கூடு கட்ட முயலும் குருவிக்கு

நினைத்தவுடனே நான்கைந்து காய்ந்த குச்சிகள்

கண்ணில்பட்டுவிட்டன.

சிறிதுதூரம் பறந்தவுடன்

சில வைக்கோல் துண்டுகள் கிடைத்தன.

காய்ந்த புற்களுக்காகத்தான் ஒருகாத தூரம்

அது பயணிக்க வேண்டியிருந்தது.

கூடமைக்கத் தேவையான பொருள்களுடன்

நெடுங்காலமாய் ஒரு நிரந்தர அமைதி பொருந்திய

இடமாய்த் தேடியலையும்

அந்தக் குருவியைக் காணநேர்ந்தால்

உங்களின் சத்தத்தையோ அல்லது

இரைச்சலையோ

வாகன அரவங்களையோ

கொஞ்சம் நிறுத்தி மௌனமாக்கிக்கொள்வீராக...

- சாமி கிரிஷ்

காணாமல்போன ஒருவனை

கண்டுபிடிக்கும் பொறுப்பு

ஒப்படைக்கப்பட்டிருக்கிறது எனக்கு

அவன் குறித்த அங்க அடையாளங்களைப்

பதிவு செய்துகொள்ள

குறிப்பேடுகள் கொடுக்கப்பட்டன

அடையாளமெனச் சொல்லப்பட்ட யாவுமே

இதற்குமுன் யார்சொல்லியோ

பார்க்கப்பட்டதாகவோ அல்லது

எழுதப்பட்டதாகவோ தோன்றியதெனக்கு

குற்றங்களைக் குறித்துக்கொண்டிருக்கிறேன்

குற்றமெனச் சொல்லப்படுபவையாவும்

குற்றமேயில்லையென

மனம் விலக்கிக்கொண்டிருக்கிறது

தேடலின் பொருட்டு

சற்று நாள்களாய்

தொலைந்துபோயிருக்கிறேன் நானும்...

கடவுச்சீட்டளவு அச்சடிக்கப்பட்டு

நாளிதழ்களில் பிரசுரமாயிருக்கும்

காணாமல்போனவர் பற்றிய விவரத்தில்

யாரோ பொருத்திப்பார்க்கக்கூடும்

என்னைப்போலவே எனதடையாளங்களையும்

பின்குறிப்பாய்...

- பன்னீர்.மு