Published:Updated:

கைவிடப்படும் நோயாளிகள்... எகிறும் கொரோனா பலி!

தனியார் மருத்துவமனைகள்
பிரீமியம் ஸ்டோரி
தனியார் மருத்துவமனைகள்

தனியார் மருத்துவமனைகள் செய்வது நியாயமா?

கைவிடப்படும் நோயாளிகள்... எகிறும் கொரோனா பலி!

தனியார் மருத்துவமனைகள் செய்வது நியாயமா?

Published:Updated:
தனியார் மருத்துவமனைகள்
பிரீமியம் ஸ்டோரி
தனியார் மருத்துவமனைகள்

கொரோனா சிகிச்சையில் இருக்கும் நோயாளிகளை உயிருக்கு ஆபத்தான காலகட்டத்தில் தனியார் மருத்துவமனைகள் கைவிட்டு, அரசு மருத்துவமனைகளுக்கு அனுப்பிவிடுவதாகக் குற்றச்சாட்டு எழுந்துள்ளது. ‘இப்படித் தனியார் மருத்துவமனைகளால் கைவிடப்படும் நோயாளிகள் பலரையும் எங்களாலும் காப்பாற்ற முடிவதில்லை’ என்று வேதனை பொங்கச் சொல்கின்றனர் அரசு மருத்துவர்கள்.

சமீபத்தில் நடந்த ஒரு சம்பவம் மனதை நொறுக்குகிறது. கொரோனாவால் பாதிக்கப்பட்டு தனியார் மருத்துவமனையில் அனுமதிக்கப் பட்டிருந்த நிறைமாத கர்ப்பிணியை சென்னைக் கீழ்ப்பாக்கம் அரசு மருத்துவக்கல்லூரி மருத்துவ மனையின் வாசலிலேயே இறக்கிவிட்டுச் சென்றிருக்கிறது அந்தத் தனியார் மருத்துவ மனையின் ஆம்புலன்ஸ். கீழ்ப்பாக்கம் மருத்துவமனை ஊழியர்கள் அந்தப் பெண்ணை மீட்டு மருத்துவமனையில் அனுமதித்து சிகிச்சை அளித்துள்ளனர்.

விகடனின் அதிரடி ஆஃபர்!
தற்பொழுது ரூ.800 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா949 மட்டுமே! மிஸ் பண்ணிடாதீங்க!Get Offer

சென்னை ராஜீவ் காந்தி அரசுப் பொது மருத்துவமனையின் முதல்வர் மருத்துவர் ஜெயந்தி, ‘‘நாள்தோறும் ஒன்று அல்லது இரண்டு நோயாளிகள் மிகவும் கவலைக்கிடமான நிலையில் எங்கள் மருத்துவமனைக்குத் தனியார் மருத்துவ மனைகளால் பரிந்துரைக்கப் படுகின்றனர். அரசு மருத்துவக் கல்லூரி மருத்துவமனைக்கு வரும் நோயாளிகளை எக்காரணம் கொண்டும் திருப்பி அனுப்புவதில்லை. நோயாளிகள் பிழைக்க மாட்டார்கள் என்று தெரிந்தாலும், அவர்களுக்குக் கடைசிவரையில் சிகிச்சை அளிக்கிறோம். அவ்வாறு வரும் நோயாளிகளில் பெரும்பாலானோரைக் காப்பாற்ற முடியாமல் போய்விடுகிறது. மருத்துவமனைக்கு வந்த அரை மணி நேரத்திலேயேகூட சிலர் உயிரிழந்து விடுகின்றனர். சிலர் அதிகபட்சம் 24 மணி நேரம் தாக்குப்பிடிக்கின்றனர்’’ என்றார் வேதனையுடன்.

ஜெயந்தி , ஜெயலால், ரகுநந்தனன்
ஜெயந்தி , ஜெயலால், ரகுநந்தனன்

சென்னை ஓமந்தூரார் மருத்துவக் கல்லூரி மருத்துவமனையின் உயரதிகாரி ஒருவர், ‘‘வாரத்துக்கு சுமார் பத்து நோயாளிகள் இதுபோன்று தனியார் மருத்துவமனைகளிலிருந்து பரிந்துரைக்கப்படுகின்றனர். அவர்களில் ஆறு அல்லது ஏழு பேர் உயிரிழந்துவிடுகின்றனர். சில மருத்துவமனைகள் மட்டுமே உடல்நிலை மோசமான நோயாளிகளை வென்டி லேட்டர் வசதியுள்ள ஆம்புலன்ஸில் அனுப்பி வைக்கின்றன. பலர் ஆபத்தான நிலையில்தான் வருகின்றனர். இதனால், சிலரை மட்டுமே காப்பாற்ற முடிகிறது. நோயாளிகள் ஆரம்பகட்டத்திலேயே அரசு மருத்துவமனைக்கு வந்துவிடுவது தான் நல்லது. அரசு மருத்துவமனைகளில் தான் தரமான ஒருங்கிணைந்த சிகிச்சைகள் வழங்கப்படுகின்றன’’ என்றார்.

தனியார் மருத்துவமனைகள் கடைசி நேரத்தில் அரசு மருத்துவமனைகளுக்கு நோயாளிகளைப் பரிந்துரைப்பதற்குப் பல்வேறு காரணங்கள் கூறப்படுகின்றன. பிரதான காரணம்: தனியார் மருத்துவ மனைகளில் ஒருசில நாள்களுக்குள் சில லட்சங்களை இழக்க நேரிடுகிறது. கையிலிருக்கும் பணத்தையெல்லாம் இழந்த பின்னர், கட்டணத்தைச் செலுத்த முடியாததால், அரசு மருத்துவமனைக்கு அனுப்பி வைத்துவிடுகின்றனர். அடுத்ததாக, நோயாளியின் உடல்நிலை மோசமான பிறகு, அங்கே உயிரிழந்தால் மருத்துவமனையின் பெயர் கெட்டுவிடும் என்று அரசு மருத்துவமனைக்குப் பரிந்துரைக்கின்றனர். உறவினர்களின் சுய விருப்பத்தின் பேரிலும் சில நோயாளிகள் அரசு மருத்துவமனைக்குப் பரிந்துரைக்கப்படுகிறார்கள்.

இந்திய மருத்துவச் சங்கத்தின் அகில இந்தியத் துணைத்தலைவர் மருத்துவர் ஜெயலாலிடம் பேசினோம். ‘‘தமிழகத்தில் முதலமைச்சரின் விரிவான காப்பீட்டுத் திட்டத்தின்கீழ் சிகிச்சை அளிக்கும் மருத்துவமனைகளில் 25 சதவிகிதப் படுக்கைகளை கொரோனா சிகிச்சைக்காக ஒதுக்க வேண்டும் என்று அரசு உத்தரவிட்டது. தமிழகத்தில் 700 தனியார் மருத்துவமனைகள் அதன்படி சிகிச்சை அளிக்கின்றன. அவற்றில் 50 மருத்துவமனைகளில் மட்டுமே கொரோனாவுக்கு முழுமையாகச் சிகிச்சை அளிக்கும் வகையிலான ஒருங்கிணைந்த சிகிச்சை வசதிகள் உள்ளன. நோயாளியின் உடல்நிலை மோசமாகும்போது, உயர் சிகிச்சைக்காக அரசு மருத்துவமனைக்குப் பரிந்துரைக்க வேண்டிய நிலை ஏற்படுகிறது. பணத்தைச் செலுத்த இயலாத நோயாளிகள் தங்கள் விருப்பத்தின் பேரில்தான் அரசு மருத்துவ மனைக்குப் பரிந்துரைக்கச் சொல்கின்றனர். கட்டணத்தைச் செலுத்த இயலும் நோயாளிகள்கூட சில நேரங்களில் அரசு மருத்துவமனைக்குப் பரிந்துரைக்கும்படி கேட்கின்றனர். சில தனியார் மருத்துவமனைகள் நோயாளிகளுக்கு சலுகைக் கட்டணத்திலும் சிகிச்சை அளிக் கின்றனர்’’ என்றார்.

கைவிடப்படும் நோயாளிகள்... எகிறும் கொரோனா பலி!

இந்தப் பிரச்னை தொடர்பாகத் தமிழக அரசின் சார்பில் தனியார் மருத்துவமனைப் பிரதிநிதிகளுடனான பேச்சுவார்த்தை சமீபத்தில் நடை பெற்றிருக்கிறது. அப்போது, ‘இதுபோன்ற சம்பவங்கள் தொடர்ந்தால் தனியார் மருத்துவமனைகள்மீது கடும் நடவடிக்கை எடுக்கப்படும்’ என்று வாய்மொழி எச்சரிக்கை விடுக்கப்பட்ட தாகவும் கூறப்படுகிறது.

கொரோனா சிகிச்சைக்கான தமிழக அரசின் ஒருங்கிணைப்பு அதிகாரியான மருத்துவர் ரகுநந்தனன், ‘‘இதுபோன்ற சம்பவங்கள் தொடர்ச்சியாக நடைபெறுவதால், ஒரு மாதத்துக்கு முன்பாகவே தனியார் மருத்துவ மனைகளுக்கு வழிகாட்டு நெறிமுறைகளை அனுப்பியிருக்கிறோம். ‘கவலைக்கிடமான நிலையில் நோயாளியை அரசு மருத்துவமனைக்குப் பரிந்துரைக்கக் கூடாது. உடல்நிலை சற்றுத் தளரும்போதே தொலைபேசியில் தகவலைத் தெரிவித்து விட்டு, உடனடியாக அரசு மருத்துவ மனைக்கு நோயாளிகளைக் கொண்டு செல்ல வேண்டும்’ என்று அறிவுறுத்தப்பட்டிருக் கிறது. இருந்தாலும் இதுபோன்ற சம்பவங்கள் தொடர்ந்து நடைபெற்றுக்கொண்டுதான் இருக்கின்றன’’ என்றார்.

விலைமதிப்பற்ற உயிர்களைக் காப்பாற்ற வேண்டிய கடமை தனியார் மருத்துவமனை களுக்கும் உள்ளது. தமிழக அரசும் வாய்மொழியாக உத்தரவுகளைப் பிறப்பிக்காமல் கடும் நடவடிக்கைகளை எடுத்தால்தான் இதற்குத் தீர்வு கிடைக்கும்.