Published:Updated:

சொல்வனம்

சொல்வனம்
பிரீமியம் ஸ்டோரி
சொல்வனம்

கதவுகள் தட்டப்படும் போது திறக்கப்பட வேண்டுமென்று எந்த அவசியமும் இல்லை

சொல்வனம்

கதவுகள் தட்டப்படும் போது திறக்கப்பட வேண்டுமென்று எந்த அவசியமும் இல்லை

Published:Updated:
சொல்வனம்
பிரீமியம் ஸ்டோரி
சொல்வனம்

காதல் விதை

இறுக மூடிய கைக்குள்

மௌனித்திருக்கும் ரேகைகளென

அமைதி காக்கிறது உன் காதல்

கூம்பிய எருக்கங்காயினுள்

பொதிந்து கிடக்கும் விதைகளாய்

நெருக்கியடித்தபடி கிடக்கின்றன

உன் நினைவுகள்

ஊடலில் காய்ந்து கிடக்கும்

என் மன எருக்கு பெருவெடிப்பைச்

சந்திக்கும் நாள் மிக அருகில்

நம் காதல்

அலைந்து திரிந்த பெருவெளியேகி

உன் தோட்டம் அடைந்து

முளைக்கக்கூடும் ஏதேனும் ஒரு விதை

இலைத் துளிரில்

எனைக் காண

உனக்குக் கொடுத்துவைத்தால்

அன்று பூக்கும் மலர்களில்

நீ முகரலாம் என் பிரியத்தின் வாசம்.

- கி.சரஸ்வதி

****

திறப்பு

கதவுகள் தட்டப்படும் போது

திறக்கப்பட வேண்டுமென்று

எந்த அவசியமும் இல்லை

திறக்காத கதவுகளை

தட்டவேண்டுமென்ற

அவசியமும் இல்லை

ஆனால் ஏதொன்றும்

செய்யாமல்

கொஞ்ச நேரம்

அமைதியாய்ப் பார்த்துவிட்டுக்

கடப்பது

எவ்வளவு சௌகரியமாய்

இருக்கிறது

கதவிற்கும் நமக்கும்.

- மணிவண்ணன் மா

****

பாரம்..!

பூக்கள் விற்கும்

பொன்னம்மா பாட்டியின் கூடையில்

இன்னமும் இருக்கின்றன

விற்காத பூக்கள்

இருப்பதில் இருநூறு ரூபாய்க்கு

விற்றால்கூட இப்போதைக்கு

அசல்தான் தேறும்

விலை குறைத்தாவது விற்கலாமென்று

ஏழெட்டுத் தெரு சுற்றியும்

எதுவும் விற்பதாய்க் காணோம்

ஏற்கெனவே இருந்த 700 கடனுடன்

இன்றைக்கு 200ம் சேரும் என்ற நினைவே

தலைமேல் இருந்த கூடை அவளைத்

தரையோடு அழுத்தத் தொடங்கியிருக்க...

பொன்னம்மா பாட்டியிடம் இப்போது

யார் சொன்னாலும்

நம்பியிருக்க மாட்டாள்

பூக்கள் பாரமில்லாதவை என்று!

- சாய்மீரா

சொல்வனம்

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS
விகடனின் அதிரடி ஆஃபர்!
தற்பொழுது ரூ.750 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா999 மட்டுமே! மிஸ் பண்ணிடாதீங்க!Get Offer

காத்திருப்பு

அம்மா

கூழாடும் முட்டைகளை

முட்டை சுமந்த தவிட்டை

தவிடு நிறைந்த கூடையை

அப்புறப்படுத்திய பிறகும்

கோழி ரோமம் சிலிர்க்க அவ்விடத்திலேயே படுத்திருக்கிறது

இன்னும் கொஞ்ச காலம்

அவயம் நிகழும்

இன்னும் கொஞ்ச காலம்

அடை காத்திருப்போம்

குஞ்சு பொரிக்காத சோகத்தை நாங்களும்

குஞ்சுகள் பொரிக்கும் கனவை கோழியும்.

- ந.சிவநேசன்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism