Published:Updated:

எதிர்க்குரல்: அதைப் பற்றி உங்களுக்கு என்ன தெரியும்? - சூசன் பிரவுன்மில்லர்

எதிர்க்குரல்: அதைப் பற்றி உங்களுக்கு என்ன தெரியும்? - சூசன் பிரவுன்மில்லர்
பிரீமியம் ஸ்டோரி
எதிர்க்குரல்: அதைப் பற்றி உங்களுக்கு என்ன தெரியும்? - சூசன் பிரவுன்மில்லர்

எதிர்க்குரல்: அதைப் பற்றி உங்களுக்கு என்ன தெரியும்? - சூசன் பிரவுன்மில்லர்

எதிர்க்குரல்: அதைப் பற்றி உங்களுக்கு என்ன தெரியும்? - சூசன் பிரவுன்மில்லர்

எதிர்க்குரல்: அதைப் பற்றி உங்களுக்கு என்ன தெரியும்? - சூசன் பிரவுன்மில்லர்

Published:Updated:
எதிர்க்குரல்: அதைப் பற்றி உங்களுக்கு என்ன தெரியும்? - சூசன் பிரவுன்மில்லர்
பிரீமியம் ஸ்டோரி
எதிர்க்குரல்: அதைப் பற்றி உங்களுக்கு என்ன தெரியும்? - சூசன் பிரவுன்மில்லர்
எதிர்க்குரல்: அதைப் பற்றி உங்களுக்கு என்ன தெரியும்? - சூசன் பிரவுன்மில்லர்

`சூசன், நிஜமாகவே நீ அதைப் பற்றிதான் புத்தகம் எழுதிக் கொண்டிருக்கிறாயா?' - அதிர்ச்சியோடும் தீராத ஆதங்கத்தோடும் என்னிடம் அடிக்கடி கேட்கப்பட்ட கேள்வி இது. `ரேப்’ என்று சொல்லக்கூட அவர்களுக்கு அப்படியொரு தயக்கம். `ஆம், நான் வன்புணர்ச்சி குறித்துதான் ஆய்வு செய்துகொண்டிருக்கிறேன்' என்று சொன்னபோது அவர்கள் அதிர்ச்சி அதிகரித்தது.

`வன்புணர்ச்சியைப்போய் ஆய்வுசெய்வதா?!' என்னும் அவர்களின் அதிர்ச்சியையும் என்னால் புரிந்துகொள்ள முடிகிறது. காரணம், அதன் முக்கியத்துவம் அவர்களுக்குப் புரியவில்லை. எனக்கும்கூட நீண்டகாலம் புரியாமல்தான் இருந்தது. வன்புணர்ச்சி குறித்து தவறான பல கருத்துகளோடுதான் நான் சுற்றித் திரிந்துகொண்டிருந்தேன். அனுபவம், என்னைக் கொஞ்சம் கொஞ்சமாக மாற்றியமைத்தது' என்கிறார் அமெரிக்கப் பத்திரிகையாளரும் பெண்ணியவாதியுமான சூசன் பிரவுன்மில்லர்.

1975-ம் ஆண்டு வெளிவந்த சூசனின் Against Our Will: Men, Women and Rape நூல் மிகப் பரவலான ஆதரவையும் கிட்டத்தட்ட சம அளவிலான எதிர்ப்புகளையும் சம்பாதித்துக்கொண்டது. இதற்கு 10 ஆண்டுகளுக்கு முன்பு ஓர் அமெரிக்கப் பத்திரிகையில்தான் முதன்முதலாக வன்புணர்ச்சி குறித்து ஒரு கட்டுரை எழுதினார் சூசன். வன்புணர்ச்சிதான் மையம் என்றாலும் அவர் எழுத்தில் ஒரு துளி கண்ணீர் இல்லை; உருக்கம் இல்லை; அதிர்ச்சி இல்லை; இவர்களுக்கு நடந்தது, நாளை எனக்கும் உங்களுக்கும்கூட நடக்கலாம் என்னும் எச்சரிக்கை உணர்வு இல்லை. உணர்ச்சிகளிலிருந்து விலகி நின்று, தன் கட்டுரையை எழுதியிருந்தார் சூசன்.

ஒட்டுமொத்த விகடனுக்கும் ஒரே ஷார்ட்கட்!

எதிர்க்குரல்: அதைப் பற்றி உங்களுக்கு என்ன தெரியும்? - சூசன் பிரவுன்மில்லர்

தன் நண்பர்களோடு சூசன் அவ்வப்போது முரண்படுவது வழக்கம். `தோழிகளே, எதற்காக இப்படி அலறுகிறீர்கள்? வன்புணர்ச்சி குற்றமேயல்ல என்றா சொல்லிவிட்டேன்? அது குற்றம்தான். ஆனால், நீங்கள் பயப்படுவதுபோல அது மற்ற குற்றங்களைக்காட்டிலும் அப்படியொன்றும் கொடூரமானதல்ல. கொலையும் கொள்ளையும் கடத்தல்களும் சமூகத்தில் நடைபெறுவதில்லையா என்ன? வன்புணர்ச்சிக்கு, தேவைக்கு அதிகமாக முக்கியத்துவம் கொடுக்கவேண்டியதில்லை என்றுதான் சொல்கிறேன். நீங்கள் நினைக்கும் அளவுக்கு உலகம் அப்படியொன்றும் கெட்டுப்போய்விட வில்லை. நீங்கள் நம்ப விரும்பும் அளவுக்கு ஆண்கள் அயோக்கியர்களும் அல்லர்.

என்னைப் போன்ற துணிச்சலான பெண்களை, யார்தான் என்ன செய்துவிட முடியும்? உங்கள் பிரச்னை என்ன தெரியுமா? நீங்கள் எல்லோரும், பயந்தாங்கொள்ளிகளாக இருக்கிறீர்கள்; அதிகமாக உணர்ச்சிவசப்படுகிறீர்கள். மேலும், எது வன்புணர்ச்சி என்பதுகூட உங்களுக்குப் புரியவில்லை. என் கட்டுரையை தயவுசெய்து படியுங்கள்... தயவுசெய்து திருந்துங்கள்!'

ருநாள் சூசன், வன்புணர்வுக்கு ஆளான பெண்களின் சாட்சியங்களை அருகிலிருந்து கேட்க நேர்ந்தது. அவருக்கு நெருக்கமான சில பெண்களும் தங்களுக்கு நிகழ்ந்த மோசமான அனுபவங்களைப் பகிர்ந்துகொண்டனர். அந்த அனுபவங்கள், மெள்ள மெள்ள சூசனுக்குள் இறங்க ஆரம்பித்தன. பகலிலும் இரவிலும் அவை சூசனைத் துரத்திச் செல்ல ஆரம்பித்தன. பயந்தாங்கொள்ளிகள் மட்டுமல்லர்; வலுவான, படித்த, சிந்திக்கக்கூடிய பெண்களும்கூட பாலியல் வன்கொடுமைக்கு ஆளாகியிருப்பதை அறிந்துகொண்டபோது, சூசனின் உடல் தன்னிச்சையாக நடுங்கியது. ஆணித்தரமாக அதுவரை பேசிவந்த சூசன், மற்றவர்களுடைய வாதங்களை காதுகொடுத்துக் கேட்க ஆரம்பித்தார். வன்புணர்ச்சி குறித்து வெளிவந்த செய்திக்கட்டுரைகளை, நேர்காணல்களை, வரலாற்றுத் தரவுகளைப் படிக்க ஆரம்பித்தார்.

`எனக்கு வன்புணர்ச்சி குறித்து எல்லாம் தெரியும்' எனும் நினைப்பு முற்றிலுமாக அழிந்துபோனதை உணர்ந்தேன். வலிமை  குறித்து நான் கொண்டிருந்த கற்பிதம் உடைந்துபோனது. ஆண்கள் குறித்து நான் கொண்டிருந்த பிம்பம் தலைகீழாகத் திரும்பியது. பெண்களில் சிலர் மோசமானவர்களாக இல்லையா, அப்படி ஆண்களிலும் சிலர் இருக்கத்தானே செய்வார்கள் என்னும் என்னுடைய வாதம், எவ்வளவு வெகுளித்தனமானது என்பதை உணரவைத்தது. `நீ மோசமான முறையில் ஆடை அணிந்திருக்கிறாய். நீ அவனோடு அந்த அளவுக்கு நெருக்கமாக இருந்தது உன் தவறுதான். அவன் பலாத்காரம் செய்யும் வரை நீ என்ன செய்துகொண்டிருந்தாய்?' போன்ற கணக்கற்ற விமர்சனங்கள் எவ்வளவு அபத்தமானவை என்பதை உணர்ந்து கொண்டேன். வன்புணர்ச்சி என்றால் என்னவென்பது புரிய ஆரம்பித்தது. மேலும் மேலும் படிக்கவும் பேசவும் காதுகொடுத்து கேட்கவும் ஆரம்பித்தபோது என்னுடைய அறியாமை விலகியது.

வன்புணர்ச்சி என்பது, நான் நினைத்ததைப் போல எப்போதாவது எங்கேயாவது நடக்கும் ஒரு குற்றச்செயல் அல்ல. அதைப் பற்றி நான் எப்போதாவதுதான் படிக்கிறேன் என்றால், அதற்குக் காரணம் அது எப்போதாவதுதான் ஊடக ஒளியைப் பெறுகிறது. `நான் வன்புணர்ச்சி செய்யப்பட்டேன்' என்று ஒரு பெண் முறையிட்டால், அவளை ஒட்டுமொத்த உலகமும் எரிச்சலோடுதான் அணுகுகிறது. அவளிடம் என்னென்ன குறைகளைக் கண்டுபிடிக்கலாம் என்றுதான் சிந்திக்கிறது. எப்படியாவது அவளையே குற்றவாளியாக மாற்றி தீர்ப்பு எழுதிவிடவே உலகம் துடிக்கிறது. மாறுபட்டச் சிந்தனை, நடுநிலை, நவீனப் பெண்ணியம் என்றெல்லாம் பெயர் சூட்டிக்கொண்டு நானும் அதைத்தானே நீண்டகாலம் செய்துகொண்டிருந்தேன். நீதிமன்றத்தைப் பொறுத்தவரை அது ஒரு வழக்கு. சம்பந்தப்பட்ட பெண்ணின் பெற்றோருக்கும் நண்பர்களுக்கும், ஏன் அவளுக்குமேகூட அது ஓர் அவமானகரமான நிகழ்ச்சி. பத்திரிகையாளர்களுக்கு அது ஒரு சம்பவம். அறிவுஜீவிகளுக்கு அது ஒரு விவாதம்.

வன்புணர்ச்சி என்பது அவ்வளவுதானா... `ஓர் ஆண், ஒரு பெண்ணை பலாத்காரம் செய்ய அவன் ஓர் ஆணாகவும் அவள் ஒரு பெண்ணாகவும் இருப்பதே போதுமானதாக இருப்பது ஏன்?' என்னும் கேள்வியை ஏன் நீங்கள் எழுப்பவில்லை? கட்டுப்படுத்த முடியாத பாலியல் உணர்வுதான் ஓர் ஆணைத் தவறிழைக்கவைக்கிறது என்றால், அந்தத் தவற்றை ஏன் ஒரு பெண்ணால் ஆண்களைப்போல இயல்பாக இழைக்க முடியாமல்போகிறது? பாலியல் நுகர்வுதான் அடிப்படை என்றால், ஏன் வன்புணர்ச்சி வன்முறை கலந்ததாக இருக்கிறது? பிரிக்க முடியாதபடிக்கு இந்த இரண்டும் எப்போதும் ஒன்றிணைந்திருப்பது ஏன்?'

எதிர்க்குரல்: அதைப் பற்றி உங்களுக்கு என்ன தெரியும்? - சூசன் பிரவுன்மில்லர்

வன்புணர்ச்சிக்கு என நீண்ட, நெடிய ரத்த வரலாறு ஒன்று இருக்கிறது என்பதை சூசன் தன் தேடலின் முடிவில் கண்டடைந்தார். அந்த வரலாற்றை விவரிப்பதோடு நிறுத்திக்கொள்ளாமல், அது ஏன் அவ்வாறானதாக இருக்கிறது என்பதற்கான காரணங்களையும் அவர் கண்டறிய முயன்றார். ஆண்கள் அதிகாரம்மிக்கவர்களாகவும் பெண்கள் அவர்களுக்கு அடங்கிப்போகிறவர்களாகவும் வரலாறு நெடுகிலும் இருப்பதற்கும் வன்புணர்ச்சிக்கும் நேரடி தொடர்பு இருக்கிறது. பெண்களைத் தலையில் தட்டி அவர்களுக்கான இடத்தில் அமர்த்திவைக்க, ஆண்களுக்கு வலுவான ஓர் ஆயுதம் தேவைப்படுகிறது. பெயரை உச்சரிக்கும்போதே பெண்கள் குலைநடுங்குமாறு அந்த ஆயுதம் அமைந்திருப்பது அவசியம். எளிதில் கையாளும் வடிவில், எப்போதும் உடனிருக்குமாறு அது இருக்க வேண்டும். ஒருமுறை பாவித்தாலே போதும், வாழ்நாள் முழுக்க அதன் தாக்கம் நீடித்திருக்கும் என்று சொல்லும்படியான ஆயுத
மாகவும் அது இருந்துவிட்டால், அதிகாரம் என்றென்றும் நம் கரங்களில் இருக்கும்.

அந்த ஆயுதம் `வன்புணர்ச்சி' என்றார் சூசன். பாலியல் விழைவு என்பது, அந்த ஆயுதத்தைக்கொண்டு ஆண்கள் ஈட்ட விரும்பும் வெற்றியின் ஒரு பகுதி மட்டுமே. அதிகாரத்தை நிலைநாட்டுவதே வன்புணர்ச்சியின் மைய நோக்கம். அதிகாரம் என்பது, எப்போதுமே வன்முறையோடு தொடர்புடையதாக இருப்பதால், வன்புணர்ச்சியின் உள்ளடக்கமும் வன்முறையாகவே இருந்துவிடுகிறது. போர்க்களம் முதல் வீதி வரை எல்லா இடங்களிலும், எல்லா காலங்களிலும் ஆண்கள் வன்புணர்ச்சியை ஓர் ஆயுதமாகப் பெண்கள் மீது பிரயோகித்துவருவதை நாம் பார்க்கிறோம்.

இந்த ஆயுதம் எப்போது வேண்டுமானாலும் தன் மீது திருப்பப்படலாம் என்னும் அச்சம் ஒவ்வொரு பெண்ணையும் பலமிழக்கச் செய்ய போதுமானதாக இருக்கிறது. தவிரவும், இதை எந்த ஆணும் எந்தச் சூழலிலும் தன் மீது பயன்படுத்தலாம் எனும் எண்ணம் அவளை நிம்மதியிழக்கச் செய்கிறது. வீட்டுக்கு வெளியில்தான் என்றில்லை, வீட்டிலேயேகூட இந்த ஆயுதம் திடீரென முளைக்கலாம். முன்பின் அறிமுகமற்றவர் மட்டுமல்லர், நன்கு அறிமுகமான ஒருவர்கூட ஆயுததாரராக மாறலாம். இந்த நினைப்பே ஒரு கொடுங்கனவாக மாறி ஒவ்வொரு பெண்ணையும் உள்ளுக்குள் இருந்தபடி வதைத்துக்கொண்டிருக்கிறது. ஆண்கள் எதிர்பார்த்தபடியே அவர்களுடைய ஆயுதம், பெண்களை அதிகாரத்துக்கு அடி பணிபவளாகவும் அடங்கி நடப்பவளாகவும் வெற்றிகரமாக மாற்றி வைத்திருக்கிறது. ஆக, வன்புணர்ச்சிக்கு என ஒரு வரலாறு மட்டுமல்ல, அரசியலும் இருக்கிறது என்பதைக் கண்டறிந்து வெளிப்படுத்தினார் சூசன்.

வன்புணர்ச்சி என்பது எப்படிப்பட்ட விலங்கு என்பதை, அமெரிக்காவும் உலகும் சூசனிடமிருந்து தெரிந்துகொண்டன. சிந்தனையளவில் மட்டுமின்றி செயலளவிலும் குறிப்பிடத்தக்க சில மாற்றங்களை இவருடைய நூல் ஏற்படுத்தியது. எடுத்துக்காட்டுக்கு, பாலியல் வன்கொடுமைக்கு ஆளான ஒரு பெண்ணிடம் சாட்சியம் குறித்து விசாரிக்கத் தேவையில்லை என்னும் முடிவை அமெரிக்க நீதிமன்றங்கள் எடுத்ததற்கு, சூசனின் நூல் ஏற்படுத்திய விவாதங்களும் ஒரு முக்கியக் காரணம். சமீபத்தில் `#metoo' அலை உலகம் முழுக்க வீசியபோது, 82 வயது சூசனின் கருத்துகள் மீண்டும் விவாதத்துக்கு எடுத்துக் கொள்ளப்பட்டு அவற்றின் நிறைகுறைகள் பரிசீலிக்கப்பட்டன.

அப்போது அனைவரும் உடன்பட்டு ஒப்புக் கொண்ட ஓர் உண்மை இதுதான். `எங்களை இதுகாறும் அச்சுறுத்திவந்த ஆயுதத்தின் வலிமை எங்கே ஒளிந்து கொண்டிருக்கிறது என்பதை சூசன் புரியவைத்துள்ளார். இந்தப் புரிதல், எங்கள் அச்சத்தைப் போக்கி, எங்கள் போர்க்குணத்தை அதிகரிக்கச் செய்யும் என நம்புகிறோம்.’

- மருதன்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism