Published:Updated:

ட்ரக்கியோஸ்டமி... பெக் ட்யூப்... கருணாநிதி மெடிக்கல் ரிப்போர்ட்!

ட்ரக்கியோஸ்டமி... பெக் ட்யூப்... கருணாநிதி மெடிக்கல் ரிப்போர்ட்!
பிரீமியம் ஸ்டோரி
ட்ரக்கியோஸ்டமி... பெக் ட்யூப்... கருணாநிதி மெடிக்கல் ரிப்போர்ட்!

ட்ரக்கியோஸ்டமி... பெக் ட்யூப்... கருணாநிதி மெடிக்கல் ரிப்போர்ட்!

ட்ரக்கியோஸ்டமி... பெக் ட்யூப்... கருணாநிதி மெடிக்கல் ரிப்போர்ட்!

ட்ரக்கியோஸ்டமி... பெக் ட்யூப்... கருணாநிதி மெடிக்கல் ரிப்போர்ட்!

Published:Updated:
ட்ரக்கியோஸ்டமி... பெக் ட்யூப்... கருணாநிதி மெடிக்கல் ரிப்போர்ட்!
பிரீமியம் ஸ்டோரி
ட்ரக்கியோஸ்டமி... பெக் ட்யூப்... கருணாநிதி மெடிக்கல் ரிப்போர்ட்!

செப்டம்பர் 2016-க்கு முன்புவரை தி.மு.க தலைவர் கருணாநிதிக்கு மிகப்பெரிய உடல்நலப் பாதிப்புகள் எதுவுமில்லை. 2000 மே மாதத்தில் முதுகுவலிக்காகவும், 2008 மே மாதத்தில் கழுத்துவலிக்காகவும் ஓரிரு நாள்கள் சிகிச்சை எடுத்துக்கொண்டார். மற்றபடி, உடல்நிலை சரியில்லையென்று அவர் படுத்ததில்லை. உடல் எடையைத் தாங்கும் சக்தி கால்களுக்கு இல்லாமல் போனதால், சில ஆண்டுகளுக்கு முன்பு சக்கர நாற்காலிக்கு மாறினார் கருணாநிதி. அதற்குப் பிறகான பாதிப்புகள்தான், அவரை முழுவதுமாக முடக்கிப்போட்டன. அன்றிலிருந்து இன்றுவரை அந்தப் பாதிப்புகளிலிருந்து மீளமுடியாமல் அவர் தவிக்கிறார்.

2016 செப்டம்பரில் முதல்முறையாக நெஞ்சு சளி காரணமாக மூச்சுத்திணறல் ஏற்பட்டு மருத்துவமனையில் அனுமதிக்கப்பட்டார் கருணாநிதி. அந்தப் பிரச்னைக்காக எடுத்துக்கொண்ட மருந்துகளின் பக்கவிளைவாக, அதே ஆண்டு நவம்பர் மாதத்தில் புதிய பிரச்னை ஒன்று உருவெடுத்தது. எடுத்துக்கொண்ட மருந்தில் ஒன்று ஒத்துக்கொள்ளாமல் போகவே, ஒவ்வாமை ஏற்பட்டது. நோய் எதிர்ப்பு சக்தி குறைந்து அவரின் உடல் முழுவதும் ஒவ்வாமை கொப்புளங்கள் வந்தன. மருத்துவர் கோபால் தலைமையிலான மருத்துவக் குழு அவரைக் கவனித்துக்கொண்டாலும், கொப்புளப் பிரச்னைக்குத் தோல் மருத்துவர் இயேசுதாசன் சிகிச்சை வழங்கினார். அதன்பின் முழுமையாக ஓய்வெடுக்க மருத்துவர்கள் அறிவுறுத்தினர். இந்தக் கொப்புளங்களின் ரணம் வாட்ட, இரவு நேரத்தில் தூங்க முடியாமல் அவதிப்பட்டார் கருணாநிதி. படுக்கையில் மாற்றங்கள் செய்தும் அவருக்கு அதே பிரச்னைகள் தொடர, டிசம்பர் ஒன்றாம் தேதி மீண்டும் காவேரி மருத்துவமனையில் சிகிச்சைக்காக அனுமதிக்கப்பட்டார். ஒரே வாரத்தில் அந்தப் பிரச்னைகள் சரியாகிவிட, வீடு திரும்பினார் கருணாநிதி.

ட்ரக்கியோஸ்டமி... பெக் ட்யூப்... கருணாநிதி மெடிக்கல் ரிப்போர்ட்!

மீண்டும் ஒரு வாரத்தில் அவருக்குச் சுவாசக் கோளாறும் நுரையீரல் தொற்றும் ஏற்பட்டது. அப்போதுதான், அவருக்கு முதல்முறையாக ட்ரக்கியோஸ்டமி ட்யூப் பொருத்தும் அறுவை சிகிச்சை செய்யப்பட்டது.

இயற்கையாகச் சுவாசிக்க முடியாத நேரத்தில், வாய் மற்றும் மூக்கின் உதவியின்றி நேரடியாக நுரையீரலுக்கு ஆக்ஸிஜனைக் கொண்டு செல்லும் கருவிதான் ட்ரக்கியோஸ்டமி. தொண்டையில் துளையிட்டு இதைப் பொருத்துவார்கள். காது மூக்கு தொண்டை நிபுணர் டாக்டர் மோகன் காமேஸ்வரன் இதைப் பொருத்தினார். அறுவை சிகிச்சை முடிந்து ஒரு வாரத்தில் வீடு திரும்பினார் கருணாநிதி. அதற்குப் பிறகு எட்டு மாதங்கள் வீட்டிலேயே ஓய்வெடுத்தார். தேவையானபோது மருத்துவர்கள் வந்து சிகிச்சையளித்தனர். கடந்த ஒரு வருடமாகப் பொது நிகழ்ச்சிகளில் கலந்துகொள்வதை அவர் தவிர்த்து வந்தார்.

2017 ஆகஸ்ட் மாதத்தில் மீண்டும் காவேரி மருத்துவமனையில் அனுமதிக்கப்பட்டார் கருணாநிதி. ஏற்கெனவே பொருத்தப்பட்டிருந்த ட்ரக்கியோஸ்டமி ட்யூப் அகற்றப்பட்டு இரண்டாவது முறையாகப் புதிய ட்யூப் பொருத்தப்பட்டது. 2018  ஜனவரியில் ஒருமுறை பல் சிகிச்சைக்காக காவேரி மருத்துவமனை அழைத்துச்செல்லப்பட்டார். 2018 பிப்ரவரி 15-ம் தேதி அவருக்கு மூன்றாவது முறையாக ட்ரக்கியோஸ்டமி ட்யூப் மாற்றப்பட்டது.

இதற்கிடையே தொண்டையில் ட்ரக்கியோஸ்டமி ட்யூப் இருப்பதால், உணவு எடுத்துக்கொள்வதும் பிரச்னையானது. அதனால், வயிற்றில் துளையிட்டு பெக் ட்யூப் (Percutaneous endoscopic gastrostomy -PEG) வழியாக அவருக்கு உணவளித்து வந்தார்கள். வயிறு இரைப்பை நிபுணர் டாக்டர் கே.ஆர்.பழனிசாமி இதற்காகச் சிகிச்சை தந்தார்.   

ட்ரக்கியோஸ்டமி... பெக் ட்யூப்... கருணாநிதி மெடிக்கல் ரிப்போர்ட்!

இந்நிலையில், கருணாநிதிக்கு ஜூலை 18-ம் தேதி நான்காவது முறையாக காவேரி மருத்துவமனையில் ட்ரக்கியோஸ்டமி கருவி மாற்றம் செய்யப்பட்டது. அன்றிரவே வீட்டுக்கு அழைத்துவரப்பட்டார் அவர். வீட்டுக்கு வந்ததிலிருந்தே சிறுநீரகப் பாதையில் நோய்த்தொற்று ஏற்பட்டது. இதனால் எழுந்த காய்ச்சல் அவரை வாட்டியெடுத்தது. அவரின் உடலில் நோய் எதிர்ப்பு சக்தி குறைந்துவிட்டதாகவும் மருத்துவ வட்டாரங்கள் தெரிவித்தன.  இந்தமுறை அவரை மருத்துவமனைக்கு அழைத்துச் செல்லாமல், காவேரி மருத்துவமனை மருத்துவர்கள் வீட்டுக்கே வந்து சிகிச்சை தந்தனர். இந்தநிலையில், திடீரென அவருக்கு ரத்த அழுத்தம் குறையவே, ஜூலை 28-ம் தேதி ஆம்புலன்ஸ் வரவழைக்கப்பட்டு அதிகாலை 1.30 மணிக்கு காவேரி மருத்துவமனையில் அனுமதிக்கப்பட்டார் கருணாநிதி. ஆம்புலன்ஸில் அவர் அழைத்துச் செல்லப்பட்டது இதுவே முதல்முறை. காவேரி மருத்துவமனையின் நான்காவது மாடியில், ஐ.சி.யூ-வில் வைத்து அவருக்குச் சிகிச்சையளிக்கப்பட்டது.

கருணாநிதிக்குச் சிகிச்சையளித்து வரும் காவேரி மருத்துவமனையின் மருத்துவர் குழுவில் இருக்கும் மூத்த டாக்டர் ஒருவரிடம் பேசினோம். ‘‘இம்முறை ட்ரக்கியோஸ்டமி ட்யூப் மாற்றப்பட்ட பிறகு அவருக்கு நோய்த்தொற்று ஏற்பட்டது. வயது அதிகம் என்பதால் உடல் நலிவுற்று, உடலில் சோடியம், பொட்டாசியம் அளவு குறைந்துள்ளது. அதற்காகத்தான் வீட்டிலேயே சிகிச்சையளிக்கப்பட்டது. மனித உடலின் முக்கிய உறுப்புகளாகக் கருதப்படுவது மூளை, இதயம், சிறுநீரகம், கல்லீரல் மற்றும் நுரையீரல் ஆகியவைதான். இவை அனைத்தும் அவருக்கு நன்றாக இயங்குகின்றன. இ்வற்றில் எந்த பாதிப்புகளும் இல்லை.

அதற்குக் காரணம் அவர் தொடர்ச்சியாகச் செய்துவந்த நடைப்பயிற்சியும் யோகப்பயிற்சியும் தான். உடல்நலக் கோளாறு என்பது அவருக்குப் பெரிய அளவில் இல்லை. ஆனாலும், முதுமையின் பாதிப்புகள் தவிர்க்க முடியாதவை. அவருக்கு அளிக்கப்படும் ஆன்டி பயாடிக் மருந்துகளை, தேவைக்கு ஏற்றபடி மாற்றித் தருகிறோம். இதில் நல்ல பலன் தெரிய ஆரம்பித்தது’’ என்கிறார் அவர்.

- இரா.செந்தில்குமார்