Published:Updated:

படிப்பறை

ஸலாம் அலைக்
பிரீமியம் ஸ்டோரி
ஸலாம் அலைக்

இப்படி நாவல் முழுதும் நம்மை உலுக்கும் சம்பவங்களை அடுத்தடுத்து அடுக்கியிருக்கிறது `ஸலாம் அலைக்.

படிப்பறை

இப்படி நாவல் முழுதும் நம்மை உலுக்கும் சம்பவங்களை அடுத்தடுத்து அடுக்கியிருக்கிறது `ஸலாம் அலைக்.

Published:Updated:
ஸலாம் அலைக்
பிரீமியம் ஸ்டோரி
ஸலாம் அலைக்

`இந்த உலகத்தில் ஒரேயொரு கதைதான் உள்ளது' என்ற வரி, இந்த நாவலின் பல்வேறு இடங்களில் திரும்பத் திரும்ப வருகிறது. வெவ்வேறு மனிதர்கள் வெவ்வேறு தருணங்களில் மீண்டும் மீண்டும் இந்த வரியை உச்சரிக்கிறார்கள். ஷோபாசக்தி எழுதிய 'ஸலாம் அலைக்' என்ற இந்த நாவலின் கட்டமைப்போ, ஒன்றுக்கொன்று தலைகீழான இரண்டு அட்டைகளைக் கொண்டது. சிவப்பு நிற அட்டையிலிருந்து படிக்க ஆரம்பித்தால் ஒரு கதை; நீலநிற அட்டையிலிருந்து படிக்க ஆரம்பித்தால் ஒரு கதை. இரு கதைகளும் இணையும் புள்ளி பலாலி, மண்டைத்தீவு, புற்பமுனை, கொழும்பு, பாங்காக், பிரான்ஸ் என்று அலைவுற்ற இளையநந்தன் ஜெபானந்தன் என்ற ஈழ அகதியின் கதை.

ஜெபானந்தனின் தங்கை இலங்கை ராணுவத்தின் குண்டுவீச்சில் தலைவேறு, உடல்வேறாகச் சிதறிச் சாகிறாள். இலங்கையில் அமைதியை நிலைநாட்ட வந்த இந்திய ராணுவத்தால் நந்தனின் அம்மாவும் அக்காவும் பாலியல் வன்முறைக்குள்ளாகி, அக்கா இறக்கிறாள். நந்தன் கொழும்பில் புலம்பெயர்ந்து வாழும்போது அம்மாவும் அப்பாவும் இலங்கை ராணுவத்தின் குண்டுவீச்சுக்கு உள்ளாகி, பிறகு அங்கு ஒரு நல்ல தண்ணீர்க்கிணறு கண்டுபிடிக்கப்படுகிறது. பாங்காங்கில் கள்ள பாஸ்போர்ட்டில் சென்ற ஜெபாநந்தனிடம் ஐ.நா அதிகாரி ``அங்கே உங்களது வீட்டில் இப்போது யார் யாரெல்லாம் இருக்கிறார்கள்?’’ என்ற கேள்விக்கு நந்தன் அளிக்கும் பதில் ``விமானப்படையினர் இருக்கிறார்கள்.’’

இப்படி நாவல் முழுதும் நம்மை உலுக்கும் சம்பவங்களை அடுத்தடுத்து அடுக்கியிருக்கிறது `ஸலாம் அலைக்.' வீடு, உறவுகள், நண்பர்கள் என அனைவரையும் இழந்து, எந்த இடத்தில் எப்போது வசிப்போம், எது நிரந்தரம் என எந்த நிச்சயமும் அற்ற வாழ்க்கையை, ரத்தமும் நிணமும் வினோத மனிதர்களும், அவர்கள் சந்திக்கும் வதைகளும் நிரம்பிய ஒரு புத்தகமாய் முன்வைத்திருக்கிறார் ஷோபாசக்தி.

படிப்பறை

இருவேறு முனைகளில் தொடங்கும் இந்தக் கதைகள் இளையதம்பி ஜெபானந்தனின் ஒரே கதைதான். அது அவருடையது மட்டுமல்ல; போரால் எல்லாம் இழந்து சிதைவுண்ட வாழ்க்கையையும் நினைவுகளையும் சுமந்து திரியும் எல்லா ஈழத்தமிழர்களுக்குமான ஒரே கதை; இல்லை, தாயகத்திலிருந்து இருப்பின் வலி துரத்த புகலிடத்தில் அகதியாய் வதிபவர்கள் அனைவருக்குமான ஒரே கதை.

இந்தக் கதையைப் படித்து முடிக்கும்போது ‘இது என்னுடைய கதையும்தான்; ஆம் உலகத்தில் ஒரே ஒரு கதைதான் இருக்கிறது' என்று ஈழத்தமிழருக்குக் கண்களிலோ இதயத்தின் ஏதேனுமொரு மூலையிலோ ஈரம் கசியும். தமிழகத் தமிழருக்கோ `இது என் கதையில்லை; என் வாழ்க்கையில்லை' என்று பெருமூச்சுடன் ஒரு நிம்மதி கவியும். உண்மையில் அது குரூரமான நிம்மதி.

ஸலாம் அலைக் - ஷோபாசக்தி

வெளியீடு :
கருப்புப் பிரதிகள், 55, பப்பு மஸ்தான் தர்கா,
லாயிட்ஸ் ரோடு, சென்னை - 600 005.

தொலைபேசி : 94442 72500

பக்கங்கள் : 304

விலை : ரூ. 350