Vikatan.com

www.vikatan.com would like to send you push notifications.

Notifications can be turned off anytime from browser settings.

மியூச்சுவல் ஃபண்டில் முதலீடு செய்யும் முன் கவனிக்க வேண்டிய விஷயங்கள்!

Chennai: 

‘மியூச்சுவல் ஃபண்ட் முதலீடு, சந்தை அபாயத்துக்கு உட்பட்டது; திட்டம் தொடர்பான அனைத்துத் தகவல்களையும் கவனமாகப் படிக்கவும்' என விளம்பரங்களில் சொல்லப்படுவதால் மியூச்சுவல் ஃபண்ட் முதலீடு என்றாலே பணம் போய்விடுமோ என்ற பயப்படுகின்றனர். 

முதலீடு

ஆனால், மியூச்சுவல் ஃபண்டைப் பொறுத்தவரைப் பணவீக்க விகிதத்தைத் தாண்டிய வருமானம் கிடைக்கும். பங்குச் சந்தை சிறப்பாகச் செயல்படும் பட்சத்தில், நீண்ட காலத்தில் ஆண்டுக்கு 12 முதல் 15 சதவிகிதமும், குறிப்பிட்ட சில ஃபண்ட்களில் இதைவிட அதிக வருமானமும் கிடைக்க வாய்ப்பு இருக்கிறது. அதேநேரத்தில் இன்றைய சூழ்நிலையில் 3,500-க்கும் அதிகமான மியூச்சுவல் ஃபண்ட் திட்டங்கள் சந்தையில் இருக்கின்றன. இதில் நமக்குத் தேவையான, சரியான மியூச்சுவல் ஃபண்ட் திட்டங்களைத் தேர்ந்தெடுப்பது என்பது கொஞ்சம் சிக்கலான காரியம். ஏனெனில் பெரும்பாலோனோருக்கு நிதிச் சேவைகள் தொடர்பான விழிப்பு உணர்வு போதுமான அளவு இல்லாத காரணத்தினால், அது கிடைக்கும், இது கிடைக்கும் என சொல்லி மிஸ் செல்லிங் செய்ய அதிக வாய்ப்பு இருக்கிறது. ஆகையால், `அவரு சொன்னாரு, இவரு சொன்னாரு' என எந்த ஒரு மியூச்சுவல் ஃபண்ட் திட்டத்திலும் முதலீடு மேற்கொள்ளாமல், சில முக்கியமான விஷயங்களைக் கவனித்து அதன் பிறகு முதலீடு மேற்கொள்ளுங்கள். 

500 ரூபாய் கூட போதும்! 

பங்குச் சந்தை, ரியல் எஸ்டேட் போன்ற முதலீட்டுத் திட்டத்தில் முதலீடு செய்வதற்கு அதிக பணம் தேவைப்படும். ஆனால், மியூச்சுவல் ஃபண்டில் அப்படியில்லை. வெறும் 500 ரூபாய் இருந்தால்கூட போதும்; மாதந்தோறும் எஸ்.ஐ.பி மூலமாக முதலீட்டை மேற்கொள்ளலாம். ஆனால், 500 ரூபாய் போதும் என்பதற்காக போகிறபோக்கில் ஏதாவது ஒரு முதலீட்டுத் திட்டத்தில் முதலீடு மேற்கொள்வது நல்லதல்ல. முதலீடு செய்யும் முன் அந்தத் திட்டத்தின் சாதக, பாதகம் குறித்து முழுவதுமாக தெரிந்து கொண்டு முதலீடு செய்ய வேண்டும். இல்லையெனில் மாதந்தோறும் எவ்வளவு முதலீடு செய்ய முடியும்; உங்களுடைய நிதி சார்ந்த இலக்கு என்ன என்பதை முதலீட்டு ஆலோசகரிடம் தெரிவித்து, அவரின் ஆலோசனைப்படி முதலீட்டைத் தொடருங்கள். 

குறைந்த ரிஸ்க், அதிக ரிஸ்க்? 

மியூச்சுவல் ஃபண்ட் முதலீட்டில் குறைந்த ரிஸ்க், நடுத்தர ரிஸ்க், அதிக ரிஸ்க் என பலதரப்பட்ட ஃபண்ட்கள் எனச் சந்தையில் இருக்கின்றன. குறைந்த ரிஸ்கில் குறைந்த வருமானமும், நடுத்தர ரிஸ்கில் நடுத்தர வருமானமும், அதிக ரிஸ்கில் அதிக வருமானமும் கிடைக்க வாய்ப்பு இருக்கிறது. அதேநேரத்தில், சந்தையைப் பொறுத்து அதிக ரிஸ்கில், முதலீட்டாளருக்கு அதிக நஷ்டமும் ஏற்பட வாய்ப்பு இருக்கிறது. ஆகையால், மியூச்சுவல் ஃபண்டில் எனக்கு ரிஸ்கே வேண்டாம்; குறைந்த வருமானமே போதும் என நினைத்தால், அதற்கேற்ற முதலீட்டுத் திட்டத்தில் முதலீடு செய்யுங்கள். இல்லை, என்னால் ஓரளவுக்கு மட்டுமே ரிஸ்க் எடுக்க முடியும் என்றால், அதற்கேற்ற முதலீட்டுத் திட்டங்களும் இருக்கின்றன. அதிக வருமானம் வேண்டும், நான் அதிக ரிஸ்க் எடுக்கத் தயார் என்றாலும் அதற்கேற்ற முதலீட்டுத் திட்டங்கள் மியூச்சுவல் ஃபண்டில் மட்டுமே இருக்கின்றன. எனவே, உங்களால் எந்த அளவுக்கு ரிஸ்க் எடுக்க முடியுமோ, அதற்கேற்றார்போல், முதலீட்டைத் தீர்மானியுங்கள். ஒரு வேளை நீங்கள் முதலீட்டு ஆலோசகரின் அறிவுரைப்படி, முதலீட்டை மேற்கொண்டு வருபவர்கள் எனில், எந்தெந்த ஃபண்ட்களில் எவ்வளவு ரிஸ்க் இருக்கிறது; எவ்வளவு சதவிகிதம் வருமானம் கிடைக்கும் என்பதை கேட்டுத் தெரிந்து கொண்டு முதலீட்டைத் தொடருவது நல்லது. 

எந்த ஃபண்டில் முதலீடு? 

மியூச்சுவல் ஃபண்ட் முதலீட்டில் ரிஸ்கை முடிவு செய்த பிறகு, எந்த ஃபண்டில் முதலீடு மேற்கொள்கிறோம் என்பதைத் தீர்மானித்துக் கொள்ளுங்கள். நம்முடைய உடனடி தேவைக்கு, அதாவது ஓர் ஆண்டுக்காலத் தேவைக்கு ஷார்ட் டெர்ம் ஃபண்ட், லிக்விட் ஃபண்ட், இன்கம் ஃபண்டுகளில், அல்ட்ரா ஷார்ட் டெர்ம் ஃபண்டில் முதலீடு செய்யலாம். இடைக்காலத் தேவைக்கு அதாவது சுமார் ஓர் ஆண்டு முதல் மூன்று ஆண்டுகள் வரையிலான தேவைக்கு மீடியம் டேர்ம் ஃபண்ட்களான பேலன்ஸ்டு ஃபண்ட், ஹைபிரிட் ஃபண்ட், இ.எல்.எஸ்.எஸ், ஷார்ட் அண்ட் மீடியம் டெர்ம் ஃபண்டுகளில் முதலீடு செய்யலாம். நீண்ட காலத் தேவைக்கு அதாவது மூன்று ஆண்டுகளுக்கு மேற்பட்ட முதலீட்டுக்கு செக்டார் ஃபண்ட்ஸ் மற்றும் ஈக்விக்டி டைவர்சிஃபைட் மியூச்சுவல் ஃபண்டில் முதலீடு செய்யலாம் என்கின்றனர் நிபுணர்கள். 

சிறந்த போர்ட்ஃபோலியோ! 

சந்தையில் நிதி சார்ந்த திட்டங்கள் பல இருக்கின்றன. ஆனால், மற்ற திட்டங்களைவிட, மியூச்சுவல் ஃபண்ட் நம் வாழ்வை வளப்படுத்த மிகவும் உறுதுணையாக இருப்பவை. தற்பொழுது நிலவுகின்ற பொருளாதாரச் சூழலில் குழந்தைகளின் கல்வி/திருமணம், புதிய வீடு, கார், ஓய்வு வாழ்க்கை என உங்களுடைய நிதி சார்ந்த இலக்கு எதுவாக இருந்தாலும், அந்த இலக்குக்கு ஏற்றார்போல் சிறந்த போர்ட்ஃபோலியோவை உருவாக்கி முதலீட்டை மேற்கொண்டு வருமானத்தை ஈட்டுங்கள். உங்களுடைய இலக்கை எட்டிப் பிடியுங்கள்.

உங்கள் கருத்தைப் பதிவு செய்யுங்கள்

Advertisement
Advertisement
Advertisement

எடிட்டர் சாய்ஸ்

Advertisement

MUST READ

Advertisement