு வருகை தந்து தியானம் செய்கிறார்கள். பாண்டிச்சேரி பேருந்து நிலையத்திலிருந்து 3 கிலோ மீட்டர் தூரத்தில் கிருஷ்ணா நகரில் உள்ளது.

148. காக்கும் கடவுள்

பாண்டிச்சேரி பேருந்து நிலையத்திலிருந்து 3 கிலோ மீட்டர் தூரத்தில் மகாத்மா காந்தி சாலையில் உள்ளது, அருள்மிகு கன்னிகா பரமேஸ்வரி கோயில். இந்தக் கோயிலின் பெரிய ஆச்சர்யம் என்னவென்றால் பிரான்ஸ் நாட்டு பாணியில் தக்காண கலை நுட்பத்துடன் கட்டப்பட்டுள்ளதுதான். விழாக் காலங்கள் மற்றும் வீட்டு விஷேசங்களின்போது மக்கள் பெருமளவில் இக்கோயிலில் கூடுகிறார்கள்.

149. புனித இருதய ஆண்டவர் ஆலயம்

சுற்றுலா முக்கியத்துவம் வாய்ந்த இடங்களில் புனித இருதய ஆண்டவர் திருத்தலமும் ஒன்று. பாண்டிச்சேரி பேருந்து நிலையத்திலிருந்து 2 கிலோ மீட்டர் தொலைவில் எம்.ஜி.ரோடு ஏரியாவில் உள்ளது. கண்ணாடி அறைகளில் வைக்கப்பட்டுள்ள யேசு கிறிஸ்துவின் வாழ்க்கை வரலாற்றை சித்திரிக்கும் சிற்பங்கள் பக்தர்களைக் கவரும்.

150. வீரநாராயண விண்ணகரம்

வில்லியனூர் தாலூகா மண்ணாடிப்பேட்டை கம்யூனில் உள்ளது திருபுவனை கிராமம். இந்த கிராமத்தில் உள்ள அருள்மிகு வரதராஜப் பெருமாள் கோயில், புதுச்சேரியின் புகழ்பெற்ற கோயில். முதலாம் பராந்தகச் சோழன் (கி.பி. 907 - 955 ) காலத்தைச் சேர்ந்தது. வீரநாராயண விண்ணகரம் என்று புகழப்படும் கோயில்.

பொருளாதாரம்

151. புதுச்சேரியில் பொருளாதார வளர்ச்சி

புதுச்சேரி, இந்தியாவுடன் இணைந்த நேரத்தில் இந்திய அரசாங்கம் முதலாவது ஐந்தாண்டுத் திட்டத்தை நிறைவேற்றிக்கொண்டிருந்தது. ஐந்தாண்டுத் திட்டம் புதுச்சேரியில் நீட்டிக்கப்பட்டது. முதலாவது ஐந்தாண்டுத் திட்டம் முடிவடைவதற்கு 15 மாதங்களே இருந்தபோது, புதுச்சேரியின் வளர்ச்சிக்காக 50 லட்ச ரூபாய் செலவிடப்பட்டது. (50 லட்சம் ரூபாய் என்பது 70 ஆண்டுகளுக்கு முன்னர் மிகப் பெரிய தொகை மாணவர்களே!)

152. இரண்டாவது ஐந்தாண்டுத் திட்டம்

இரண்டாவது ஐந்தாண்டுத் திட்ட காலத்தில் (1956-57 முதல் 1960-61) புதுச்சேரி மாநிலத்துக்கு திட்ட முதலீடாக 476.50 லட்சம் ரூபாய் ஒதுக்கப்பட்டது. விவசாய உற்பத்திப் பெருக்கம், மின்சாரம் வழங்கும் திட்டம், கரும்பு உற்பத்தி பெருக்கம், ஆகிய திட்டங்கள் தீவிரமாகச் செயல்படுத்தப்பட்டன. கல்வியிலும் நல்ல முன்னேற்றம் ஏற்பட்டது. 350 ஓராசிரியர் பாள்ளிகள் மாநிலம் முழுவதும் பரவலாகத் தொடங்கப்பட்டன.

153. மூன்றாவது திட்டகாலம் 

மூன்றாவது ஐந்தாண்டுத் திட்ட காலத்தில் பொருளாதாரம் குறிப்பிடத்தக்க அளவு உயர்ந்தது. இரண்டாவது திட்டத்தின்போது தனியார் தொழிற்சாலைகள் ஐந்து மட்டுமே இருந்தன. மூன்றாவது திட்ட முடிவில் 171 தொழிற்சாலைகளாக உயர்ந்தது. புதுச்சேரியில் ஒரு தொழிற்பேட்டை தொடங்கப்பட்டது. இந்தக் காலத்தில், புதுச்சேரியில் மின் உற்பத்தி இரண்டு மடங்காக அதிகரித்தது.

154. புதுச்சேரியில் புது வெளிச்சம்

நான்காவது, ஐந்தாவது திட்டக் காலத்தில் நீர்ப்பாசனத் திட்டங்களுக்கு புதுச்சேரி அரசு முக்கியத்துவம் கொடுத்தது. காரைக்காலில் நீர்பாசன வாய்க்கால்கள் 64 லட்சம் ரூபாய் செலவில் மேம்படுத்தப்பட்டன. கிராமங்களுக்கு மின் வசதி அளிக்கும் திட்டம் 1972 ஆம் ஆண்டு முடிவடைந்துவிட்டது. இந்தியாவிலேயே எல்லா கிராமங்களுக்கும் மின் வசதி அளித்த இரண்டாவது மாநிலம் என்ற பெருமையைப் பெற்றது புதுச்சேரி.

155. புதுச்சேரி வேளாண் அறிவியல் மையம்

இளைய தலைமுறை விவசாயிகள் வேளாண்மை செய்யும்போது பின்பற்றவேண்டிய புதிய உத்திகளை சொல்லிக்கொடுப்பதற்காக வேளாண் அறிவியல் மையம் 1974 ஆம் ஆண்டு மார்ச் 25 ஆம் நாள் தொடங்கப்பட்டது. இம்மையம், கடற்கரைப் பகுதியில் நன்கு வளரக்கூடிய செடிகளையும், விதைகளையும் அறிமுகப்படுத்தியது. இந்தியாவிலேயே புதுச்சேரியில்தான் இம்மையம் முதலாவதாக ஏற்படுத்தப்பட்டது.

156. அஞ்சாத ஐந்தாவது திட்டம்

ஐந்தாவது ஐந்தாண்டுத் திட்டக் காலத்தில் விரைவான பொருளாதார வளர்ச்சி ஏற்படுத்தப்பட்டது. இந்தக் காலகட்டத்தில் ( 1974-79) 34 கோடி ரூபாய் திட்டப் பணிகளுக்காகச் செலவிடப்பட்டது. ஏரிகளை ஆழப்படுத்தி நீர்ப்பாசனம் மேம்படுத்தப்பட்டது. நீர்ப்பாசனக் கால்வாய்களும் ஆழப்படுத்தப்பட்டன.

157. தொழில் வளர்ச்சிக் கழகம்

1978 ஆம் ஆண்டு ஜீலை மாதம் மாவட்டத் தொழில் மையம் தொடங்கப்பட்டது. இதே ஆண்டு புதுச்சேரி தொழில் வளர்ச்சிக் கழகம் ஒன்றும் தொடங்கப்பட்டது. இந்த இரு நிறுவனங்களும் மாநிலத்தில் சிறு தொழில் பெருக அதிக முயற்சிகள் மேற்கொண்டன.

158. ஒளி கொடுத்த திட்டம் - ஒரு குடிசைக்கு ஒரு மின்விளக்கு

ஆறாவது ஐந்தாண்டுத் திட்டத்தில், மாநில அரசின் திட்டப் பணிகளுக்காக மட்டும் 71.55 கோடி ரூபாய் ஒதுக்கப்பட்டது. இந்தத் திட்ட காலத்தில் 162 சிறு தொழிற்சாலைகளும், 100 புதிய கிராம தீப்பெட்டி தொழிற்சாலைகளும் தொடங்கப்பட்டன. முக்கியமாக, ‘ஒரு குடிசைக்கு ஒரு மின் விளக்குத் திட்டம் தொடங்கப்பட்டது.

சான்றோர் ஆளுமை

159. பாரதிதாசன் நினைவலைகள்

புதுச்சேரி அரசாங்கம், புரட்சிக் கவிஞர் பாரதிதாசன் புதுவை பெருமாள் கோயில் தெருவில் வாழ்ந்த வீட்டை அரசுடைமையாக்கி, அதை நினைவு இல்லமாக அறிவித்தது. 1972 ஆம் ஆண்டு ஏப்ரல் 29 ஆம் தேதி, புதுச்சேரியில் பாவேந்தர் பாரதிதாசனின் முழு உருவச் சிலை திறந்து வைக்கப்பட்டிருக்கிறது.

தமிழகம் இன்ஃபோ ஸ்பெஷல் #7 - புதுச்சேரி 200 - இன்ஃபோ புக்

160. புரட்சிக் கவிஞரும் புதுச்சேரியும்

புதுச்சேரியில் 1891 ஆம் ஆண்டு பிறந்தவர் பாவேந்தர் பாரதிதாசன். இயற்பெயர் கனகசுப்பு ரத்தினம் விடுதலைப் போராட்டக் கவிஞர்களுள் ஒருவர். புதுச்சேரிக்கு பாரதியார் வந்த பிறகு சுப்புரத்தினம் பாரதியாரின் நண்பராகி பின்னர் அவருடைய தாசனாகவும் ஆகி தன்னுடைய பெயரை பாரதிதாசன் என்று மாற்றிக்கொண்டார்.

161. பெரியசாமி பிள்ளையின் பெரிய இலக்கியம்

பு.அ.பெரியசாமி பிள்ளை புதுச்சேரியின் இன்னொரு புகழ்மிக்க கவிஞர். புதுவை செந்தமிழ் பிரகாச சபையின் தலைவராக விளங்கியவர். இவர் எழுதிய புதுவை வெண்பா, புதுவைக் கலம்பகம் ஆகியவை 19 ஆம் நூற்றாண்டின் இறுதியில் புதுச்சேரியின் நிலை பற்றி விளக்குகின்றன.

162. பங்காரு பத்தர்

சி.பங்காரு பத்தர் யசோதா காவியம், சிவ சுப்பிரமணிய கீர்த்தனங்கள் ஆகியவற்றை எழுதியவர். வேலாயுத முதலியார் சமாதி இருந்த இடத்தில் `கலைமகள் வாசக சாலை' என்ற பெயரில் நூலகம் ஒன்றை நடத்திவந்தார்.

163. புதுச்சேரியில் பாரதியார்

பாரதியார் புதுச்சேரியிலிருந்த போதுதான் (1908 - 1918) என்று தணியும் இந்த சுதந்திரதாகம் என்ற புகழ் மிக்க கவிதையை எழுதினார். சுதந்திரப் பெருமை, சுதந்திர தேவியின் துதி, சுதந்திரப் பள்ளு போன்ற பாடல்களும் அவரால் இங்கே எழுதப்பட்டன. குயில் பாட்டு, கண்ணன் பாட்டு, பாஞ்சாலி சபதம் போன்ற குறுங்காவியங்களையும் புதுச்சேரியில் இருந்தபோதுதான் எழுதினார்.

164. ஞானு தியாக முதலியார்

புதுச்சேரியின் குறிப்பிடத்தக்க சான்றோர்களில் ஒருவர், ஞானு தியாக முதலியார். திருக்குறள், கம்பராமாயணத்தில் சுந்தர காண்டம், நாலடியார், ஆசாரக் கோவை ஆகியவற்றை பிரெஞ்சு மொழியில் மொழி பெயர்த்தார். இந்து, முஸ்லிம் சட்டங்கள் பற்றியும் நூல்கள் எழுதியிருக்கிறார்.

165. சவரிராயலு நாயக்கர்   

சவரிராயலு நாயக்கர் என்பவர் 1829 - 1911 காலத்தில் வாழ்ந்த புதுச்சேரியின் புகழ்மிக்க புலவர். மகாவித்துவான் மீனாட்சி சுந்தரம் பிள்ளையின் மாணவர். ஜெயராக்கினி மாதா பஞ்சரத்தினங்கள், தேவ கீர்த்தனங்கள், நாகபந்தம், சதுரங்க பந்தம், கமல பந்தம் ஆகிய நூல்களை எழுதியிருக்கிறார்.

166. கணக்கராய முதலியார்

பிரெஞ்சு கிழக்கிந்திய கம்பெனியில் ஆனந்த ரங்கம் பிள்ளைக்கு முன்னால் துபாஷியாக (மொழி பெயர்ப்பாளராக) இருந்தவர். 1722 முதல் 1746  வரை 24 ஆண்டுகள் பணியாற்றியிருக்கிறார். கணக்கராய முதலியார் பற்றிய செய்திகளை ஆனந்த ரங்கம் பிள்ளையின் குறிப்புகள் நமக்குத் தருகின்றன.

167. ஆனந்தரங்கம் பிள்ளை

புதுச்சேரி வரலாற்றின் முக்கியமான ஆளுமை, ஆனந்தரங்கம் பிள்ளை. 1709 ஆம் ஆண்டு சென்னையில் பிறந்தவர். பிரெஞ்சுக் கிழக்கிந்திய கம்பெனியில் மொழிபெயர்ப்பாளராகப் பணி புரிந்தவர். 1736 ஆம் ஆண்டு முதல் 1761 ஆம் ஆண்டு வரையிலான காலகட்டத்தில், இவர் எழுதிய டைரிக் குறிப்புகள் புதுச்சேரியின் 18 ஆம் நூற்றாண்டு வரலாற்றைத் தெரிந்துகொள்ள உதவுகிறது.

168. ஜிப்மர் (JIPMER)

ஜவஹர்லால் இன்ஸ்டிட்யூட் ஆஃப் போஸ்ட்கிராஜுவேட் மெடிக்கல் எஜுகேசன் அண்ட் ரிசர்ச் என்பதன் சுருக்கமே ஜிப்மர். முதுகலை மருத்துவம் மற்றும் ஆராய்ச்சிப் படிப்புக்கான மத்திய அரசு நிறுவனம் இது. இளநிலை மற்றும் முதுநிலை மருத்துவப் படிப்புக்குப் பெயர்பெற்ற கல்வி நிறுவனம். மத்திய அரசு நிறுவனம் என்றாலும் தன்னாட்சி அந்தஸ்து பெற்ற கல்வி நிறுவனம். 200 பேராசிரியர்களும், மருத்துவ வளாகத்திலேயே தங்கி சிகிச்சை அளிக்கும் வகையில் 300-க்கும் மேற்பட்ட உறைவிட மருத்துவர்களும், 3000-க்கும் மேற்பட்ட பணியாளர்களும் மருத்துவ சேவையில் ஈடுபட்டு வருகின்றனர். இங்கு, ஆண்டுதோறும் இளநிலை மருத்துவப் படிப்பில் 150 மாணவர்களும், முதுநிலைப் படிப்பில் 200 மாணவர்களும் சேர்த்துக் கொள்ளப்படுகிறார்கள்.

169. மாஹே-யின் கல்வி

மகாத்மா காந்தி அரசு கலைக் கல்லூரி, 1970 ஆம் ஆண்டு கட்டப்பட்டது. 2005 ஆம் ஆண்டு, மாஹே கூட்டுறவு ஆசிரியர் கல்லூரி தொடங்கப்பட்டது. மாஹே கோஆபரேட்டிவ் காலேஜ் ஆஃப் ஹையர் எஜுகேசன், மாஹே பல்மருத்துவக் கல்லூரி, ராஜீவ் காந்தி அரசு ஆயுர்வேத கல்லூரி, ராஜீவ் காந்தி இண்டஸ்ட்ரியல் டிரெய்னிங் இன்ஸ்டிட்யூட் ஆகியவை செயல்படுகின்றன.

காரைக்கால்

170. போட் கிளப்

காரைக்கால் அரசலாற்றங்கரையில் உள்ளது. ‘காரைக்கால் போட் கிளப்’. 2 கிலோ மீட்டர் தூர கடற்கரை. மணற்பாங்காக இருப்பதால் பொழுது போக்கு அம்சங்கள் நிறைந்து காணப்படுகின்றன. படகு வீடு, விசைப்படகுப் பயணம், அலை சவாரி என்று நாள் முழுக்கப் பொழுதுபோக்கலாம்.

171. திருமலை ராயன்பட்டினம்

காரைக்காலின் வரலாற்று முக்கியத்துவம் வாய்ந்த ஊர், திருமலைராயன்பட்டினம். விஜயநகர மன்னர் திருமலைராயர் உருவாக்கிய நகரம் என்று கூறப்படுகிறது. இவரது அவையில்தான் காளமேகப் புலவர் அவைப்புலவராக இருந்திருக்கிறார். திருவானைக்காவல், தஞ்சாவூர் மற்றும் பாபநாசம் கல்வெட்டுகள், திருமலைராயன்பட்டினம் பற்றிக் கூறுகின்றன.

172. காரைக்கால் கடற்கரை

அரசலாற்று முகத்துவாரத்தில் அமைந்திருக்கும் அழகிய கடற்கரை இது. காரைக்கால் கடற்கரை. நீர் விளையாட்டுகளுக்குப் புகழ்பெற்ற கடற்கரை. சூரிய உதயம் பார்ப்பதற்காக நூற்றுக்கணக்கான மக்கள் தினமும் கடற்கரையில் கூடுகிறார்கள். குழந்தைகள் பூங்கா, உணவகம், டென்னிஸ் கோர்ட் என்று கடற்கரைக்கான அத்தனை அம்சங்களோடும் இருக்கிறது இந்தக் கடற்கரை.

தமிழகம் இன்ஃபோ ஸ்பெஷல் #7 - புதுச்சேரி 200 - இன்ஃபோ புக்

173. அகலன் கண்ணு

காரைக்கால் மாவட்டத்தின் வரலாற்று முக்கியத்துவம் வாய்ந்த ஊர், அகலன் கண்ணு (Akalan Kannu). சோழர் மற்றும் பல்லவர் கால கோயில்கள் இந்த ஊரில் காணப்படுகின்றன. எனவே,  காரைக்காலுக்கு சுற்றுலா வரும் பயணிகள், அப்படியே அகலன் கண்ணு கிராமத்துக்கும் ஒரு எட்டு வந்து விட்டுப்போகிறார்கள். தொல்லியல் முக்கியத்துவம் வாய்ந்த ஊர்.

174. கீழ காசாக்குடி (தாமிரத் தகடுகள்)

காரைக்காலின் வடக்குப் பகுதியில் உள்ளது கீழ காசாக்குடி. 1879 ஆம் ஆண்டு எம்.ஜே. டெலா போன் என்பவரால் இங்கு தாமிரப்பட்டயங்கள் கண்டெடுக்கப்பட்டன. பல்லவ மன்னன் இரண்டாம் நந்திவர்மன் காலத்து சிவன் கோயில் இந்த ஊருக்கு சிறப்பு.

175. மேல காசாக்குடி - தொல்லியல் நகரம்

காரைக்கால் நெடுங்காடு சாலையில் உள்ள ஊர், மேல காசாக்குடி. கி.பி. 12 ஆம் நூற்றாண்டைச் சேர்ந்த வரதராஜப் பெருமாள் கோயில், தமிழ் நாட்டின் தொல்லியல் பாதுகாப்புத் துறையால் பராமரிக்கப்படுகிறது. வைகுண்ட ஏகாதசி, திருவாதிரை, மாசி மகம், சித்திரா பௌர்ணமி விழாக்களுக்கு மக்கள் அதிக அளவில் மேல காசாக்குடியில் கூடுகிறார்கள். நாகநாத ஸ்வாமி கோயிலும் இந்த ஊரில் உள்ளது.

176. பொன்பேத்தி

காரைக்கால் மாவட்டத்தின் விசேஷமான ஊர் பொன்பேத்தி. வீர சோழியம் இலக்கண நூலின் ஆசிரியர் பொன் பற்றிக் காவலன் புத்த மித்திரன் பிறந்த ஊர் `பொன்பேத்தி' என்று அழைக்கப்படுகிறது. பொன்பற்றிக் காவலன் புத்த மதத்தைச் சேர்ந்தவர் என்று கருதப்படுகிறது.

177. புத்தர் குடி

காரைக்கால் மாவட்டத்தில் புத்த மதத்தினர் வாழ்ந்தார்கள் என்பதற்கு ஆதாரம் சொல்லும் ஊர் புத்தக்குடி. (புட்டக்குடி என்றும் சிலர் சொல்கிறார்கள்) பல வருடங்களுக்கு முன்பு இந்த ஊரில் புத்தரின் கருங்கல் சிலை ஒன்று கண்டெடுக்கப்பட்டது. புத்த சமயத்தினர் இப்பகுதியில் இருந்தார்கள் என்பதற்கு அருகில் புத்தர் பெயரில் இருக்கும் புத்தமங்கலம், அசுர புத்தக்குடி ஆகிய ஊர்களும் ஆதாரங்கள்.

178. சேத்தூர்

காரைக்கால் மாவட்டம், காரைக்கால் - பேரளம் மெயின் ரோட்டில் உள்ளது, சேத்தூர். அசுர சேத்தூர் என்றும் பண்டாரவடை சேத்தூர் என்றும் அழைக்கிறார்கள். 13 ஆம் நூற்றாண்டைச் சேர்ந்த பார்த்தப சிம்மேஸ்வரா கோயில், இவ்வூரின் சிறப்புகளில் ஒன்று. இதே ஊரில் இருக்கும் ஏகாம்பர நாதர் கோயில், இந்தியத் தொல்லியல் துறையால் பாதுகாக்கப்படுகிறது.

179. பிரெஞ்சுக்காரர்கள் கட்டிய கோயில்

காரைக்கால் அம்மையார் கோயிலுக்கு எதிரில் உள்ளது. 200 ஆண்டுகளுக்கு முற்பட்ட கைலாச நாதர் கோயிலின் சில பகுதிகள் பிரெஞ்சுக்காரர்களால் கட்டப்பட்டது. நான்கு பெரிய ராஜா கோபுரங்களுடன் கூடிய இக்கோயில், காரைக்காலுக்குப் பெருமை சேர்க்கிறது.

180. சொரக்குடி

சொரக்குடி, காரைக்கால் மாவட்டத்தில் உள்ள மிகப்  பழைமையான ஊர். திருபுராந்தகன், திரிபுரசங்கரி ஆகியோரின் வெண்கலச் சிலைகள் இந்த ஊரின் அருகே உள்ள பெரிய தோப்பு பகுதியில் 1971 ஆம் ஆண்டு கண்டெடுக்கப்பட்டுள்ளன. இந்தச் சிலைகள், பாண்டிச்சேரி அருங்காட்சியகத்தில் வைக்கப்பட்டுள்ளன.

181. ஆயிரம் காளியம்மன் ஆலயம்

காரைக்கால் ஆயிரம் காளியம்மன் கோயில் இப்பகுதியில் புகழ்பெற்ற கோயிலாகும். திருமலை ராயன்பட்டினம் முதலியார் குடும்பங்களுக்குப் பாத்தியப்பட்ட கோயில். காளியம்மன் உருவம் தண்ணீரில் மிதந்து வந்தபோது முதலியார் வகுப்பைச் சேர்ந்த பக்தர்கள் எடுத்து கோயில் கட்டி வழிபட்டனர். ஆயிரம் நாமம் சொல்லி அர்ச்சனை செய்வதால், ஆயிரம் பொருள்களைக் கொண்டு பூஜை செய்வதாலும் ஆயிரம் காளியம்மன் கோயில் என்று அழைக்கப்படுகிறது.

182. மஸ்தான் சையத் தாலுத் தர்கா

முஸ்லிம் மகான் மஸ்தான் சையத் தாலுத் அடக்கஸ்தலம் இந்த தர்கா. தர்கிஸ்தான் தலைநகர் புக்காராவில் பிறந்து, காரைக்கால் பகுதியில் அமைதியை போதித்த மகான் சையத் தாலுத். திருச்சிராப்பள்ளியில் இருந்த மகான் சையத் அகமத் ஒலியுல்லாவை தனது குருவாகக் கொண்டார். கந்தூரி திருவிழா எனப்படும் சந்தனக்கூடு திருவிழா பிரபலமானது.

183. காரைக்கால் துறைமுகம்

சென்னையை மையமாகக்கொண்டு செயல்படும் மார்க் லிமிடெட் காரைக்கால் துறைமுகத்தை நிர்வகிக்கிறது. 2009 ஆம் ஆண்டு முதல் இத்துறைமுகம் பயன்பாட்டுக்கு வந்தது. சென்னையிலிருந்து 300 கிலோ மீட்டர் தொலைவில் கிழக்கு கடற்கரையில் உள்ளது காரைக்கால் துறைமுகம்.

மாஹே - கேரளா

184. மாஹே ஆன மையாழி

மாஹே நதிக்கரையில் உள்ள குட்டி நகரம் மாஹே. கேரளாவில் உள்ள இந்த நகரம், மூன்று பக்கம் கண்ணூர் மாவட்டத்தாலும் ஒரு பக்கம் கோழிக்கோடு மாவட்டத்தாலும் சூழப்பட்டுள்ளது. இதன் பழைய பெயர் மையாழி. மாயே என்றும் மாஹே என்றும் பிரெஞ்சு மொழியில் குறிப்பிடப்பட்டுள்ளது.

185. மாஹே கோட்டை

ஐரோப்பியர்களின் வருகைக்கு முன்னர் மாஹேப்பகுதி, கொளத்து நாட்டின் ஒரு பகுதியாக இருந்து வந்திருக்கிறது. 1724 ஆம் ஆண்டு பிரெஞ்சு கிழக்கிந்திய கம்பெனி இங்கு ஒரு வியாபாரத் தலத்தைக்(கோட்டையை) கட்டியது. முன்னதாக இந்தப் பகுதியை ‘வட்டக்கார’ ராஜா வழு நாலரிடமிருந்து மூன்று ஆண்டுகளுக்கு குத்தகைக்கு பிரான்ஸ் பெற்றது.

186. பண்டிகைப் பரவசம்

மாஹே மக்களின் கலாசாரம் மலபார் கடற்கரை மக்களின் முக்கியப் பண்டிகை விஷு மற்றும் ஓணம். தமிழ் மற்றும் தெலுங்கு பேசுவோர்களும் மாஹேயில் வசிக்கிறார்கள். முஸ்லிம்கள் ஈத் பண்டிகையைக் கொண்டாடுகிறார்கள்.

187. மாஹே நகராட்சி

மாஹே, 15 வார்டுகளுடன் நகராட்சியாகச் செயல்பட்டுவருகிறது. நகராட்சிக்கான மண்டல அலுவலர், மண்டல செயல் அலுவலர் ஆகியோர் மாஹே நகராட்சி நிர்வாகத்தைக் கவனித்து வருகின்றனர். மாஹேயின் அருகில் உள்ள விமான நிலையம் கண்ணூர் (சமீபத்தில்தான் திறக்கப்பட்டது). இதற்கு அடுத்த விமான நிலையம் கோழிக்கோடு.

188. மாஹேயின் காந்தி

இறையி குன்னத்திடத்தில் குமரன் மாஸ்டர் மாஹேயின் காந்தி என்று கொண்டாடப்படுகிறார். பிரான்ஸிடமிருந்து மாஹே விடுதலை பெற போராடியவர். மாஹே சுதந்திரமடைந்த பின்னர், அதன் முதல் நிர்வாகியாகப் பதவி வகித்தார்.

189. மாஹே முகுந்தன்

மன்னியம்பாத் முகுந்தன் என்று அழைக்கப்பட்ட ம.முகுந்தன், மாஹேயில் பிறந்தவர். மலையாள இலக்கிய வாதிகளின் முன்னோடி. `மய்யாழியூடே சுதாகரன்' என்று கேரளாவில் பிரபலமாக அறியப்படுகிறார் `மய்யாழிபுழையூடே தீரங்களில்', `தெய்வத்திண்டே விக்ரிதிகள்,' ஆகியவை இவருடைய சிறப்பான இலக்கியப் பங்களிப்புகள். கேரளாவின் மிக உயரிய இலக்கிய விருதான எழுத்தச்சன் புரஸ்கார் இவருக்கு வழங்கப்பட்டது.

ஏனாம் - ஆந்திரா 
 
190. ஏனாம் என்ன விலை அழகே!

ஆந்திரப்பிரதேசத்தின் கோதாவரி நதியின் கிளை நதியான கௌதமி, கோதாவரிக் கரையில் அமைந்திருக்கிறது ஏனாம். ஏனாமில் 12 கிலோ மீட்டர் தூரம் பயணித்த பிறகுதான் கௌதமி, கோதாவரி வங்கக்கடலை அடைகிறது. இங்கு ஈரக்காற்றும், இயற்கை அழகும் எப்போதும் உங்களை தாலாட்டிக் கொண்டே இருக்கும்.

191. கல்யாணபுரம்

ஏனாமில் உள்ள வெங்கண்ணா கோயிலை வெங்கண்ணா பாடி கோயில் என்றும் சல்டிகுரு வெங்கண்ணா கோயில் (Chaldikudi Venkanna Temple) என்றும் அழைக்கிறார்கள். இந்தக் கோயிலில் 200 ஆண்டுகளுக்கு முன்பு, குழந்தைகள் திருமணம் அதிக அளவில் நடைபெற்றுவந்தன. நாட்டின் பல்வேறு பகுதிகளில் இருந்தும் திருமணம் செய்தவதற்கு இந்தக் கோயிலுக்கு வருகைதருவார்கள். அதனால் ஏனாம் அப்போது `கல்யாணபுரம்' என்று அழைக்கப்பட்டது.

தமிழகம் இன்ஃபோ ஸ்பெஷல் #7 - புதுச்சேரி 200 - இன்ஃபோ புக்

192. ஏனாம் மசூதி

ஏனாமில் உள்ள மசூதிக்கான இடத்தை 1848 ஆம் ஆண்டு பிரெஞ்சு அரசாங்கம் தானமாகக் கொடுத்தது. அந்த வருடம் கட்டப்பட்ட மசூதி, 1956 ஆம் அண்டு புதுப்பிக்கப்பட்டது. 1978 ஆம் ஆண்டு அந்த மசூதியை இடித்துவிட்டு, புதிய மசூதி ஒன்றை கட்டினார்கள். 2000 ஆண்டு இந்த மசூதி விரிவாக்கிக் கட்டப்பட்டது. நிறைய பேர் அமர்ந்து ஒரே நேரத்தில் வழிபட முடியும். ஆந்திரப் பிரதேசத்தின் தல்லநேவு, கொலங்கா, சங்கர பாலம் பகுதி மக்களும் இந்த மசூதிக்கு வந்து வழிபடுகிறார்கள்.

193. கத்தோலிக்க தேவாலயம்

ஏனாம் தேவாலயம் 1846 ஆம் அண்டு பிரெஞ்சு மிஷனரிகளால் கட்டப்பட்டது. ஐரோப்பிய பாணி கட்டடக் கலையில் உருவான தேவாலயம். இந்த தேவாலயத்துக்குத் தேவைப்பட்ட  மரப்பொருள்கள் அனைத்தும் பிரான்ஸ் நாட்டிலிருந்து கொண்டு வரப்பட்டவை. இந்த தேவாலயத்தின் இன்னொரு சிறப்பம்சம் மலைக்கோயில்.

194. பிரெஞ்சுக் கால்வாய்

ஏனாம் பகுதிக்கு நீர்ப்பாசனம் அளிக்கும் கால்வாய் பிரெஞ்சுக் கால்வாய். தவலேசுவரம் (Dowleswaram) தலைப் பகுதியிலிருந்து தொடங்கி ஏனாம் அருகில் உள்ள பில்லங்கா (Pillanka) கிராமம் வரை பாய்கிறது. 1949 ஆம் ஆண்டு பிரெஞ்சு மற்றும் இந்திய அரசாங்கத்துக்கு இடையே ஏற்பட்ட ஒப்பந்தத்தின் அடிப்படையில் இந்தக் கால்வாய் வெட்டப்பட்டது.

195. ஏனாம் எக்ஸ்டன்ஷன்

ஏனாம் நகரம் தவிர, அக்ரஹாரம், டேரியாலடிப்பா (Darialatippa), ஃபாரம் பேட்டா (Faram peta), குரேம் பேட்டா (Gurempeta) சாவித்ரி நகர், கனகலப் பேட்டா (Kanakalapeta), குரசம்பேட்டா மற்றும் மேட்டாக்கூர் (Mettakur) ஆகிய ஊர்கள் ஏனாம் மாவட்டத்தில் இருக்கின்றன.

196. ஏனாம் எழுத்தாளர்கள்

ஏனாம் பகுதியைச் சேர்ந்த செல்லப்பிள்ளை வெங்கட கவி, திருப்பதி வெங்கட கவுலு ஆகியோர் தெலுங்கு இலக்கியத்துக்குப் பங்களித்த முக்கியமான எழுத்தாளர்கள். இவர்களைத் தவிர வில்லா ரெட்டி நாயுடு, வெங்கடசாமி நாயுடு ஆகியோர் ஏனாமின் குறிப்பிடத்தக்க கவிஞர்கள்.

தமிழகம் இன்ஃபோ ஸ்பெஷல் #7 - புதுச்சேரி 200 - இன்ஃபோ புக்

ஏனாம் தலைவர்கள்

197. தடலா ரபேல ரமணய்யா

டி.ஆர்.ரமணய்யா, பரம்பேட்டாவில் பிறந்தவர்.ஏனாம் விடுதலைக்காகப் பாடுபட்டவர். ஏனாம் பகுதி இந்திய யூனியனுடன் இணைவதற்கான முயற்சிகளை முன்னெடுத்துப் போராட்டங்களை நடத்தியவர். 13.06.1954 ஆம் தேதி ஏனாம் புரட்சிக்குத் தலைமையேற்றதுடன் புரட்சிக்கு பிறகு ஏனாமில் ஏற்படுத்தப்பட்ட தற்காலிக அரசுக்குத் தலைமை அதிகாரியானர். (ஏனாம் புரட்சி என்பது, ஏனாம் பகுதி இந்தியாவுடன் இணைவதற்கு நடந்த போராட்டம் ஆகும்.)

198. மாடிம் செட்டி சத்தியானந்தம்

ஏனாம் பகுதியின் இன்னொரு முக்கியமான தலைவர், சத்தியானந்தம். ஏனாம் பகுதி இந்தியாவுடன் இணைவதற்காகப் பெரும் பங்காற்றியவர். 1940-களில் ஏனாம் அரசியலின் தவிர்க்க முடியாதவராக இருந்தார். 1948 ஆம் ஆண்டு நடந்த தேர்தலில் ஏனாம் மேயராகத் தேர்ந்தெடுக்கப்பட்டார்.

199. ஏனாம் கோயில்

ஏனாமில் உள்ள பித்தாபுரம் (pithapuram) பற்காய கோயில் இந்தியாவின் பழைமையான கோயில்களில் ஒன்றாகும். தென்னிந்தியாவின் காசி என்று இந்தக் கோயிலை அழைக்கிறார்கள். மூலவர் சிவபெருமான் குக்குடேஸ்வர ஸ்வாமி என்ற பெயருடன் எழுந்தருளியிருக்கிறார். அம்பாள் பார்வதியின் பெயர் ராஜ ராஜேஸ்வரி

தமிழகம் இன்ஃபோ ஸ்பெஷல் #7 - புதுச்சேரி 200 - இன்ஃபோ புக்

200. ஆத்ரேய நதிக்கரையில் ஆலாலகண்டன்

ஏனாம் பகுதியில், ஆத்ரேய கோதாவரி நதிக்கரையில் இருக்கிறது. அருள்மிகு ராஜராஜேஸ்வர ஸ்வாமி கோயில் (இந்த நதிக்குக் கோரங்கி நதி என்றும் பெயர்) சாளுக்கிய மன்னன் ராஜ மகேந்திரவர்மனால் முன்பு கட்டப்பட்ட கோயில் இது. அப்போதிருந்தே கல்யாண உற்சவம், ரத உற்சவம் ஆகியவை கொண்டாடப்பட்டு வருகின்றன.

தொகுப்பு : ஆதலையூர் த. சூர்யகுமார்

உதவி: ஞா.சக்திவேல் முருகன், கே.ஆர்.ராஜமாணிக்கம்

படங்கள்: அ.குரூஸ்தனம்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு