வெளியிடப்பட்ட நேரம்: 08:56 (05/02/2018)

கடைசி தொடர்பு:19:14 (05/02/2018)

அமேசான் காட்டிலிருந்து சேகரித்த சுத்தமான ஆக்சிஜன்... விற்பனைக்கு!

இன்னும் சில வருடங்கள் எதிர்நோக்கிக் கற்பனை செய்துகொள்ளுங்கள். உங்களுக்கு உடல் நலக் குறைவு ஏற்படுகிறது. நீங்கள் மருத்துவரிடம் போய் “சரியா மூச்சே விட முடியல டாகடர். ரொம்பக் கஷ்டமா இருக்கு” என்று சொல்கிறீர்கள். அதற்கு அவர் தன் அறையின் சன்னல் திரையை விலக்கிப் பார்க்கிறார். நீங்களும் எட்டிப் பார்க்கிறீர்கள். தூசும் புகை மண்டலமும் கூடி ஊரே பாலைவனம் போல காட்சியளிக்கிறது. சட்டென்று தன் பேனாவை எடுத்து "ஒரு லிட்டர் ஆக்சிஜன் கேன். காலை எழுந்தவுடன் சிறிதளவு, மதியம் உணவுக்குப் பின் சிறிதளவு, தூங்கப்போகும் முன் சிறிதளவு" என்று எழுதித் தருகிறார். நீங்கள் வீட்டுக்குப் போகும் வழியிலேயே பல பேனர்களில் "சுத்தமான சுகாதாரமான ஆக்சிஜன். ஆறு கேன்களை சேர்த்து வாங்கினால் ஒரு கேன் இலவசம். ஆடி ஆஃபர்ல ஆடிப் போய்டுவிங்க ஆடி.. உடனே முந்துங்கள்" என்று விளம்பரங்கள் ஊரெங்கும் இருக்கின்றன. உங்கள் மொபைலை எடுத்து அமேஸானில் ஆறு ஆக்சிஜன் கேன்களை ஆர்டர் செய்கிறீர்கள்.

ஏதோ ஆங்கிலப் படத்தில் பார்க்கும் காட்சிபோல தோன்றலாம். ஆனால், சில மாதங்களுக்கு முன்பே இந்தியாவில் ஆக்சிஜன் கேன்கள் அமேஸானிலும் ஃபிளிப் கார்டிலும் ஸ்நாப் டீலிலும் விற்பனைக்கு வந்துவிட்டன. 

ஆக்சிஜன் கேன்

1985-லிருந்து செயல்பட்டுவரும் இத்தாலி நிறுவனம் பாஸ்ச்சி. இதன் 'ஆக்சி99' எனும் ஆக்சிஜன் கேன் தற்போது ஆன்லைனில் விற்பனைக்கு வந்துள்ளது. ஒவ்வொரு இணையதளமும் நான் நீ என்று போட்டி போட்டுக் குறைந்த விலையில் இதை விற்பனை செய்து வருகிறது. அமேசான் காடுகளிலிருந்து வேட்டையாடிய சுத்தமான காற்று என்று விளம்பரம் செய்து வருகிறார்கள்.

இதில் சுவாரஸ்யம் என்னவென்றால் நிஜமாகவே காற்றை வேட்டையாடும் வேட்டைக்காரர்கள் இருக்கிறார்கள். அவர்களை "ஆக்சிஜன் வேட்டையர்கள்" என்று அழைக்கின்றனர். சீனாவில் ‘வ்ரூம்ம்ம்’ என பிக்அப் ஆகிவரும் தொழில்களில் இதுவும் ஒன்று. இதற்காக உலகளவில் பெரிய சந்தை உருவாகிக்கொண்டிருக்கிறது என்றும் அதுவே வருங்காலத்தின் முக்கியத் தேவையாக இருக்கக்கூடும் என்றும் இயற்கை ஆர்வலர்கள் குறிப்பிடுகிறார்கள்.

இந்த கேனை எப்படிப் பயன்படுத்த வேண்டும் என்று விளக்க வீடியோவே விளம்பரமாக யூ-டியூபில் காணக் கிடைக்கிறது.

சென்னை, பெங்களூர், மும்பை, டெல்லி ஆகிய பெருநகரங்களில் அதிகம் பயன்படுத்தப்படுவதாகத் தெரிகிறது. சுத்தமான காற்று, தெளிவான தண்ணீர், நிம்மதியான சுற்றுச்சூழல் இதைத் தேடித்தான் மனிதன் ஓடிக்கொண்டிருக்கிறான். ஆனால், அது கார்ப்பரேட் கைகளில் போகும்போது வியாபாரமாக மாறுகிறது. மாதம் ஓரிரு நாள்கள் ஆபீஸுக்கு லீவு எடுத்துக்கொண்டு நம் சொந்த ஊருக்கு விசிட் அடித்தால்போதும்; சுற்றமும் நட்பும் ஆக்சிஜனும் நிலைக்கும்.


டிரெண்டிங் @ விகடன்