Published:Updated:

ஆக்ஸிஜன் பிரச்னைக்கு முடிவுகட்டும் 2DG

2DG
பிரீமியம் ஸ்டோரி
2DG

- அபையா ஸ்ரீஸ்ரீமால் ஜெயின் பேட்டி

ஆக்ஸிஜன் பிரச்னைக்கு முடிவுகட்டும் 2DG

- அபையா ஸ்ரீஸ்ரீமால் ஜெயின் பேட்டி

Published:Updated:
2DG
பிரீமியம் ஸ்டோரி
2DG
புதிய கொரோனா மருந்தான 2-deoxy-D-glucose-ஐ மே 17-ம் தேதியன்று அறிமுகப்படுத்தியிருக்கிறது மத்திய அரசு. கடந்த 40 ஆண்டுகளாக புற்றுநோய்க்கான மருந்தைக் கண்டுபிடிக்கும் முயற்சியில் ஈடுபட்டிருந்தது மத்திய அரசின் பாதுகாப்பு ஆராய்ச்சி மற்றும் வளர்ச்சிக் கழகம் (DRDO). அந்த ஆராய்ச்சியில் கண்டுபிடிக்கப்பட்ட மருந்தான இது, புற்றுநோய் செல்கள்மீது மட்டுமன்றி, கோவிட்-19 செல்களின் மீதும் வேலை செய்வதாக உறுதி செய்யப்பட்டுள்ளது. இந்த மருந்தின் இரண்டாம் கட்ட பரிசோதனை முடிந்து, மூன்றாம் கட்ட பரிசோதனை தொடங்கியுள்ள நிலையில், அவசரகால அடிப்படையில் முதற்கட்டமாக பத்தாயிரம் கொரோனா நோயாளிகளுக்கு இந்த மருந்தை அளிக்க முடிவு செய்துள்ளது மத்திய அரசு. இந்தநிலையில்தான், 2DG மருந்து எவ்வாறு வேலை செய்கிறது, அதன் செயல்திறன் என்ன உள்ளிட்ட விஷயங்கள் குறித்து, மருந்து உற்பத்தித்துறையில் 44 ஆண்டுகள் அனுபவம்கொண்டவரும் ‘நானோ லைஃப்’ நிறுவன தலைவருமான அபையா ஸ்ரீஸ்ரீமால் ஜெயினிடம் சில கேள்விகளைக் கேட்டோம்.
அபையா ஸ்ரீஸ்ரீமால் ஜெயின்
அபையா ஸ்ரீஸ்ரீமால் ஜெயின்

“இந்த மருந்து நோயாளிகளின் ஆக்ஸிஜன் பிரச்னைக்கு முடிவுகட்டும் என்று சொல்லப்படுகிறதே, உண்மையா?”

“கொரோனா நோயாளிகளுக்கு ஆக்ஸிஜன் பற்றாக்குறை பெரிய பிரச்னையாக இருக்கிறது. இதற்கென்று தனித்துவமான சிகிச்சையை முயற்சி செய்துகொண்டிருந்தபோதுதான், 2-deoxy-D-glucose மருந்து கண்டுபிடிக்கப் பட்டுள்ளது. ஏற்கெனவே புற்றுநோய் சிகிச்சையில் இதன் வேதிமப் பொருளைப் பயன்படுத்திக்கொண்டிருந்த நிலையில்தான், இந்த மருந்து கொரோனா சிகிச்சையிலும் உதவக்கூடும் என்று டி.ஆர்.டி.ஓ உறுதிசெய்துள்ளது. புற்றுநோய் செல்கள் அதிக அளவிலான குளூக்கோஸை உறிஞ்சுகின்றன. இந்த மருந்து, பாதிக்கப்பட்ட செல்களின் குளூக்கோஸ் தேவையைக் குறைத்து, புற்றுநோய் பாதித்த செல்களையே அழித்துவிடும். இதன் மூலம், கீமோதெரபியே இல்லாமல் புற்றுநோயாளிகள் குணமடைகிறார்கள். அதே பாணியில் இந்த மருந்தை கோவிட் செல்களின் மீதும் ஏன் முயன்று பார்க்கக் கூடாது என்று நினைத்த டி.ஆர்.டி.ஓ அமைப்பு, அதற்கு மே 8-ம் தேதி மத்திய அரசிடம் ஒப்புதல் பெற்றது. கோவிட் நோயாளிகளின் நுரையீரலில் எங்கெல்லாம் பாதிப்பு இருக்கிறதோ, அங்கெல்லாம் இந்த மருந்து சென்று படிந்துவிடும். அப்படிப் படிந்து அவற்றுடைய குளூக்கோஸ் தேவையைத் தடை செய்வதால், அந்த செல்கள் அழியக்கூடும். அதன் மூலம் ஆக்ஸிஜன் பற்றாக்குறை ஏற்படுவதைத் தடுக்க முடியும்.’’

“இந்த மருந்து புற்றுநோய் செல்களை மட்டுமன்றி ஆரோக்கியமான செல்களையும் பாதிப்பதால்தான், இதுவரை இதற்கு அனுமதி கொடுக்கப்படவில்லை என்று சொல்லப்படுகிறது. அது உண்மையா?”

“இந்த மருந்தை 40 ஆண்டுகளாக ஆய்வு செய்ததன் மூலம், இது ஆரோக்கியமான செல்களின் மீது பெரிதாக எந்தத் தாக்கத்தையும் ஏற்படுத்துவதில்லை என்று கண்டுபிடிக்கப் பட்டுள்ளது. பாதிப்படைந்த செல்களையே இது தேர்ந்தெடுத்து அங்கேயே தங்கி, குளூக்கோஸ் தேவையைத் தடுத்து அந்த செல்லையே முற்றிலும் அழித்துவிடும். ஆகவே, ஆரோக்கியமான செல்களை இது அழிப்பதற்கான வாய்ப்புகள் மிகவும் குறைவு.”

“கேன்சர் வைரஸ்களிடம் காட்டும் அதே வீரியத்தை கொரோனா வைரஸிடமும் காட்டுமா 2DG?”

“கேன்சர் வைரஸோ... கோவிட் வைரஸோ... பெயர்கள்தான் வேறுபடுகின்றனவே தவிர, இரண்டுமே பாதிக்கப்பட்ட அணுக்களே. அந்த வகையில், இது புற்றுநோய் அணுக்கள்மீது திறம்படச் செயல்படுவதுபோல கோவிட் தாக்கிய செல்களிலும் குளூக்கோஸ் தேவையைத் தடை செய்து, ஆக்ஸிஜன் பற்றாக்குறையைச் சரி செய்யும் என்ற நம்பிக்கை இருக்கிறது.”

“கொரோனா தடுப்பூசிகளுக்குக் குறிப்பிட்ட செயல்திறன் விகிதம் குறிப்பிடுவதுபோல, 2DG மருந்தின் செயல்திறன் விகிதத்தைக் குறிப்பிட முடியுமா?”

“இவ்வளவு சீக்கிரத்தில் இதன் செயல்திறன் விகிதத்தைக் கணிக்க முடியாது. இப்போதுதான் 10,000 பாக்கெட்டுகளை நோயாளிகளுக்குக் கொடுத்து, அதன் செயல்திறனைப் பதிவு செய்யப் போகிறார்கள். மருந்து உற்பத்தித் துறையில் 44 ஆண்டுகள் அனுபவம் எனக்கு இருக்கிறது... அதன் அடிப்படையில், இதன் செயல்திறன் 80 சதவிகிதத்துக்கும் அதிகமாகவே இருக்கும் என்று நம்புகிறேன்.”

“இந்த மருந்தும் தடுப்பூசியைப்போல, வயதுக்கேற்ப பரிந்துரைக்கப்படுமா?”

“இதை வயது அடிப்படையில் பரிந்துரைப் பதில்லை. ஒருவருடைய உடல் எடையைப் பொறுத்தே பரிந்துரைக்கப்படுகிறது. ஒரு கிலோ உடல் எடைக்கு 64 மில்லிகிராம் கொடுக்கப்படும். குழந்தைகளுடைய எடைக்கு ஏற்ப, குறைந்த அளவில் மருந்து இருந்தாலே போதும்.’’

ஆக்ஸிஜன் பிரச்னைக்கு முடிவுகட்டும் 2DG

“எப்போது இந்த மருந்து பரவலாக அனைத்து இடங்களிலும் கிடைக்கும்?”

“அனைத்துகட்ட பரிசோதனைகளும் முடிந்துவிட்டால், பாராசிட்டமால் போலவே இதுவும் எளிதில் கிடைக்கும்.”

“மருந்தின் விலை எவ்வளவு இருக்கும்?”

“நான் கேள்விப்பட்ட வரை, ஒரு சாஷே பாக்கெட் 350 ரூபாய் என்று சொல்லப்படுகிறது. ஆனால், உறுதியான விலை தெரியவில்லை. உலக அளவில் தரமான மருந்தை, குறைவான விலையில் இந்தியா கொண்டுவருகிறது. நாள்கள் செல்லச் செல்ல ஒரு சாஷே பாக்கெட் 100 ரூபாய்க்குக்கூட கிடைக்கலாம்.

“பொதுமக்களுக்கு இலவசமாகக் கிடைக்க வாய்ப்பு இருக்கிறதா?”

“இந்த மருந்தின் மூலம் கொரோனாவை முற்றிலும் குணப்படுத்த முடியுமென்றால், அரசு மருந்து நிறுவனங்களுக்கு மானியம் வழங்கி, இதை அனைவருக்கும் இலவசமாக வழங்கும் என்று நம்புகிறேன்.”