எறும்புத்தின்னிகளின் விலை என்ன தெரியுமா? - விலங்குகளை வேட்டையாடும் மனித மிருகம்! அத்தியாயம் 2 #AnimalTrafficking


இந்தியாவில் இன்றைய தேதிக்கு அதிகமாக கடத்தப்பட்டு, கொல்லப்படும் உயிரினம் யானையோ, புலியோ, சிறுத்தையோ இல்லை. நம் காடுகளில் சுதந்திரமாக திரிந்துக் கொண்டிருக்கும் சாதாரண எறும்புத்தின்னி. 

எறும்புத்தின்னி

உலக உயிரினங்களில் அதிகபட்சமாக உடலெங்கும் செதில்களைக்கொண்ட ஒரே பாலூட்டி இனம் பங்கோலின் ரக எறும்புத்தின்னிகள் தான். இன்றைய நிலையில் உலக அளவில் சட்டவிரோதமாக விற்கப்படும் முதன்மையான விலங்கு. கடந்த பத்து ஆண்டுகளில் பத்து லட்சத்துக்கும் அதிகமான எறும்புத்தின்னிகள் காடுகளில் இருந்து வேட்டையாடப்பட்டுக் கொல்லப்பட்டிருப்பதாக இயற்கைப் பாதுகாப்புக்கான சர்வதேச அதிகாரிகள் தெரிவித்திருக்கிறார்கள். குறிப்பாகப் பெரிய செதில்களைக்கொண்ட பங்கோலின் என்று அழைக்கப்படும் எறும்புத்தின்னிகள் அதிகம் அழிக்கப்பட்டிருக்கின்றன.

எந்த விலங்குகளாலும் எறும்புத் தின்னியின் செதில் சூழ்ந்த உடலைக் காயப்படுத்திவிட முடியாது. பலம்வாய்ந்த புலிகளின் நகங்களால்கூட இவ்விலங்கைக் காயப்படுத்திவிட முடியாது. அந்த அளவிற்கு பலம் பெற்றது எறும்புத் தின்னியின் செதில்கள். எறும்புத் தின்னிகளுக்கு மிகப் பெரிய இயற்கை கவசமாக இருப்பது அதன் செதில்கள்தான். எந்தக் கவசம் மற்ற விலங்குகளிடமிருந்து எறும்புத் தின்னியை பாதுகாக்கிறதோ அதே கவசம்தான் மனிதர்கள் அவற்றை அழிக்கக் காரணமாய் இருக்கிறது என்பதுதான் வேதனையிலும் வேதனை. 

எறும்புத் தின்னிகள் குறித்த செய்திகளும் சில சம்பவங்களும்:
2017 ஆண்டு  ஜனவரி 17, 2.9 டான் எடையுள்ள எறும்புத்தின்னியின் செதில்களை தாய்லாந்து சுங்க அதிகாரிகள் ஸ்வர்ணபுரி விமான நிலையத்தில்  கைப்பற்றினர். இவை சீனாவிற்கு கடத்த இருந்தது கண்டு பிடிக்கப்பட்டது. ஜனவரி மாதம் வரை செதில்கள் நீக்கப்பட்ட இறந்து போன எறும்புத் தின்னிகளும் அவற்றின் செதில்களும் மட்டுமே அதிகாரிகளால் கைப்பற்றப்பட்டன. ஆனால் கடத்தல்காரர்கள் அதோடு நின்று விட வில்லை. தங்களின் எல்லைகளை விரிவாக்கி சுமத்ரா தீவுகளின் தடை செய்யப்பட்ட ஆளில்லா கடற்கரையையும் படகுகளையும் பயன்படுத்தி செதில் கடத்துவதை தொடர்ந்து கொண்டே இருந்தார்கள். போலீசார் தீவிர சோதனையில் இருந்தாலும் செதில் கடத்தல் தொடர்ந்தது.

2017 ஆண்டு மே 1 கோலாலம்பூர் சர்வதேச விமான நிலைய சரக்கு வைக்கும் கார்கோவில் சுங்க அதிகாரிகள் சோதனையில் ஈடுபடுகிறார்கள். சோதனையில்  எட்டு மூட்டைகளில் 408 கிலோ எறும்புத் தின்னியின் செதில்கள் இருப்பதைக் கண்டுபிடித்து பறிமுதல் செய்கின்றனர். செதில்கள் காங்கோவில் இருந்து சவுதி அரேபியா வழியாக கோலாலம்பூர் விமான நிலையத்திற்குக் கடத்தி வந்தது தெரிய வருகிறது. அடுத்த நாள் மே 2 மீண்டும் தொடர்ந்த சோதனையில் எட்டு மூட்டைகளில் 304 கிலோ எறும்புத் தின்னியின் செதில்களைக் கைப்பற்றுகிறார்கள். இந்தச் செதில் மூட்டைகள் காங்கோ தலைநகர் மின்சசாவில் இருந்து கென்யா,  நைரோபி, சவுதி அரேபியா வழியாகப் பயணித்து கோலாலம்பூர் வந்திருக்கிறது. விசாரணையில் எல்லாச் சரக்குகளும் தவறான முகவரிகளில் இருந்து தவறான முகவரிகளுக்கு அனுப்பப்பட்டிருக்கின்றன. எல்லா மூட்டைகளிலும் உலர்ந்த மூலிகைகள் இருப்பதாக ஆவணங்களில் குறிப்பிடப்பட்டிருந்தது. யாரையும் சந்தேகத்தின் அடிப்படையில் கூட கைது செய்ய முடியாமல் திணறியது அப்போதைய மலேசிய அரசாங்கம். இவற்றின் சர்வதேச மதிப்பு 1.6 மில்லியன் அமெரிக்க டாலர்கள். 10 கோடி இந்திய ரூபாய்.

எறும்புத்தின்னி

முதல் அத்தியாயம்: பாம்புக் கடத்தல்

2017 ஆண்டு அக்டோபர் 6 சுமத்ரா தீவில் இருக்கிற டுமாய் நகரின் மேடங்கம்பை என்கிற இடத்தில் கைரில் அன்வர் என்கிறவரின் தலைமையில் சுங்க அதிகாரிகள் வாகனச் சோதனையில் ஈடுபடுகிறார்கள். அப்போது சந்தேகப்படும்படியாக வருகிற ஒரு காரை ரகசியமாகப் பின் தொடர்கிறார்கள். கார் தடைச் செய்யப்பட்ட கடல்பகுதிக்குள் நுழைகிறது. போலீஸ் பின்தொடர்வதை அறிகிற கார் ஓட்டுநர் காரை நிறுத்திவிட்டுத் தப்பித்து விடுகிறார். காரை சோதனை செய்ததில் தடை செய்யப்பட்ட 100 எறும்புத் தின்னிகளும் 37 கிலோ எறும்புத் தின்னியின் செதில்களும் இருப்பதைக் கண்டறிகிறார்கள். இவற்றின் கறுப்பு சந்தை விலை 2.2 மில்லியன் அமெரிக்க டாலர்கள்.

இந்தோனேசியா, மலேசியா எனக் கடத்தி வரப்படுகிற எறும்புத் தின்னியின் செதில்கள் அங்கிருந்து சீனாவிற்கும் வியட்னாமிற்கும் கடத்தப்படுகின்றன. செதில்களைப் பொறுத்தவரை சீனாதான் கடத்தல்காரர்களின் ஹாட் ஸ்பாட். சீனாவிலும் வியட்நாமிலும் பங்கோலின் ரக எறும்பு திண்ணியின் மாமிசம் மிகவும் விரும்பி உண்ணப்படும். இவற்றின் செதில்கள் சீன மருத்துவத்தில் பயன்படுத்தப்படுகிறது. இத்தனைக்கும் இந்த பங்கோலின் ரக எறும்புத்தின்னிகளின் செதில்கள் மனித நகங்களைப் போல வெறும் கெராடின் என்கிற வேதிப்பொருளால் ஆனது தான். அதற்கு மருத்துவக் குணங்கள் இருப்பதாக சிலர் வதந்திகளைக் கிளப்பி விட்டிருக்கிறார்கள். அவற்றை உண்மை என நம்பிய சீனர்கள் எறும்புத் தின்னியின் செதில்களுக்காகத் தவம் இருக்கிறார்கள்.

செதில்களைக் கடத்துவதில் கடத்தல் கும்பல் இப்போது தனியார் கூரியர்  நிறுவனங்களைப் பயன்படுத்துவதாக சொல்கிறார்கள். நிலம், நீர், காற்று என ஐம்பெரும் பூதங்களில் மூன்று பூதங்களின் வழியில்தான் செதில் கடத்தல் நிகழ்ந்துக் கொண்டிருக்கிறது. தரைவழி, கடல்வழி, வான்வழி என எல்லா வழிகளிலும் அதிவிரைவு போக்குவரத்து, எளிதில் கண்டுபிடிக்க முடியாது போன்ற வசதிகளால் கொள்ளையர்கள் கூரியரை பயன்படுத்துகிறார்கள் என்பதை ஏற்காமலும் இருக்க முடிவதில்லை. தவறான முகவரியை பார்சல்களில் கொடுத்துவிட்டுச் சரியான இடங்களுக்குச் சென்று பார்சல்களை பெற்றுக்கொள்கிறார்கள். எல்லாச் செயல்களுக்கும் அந்தச் சரியான இடத்தில் இருக்கிற ஒருவர் உதவிக் கொண்டே இருக்கிறார் என்பதுதான் உண்மை. கடத்தலுக்குக் கடத்தல்காரர்கள் மட்டுமே காரணமாக இருப்பதில்லை என்பதைக் கவனத்தில் கொள்ள வேண்டும். அரசின் துறைகளில் இருக்கிற ஒரே ஒருவரை கைக்குள் போட்டுக் கொள்ளுகிற கடத்தல் கும்பல் மற்ற எல்லாத் தடைகளையும் எளிதாகத் தாண்டி விடுகிறது.

சீனா, தாய்லாந்து எனக் கடந்து போகிற உலகளாவிய செதில் கடத்தல்  சம்பவங்களில் சில தமிழ்நாட்டிலும் நடந்திருக்கிறது. நவம்பர் 21 2015 ஆம் ஆண்டு  ஈரோடு மாவட்டம் சத்தியமங்கலத்துக்கு உள்பட்ட வனப்பகுதியில் இருந்து எறும்புத்தின்னிகளைக் கொன்று அதன் ஓடுகளை காரில் கடத்துவதாக வனத்துறையினருக்கு ரகசிய தகவல் கிடைத்தது. இதைத்தொடர்ந்து பவானிசாகர் வனச்சரகர் பெர்னாட், வனரோந்து படை வனச்சரகர் சாமியப்பன் மற்றும் வன ஊழியர்கள் பவானிசாகர் மேட்டுப்பாளையம் சாலையில் உள்ள மல்லியம் பிரிவு பகுதியில் வாகன சோதனையில் ஈடுபட்டு இருந்தனர். அப்போது அந்த வழியாக வந்த ஒரு காரை சோதனையிட்டதில் அதில் ½ கிலோ எறும்புத்தின்னி ஓடுகள் இருந்ததைக் கண்டுபிடித்தனர். கைது செய்யப்பட்ட மூன்று பேர் அளித்தத் தகவலின் பெயரில் கடத்தலுக்கு முக்கிய காரணமாக செயல்பட்ட பத்து பேரை நான்கு தனிப்படை அமைத்துத் தேடியது வனத்துறை. பத்தில் ஐந்து பேர் மட்டும் கோவையில் கைது செய்யப்பட்டனர். விசாரணையில் செதில்கள் சென்னையில் இருந்து சீனாவிற்கு கடத்த இருந்தது தெரிய வந்தது. சிக்கியவர்கள் யாருக்கும் செதில்களை ஏன் கடத்துகிறோம் எதற்கு கடத்துகிறோம் என்ற எந்த அடிப்படைத்  தகவலும் தெரிவிக்கப்படவில்லை என்பதுதான் வினோதம்.

குமுளி பகுதியில் கைப்பற்றப்பட்ட செதில்கள் குறித்து விசாரித்த வனத்துறை அளித்த அறிக்கை மற்ற உலக நாடுகளை விட வித்தியாசமானது. “எறும்புத்தின்னியின் செதில்களை எரிப்பதன் மூலம் வெளியே கிளம்பும் புகையைச் சுவாசித்தால் மூலவியாதி குணமாகும்” என்ற தவறான நம்பிக்கையால் உள்ளூர் மக்கள் எறும்புத்தின்னியை வேட்டையாடி இருக்கிறார்கள். தமிழகத்திலும்  சட்டவிரோதமாக எறும்புத்தின்னிகள் கொல்லப்பட்டு செதில்கள் விற்பனை செய்யப்படுவதாக வனத்துறையினர் தெரிவிக்கின்றனர்.  

ஐக்கிய நாடுகள் சபையின் கருத்துப்படி, சட்டவிரோத வன வியாபாரத்திற்கான பிரபலமான நாடுகள் என இந்தோனேசியாவையும் தாய்லாந்தையும்   அறிவித்துள்ளது. மிகப்பெரிய விமான நிலையம், மிக நீண்ட நில எல்லைகளைக் கொண்டிருப்பது மற்றும் அண்டை நாடுகளுக்கான தொடர்பு என தாய்லாந்து  நாட்டை எல்லா வகைகளிலும் விலங்குகள் கடத்தலுக்கு மையப்புள்ளியாகப்   பயன்படுத்தி வருகின்றனர். இந்தோனேசியாவில் சட்டவிரோத வனவிலங்கு வர்த்தகம் பொதுவாக உள்ளூர் மக்களால் நடத்தப்படுகின்றது. 

இந்தோனேசியாவின் ஜகாரிடா, யோகியாகர்ட்டா, மாநாடொவ் போன்ற முக்கிய நகரங்களில் எல்லாம் விலங்குகள் மார்க்கெட் சட்ட விரோதமாக இப்போதும் செயல்பட்டு வருகிறது. அழிந்து வரும் உயிரினம் என உலக விலங்குகள் நல  வாரியம் அறிவித்துள்ள விலங்குகளின் மிச்சங்கள் இந்தோனேசியா மார்க்கெட்டுகளில் இருக்கின்றன என்பதுதான் அதிர்ச்சியான தகவல். தாய்லாந்து இந்தோனேசியாவில் விலங்குகள் கடத்தல் குறித்தத் தண்டனைகள் மிகக்  கடுமையாக இருந்தும் அண்டர்கவர் வேலைகள் ஜரூராக நடந்து கொண்டிருக்கிறது.  

காட்டுப்பகுதியில் எத்தனை எறும்புத் தின்னிகள் எஞ்சியுள்ளன என்பது தெரியவில்லை, நான்கு ஆசிய இனங்கள் அபாயகட்டத்தில் இருப்பதாக விஞ்ஞானிகள் அறிவித்திருக்கிறார்கள். ஆசியாவில் இருந்த 100ல் 85 சதவிகித எறும்புத்தின்னிகள் அழிந்து விட்டன. கடத்தல்காரர்கள் தங்களின் பார்வையை இப்போது ஆப்ரிக்கா நாடுகளின் மீது திருப்பி இருப்பது உலகின் மீதமிருக்கும் எறும்புத்தின்னிகளையும் அழித்துவிட  வழிகோலியிருக்கிறது. ஆப்கானிஸ்தானின் நான்கு பாங்கோலின் இனங்கள் ஆபத்தானவை அல்ல; ஆனால் அவையும்  பாதிக்கப்படக்கூடியவை எனக் கருதப்படுகின்றன. எறும்புத்தின்னியின் தேவை அதிகரிக்குமானால் உலகம் முழுமைக்கும் மீதமிருக்கிற எறும்புத் தின்னிகள் கொல்லப்படும் வாய்ப்பு இருக்கிறது. கடத்தல்காரர்கள் அடிக்கடி இலக்கை மாற்றிக் கடத்தல் திட்டங்களை மாற்றி  அமைக்க நேர்ந்தால்  அவற்றிற்கும் பாதிப்பு வரும் என்கிறது விலங்குகள் நல வாரியம்.

அழிந்து வரும் உயிரினங்களில் சர்வதேச வர்த்தகம் குறித்த சபையில்  சீனா உறுப்பினராக உள்ளது.  CITES   (Convention on International Trade in Endangered Species) ஆனால் இன்னொரு பக்கம்  மருத்துவ பாரம்பரியங்களை மதிப்பதற்காக எறும்புத்தின்னிகளின் நுகர்வுகளைச் சீன அரசு அனுமதிக்கிறது. மருத்துவ சிகிச்சை மற்றும் காப்புரிமை பெற்ற சீன மருந்துகளின் உற்பத்திக்கு பாங்கோலின் செதில்கள் பயன்படுத்தப்படுவதே அதற்கு முக்கிய காரணம். விலங்குகளை வேட்டையாடுதல் அல்லது விலங்குகளை வர்த்தகம் செய்வது தொடர்பான தடைகளை நடைமுறைப்படுத்தியுள்ள பெரும்பாலான நாடுகள் , தடையை மீறுபவர்கள் மீது கடுமையான தண்டனைகளை விதித்திருக்கிறது. இருப்பினும் போதிய வன பணியாளர்கள் இல்லாமை மற்றும் நிதி இல்லாமை காரணமாக, தவறுகள் நடந்து  விடுவதாக சில நாடுகள் ஒப்புக்கொள்கின்றன.

எல்லா நாடுகளிலும் விலங்குகள் கடத்தல் குறித்த தண்டனைகள் ஒரு தடையாக இருக்க  வேண்டும், அப்படி நடக்காதவரை விலங்குகள்  வர்த்தகம்  தொடர்ந்துக் கொண்டே இருக்கும். காரணம் பணம் பத்தும் செய்யும் அந்தப் பத்துக்காக மனிதன் எதையும் செய்வான் 

முதல் அத்தியாயம்: பாம்புக் கடத்தல்

Do you like the story?

Please Appreciate the Author by clapping!