Published:Updated:

மதுரைத் துளிகள்

விகடன் விமர்சனக்குழு

பா.முதின்ஸ்

பிரீமியம் ஸ்டோரி
மதுரைத் துளிகள்
மதுரைத் துளிகள்
மதுரைத் துளிகள்

ரோஸ் பீட்டர்!

1812ஆம் ஆண்டுகளில் மதுரையின் ஆட்சித் தலைவராக இருந்தவர், ரோஸ் பீட்டர். மதுரை மீனாட்சி அம்மன் மீது பக்திகொண்டவர். தன்னை ஓர் ஆபத்திலிருந்து காப்பாற்றியவர் மீனாட்சி அம்மன்தான் என்ற நம்பிக்கையுடன், கோயிலுக்கு ஏதாவது செய்ய நினைத்தார். மீனாட்சி அம்மனுக்குக் காலணி தேவை என்றதும், பவளங்கள், மரகதங்கள், வைரங்கள் பதித்த காலணியைச் செய்துகொடுத்தார். அது  இப்போதும் மீனாட்சி அம்மனுக்குப் பயன்படுத்தப்படுகிறது. இவர் நினைவாக மதுரையைச் சுற்றியுள்ள கிராமங்களில், ரோஸ் முகிலன், ரோஸ் பாண்டியன், ரோஸ் மாயாண்டி போன்ற பெயர்களை குழந்தைகளுக்கு வைத்துள்ளார்கள்.

மதுரைத் துளிகள்

கோவலன் பொட்டல்!

பாண்டிய மன்னனால் குற்றவாளி எனத் தீர்ப்பளிக்கப்பட்டு, மரண தண்டனை பெற்றவர் கோவலன். அவருக்குத் தண்டனையை நிறைவேற்றிய இடம் ‘கோவலன் பொட்டல்’ எனப்படுகிறது. மதுரையில் மாடக்குளம் என்ற கிராமத்தில் அமைந்துள்ள அந்த இடத்தில் நடந்த அகழ்வாராய்ச்சியில், முதுமக்கள் தாழியும் மூன்று கற்களும் கண்டெடுக்கப்பட்டன. அவை, கோவலனுக்குத் தண்டனை நிறைவேற்ற பயன்படுத்திய கற்கள் எனப்படுகிறது. அந்த இடத்தைச் சுற்றி சுற்றுச்சுவர் கட்டி பராமரிக்கப்படுகிறது.

மதுரைத் துளிகள்

மருதத் துறை!

கி.மு. ஆறாம் நூற்றாண்டிலிருந்து மதுரையில் மக்கள் வசித்துவந்ததற்கான ஆதாரங்கள் கிடைத்துள்ளன. இங்கே மருதம் மரங்கள் அதிகம் இருந்ததால், ‘மருதத் துறை’ என்று அழைக்கப்பட்டது. அதுவே, ‘மதுரை’ என்று மருவியதாம். நான்மாடக் கூடல் என்றும் அழைக்கப்படுகிறது.  மீனாட்சி அம்மன் கோயில், நாயக்கர் மகால், மதுரை தமிழ்ச் சங்கம் என்று உலகப் புகழ்பெற்ற பல விஷயங்கள் மதுரைக்குப் பெருமை சேர்ப்பவை.

மதுரைத் துளிகள்

சிறப்புக் குழந்தைகளுக்கான பூங்கா!

துரையின் புதூரில் சிறப்புக் குழந்தைகளுக்கான பூங்கா அமைக்கப்பட்டுள்ளது. மாற்றுத்திறனாளிகள் சங்கம், தொண்டு நிறுவனம் மற்றும் மாநகராட்சி நிர்வாகம் இணைந்து இந்தப் பூங்காவை அமைத்துள்ளன. இங்குள்ள விளையாட்டுச் சாதனங்களை மாற்றுத்திறனாளிக் குழந்தைகள் எளிதில் பயன்படுத்தி விளையாட முடியும். இந்தப் பூங்காவைப் பயன்படுத்த சிறப்புக் குழந்தைகளுக்கு வயது வரம்பு கிடையாது. மற்ற குழந்தைகளில் 10 வயதுக்கு உட்பட்டவர்கள் மட்டும் அனுமதிக்கப்படுவர்.

படம்: ஈ.ஜெ.நந்தகுமார்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு