Vikatan.com

www.vikatan.com would like to send you push notifications.

Notifications can be turned off anytime from browser settings.

ஸ்னோஃப்ளேக்ஸ்களுக்கு இப்படி ஒரு வடிவம் எங்கிருந்து வந்தது? விளக்கும் அறிவியல்!

ஸ்னோஃப்ளேக்ஸ்

பனி படர்ந்த சூழலையே நாம் மலைப்பிரதேசத்திற்கு சென்றால் மட்டுமே பார்க்க முடியும். நம் ஊரில், நமக்குத் தெரிந்தது எல்லாம் மார்கழி மாத வெள்ளைப் பனிமூட்டமும், உதிக்கும் சூரியனை ஜெயித்து இலைகளில் தங்கியிருக்கும் பனித்துளிகளும்தான். எப்போதாவது இலங்கை அணி கிரிக்கெட்டில் ஜெயிப்பது போல், ஆலங்கட்டி மழை பெய்யும். அப்போதும் அதை ரசிக்காமல், ஃபேஸ்புக்கில் லைவ் வீடியோ போட்டுக்கொண்டிருப்போம். மேற்கத்திய நாடுகளில் பனிப் பொழிவு (Snowfall) என்பது வருடா வருடம் நடக்கும் கோலாகல இயற்கை நிகழ்வு. முதல் பனிப்பொழிவை பார்ப்பவர்கள், ஏதோ சாதித்து விட்டதாகத் துள்ளிக் குதித்து கொண்டாடுவார்கள். இந்தியாவில் இருந்து வெளிநாடு சென்றவர்கள் முதன்முறையாகப் பனிப்பொழிவை பார்த்தவர்கள் தங்கள் மகிழ்ச்சியை இந்தியாவிலிருக்கும் அனைத்து உறவினர்களுக்கும் கூறி பொறாமைப்பட வைப்பார்கள். ஸ்னோஃப்ளேக்ஸ் (Snowflakes) என்ற ஒன்றை அவ்வளவு படங்கள் பிடித்து நம்மையும் அதில் டேக் (Tag) செய்து வெறுப்படைய செய்வார்கள்.

அது சரி! இப்போது அதுவல்ல பஞ்சாயத்து. அந்த ஸ்னோஃப்ளேக்கிற்கு எப்படி அப்படி ஒரு வடிவம் வந்தது? எத்தனை வகைகள் இருக்கின்றன? முதன்முதலில் அதை யார் படம்பிடித்தார்கள்? எல்லாம் பார்த்து விடுவோம்.

முதல் ஸ்னோஃப்ளேக் புகைப்படம்

வில்சன் பென்ட்லி (1865 - 1931) என்ற புகைப்படக்காரர்தான் முதன் முதலில் ஸ்னோஃப்ளேக்கை படம்பிடித்தார். அளவில் மிகச் சிறியதாக இருக்கும், இதில் என்ன சுவாரஸ்யம், இதற்காக இவ்வளவு செலவு செய்து படம் பிடிக்க வேண்டுமா என அனைவரும் கண்டுகொள்ளாமல் இருக்க, வில்சன் மட்டும் இதில் ஒரு ஈர்ப்பு இருப்பதாய் உணர்ந்தார். தன் கேமரா லென்ஸின் முன் ஒரு நுண்ணோக்கி (Microscope) ஒன்றை மாட்டிக்கொண்டார். குறுகிய காலகட்டத்தில் படபடவென 5000 ஸ்னோஃப்ளேக்குகளைப் படம் பிடித்துத் தள்ளினார். அவரின் புகைப்படங்களைப் பார்த்துத்தான், ஸ்னோஃப்ளேக்குகளில் இவ்வளவு வடிவங்கள், வித்தியாசங்கள் இருக்கின்றன எனப் பலரும் தெரிந்து கொண்டார்கள்.

ஸ்னோஃப்ளேக்ஸ் வகைகள்

வகைகளும், வடிவங்களும்

1951ல் சர்வதேச சைரோஸ்பெரிக் அறிவியல் சங்கத்தை (International Association of Cyrospheric Sciences - IACS) சார்ந்த விஞ்ஞானிகள் ஸ்னோஃப்ளேக்குகள் குறித்த ஆராய்ச்சியில் ஈடுபட்டனர். அவர்கள் இதில் 10 வித்தியாசமான வடிவங்கள் இருப்பதைக் கண்டறிந்தனர். தற்போது அதில் 8 வடிவங்கள் மட்டுமே அதிகமாகக் காணப்படுகின்றன. அதிலும் 80 வகைகளில் தனிப்பட்ட மாறுபாடுகள் கொண்ட ஸ்னோஃப்ளேக்குகள் இருக்கின்றன.

எப்படி அதன் வடிவங்களைப் பெறுகின்றன?  

கலிஃபோர்னியா இன்ஸ்டிடியூட் ஆப் டெக்னாலஜியின் இயற்பியல் பேராசிரியர் கென்னத் லிப்ரெட்ச்ட் ஸ்னோஃப்ளேக்குகள் குறித்து விரிவான கண்காணிப்புகளை நடத்தினார். பனி படிகங்கள் கீழே இறங்கும்போது, அதில் தண்ணீர் மற்றும் காற்றின் மூலக்கூறுகள் நிகழ்த்தும் ஜாலமே இந்த விதவிதமான வடிவங்களுக்குக் காரணம் என்று கூறினார். இன்னொரு சுவாரஸ்ய செய்தியாகக் காற்றில் ஈரப்பதம் இருக்கும்போது மட்டுமே விதவிதமாக சிக்கலான வடிவங்கள் வருவதாகவும், உலர் நிலைகளில் உருவாகும் ஸ்னோஃப்ளேக்குகள் சாதாரண வடிவம் கொண்டே இருக்கின்றன என்றும் தெரிவித்தார்.

ஸ்னோஃப்ளேக்ஸ்

இதற்கு அடுத்தபடியாக, இந்த ஸ்னோஃப்ளேக்கிற்கு இந்த வடிவம்தான் என்று முடிவு செய்வது வெப்பநிலை. - 22 டிகிரி செல்சியஸிற்கு (- 7.6 டிகிரி ஃபாரன்ஹீட்) கீழ் உருவாகும் ஸ்நோஃப்ளேக்குகள் பெரும்பாலும் எளியப் படிகத் தகடுகள் மற்றும் பத்திகளாகவே இருக்கின்றன. ஆனால்,சற்று அதிகமான வெப்பநிலையில் உருவாகும் ஸ்னோஃப்ளேக்குகள் பல்வேறு கிளைகள் கொண்டதாய், பூப்போல வடிவம் பெற்று விடுகின்றன.

வெப்பநிலை மற்றும் ஈரப்பதம்தான் இந்த இயற்கையின் விந்தைக்குக் கலை வடிவம் கொடுப்பதாய் அமைகின்றன. சூடான வெப்பநிலை, அதே சமயம் ஈரப்பதம் கொண்ட காற்று பனிப்பொழிவை அற்புத சிற்பங்களாக மாற்றி நம் கண்களுக்கு விருந்து படைக்கின்றன. ஸ்னோஃப்ளேக் செல்ஃபி எடுக்கவே வெளிநாடு போக வேண்டும் போல!

உங்கள் கருத்தைப் பதிவு செய்யுங்கள்

Advertisement
Advertisement
Advertisement

எடிட்டர் சாய்ஸ்

Advertisement

MUST READ

Advertisement