ஓ.பி.எஸ்., விஜயபாஸ்கர், குருமூர்த்தி... க்ளைமாக்ஸை நெருங்கும் ஆறுமுகசாமி ஆணையம்!

ஜெ யலலிதா மரண மர்மம் குறித்து விசாரிக்க அமைக்கப்பட்ட ஆறுமுகசாமி ஆணையம் விசாரணையை ஆரம்பித்து ஓர் ஆண்டாகிவிட்ட நிலையில், அடுத்தடுத்து நிகழ்ந்துவரும் திருப்பங்கள் பரபரப்பை ஏற்படுத்தியுள்ளன. ஆணையத்தில் இதுவரை சாட்சியம் அளித்தவர்களின் எண்ணிக்கை சதமடித்து விட்டது. இந்த நிலையில், செப்டம்பர் 27-ம் தேதி முதல் குறுக்குவிசாரணை வேகமெடுத்துள்ளது. குறிப்பாக, நான்கு நாட்களில் 40 சாட்சிகளைக் குறுக்குவிசாரணை செய்துள்ளார் சசிகலா தரப்பு வழக்கறிஞர் ராஜாசெந்தூர் பாண்டியன்.

ஜெயலலிதா மரணம் குறித்து ஆரம்பத்தில் சந்தேகத்தை எழுப்பியவர்களில் முதன்மையானவர், முன்னாள் எம்.பி மனோஜ்பாண்டியன். ஓ.பி.எஸ் ஆதரவாளரான அவர், ஆணையம் ஆரம்பித்தபோதே தனது முதற்கட்ட சாட்சியத்தைப் பதிவுசெய்திருந்தார். கடந்த வாரம் அவர் இரண்டாவது முறையாக ஆணையத்தில் ஆஜரானபோது, “ஜெயலலிதா, போயஸ் கார்டனில் தாக்கப்பட்டதாகச் சொன்னது ஆதாரத்தின் அடிப்படையில் அல்ல... யூகத்தின் அடிப்படையில்தான். ஜெயலலிதா அப்போலோவில் அனுமதிக்கப்பட்ட அன்றும், அதற்குப் பிறகு இரண்டு நாள்களும் போயஸ் கார்டன் வீட்டில் உள்ள சி.சி.டி.வி கேமரா பதிவுகளை ஆய்வுசெய்ய வேண்டும். அப்போலோவில் ஜெயலலிதா இருப்பதாக வெளியிடப்பட்ட வீடியோ போலியானது. அதை தடயவியல் துறையின் பரிசோதனைக்கு அனுப்ப வேண்டும்” என்றார்.

. ஆறுமுகசாமி ஆணையம் ஆரம்பிக்கப்பட்ட போது, அதன் செயலாளராக பன்னீர்செல்வம் என்பவர் நியமிக்கப்பட்டார். சில மாதங்களிலேயே அவர் மாற்றப்பட்டு, சட்டத்துறையில் பணியாற்றிவந்த கோமளா என்ற அதிகாரியை அரசுத் தரப்பு நியமனம் செய்தது. அவர்மீது சர்ச்சை எழுந்தது. கோமளாவின் கணவர் பாபு, துணை முதல்வர் பன்னீர்செல்வத்தின் ஆதரவாளர். சசிகலா தரப்பு வழக்கறிஞர் ராஜாசெந்தூர் பாண்டியன், ஆணையர் ஆறுமுகசாமியிடம் ஒரு மனு அளித்தார். அதில், “பன்னீர்செல்வத்தின் ஆதரவாளர் பாபுவின் மனைவி கோமளா, ஆணையத்தின் செயலாளராகத் தொடரக் கூடாது. அவரை மாற்ற வேண்டும்’’ என்று கோரிக்கை வைத்தார். இப்போது, கோமளா தாமாகவே விலக முன்வந்துள்ளார்.

ஜெயலலிதாவின் மருத்துவர் சிவக்குமார், மருத்துவமனையில் ஜெயலலிதா பேசியதாக ஆடியோ ஒன்றை ஆணையத்தில் தாக்கல் செய்திருந்தார். அந்த ஆடியோவில் பேசியது மருத்துவர் அர்ச்சனா எனவும் சிவக்குமார் தனது சாட்சியத்தில் பதிவு செய்திருந்தார். ஆனால், அது அர்ச்சனாவின் குரல் அல்ல என்ற செய்தி கிளம்பியது. இந்நிலையில், கடந்த வாரம் அர்ச்சனாவிடம் குறுக்குவிசாரணை செய்த சசிகலா தரப்பு வழக்கறிஞர், மூன்று முறை அந்த ஆடியோவைப் போட்டுக்காட்டியுள்ளார். அந்த ஆடியோவில் ஜெயலலிதாவின் குரல் உட்பட மொத்தம் மூன்று பெண் குரல்கள் பதிவாகியிருந்தன. ‘‘இதில், ‘திரும்பிப் படுங்கள்’ என்று சொல்லும் குரல் என்னுடையது’’ என்று அர்ச்சனா சாட்சியம் அளித்தார்.

‘‘கடைசியாக 2016 டிசம்பர் 3-ம் தேதி ஜெயலலிதாவின் கால்களை நான் சோதித்தேன். அப்போது, அவருடைய கால்களின் செயல்பாடுகள் நன்றாக இருந்தது’’ என மருத்துவர் மீரா குறுக்குவிசாரணையில் தெரிவித்துள்ளார். ‘‘ஜெயலலிதாவை போயஸ் கார்டனிலிருந்து ஆம்புலன்ஸில் அழைத்துவந்தபோது, அவரிடம் சசிகலா பேசிக்கொண்டே வந்தார். ஜெயலலிதா முனகலாக ஏதோ சொல்லிவந்தார்’’ என மருத்துவர் சினேகாஸ்ரீ வாக்குமூலத்தில் சொல்லியுள்ளார்.

. ஜெயலலிதாவுக்கு பிசியோதெரபி சிகிச்சை அளித்தபோது, கண்ணாடி வழியாக கவர்னர் பார்த்தார் என்று சாட்சிகள் பலர் சொல்லியிருந்தார். ஜெயலலிதா அப்போது கவர்னரிடம் தம்ஸ்அப் காட்டியதாகவும் கூறப்பட்டது. செவிலியர் சாமுண்டீஸ்வரியோ, “ஜெயலலிதாவை கவர்னர் பார்த்தபோது, அவரை ஜெயலலிதா பார்க்கவில்லை” என்று முதல் சாட்சியத்தில் தெரிவித்திருந்தார். குறுக்குவிசாரணையில், “ஜெயலலிதாவுக்குப் அருகில் இருந்த நீங்கள், கவர்னர் பார்த்த நேரத்தில், ஜெயலலிதாவைப் பார்த்துக் கொண்டிருந்தீர்களா... கவர்னரைப் பார்த்துக்கொண்டிருந்தீர்களா?’’ எனக் கேட்டுள்ளனர். அதற்கு கவர்னரைப் பார்த்தேன் என்று சொன்னதும், ‘‘அப்போது ஜெயலலிதா கைகாட்டியது உங்களுக்கு எப்படித் தெரியும்?’’ என்று கேட்டுள்ளார்கள். அதற்கு செவிலியர், ‘‘ஜெயலலிதா கைகாட்டியதை நான் பார்க்கவில்லை” என்று மாற்றிச் சொன்னார்.

‘விசாரணைக்கு ஆடிட்டர் குருமூர்த்தி ஆஜராக வேண்டும்’ என ஏற்கெனவே ஆணையம் சம்மன் அனுப்பியது. ஆனால், ‘எனக்கும் ஜெயலலிதாவின் மரணம் தொடர்பான விசாரணைக்கும் தொடர்பில்லை என்பதால், நான் ஆஜராக வேண்டிய அவசியமில்லை’ என குரூமூர்த்தி தன் வழக்கறிஞர் மூலம் பதில் அளித்திருந்தார். ஆனால், ஜெயலலிதா மரணம் அடைந்த இரண்டு மாதங்களிலே தனியார் தொலைக்காட்சிக்குப் பேட்டி அளித்த குருமூர்த்தி, “ஜெயலலிதா மரணம் குறித்து விசாரணை ஆணையம் அமைக்க வேண்டும்” எனக் குறிப்பிட்டார். அதை சசிகலா தரப்புச் சுட்டிக்காட்டி, அவரை விசாரணையிலிருந்து தவிர்க்க முடியாது என்று ஆணையரிடம் குறிப்பிட்டிருந்தனர். இதை ஆணையரும் ஏற்றுக்கொண்டதால், இன்னும் சில தினங்களில் குருமூர்த்தி ஆஜராகும்படி ஆணையத்திலிருந்து சம்மன் அனுப்பப்பட உள்ளது.

கடந்த ஆண்டு செப்டம்பர் மாதம், ஆறுமுகசாமி ஆணையம் விசாரணையை ஆரம்பித்தது. ஓர் ஆண்டில் இரண்டு முறை கால நீட்டிப்பு நடந்துள்ள நிலையில், வரும் அக்டோபர் 24-ம் தேதியோடு அதன் காலம் முடிவடைகிறது. இன்னும் பன்னீர்செல்வம், விஜயபாஸ்கர் உள்ளிட்டவர்களை விசாரணைக்கு அழைக்கும் திட்டமிருப்பதால், ஆணையத்தின் ஆயுள்காலத்தை நீட்டிக்க ஆணையர் ஆறுமுகசாமி அரசிடம் கோரிக்கை வைக்கப்போகிறாராம்.

- அ.சையது அபுதாஹிர் படங்கள்: கே.ஜெரோம், வெ.நரேஷ்குமார்